Sapta 9

Taim Jisas i Liklik Yet

JISAS i go bikpela long taun Nasaret. Long dispela taim bipo Nasaret em i wanpela liklik taun i no gat nem, na i stap long hap bilong Galili klostu long gutpela ples daun bilong Jesril.

Taim Jisas i gat olsem tupela krismas, Josep tupela Maria i lusim Isip na bringim em i go long Nasaret. Long dispela taim ol i gat wanpela pikinini tasol, em Jisas. Tasol i no longtaim na tupela i kamapim sampela pikinini moa, em Jems na Josep na Saimon na Judas, na tupela i gat sampela pikinini meri tu. Olsem na Jisas i gat planti brata susa, olsem 6-pela samting.

Jisas i gat ol sampela narapela wanblut tu, olsem Jon Bilong Baptais, em kasen brata bilong em. Jon i stap long hap bilong Judia, longwe long Jisas. Tasol Salome, em sista bilong Maria, em i stap klostu, olsem long hap bilong Galili. Salome em i meri bilong Sebedi, olsem na tupela pikinini man bilong ol, em Jems na Jon, tupela i kasen brata bilong Jisas. Taim ol i wok long i go bikpela, ol i poroman wantaim Jisas o nogat, em yumi no save, tasol bihain ol i kamap gutpela poroman tru bilong em.

Josep i mas wok strong bambai em inap lukautim meri pikinini. Em i save mekim wok kamda. Em i lukautim Jisas olsem pikinini tru bilong em, olsem na ol i kolim Jisas olsem ‘pikinini bilong kamda.’ Josep i lainim Jisas long mekim wok kamda, na Jisas i lain gut long mekim, olsem na bihain ol manmeri i stori long Jisas na ol i tok, “Dispela man em i wanpela kamda.”

Josep na meri pikinini bilong em ol i tingim tru lotu bilong God Jehova. Josep tupela Maria i bihainim lo bilong God na skulim gut ol pikinini long ol tok bilong God ‘long taim ol i sindaun long haus o wokabaut long rot, na long taim ol i laik slip o ol i kirap.’ Wanpela haus lotu bilong ol Juda i stap long Nasaret, na oltaim Josep i save kisim famili bilong em i go lotu long Jehova long dispela haus lotu. Tasol ating ol i save amamas tru long i go long bikpela haus lotu bilong Jehova long Jerusalem. Matyu 13:​55, 56; 27:56; Mak 15:40; 6:3; Lo 6:​6-9.

▪ Jisas i gat hamas brata na susa? Kolim nem bilong sampela.

▪ Kolim nem bilong sampela kasen brata bilong Jisas em yumi save long ol.

▪ Jisas i mekim wanem wok bilong skin? Bilong wanem em i mekim dispela wok?

▪ Josep i skulim gut ol pikinini long wanem bikpela samting?