Sapta 81

Ol i Traim Gen Long Kilim i Dai Jisas

EM TAIM bilong kol na Jisas i wokabaut insait long banis bilong haus lotu, long veranda bilong Solomon. Ol Juda i kam askim em: “Yu husat tru? Sapos yu dispela man tasol God i bin makim bilong kisim bek ol manmeri bilong en, orait yu mas tokaut klia long mipela.”

Jisas i tok: “Mi tokim yupela pinis, na yupela i no bilip.” Tru Jisas i no tokaut stret olsem em i dispela Man olsem em i bin tokaut long meri Samaria long hul wara. Tasol em i bin tokim ol, em i bilong ples antap, na em i bin i stap taim Abraham i no kamap yet.

Jisas i laik bai ol man i skelim wok bilong em wantaim ol wok em Baibel i tok dispela Man bai mekim, na nau ol yet inap pilim na ol i ken save, tru em i dispela Man. Olsem na bipo em i bin tokim ol disaipel bilong em, ol i no ken tokaut long ol man olsem em i dispela man God i bin tok promis long en. Na long dispela as tasol, nau em i tokim ol dispela Juda, ‘Olgeta wok mi mekim long nem bilong Papa, dispela i soim yupela olsem mi husat tru. Tasol yupela i no bilip.’

Bilong wanem ol i no bilip? Ating Jisas i no bin mekim sampela samting bambai ol i ken luksave olsem em i dispela man God i bin makim, o olsem wanem? Nogat, i no olsem. Jisas i kolim as stret na ol i no bilip, olsem: “Yupela i no bilong ol lain sipsip bilong mi. Olsem na yupela i no save bilip. Ol sipsip bilong mi i save harim maus bilong mi, na mi . . . givim laip i stap gut oltaim oltaim long ol . . . Papa bilong mi i bin givim ol long mi.”

Orait nau Jisas i mekim wanpela tok bambai ol i ken save em i pas gut tru wantaim Papa. Em i tok: “Mi wantaim Papa mitupela i wanpela tasol.” Yumi save Jisas i no laik tok em wantaim Papa i wanpela bodi tru. Long wanem, taim em i mekim dispela tok em i stap long graun na Papa bilong em i stap antap. Insait bilong dispela tok i olsem: Tupela i gat wanpela laik tasol na i stap wanbel tru.

Ol Juda i harim dispela tok bilong Jisas na ol i belhat, na ol i laik tromoi ston long em bilong kilim em i dai. Tasol Jisas i no pret long ol. Em i tokim ol: “Mi bin soim yupela planti gutpela wok bilong Papa. Yupela i tingting long wanem bilong dispela ol wok na yupela i laik tromoi ston long mi?”

Ol i tok: “Yu laik kisim ples bilong God, na long dispela as mipela i laik tromoi ston long yu. Yu man nating, tasol yu tok olsem yu yet yu God.” Tasol Jisas i no bin tok em i God, olsem na bilong wanem ol Juda i tok olsem?

Ating ol i bin tok olsem, long wanem Jisas i bin tokaut long sampela strong em i holim, na ol i bilip olsem God tasol i holim dispela kain strong. Olsem: Jisas i stori long ol “sipsip” na em i tok, “Mi givim laip i stap gut oltaim oltaim long ol.” I no gat wanpela man bilong graun inap mekim dispela samting. Tasol ol Juda i no laik tingim wanpela tok bilong Jisas, em i tok em i bin kisim dispela strong long Papa bilong em.

Orait nau Jisas i kamapim klia olsem em i no ting em i bikpela olsem God. Em i tokim ol: “Long lo bilong yupela i gat wanpela tok bilong God [long Buk Song 82:6] i stap olsem, ‘Mi tok olsem, “Yupela i god.” ’ Bipo God i bin autim dispela tok long ol man, . . . Tasol mi, Papa yet i bin makim mi, na em i salim mi na mi kam long graun. Olsem na taim mi tok, ‘Mi Pikinini bilong God,’ watpo yupela i tok, ‘Yu laik kisim ples bilong God’?”

Baibel i kolim sampela jas o bikman bilong graun olsem “god,” maski ol i no stretpela man. Olsem na i no gat as na ol Juda i ken painim wanpela rong long tok bilong Jisas, em i tok, “Mi Pikinini Bilong God.” Na Jisas i tok: “Sapos mi no mekim wok bilong Papa bilong mi, orait yupela i no ken bilipim tok bilong mi. Tasol mi mekim wok bilong em. Na sapos yupela i no laik bilipim tok bilong mi, orait yupela i ken bilip long ol wok mi mekim.”

Taim Jisas i tok olsem, nau ol Juda i laik holim em. Tasol em i abrusim ol na i go. Em i lusim Jerusalem na brukim wara Jordan na wokabaut olsem tupela de bilong kamap long dispela hap em Jon i bin baptaisim ol man klostu 4-pela yia i go pinis. Dispela hap i klostu liklik long hap bilong saut bilong raunwara Galili.

Long dispela hap planti manmeri ol i kam long Jisas na ol i tok: “Tru, Jon i no bin wokim wanpela mirakel olsem mak bilong strongim tok bilong en. Tasol olgeta tok Jon i bin mekim long dispela man em i tru tasol.” Olsem na long dispela hap planti man i bilip long Jisas. Jon 10:​22-42; 4:26; 8:​23, 58; Matyu 16:20.

▪ Long wanem rot Jisas i laik bai ol man i ken luksave olsem em i dispela man God i bin makim bilong kisim bek ol manmeri?

▪ Olsem wanem Jisas na Papa bilong em i wanpela tasol?

▪ Bilong wanem ol Juda i tok, Jisas i tok em i God?

▪ Olsem wanem dispela tok Jisas i kamapim long Buk Song i kamapim klia olsem em i no tok em i God?