Sapta 6

Pikinini Bilong Promis

JOSEP tupela Maria i no go bek long Nasaret; tupela i stap long Betlehem. Maria i karim pinis Jisas na 8-pela de bihain ol i katim skin bilong em olsem Lo bilong Moses i tok. Na ating em i pasin bilong ol Juda long givim nem long pikinini man long namba 8 de, olsem na ol i kolim nem bilong pikinini Jisas, olsem ensel Gebriel i bin tokim ol long mekim.

Sampela wik i go pinis na nau Jisas i gat 40 de. Orait, papamama i kisim em i go we? Ol i kisim em i go long tempel long Jerusalem, em klostu liklik long ples ol i stap long en. Lo God i givim long Moses i tok, taim pikinini man i gat 40 de, mama i mas givim ofa bilong mekim em yet i kamap klin.

Orait Maria i mekim olsem. Lo bilong Moses i tok mama i mas givim wanpela pikinini sipsip man olsem ofa, tasol sapos em i no gat sipsip, em i ken givim tupela namba wan balus o tupela namba 2 balus olsem ofa. Josep tupela Maria i no gat planti mani, olsem na Maria i kisim tupela liklik pisin i go bilong mekim ofa.

Insait long tempel, wanpela lapun man, nem bilong em Simeon, em i holim liklik pikinini Jisas. Spirit holi i tokim em pinis, bai em i no i dai kwik. Nogat. Pastaim em i mas lukim dispela Man em Jehova i tok promis long salim em i kam bilong kisim bek ol. Orait, taim Simeon i go insait long tempel long dispela de, spirit holi i stiaim em i go long dispela pikinini bilong Josep tupela Maria.

Simeon i holim pikinini na em i tenkyu long God na i tok: “Bikpela, . . . nau yu ken larim mi i go, na bel bilong mi i ken i stap isi, olsem bipo yu tok. Ai bilong mi i lukim pinis samting yu mekim bilong kisim bek mipela. . . . Em i wanpela lait, na em bai i givim lait long . . . ol arapela lain, na em bai i givim biknem long ol Israel.”

Josep tupela Maria i tingting planti taim ol i harim dispela tok. Bihain Simeon i givim blesing long ol na em i tokim Maria olsem, “God i makim dispela pikinini bilong mekim planti Israel i pundaun, na bilong mekim planti i kirap gen,” na em i tok, bikpela bel hevi olsem wanpela bainat bai i sutim lewa bilong Maria.

Wanpela profet meri i stap, nem bilong em Ana, na nau em i gat 84 krismas bilong em. Em i no save lusim tempel. Long dispela taim em tu i kam klostu na em i tenkyu long God na em i kamapim stori bilong dispela pikinini long olgeta man i laik harim.

Olgeta dispela samting i kamap long tempel i mekim Josep tupela Maria i amamas! Nau tupela i save tru, dispela pikinini em dispela man God i tok promis long salim em i kam. Luk 2:​21-38; Wok Pris 12:​1-8.

▪ Wanem taim ol Israel i save givim nem long pikinini man?

▪ Taim mama i karim pinis pikinini man, orait 40 de bihain em i mas mekim wanem? Na olsem wanem ofa bilong Maria i soim yumi Maria i no gat planti mani?

▪ Long dispela taim, husat ol i luksave long Jisas olsem em i dispela man God i bin tok promis long salim em i kam? Ol i tok wanem na dispela i kamapim klia olsem ol i save Jisas em i dispela Man?