Sapta 31

Ol i Kisim Wit Long De Sabat

BIHAIN liklik Jisas wantaim ol disaipel bilong em i lusim Jerusalem na i go bek long Galili. Em mun Epril samting na wit i redi pinis long ol gaden. Long wanpela de Sabat ol i wokabaut namel long gaden wit na ol disaipel i hangre, na ol i kisim pikinini bilong wit na ol i kaikai. Ol Farisi i lukim dispela samting.

Ol hetman bilong lotu long Jerusalem i bin painim rot bilong kilim i dai Jisas, long wanem ol i tok em i brukim lo bilong Sabat. Na nau ol Farisi i sutim tok long Jisas na ol i tok: “Lukim, dispela pasin ol disaipel bilong yu i mekim, em i tambu long mekim long de Sabat.”

Ol disaipel i bin kisim pikinini bilong wit na rapim long han bilong klinim na kaikai, tasol ol Farisi i tok dispela i olsem ol i bungim wit long gaden na klinim. Ol i putim lo bilong ol yet bilong makim wanem kain wok i tambu long mekim long de Sabat, na dispela i putim hevi long ol man. Tasol Jehova i laik bai de Sabat em i de bilong amamas na bilong strongim man long spirit. Olsem na Jisas i kolim sampela stori bilong Baibel na bai yumi ken save, taim Jehova i bin kamapim lo bilong Sabat em i no tingting long putim strongpela lo olsem i givim hevi long ol man.

Jisas i tok, taim Devit wantaim lain bilong em ol i hangre, ol i go long haus bilong God na kaikai bret tambu ol i givim long God. Tru dispela bret ol i kaikai em i olpela na ol pris i rausim pinis na putim nupela i stap, tasol dispela bret i tambu na ol pris tasol i save kaikai. Tasol long dispela taim God i no kros long Devit wantaim lain bilong em.

Na Jisas i stori moa olsem: “Ating yupela i no bin ritim tu dispela tok i stap long buk bilong lo, em i tok long ol pris i save mekim wok long tempel ol i mas mekim wok long de Sabat? Ol i save kalapim lo bilong de Sabat, tasol ol i no gat asua.” Tru tumas, long de Sabat tu ol pris i save kilim i dai ol animal na mekim ol narapela wok long tempel bilong redim ol ofa. Jisas i tok: “Orait mi tokim yupela, samting i stap hia, em i winim tempel.”

Jisas i tok strong long ol Farisi, olsem: “Sapos yupela i bin save gut long as bilong dispela tok i stap long buk bilong God, ‘Mi no laikim ol ofa nating yupela i save mekim. Mi laikim tumas bai yupela i mekim gutpela pasin long ol arapela,’ orait bai yupela i no inap putim hevi long ol man i no gat asua.” Na bihain em i tok: “Pikinini Bilong Man em i bosim de Sabat.” Wanem insait bilong dispela tok bilong Jisas? Jisas i tingim taim em bai i stap king long Kingdom na bosim graun inap 1,000 yia na bai gutaim i stap.

Inap 6,000 yia ol man i bin wok kalabus aninit long Satan na pait i pulap long graun. Tasol taim Krais i bosim graun long bikpela de Sabat bilong 1,000 yia, bai i gat malolo; bai ol man i no karim moa pen na hevi. Matyu 12:​1-8; Wok Pris 24:​5-9; 1 Samuel 21:​1-6; Namba 28:9; Hosea 6:6.

▪ Ol Farisi i sutim wanem tok long ol disaipel bilong Jisas? Na Jisas i bekim wanem tok long ol?

▪ Ol Farisi i popaia olsem wanem na Jisas i kamapim dispela?

▪ Olsem wanem Jisas “em i bosim de Sabat”?