Sapta 115

Tok Pait i Kamap

LONG dispela apinun Jisas i bin wasim lek bilong ol aposel bilong lainim ol long mekim pasin daun. Bihain em i kirapim wanpela bung bilong tingim i dai bilong em, olsem Kaikai Bilong Bikpela. Orait nau wanpela tok pait i kamap namel long ol long husat i stap namba wan. Yumi kirap nogut long dispela, long wanem, long dispela apinun yet Jisas i bin lainim ol long mekim pasin daun. Bipo tu ol i bin tok pait olsem.

Long taim Jisas i stap long maunten na em i kamap narapela kain, ol aposel i tok pait long husat i stap namba wan namel long ol. Na Jems wantaim Jon i bin tokim Jisas, ol i laik sindaun klostu long em long Kingdom, na ol narapela aposel i kros long dispela. Orait nau em i laspela nait bilong Jisas long i stap wantaim ol, na ol i kirap na tok pait gen! Ating Jisas i bel hevi tru. Em i mekim wanem?

Em i no krosim ol. Em i tok isi long ol, olsem: “Ol king bilong ol arapela lain manmeri ol i gat namba na ol i bosim ol, . . . Tasol yupela i no ken mekim olsem. . . . Tingim. Husat em i namba wan? Ating man i sindaun kaikai o wokman i sutim kaikai na bringim i kam long en? Namba wan, em dispela man i sindaun kaikai, em tasol.” Ol i mas bihainim pasin bilong Jisas, em i tok: “Tasol mi stap namel long yupela olsem wokman bilong helpim yupela.”

Tru ol aposel i no gutpela olgeta na ol i save popaia, tasol taim ol hevi i bin painim Jisas ol i no lusim em​—ol i stap gut long em. Olsem na em i tok: “Papa bilong mi em i givim kingdom long mi, olsem tasol mi givim kingdom long yupela.” Dispela tok promis Jisas i givim long ol gutpela disaipel i makim stret olsem ol bai stap king wantaim em long kingdom bilong em. I gat 144,000 tasol ol i insait long dispela tok promis bilong givim Kingdom long ol.

Em gutpela samting tru Jisas i tok long givim long ol​—ol inap i stap king wantaim em long Kingdom. Tasol long dispela taim bilip bilong ol i no strong. Jisas i tok: “Long dispela nait . . . bilip bilong yupela olgeta bai i pundaun.” Tasol Jisas i tokim Pita, em i beten pinis bilong helpim Pita, na nau Jisas i tokim em: “Taim yu . . . kam bek, orait yu mas strongim ol brata bilong yu.”

Na Jisas i tokim ol aposel: “Ol pikinini, liklik taim tasol bai mi stap wantaim yupela. Na bai yupela i wok long painim mi. . . . yupela i no inap i go long ples mi go long en. Na nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”

Pita i askim Jisas: “Bikpela, yu bai go we?”

Jisas i tok: “Ples mi go long en, em nau yu no inap bihainim mi na yu go long en. Tasol bihain bai yu bihainim mi i kam.”

Orait Pita i tok: “Olsem wanem na mi no inap bihainim yu nau? Bai mi inap lusim laip bilong mi bilong helpim yu.”

Jisas i bekim tok olsem: “Mi tok tru long yu, nau long dispela nait, taim kakaruk i no krai tupela taim yet, yu bai tok tripela taim olsem yu no save long mi.”

Tasol Pita i tok: “Maski sapos mi mas i dai wantaim yu, mi no inap tok olsem mi no save long yu. Nogat tru.” Olgeta aposel i mekim wankain tok, na Pita i tok: “Maski sapos ol arapela i lukim samting i kamap long yu na bilip bilong olgeta i pundaun na ol i lusim yu, mi bai i no inap lusim yu.”

Jisas i stori long taim em i bin salim ol i go autim tok long Galili bipo na ol i no karim paus mani o kaikai samting. Em i askim ol: “Long dispela taim yupela i sot long wanpela samting, o nogat?”

Ol i tok, “Nogat.”

Orait em i tok: “Tasol nau man i gat paus mani, em i mas kisim. Na tu, man i gat hanbek [bilong karim kaikai] em i mas kisim. Na man i no gat bainat, em i mas . . . baim wanpela bainat. Long wanem, buk bilong God i gat tok olsem, ‘Ol manmeri i bin lukim em olsem wanpela man nogut.’ . . . Long wanem, olgeta samting buk bilong God i tok bai i kamap long mi, em i mas kamap.”

Jisas i toktok long taim ol bai nilim em long pos wantaim ol man nogut. Na tok bilong em i makim tu olsem: Kirap long dispela taim, ol man bai mekim nogut tru long ol disaipel bilong em. Orait nau ol disaipel i tok: “Mipela i gat tupela bainat i stap hia.”

Jisas i bekim tok olsem: “Em inap.” I gutpela ol disaipel i holim bainat long dispela taim, long wanem, dispela bai givim rot long Jisas long skulim ol long wanpela bikpela samting long dispela nait stret. Bihain bai yumi stori long dispela. Matyu 26:​31-35; Mak 14:​27-31; Luk 22:​24-38; Jon 13:​31-38; Kamapim Tok Hait 14:​1-3.

▪ Bilong wanem yumi kirap nogut long samting ol aposel i tok pait long en?

▪ Jisas i mekim wanem bilong mekim dai dispela tok pait?

▪ Wanem samting bai kamap long rot bilong dispela tok promis o kontrak Jisas i mekim wantaim ol disaipel?

▪ Jisas i givim wanem nupela lo long ol? Em i bikpela samting tru o olsem wanem?

▪ Pita i ting em i sanap strong, olsem na em i tok wanem? Jisas i bekim wanem tok long em?

▪ I gat wanem as na dispela tok nau Jisas i givim long ol long karim paus mani na hanbek i narapela kain long tok em i bin givim long ol bipo?