Sapta 94

Ol i Mas Beten na Mekim Pasin Daun

BIPO liklik, taim Jisas i stap long Judia, em i bin mekim wanpela tok piksa bambai ol disaipel i ken save, ol i mas beten oltaim. Orait, nau em i laik mekim laspela raun bilong em i go long Jerusalem na em i tok strong gen long ol i no ken les long beten. Ating em i stap yet long Samaria o Galili na em i givim narapela tok piksa long ol disaipel, olsem:

“Long wanpela taun, wanpela jas i stap. Dispela jas i no save pret long God, na em i no save tingting tumas long ol man tu. Na wanpela meri, man bilong en i dai pinis, em i stap long dispela taun. Oltaim em i save kam long dispela jas na i tokim em, ‘Birua bilong mi em i laik bagarapim mi. Yu mas helpim mi long kot.’ Pastaim dispela jas i no laik helpim em. Tasol bihain em i ting olsem, ‘Mi no pret long God, na mi no tingting tumas long ol man. Tasol dispela meri, . . . oltaim em i save givim hevi long mi. Ating mobeta mi mas helpim em long kot. Nogut em i wok long kam oltaim oltaim, na bihain mi les olgeta long harim toktok bilong en.’ ”

Orait nau Jisas i kamapim insait bilong dispela stori na em i tok: “Yupela i harim dispela tok bilong dispela jas nogut. Orait olsem wanem? Ol manmeri God i bin makim bilong em yet, na ol i wok long krai long em long olgeta de . . . ating God bai . . . i no helpim ol kwik, a? Nogat tru. . . . Em bai i helpim ol kwiktaim.”

Jisas i no laik tok, God Jehova em i wankain olsem dispela jas nogut. Jisas i laik bai yumi save, sapos wanpela jas nogut i kirap helpim wanpela meri i wok long krai krai long em bilong helpim em, orait olsem wanem long God, em i gat stretpela pasin na i save mekim gut long ol man? Yumi ken bilip tru olsem em bai i harim beten bilong lain bilong em sapos ol i no les long beten. Olsem na Jisas i tok: “[God] bai i helpim ol kwiktaim.”

Planti jas i no save mekim stretpela kot​—ol i no helpim ol rabisman na ol man i no gat nem; ol i save helpim ol man i gat bikpela namba na ol maniman. Tasol God bai mekim stretpela kot na givim strafe long ol man nogut na helpim ol wokboi bilong em​—em bai givim laip oltaim long ol. Tasol i no planti man i bilip tru olsem God bai i helpim kwik ol man i krai long em bilong helpim ol.

Nau Jisas i stori long bilip, em i bikpela samting long beten bilong man. Jisas i askim olsem: “Taim Pikinini Bilong Man i kam, em bai i lukim ol manmeri i . . . bilip, o nogat?” Em i no bekim dispela askim, tasol ating em i laik tok olsem taim em i kamap king long Kingdom, i no planti man bai i gat dispela kain bilip.

Sampela man i harim dispela askim ol i ting ol i gat strongpela bilip na ol yet i stretpela man, na ol narapela man nogat. Ating sampela disaipel tu i gat dispela tingting. Olsem na Jisas i mekim wanpela tok piksa i sutim ol dispela man. Em i tok:

“Tupela man i laik mekim [beten], na tupela i go long tempel. Narapela em i Farisi. Na narapela em i man bilong kisim takis. Dispela Farisi em i . . . [beten] olsem, ‘God, mi no olsem ol arapela man, olsem na mi tenkyu long yu. Ol i save stil na mekim pasin i no stret na trabel long ol maritmeri. Tasol mi nogat. Na mi no olsem dispela man bilong kisim takis. Long olgeta wik mi save makim tupela de bilong tambu long kaikai. Na olgeta samting mi kisim, mi save tilim long 10-pela hap na givim wanpela hap long yu.’ ”

Ol Farisi i save mekim ol kain pasin olsem long ai bilong ol man bambai ol man i ting ol i stretpela man. Ol i save tambu long kaikai long olgeta Mande na Fonde, na ol i save tilim ol liklik sayor tu long tenpela hap na givim wanpela hap long God. Sampela mun paslain long dispela, tingting bilong ol Farisi long ol man nating i bin kamap ples klia. Ol i tok: “Ol dispela lain manmeri ol i no save long lo [olsem ol Farisi i save tanim]. God i tok pinis long ol bai i bagarap.”

Jisas i stori moa long wanpela man olsem, na em i tok: “Tasol man bilong kisim takis em i sanap longwe, na em i . . . paitim bros bilong en na i tok, ‘God, mi man bilong mekim sin. Yu ken marimari long mi.’ ” Em i mekim pasin daun na i tokaut olsem em i man bilong mekim sin. Olsem na Jisas i tok: “Em tasol i kamap stretpela man long ai bilong God. Tasol dispela arapela man nogat. Long wanem, olgeta man i litimapim nem bilong ol yet, God bai i daunim ol. Na olgeta man i daunim ol yet, God bai i litimapim nem bilong ol.”

Em nau, Jisas i lainim gen ol disaipel olsem ol i mas mekim pasin daun. Long dispela taim bipo ol Farisi i holim bikpela strong long bosim ol man, na ol Juda i ting namba na biknem i bikpela samting. Olsem na ol disaipel tu i kisim dispela kain tingting. Tasol Jisas i skulim ol gut long mekim pasin daun! Luk 18:​1-14; Jon 7:49.

▪ Bilong wanem jas nogut i kirap helpim meri em man bilong em i dai pinis? Yumi inap kisim wanem save long dispela tok piksa bilong Jisas?

▪ Taim Jisas i kam bek, em bai wok long painim ol man i gat wanem kain bilip?

▪ Jisas i tingim husat na em i mekim tok piksa long wanpela Farisi na wanpela man bilong kisim takis?

▪ Yumi mas abrusim wanem kain tingting bilong ol Farisi?