Sapta 100

Tok Piksa Bilong Ol Wokboi i Kisim Mani

ATING Jisas i stap yet long haus bilong Sakias. Ol disaipel i ting, taim em i kamap long Jerusalem em bai tokaut olsem em yet em dispela Man i mas i kam, na em bai kamapim Kingdom bilong em long dispela taim. Jisas i laik bai ol i ken save, Kingdom i stap longwe yet, olsem na em i mekim wanpela tok piksa, olsem:

“Wanpela bikman i laik i go long wanpela longwe ples, bai ol i ken makim em i kamap king. Na bihain bai em i kam bek long as ples na bosim ol lain bilong en.” Dispela “bikman” em Jisas, na dispela “longwe ples” em heven. Taim Jisas i kamap long dispela ples, Papa bilong em bai givim namba long em long mekim wok king.

Orait taim bikman i laik i go, em i singautim 10-pela wokboi na em i tilim 20 kina 20 kina long olgeta wan wan, na em i tokim ol: “Yupela kisim dispela mani na wok bisnis long en, inap long taim mi kam bek.” Long namba wan truim bilong dispela tok piksa, 10-pela wokboi i makim ol disaipel bilong pastaim. Tasol long bikpela truim bilong en, ol dispela wokboi i makim olgeta manmeri ol i bilong kamap king wantaim Jisas long Kingdom.

Dispela 20 kina em bikpela mani long dispela taim bipo. Ol wokboi i wok long gaden ol i mas wok inap 3-pela mun samting bilong kisim pe olsem. Tasol dispela mani i makim wanem samting? Na ol wokboi i mas mekim wanem kain wok bisnis long dispela mani?

Ol disaipel em God i bin makim long spirit holi ol i kisim dispela mani. Mani i makim ol samting ol i holim bilong mekim wok long en na kisim sampela manmeri moa bilong Kingdom. Ol i mas mekim wok long en i go inap long taim Jisas i kamap King long Kingdom. Taim em i kirap bek pinis na em i kamap long ol disaipel, em i givim ol dispela samting long ol bambai ol i ken kamapim sampela disaipel moa bilong lain bilong Kingdom bilong heven.

Na Jisas i tok, ‘Tasol ol wanples i bel nogut tru long bikman, na ol i salim tok i go long ples bikman i bin i go long en, olsem: “Mipela i no laik bai dispela man i kamap king bilong mipela.” ’ Ol dispela wanples em ol Juda, tasol i no ol disaipel. Taim Jisas i go pinis long heven, ol Juda i kirap mekim nogut long ol disaipel, na dispela i kamapim tingting bilong ol, ol i no laik bai Jisas i kamap king bilong ol. Ol i bihainim pasin bilong ol wanples bilong bikman long dispela tok piksa.

Orait, dispela 10-pela wokboi i mekim wanem wok long dispela mani ol i kisim? Jisas i tok: “ [Bikman] i kamap king, na bihain em i kam bek. . . . orait em i tok olsem, ‘Singautim ol dispela wokboi bipo mi bin givim mani long ol. Mi laik save hamas winmani olgeta wan wan man i bin kisim.’ Orait wanpela man i kam paslain, na em i tok, ‘Bikman, mi wok bisnis long dispela 20 kina bilong yu na mi kisim 200 kina profit long en.’ Na king i tokim em olsem, ‘Yu gutpela wokboi, . . . olsem na nau mi givim namba long yu bilong bosim 10-pela taun.’ Orait namba tu wokboi . . . i tok, ‘Bikman, mi wok bisnis long 20 kina bilong yu, na nau mi kisim 100 kina profit.’ Na king i tokim em, ‘Mi putim yu bilong bosim 5-pela taun.’ ”

Dispela wokboi i kisim 200 kina profit em i makim wanpela lain disaipel, kirap long de Pentikos bilong yia 33 na i kam inap long nau, na ol aposel tu i insait long dispela lain. Wokboi i bin kisim 100 kina profit em tu i makim wanpela lain long dispela hap taim. Ol i mekim wok bilong kamapim sampela samting moa bilong king bilong ol long graun. Tupela lain wantaim i wok strong long autim tok bilong Kingdom, olsem na planti man i kamap Kristen. Nainpela wokboi i mekim gutpela wok bisnis na ol i kisim winmani.

Orait Jisas i tok: “Narapela wokboi i kam, na em i tok, ‘Bikman, 20 kina bilong yu i stap hia. Mi bin . . . putim i stap, long wanem, mi lukim yu, yu hatpela man. Samting ol arapela man i putim i stap, em yu save kisim. . . . Olsem na mi pret long yu.’ Orait king i tokim dispela wokboi olsem, ‘Yu wokboi nogut tru! Long tok bilong yu yet bai mi kotim yu. Yu save pinis olsem, mi hatpela man, . . . Orait watpo yu no bin putim mani bilong mi long beng, na taim mi kam bek mi inap kisim gen wantaim sampela winmani?’ Na em i tok olsem long ol man i sanap klostu, ‘Yupela kisim dispela 20 kina long em, na givim long dispela man i gat 200 kina.’ ”

Dispela mani ol i bin tekewe long wokboi nogut i makim olsem em i lus long kisim wok king long Kingdom; i olsem em i no inap bosim 10-pela o 5-pela taun, olsem tok piksa i kolim. I no olsem dispela wokboi i bin mekim pasin nogut na king i kolim em wokboi nogut tru. Nogat. Rong bilong em, em i no bin mekim wok long mani em i bin kisim bambai em i ken kamapim sampela winmani bilong king.

Taim ol i givim mani bilong wokboi nogut long namba wan wokboi, sampela i tok: “Em i gat 200 kina pinis.” Tasol Jisas i tok: “Olgeta man i gat sampela samting, bai mi givim sampela moa long ol. Tasol sapos wanpela man i no gat ol samting, orait liklik samting em i holim, em bai mi rausim long em. Tasol ol dispela birua . . . i no laik bai mi stap king bilong ol, yupela kisim ol i kam hia na kilim ol i dai.” Luk 19:​11-27; Matyu 28:19, 20.

▪ Bilong wanem Jisas i mekim tok piksa bilong 10-pela wokboi i kisim mani?

▪ Bikman i makim husat? Wanem dispela ples em i go long en?

▪ Ol wokboi i makim husat? Na mani i makim wanem samting?

▪ Ol wanples ol i makim husat? Olsem wanem ol i kamapim tingting bilong ol, olsem ol i birua long dispela bikman?

▪ Bilong wanem king i kolim wanpela wokboi olsem wokboi nogut tru? Taim ol i tekewe mani long em, dispela i makim wanem samting?