Sapta 85

Painim Ol Man i Lus

JISAS i wok long painim na helpim ol man i laik mekim wok bilong God. Olsem na em i save toktok wantaim olgeta man long Kingdom, maski ol i man bilong mekim sin.

Olsem na ol Farisi na saveman bilong lo i tok kros long Jisas, olsem: “Dispela man i save pren wantaim ol man bilong mekim sin na em i save kaikai wantaim ol.” Ol yet i no laik mekim olsem! Ol i daunim tru ol dispela man na tingim ol i olsem pipia nating. Ol i kolim ol olsem “ol man nating bilong graun” (‛am ha·’aʹrets).

Tasol Jisas i save sori long olgeta man na mekim gut long ol. Olsem na planti man nating, em sampela ol i man bilong mekim sin, ol i laik harim tok bilong Jisas. Tasol ol Farisi i sutim tok long Jisas na i tok, i no stret em i wok long helpim ol dispela man.

Bilong bekim tok long ol, Jisas i mekim wanpela tok piksa i kamapim tingting bilong ol Farisi, em ol i ting ol yet i stretpela man na ol i stap insait pinis long banis sipsip bilong God, na ol i ting ol dispela man nating (‛am ha·’aʹrets) i olsem ol sipsip i lus pinis na God i no ken kisim bek ol. Jisas i tok piksa olsem:

“Sapos wanpela bilong yupela i gat 100 sipsip, na sapos wanpela sipsip i lus, orait ating em bai i lusim ol 99 sipsip . . . Na em bai i go painim dispela wanpela sipsip inap em i lukim. Taim em i kisim sipsip pinis, . . . em bai i amamas na karim i kam bek long ples. Na . . . em bai i singautim ol pren na wanples bilong en, na . . . tokim ol, ‘Yupela amamas wantaim mi! Wanpela sipsip bilong mi em i lus, na mi painim na kisim bek pinis!’ ”

Jisas i kamapim as bilong dispela tok piksa, olsem: “Wankain amamas i save kamap long heven taim wanpela man bilong mekim sin i tanim bel. Tru, ol i save amamas long 99 man i stretpela pinis na i no gat wok long tanim bel. Tasol sapos wanpela man bilong mekim sin em i tanim bel, orait ol i save amamas moa moa yet.”

Inap olsem tupela yia bipo sampela Farisi i bin sutim tok long Jisas, long wanem, em i kaikai wantaim ol man bilong kisim takis na ol man bilong mekim sin. Orait em i bin tokim ol Farisi: “Mi no kam bilong singautim ol stretpela man. Nogat. Mi kam bilong singautim ol man bilong mekim sin.” Ol Farisi i ting ol i stretpela man​—ol i no pilim olsem ol i gat wok long tanim bel, olsem na God i no amamas long ol. Tasol taim wanpela man bilong mekim sin i tanim bel, bikpela amamas i kamap long heven.

Jisas i mekim narapela tok piksa long bikpela amamas i save kamap taim wanpela man bilong mekim sin i tanim bel. Em i tok: “Sapos wanpela meri em i gat 10-pela wan kina mani, na wanpela i lus long haus, orait bai em i . . . lukluk gut, na i wok i go inap long em i kisim bek mani bilong en. Taim em i kisim mani pinis, orait em bai i singautim ol pren na wanples bilong en, na . . . tokim ol, ‘Yupela amamas wantaim mi! Wanpela mani bilong mi em i lus, tasol nau mi painim na kisim bek pinis!’ ”

Nau Jisas i kamapim as bilong dispela tok piksa na i wankain olsem bilong namba wan tok piksa. Em i tok: “Mi tok stret long yupela, wankain amamas i save kamap namel long ol ensel bilong God taim wanpela man bilong mekim sin em i tanim bel.”

Olaman! Yumi kirap nogut long ol ensel bilong God i laik tumas long ol sinman i mas tanim bel! Bipo ol dispela “man nating bilong graun” i no gat nem na sampela i tingim ol i pipia nating, tasol bai ol inap insait long Kingdom bilong God long heven. Bai ol i kisim bikpela wok na bikpela nem winim bilong ol ensel yet! Tasol ol ensel i no bel nogut long dispela samting. Ol i amamas, long wanem, ol i save ol dispela man i winim pinis ol hevi bilong graun, olsem na bai ol inap mekim gut wok king na wok pris long heven. Bai ol i sori na marimari long ol man. Luk 15:​1-10; Matyu 9:13; 1 Korin 6:​2, 3; Kamapim Tok Hait 20:6.

▪ I gat wanem as na Jisas i save bung wantaim ol man bilong mekim sin? Ol Farisi i mekim wanem tok kros long em?

▪ Ol Farisi i gat wanem tingting long ol man nating?

▪ Jisas i mekim wanem tupela tok piksa? Dispela tupela tok piksa inap lainim yumi long wanem samting?

▪ Olsem wanem na yumi kirap nogut long amamas bilong ol ensel?