Tok i Go Long Papamama

Wanem nambawan gutpela presen em yu inap givim long ol pikinini bilong yu? I gat planti samting ol i nidim, ol i laik bai yu laikim ol, stiaim ol, na banisim ol. Tasol nambawan gutpela presen yu inap givim long ol, em long helpim ol long kisim save long Jehova na tok i tru bilong em i stap long Baibel. (Jon 17:3) Dispela save inap helpim ol pikinini bilong yu long laikim Jehova na givim bel olgeta long mekim wok bilong em, maski ol i liklik yet.—Matyu 21:16.

Planti papamama i luksave olsem ol liklik pikinini i save putim yau long ol sotpela sotpela lesen na instraksen. Olsem na mipela i amamas long kamapim dispela buklet, Ol Baibel Lesen Bilong Mi. Wok bilong wan wan lesen em long skulim ol pikinini long wanpela gutpela pasin. Mipela i wokim ol piksa na ol tok i stap long en bilong ol liklik pikinini i gat 3-pela krismas na aninit long en. Na tu, i gat sampela instraksen long ol samting ol i ken mekim. Buklet Ol Baibel Lesen Bilong Mi, i no samting bilong ol pikinini long pilai long en, nogat. Em i bilong yu long ritim wantaim ol pikinini bilong yu, long dispela rot yu inap toktok gut wantaim ol.

Mipela i save olsem dispela buklet bai helpim yu long skulim ol pikinini bilong yu long tok i tru bilong Baibel kirap long taim ol i “stap bebi yet.”—2 Timoti 3:14, 15.

Ol brata bilong yupela,

Gavening Bodi Bilong Ol Witnes Bilong Jehova

[Piksa long pes 3]