Sapta 32

Wanem Wok i Orait Long Mekim Long De Sabat?

LONG narapela de Sabat Jisas i go long wanpela haus lotu bilong ol Juda klostu long raunwara Galili. Na wanpela man i stap, han sut bilong em i drai pinis. Ol Farisi na ol saveman bilong lo ol i was long Jisas; ol i laik save, em bai mekim orait dispela man long de Sabat, o nogat. Olsem na ol i askim em: “Ating yumi ken mekim orait ol sikman long de Sabat, o nogat?”

Ol dispela hetman bilong lotu Juda i ting, i orait long helpim sikman long de Sabat sapos em i laik bagarap. Tasol ol i lainim ol man olsem, long de Sabat i tambu long stretim bun i bruk, o taitim banis long skru i lus. Ol i painim rot bilong kotim Jisas na ol i givim dispela askim long em.

Tasol Jisas i save long tingting bilong ol. Na em i save ol i no bihainim tok bilong Baibel long wanem kain wok i tambu long mekim long de Sabat. Em i laik stretim tingting kranki bilong ol. Olsem na em i tokim dispela man, han bilong em i drai pinis: “Yu kam hia.”

Nau Jisas i tokim ol Farisi na ol saveman bilong lo: “Sapos wanpela man namel long yupela em i gat wanpela sipsip, na dispela sipsip i pundaun long wanpela hul long de Sabat, orait yupela i save, dispela man bai i holim sipsip na pulim i kam antap.” Ol i save, ol bai mekim olsem, nogut sipsip i kisim bagarap na ol man i no laik baim. Na tu Baibel i tok: “Ol stretpela man i save marimari long ol animal bilong ol, na lukautim ol gut.”

Jisas i stori pinis long sipsip na bihain em i tok: “Tasol man em i winim tru sipsip. Olsem na em i orait long yumi mekim gutpela pasin long de Sabat.” Ol hetman bilong lotu i save dispela tok i stret na dispela pasin em i pasin bilong sori. Olsem na ol i no inap bekim wanpela tok; ol i pasim maus i stap.

Ol dispela man i bikhet na ol i no pilim tok bilong Jisas, olsem na em i kros na bel hevi long pasin bilong ol. Em i lukluk raun long ol, na bihain em i tokim dispela man: “Stretim han bilong yu.” Orait, em i stretim han, na han i kamap gutpela gen.

Ol Farisi i no amamas long dispela samting. Ol i kirap i go, na kwiktaim ol i bung wantaim lain bilong Herot na wokim toktok bilong kilim Jisas i dai. Lain bilong Herot ol i lain politik, na ol Sadyusi, em wanpela lain bilong lotu Juda, ol i insait long dispela lain politik. Ol Farisi na dispela lain politik i save stap birua birua, tasol nau ol i bung wantaim bilong birua long Jisas. Matyu 12:​9-14; Mak 3:​1-6; Luk 6:​6-11; Sindaun 12:10; Kisim Bek 20:​8-10.

▪ Wanem samting i kamap na Jisas i sakim tingting bilong ol hetman bilong lotu Juda?

▪ Ol dispela hetman i gat wanem tingting long oraitim sikman long de Sabat?

▪ Jisas i stori long wanem samting bilong stretim tingting kranki bilong ol?