Sapta 10

Ol i Go Long Jerusalem

NAU em i mun Mas o Epril na em i taim bilong Josep wantaim meri pikinini na ol wantok na wanblut ol i mas go long Jerusalem bilong lukim Bikpela De Bilong Tingim De God I Larim Ol Israel I Stap Gut, em Pasova. Ol i save go long olgeta yia, em longwe inap olsem 100 kilomita. Ol i redi long i go na ol i amamas. Long dispela taim Jisas i gat 12-pela krismas na em i tingim moa yet dispela bung.

Ol i no i go bilong i stap wanpela de tasol. Taim ol i lukim pinis de Pasova, ol i save stap inap 7-pela de moa bilong lukim Ol Bikpela De Bilong Bret I No Gat Yis. Ol i save tingim ol dispela bikpela de tu i hap bilong bikpela bung bilong Pasova. Olsem na ol i mas lusim inap olsem tupela wik bilong wokabaut i go long Jerusalem na lukim ol dispela bikpela de bilong lotu na wokabaut i go bek gen long ples. Tasol long dispela taim Jisas i mekim wanpela samting na ol i lusim sampela de moa long Jerusalem, winim tupela wik.

Ol i lusim Jerusalem na Josep tupela Maria i ting Jisas i wokabaut wantaim ol narapela manmeri, em ol wanlain na ol pren bilong ol. Tasol nogat. Ol i wokabaut wanpela de olgeta na long nait, taim ol i laik slip, ol i no lukim Jisas. Olsem na tupela i wok long painim em namel long ol manmeri i wokabaut wantaim ol. Tasol em i no i stap. Olsem na tupela i go bek long Jerusalem.

Inap wanpela de olgeta ol i wok long painim em, tasol nogat. Long namba 2 de tu, nogat. Tasol long namba 3 de ol i go long tempel, na long wanpela hap bilong tempel ol i lukim Jisas i sindaun i stap namel long ol tisa bilong lotu Juda. Em i wok long harim tok bilong ol na givim askim long ol tu.

Maria i tok: “Pikinini, bilong wanem yu mekim dispela pasin long mitupela? Bel bilong mitupela papa bilong yu i hevi tumas na mitupela i wok long painim yu.”

Jisas i kirap nogut, long wanem em i ting ol i mas save em i stap we. Em i tok: “Bilong wanem yutupela i wok long painim mi? Ating yutupela i no save, mi mas i stap long haus bilong Papa?”

Em i ting papamama i mas save long dispela. Tasol em i go bek wantaim tupela long Nasaret na oltaim em i bihainim tok bilong tupela. Em i wok long kamap bikpela, na save bilong em i kamap gutpela tru. Na God na ol man i laikim em tumas. Tru tumas, kirap long taim Jisas i liklik yet, em i makim gutpela pasin yumi ken bihainim. Em i tingim gut ol samting bilong God na em i daun long papamama bilong em. Luk 2:​40-52; 22:7.

▪ Long olgeta yia, long mun Mas o Epril, Jisas i save go we wantaim lain bilong em? Ol i save lusim hamas de bilong i go na i kam bek?

▪ Taim Jisas i gat 12-pela krismas na ol i go long Jerusalem, wanem samting i kamap?

▪ Jisas i makim wanem gutpela pasin ol yangpela i ken bihainim long nau?