Pasin Daun Long Laspela Pasova
Sapta 113
Pasin Daun Long Laspela Pasova
PITA na Jon i bihainim ol tok Jisas i bin givim long ol na tupela i kamap pinis long Jerusalem bilong redim Pasova. Jisas wantaim 10-pela narapela aposel ol i kamap long apinun tru. San i wok long i go daun na Jisas wantaim lain bilong em ol i wokabaut i go daun long maunten Oliv. Em i laspela taim bilong Jisas long sanap long dispela maunten long san na lukim Jerusalem; em i no inap mekim moa inap long taim em i kirap bek pinis long matmat.
Bihain liklik Jisas wantaim ol disaipel i kamap long Jerusalem na ol i go long dispela haus ol bai mekim Pasova long en. Ol i go antap long lata na i go long wanpela bikpela rum i stap antap, na ol i lukim olgeta samting i redi pinis bilong mekim Pasova bilong ol. Jisas i tokim ol: “Mi laikim tumas long kaikai wantaim yupela long dispela [Pasova] . Na bihain bai mi karim pen.”
Pasin bilong ol Juda bipo, taim ol i wokim Pasova ol i mekim wok long 4-pela kap wain. Nau Jisas i kisim wanpela kap, ating em namba 3 kap, na em i tenkyu long God na i tok: “Yupela kisim dispela na tilim namel long yupela. Long wanem, . . . nau na bihain tu mi no ken dring wain moa, inap long taim kingdom bilong God i kamap.”
Ol i kaikai i stap na Jisas i kirap sanap na em i lusim longpela klos bilong em na em i kisim wanpela taul. Em i kapsaitim wara long wanpela dis na em i kirap long wasim lek bilong ol disaipel. Em wok bilong man bilong haus long wasim lek bilong ol man i kam long haus, tasol em i no i stap, olsem na Jisas yet i mekim. Wanpela disaipel inap mekim, tasol nogat. Ating i gat dispela tok pait yet namel long ol, olsem husat i stap namba wan. Tasol taim Jisas i kirap long wasim lek bilong ol, ol i sem.
Orait, Jisas i kam long Pita, tasol Pita i laik pasim em na em i tok: “Yu no ken wasim lek bilong mi. I no ken tru.”
Tasol Jisas i tok: “Sapos mi no wasim yu, orait yu no inap i stap wantaim mi.”
Pita i tok: “Bikpela, sapos olsem, orait yu no ken wasim lek bilong mi tasol. Yu mas wasim han na het tu wantaim.”
Jisas i tokim em, “Man i waswas pinis em i no [gat wok long] waswas gen. Em i mas wasim lek tasol, na em bai i klin olgeta. Na yupela i stap klin pinis. Tasol mi no tok long yupela olgeta.” Jisas i save pinis olsem Judas i laik kamapim em long ol birua.
Taim Jisas i wasim pinis lek bilong 12-pela olgeta, em Judas i wanpela bilong ol, em i putim longpela klos bilong em na em i sindaun gen. Orait nau em i askim ol: “Ating yupela i save long as bilong dispela samting mi mekim long yupela? Yupela i save kolim mi Tisa na Bikpela. Na i gutpela yupela i tok olsem. Mi Tisa na mi Bikpela bilong yupela . . . na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi. Mi soim pasin long yupela, na yupela tu i mas mekim wankain pasin olsem nau mi mekim long yupela. Tru tumas mi tokim yupela, wokboi i no winim bikman bilong en. . . . Nau yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.”
Em gutpela pasin tru Jisas i mekim bilong lainim ol long mekim pasin daun! Ol aposel i no ken tingting long i stap namba wan na ol narapela i mas mekim wok bilong ol, olsem wokboi bilong ol. Ol i mas bihainim pasin bilong Jisas. I no olsem ol i mas mekim wanpela pasin bilong lotu na wasim lek bilong narapela; nogat. Ol i mas i gat laik long i stap daun na mekim wok bilong helpim narapela, maski em i husat o dispela wok i no gat nem liklik o ol man i no save amamas long mekim. Matyu 26:20, 21; Mak 14:17, 18; Luk 22:14-18; 7:44; Jon 13:1-17.
▪ Taim Jisas i laik kamap long Jerusalem bilong mekim Pasova, olsem wanem long dispela taim bilong em long lukim Jerusalem?
▪ Taim ol i mekim Pasova, ating Jisas i kisim wanem kap na em i tenkyu long God na givim long 12-pela aposel?
▪ Long taim bilong Jisas, taim ol man i kam long wanpela haus, man bilong haus i save mekim wanem long ol? Orait taim Jisas wantaim ol aposel i mekim Pasova, bilong wanem man bilong haus i no mekim olsem long ol?
▪ I gat wanem as na Jisas i mekim dispela wok bilong wasim lek bilong ol aposel?