Sapta 104

Ol i Harim Maus Bilong God Namba Tri Taim

JISAS i stap long tempel na bel bilong em i hevi long i dai i laik painim em, nogut dispela i bagarapim nem bilong Papa. Olsem na em i beten na i tok: “Papa, yu ken mekim nem bilong yu i kamap bikpela.”

Em i tok pinis na strongpela maus long heven i tok: “Mi mekim nem bilong mi i kamap bikpela pinis, na bai mi mekim olsem gen.”

Ol manmeri i sanap klostu ol i tingting planti. Sampela i tok, “Wanpela ensel i toktok long em.” Na sampela i tok, “Klaut i pairap.” Tasol ol i harim maus bilong God Jehova yet! I no namba wan taim God i bin toktok olsem long Jisas.

Inap 3-pela yia hap bipo, taim Jisas i baptais, Jon Bilong Baptais i bin harim God Jehova i toktok long Jisas olsem: “Dispela em i Pikinini bilong mi. Mi laikim em tumas.” Na taim Jems na Jon na Pita i lukim skin bilong Jisas i kamap narapela kain, ol i harim God i tok long Jisas olsem: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.” Na nau long namba 3 taim, olsem long Nisan 10, em 4-pela de paslain long taim Jisas i dai, ol man i harim gen maus bilong God Jehova. Tasol long dispela taim, bikpela lain tru ol i harim!

Jisas i tokim ol: “Dispela tok nau yupela i harim, em i no bilong helpim mi. Nogat. Em i bilong helpim yupela.” Dispela tok i helpim ol long save, tru Jisas em i Pikinini bilong God na em i Man bilong kisim bek ol. Jisas i stori moa olsem: “Nau bai God i skelim pasin bilong ol manmeri bilong dispela graun. Nau bai em i rausim dispela hetman i save bosim dispela graun.” Jisas i stap gut long God inap long em i dai, na dispela i kamapim klia olsem i stret God i mas “rausim” o pinisim hetman bilong dispela graun, em Satan.

Nau Jisas i stori long ol samting bai kamap long rot bilong i dai bilong em. Em i tok: “Nau mi stap long graun, tasol bihain bai ol i litimapim mi, na long dispela taim bai mi pulim [ol] manmeri i kam long mi.” I dai i no ken daunim em, long wanem, long dispela rot bai em i helpim ol manmeri long kisim laip i stap oltaim.

Tasol ol manmeri i tok: “Mipela i harim tok olsem long lo bilong God, taim dispela man God i makim . . . em i kamap, orait em bai i stap oltaim oltaim. Orait olsem wanem na yu tok, ‘Ol i mas litimapim Pikinini Bilong Man’? Dispela Pikinini Bilong Man em i husat tru?”

I gat planti samting i kamapim klia olsem Jisas yet em i dispela Pikinini Bilong Man na em i Man bilong kisim bek ol, na ol i bin harim maus bilong God yet i tokaut olsem, tasol planti ol i no bilip. Tasol maski, nau Jisas i mekim wankain tok olsem em i bin mekim inap 6-pela mun bipo, na em i tok em yet em i “lait.” Em i laik strongim ol na em i tok: “Nau lait i stap yet wantaim yupela, olsem na yupela i mas bilip long lait, na bai yupela i kamap pikinini bilong lait.” Em i mekim pinis ol dispela tok na em i go hait, long wanem ol man i laik kilim em i dai.

Ol Juda i no bilip long Jisas na dispela i truim tok bilong Aisaia, em i tok, ‘Ai bilong ol i no inap lukluk na tingting bilong ol i pas, olsem na ol i no tanim bel na bai God i ken mekim ol i kamap orait gen.’ Aisaia i bin lukim samting olsem driman na em i lukim lain bilong Jehova long heven, em Jisas tu i stap long bikpela lait wantaim God Jehova taim Jisas i no kamap man yet. I gat ol dispela samting, tasol olsem Aisaia i tok pinis, ol Juda i no bilip long Jisas, em dispela Man bilong kisim bek ol.

Tasol planti hetman bilong lain Juda (na sampela bilong Kaunsil tu) ol i bilip long Jisas. Wanpela hetman olsem em Nikodemus, na narapela em Josep bilong Arimatea. Tasol long dispela taim ol dispela hetman i no laik tokaut olsem ol i bilip long Jisas. Ol i pret, nogut ol man i rausim ol long bikpela wok bilong ol long haus lotu. Sori tru! Ol i lus long planti gutpela samting!

Jisas i tok: “Man i bilip long mi, em i no bilip long mi tasol. Em i bilip long Papa, em i bin salim mi na mi kam. . . . man i harim tok bilong mi na em i no bihainim, orait bai mi no skelim em olsem jas. Mi no kam bilong mi stap jas bilong ol manmeri bilong graun. Nogat. Mi kam bilong kisim bek ol. . . . Tok mi bin autim, em bai i stap jas bilong dispela man long las de.”

God Jehova i laikim tumas ol man na dispela i kirapim em long salim Jisas i kam bambai ol man i ken bilip long em na God i ken kisim bek ol. Tasol ol i mas bihainim ol tok God i tokim Jisas long autim bambai God i ken kisim bek ol. God bai tingim dispela samting na skelim ol. Em bai skelim ol long “las de,” olsem long taim bilong 1,000 yia bilong Krais i bosim graun.

Na nau Jisas i tok: “Papa i bin salim mi na mi kam, em yet i tokim mi long olgeta tok mi mas mekim na autim. Na mi save, tok bilong Papa em i save kamapim laip i stap gut oltaim oltaim. Olsem na olgeta tok mi mekim, em mi save mekim olsem Papa i bin tokim mi.” Jon 12:​28-50; 19:​38, 39; Matyu 3:17; 17:5; Aisaia 6:​1, 8-10.

▪ I gat wanem 3-pela taim ol man i bin harim maus bilong God i toktok long Jisas?

▪ Olsem wanem profet Aisaia i bin lukim bikpela lait bilong Jisas?

▪ Husat sampela hetman i bin bilip long Jisas? Bilong wanem ol i no tokaut long ol man olsem ol i bilip long em?

▪ “Las de” em wanem taim? Na long dispela taim God bai tingim wanem samting na em i skelim ol man?