“God . . . bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4, Nupela Taim Baibel.

Wok bilong yu i gat as bilong en na yu amamas long en.—Aisaia 65:21-23.

Olgeta kain sik, pen, na bel hevi bai pinis.—Aisaia 25:8; 33:24.

Bai yu amamas long i stap laip oltaim oltaim wantaim famili na ol pren.—Song 37:11, 29.

Yes, i gat tupela as na yumi inap bilip olsem:

• God inap tru long truim ol tok promis bilong em. Baibel i tok, God Jehova wanpela tasol i gat nem olsem “God i Gat Olgeta Strong,” long wanem, strong bilong em i no gat mak bilong en. (Revelesen 15:3) So em inap tru long truim tok promis bilong em long mekim ol samting bilong graun i kamap gutpela. Olsem Baibel i tok, “God inap mekim olgeta samting.”—Matyu 19:26.

• God i gat laik long truim ol tok promis bilong em. Olsem: Jehova i “laikim tumas” long kirapim bek ol man i dai pinis.—Jop 14:14, 15.

  Baibel i stori tu long Pikinini Bilong God, em Jisas, i bin oraitim ol sikman. Wai na em i mekim olsem? Bikos em i gat laik long mekim. (Mak 1:40, 41) Olsem Papa bilong em, Jisas i laik helpim ol man i nidim helpim.—Jon 14:9.

  Olsem na yumi inap bilip olsem Jehova na Jisas i laik tru long helpim yumi long amamas long gutpela sindaun bilong yumi long bihain!—Song 72:12-14; 145:16; 2 Pita 3:9.