Sapta 67

Ol i No Holimpas Em

BUNG bilong Ol Bikpela De Bilong I Stap Long Haus Win i no pinis yet na ol bikman bilong lotu i salim sampela plisman i go bilong holimpas Jisas. Jisas i no hait long ol. Em i wok yet long autim tok long ol manmeri. Em i tok: “Liklik taim tasol bai mi stap wantaim yupela, na bai mi go bek long Papa, . . . Na bai yupela i wok long painim mi, tasol bai yupela i no lukim mi. Na yupela i no inap i go long ples mi stap long en.”

Ol Juda i no pilim dispela tok bilong Jisas, olsem na ol i askim namel long ol yet, olsem: “Bai em i go we na yumi no inap lukim em? . . . Em i tok, ‘Bai yupela i wok long painim mi, tasol bai yupela i no lukim mi.’ Na em i tok, ‘Yupela i no inap i go long ples mi stap long en.’ Wanem as bilong dispela tok?” Jisas i stori long em bai dai, na bihain em bai kirap bek na i go long heven, na ol birua bilong em i no inap bihainim em i go long dispela hap.

Laspela de bilong dispela bung i kamap, em namba 7 de. Long olgeta de bilong bung, long moningtaim, wanpela pris i kisim wara long hul wara Siloam na kapsaitim na i ran i go long as bilong alta. Ating Jisas i laik bai ol man i tingim dispela samting, na em i tok: “Sapos wanpela man i dai long wara, orait em i ken i kam long mi na dring. . . . sapos man i bilip long mi, orait planti wara i gat laip bai i kamap long bel bilong en na i ran i go.”

Jisas i stori long ol gutpela samting bai kamap taim God i kapsaitim spirit holi. Dispela samting i kamap long Pentikos long yia bihain. Long dispela taim, ‘Wara i ran i go’ taim ol 120 disaipel i kirap autim tok long ol man. Paslain long dispela taim, God i no bin kapsaitim spirit holi long wanpela disaipel bilong Krais bilong makim em bilong kisim laip long heven.

Sampela i harim dispela tok bilong Jisas, na ol i tok: “Tru tumas, dispela man em i dispela profet God i bin tok long [en] .” Ol i tingim dispela profet i winim Moses, em God i bin tok long salim i kam. Na sampela i tok: “Em i man God i makim bilong kisim bek ol manmeri bilong en.” Tasol sampela i tok: “Nogat. Dispela man God i makim, em bai i no inap kamap long Galili. Nogat. Buk bilong God i tok olsem [em] i mas kamap long lain bilong King Devit, na em bai i kamap long Betlehem, dispela taun bipo Devit i stap long en.”

Olsem na ol manmeri i bruk i go tupela lain. Sampela i laik kalabusim Jisas, tasol i no gat wanpela man i holim em. Taim ol plisman i go bek gen long ol bikman bilong lotu na ol Farisi, ol i askim ol plisman: “Bilong wanem yupela i no bringim em i kam?”

Ol plisman i tok: “Bipo i no gat wanpela man i mekim toktok olsem dispela man i mekim.”

Ol bikman bilong lotu ol i belhat na ol i tok bilas long ol plisman, olsem: “Em i trikim yupela tu, a? Ating long lain bilong mipela ol hetman na ol Farisi, yupela i lukim wanpela man i bilip long em? Nogat tru. Ol lain i bilip long em, em ol dispela lain manmeri i no save long lo. God i tok pinis long ol bai i bagarap.”

Nikodemus em wanpela Farisi na em i wanpela hetman bilong ol Juda (olsem wanpela kaunsil bilong ol). Taim em i harim dispela tok bilong ol bikman bilong lotu, em i mekim sampela tok bilong helpim Jisas. Tupela yia hap bipo, Nikodemus i bin i go long Jisas long nait na i tokim Jisas em i bilip long em. Olsem na nau Nikodemus i tok: “Ating lo bilong yumi em i tok long yumi ken kotim nating wanpela man? Nogat. Yumi mas harim tok bilong en pastaim, na bai yumi ken save gut long samting em i bin mekim.”

Ol Farisi i bel nogut moa yet, long wanem wanpela bilong ol yet i mekim sampela tok bilong helpim Jisas, na ol i tokim Nikodemus: “Ating yu tu yu man bilong Galili, a? Ritim gut ol tok i stap long buk bilong God, na bai yu tu yu ken save olsem, i no gat wanpela profet bai i kamap long Galili.”

Tru, Baibel i no tok wanpela profet bai kamap long Galili, tasol Baibel i makim olsem Krais bai i kam long dispela hap, long wanem Baibel i tok “bikpela lait” bai kamap long hap bilong Galili. Na tu mama i bin karim Jisas long Betlehem, na em i tumbuna pikinini bilong Devit. Ol Farisi i save long ol dispela samting, tasol ating ol yet i as bilong ol tingting kranki ol man i kisim long Jisas. Jon 7:​32-52; Aisaia 9:​1, 2; Matyu 4:​13-17.

▪ Long taim bilong bikpela bung, wanem samting i kamap long olgeta moningtaim? Jisas i tok wanem bilong kirapim ol manmeri long tingim dispela samting?

▪ Bilong wanem ol plisman i no holimpas Jisas? Ol bikman bilong lotu i tok wanem?

▪ Nikodemus em i husat? Em i ting olsem wanem long Jisas? Ol narapela Farisi i tok wanem long Nikodemus?

▪ Wanem samting i makim olsem Jisas bai kamap long hap bilong Galili?