Mi Mas Kisim Baptais?

Makim ol dispela tok olsem tru o i no tru:

Ol Kristen i mas kisim baptais.

□ Tru

□ I no tru

Nambawan as na yu kisim baptais, em bilong banisim yu na yu no pundaun long sin.

□ Tru

□ I no tru

Baptais i opim rot long God i kisim bek yu.

□ Tru

□ I no tru

Sapos yu no baptais, God i no inap kotim yu long ol pasin yu mekim.

□ Tru

□ I no tru

Sapos ol pren bilong yu i kisim baptais, dispela i makim olsem yu tu i redi long kisim baptais.

□ Tru

□ I no tru

SAPOS yu save bihainim ol lo bilong God long i stap bilong yu, pas gut wantaim God, na yu save tokim ol narapela long bilip bilong yu, em nomol long yu tingting long kisim baptais. Tasol hau yu ken save olsem yu redi long kisim baptais? Bilong bekim dispela askim, yumi bai skelim bekim bilong ol dispela tok i stap antap.

● Ol Kristen i mas kisim baptais.

Tru. Jisas i tok ol disaipel bilong em i mas kisim baptais. (Matyu 28:19, 20) Jisas yet tu i bin kisim baptais. Bilong bihainim Krais, yu mas kisim baptais taim bilip bilong yu i kamap strong na yu yet inap long wokim dispela disisen na yu gat bikpela laik long kisim baptais.

● Nambawan as na yu kisim baptais, em bilong banisim yu na yu no pundaun long sin.

I no tru. Baptais em bilong kamapim klia long ai bilong ol man olsem yu dediket pinis long Jehova. Dediket bilong yu i no olsem wanpela kontrak bilong bisnis we i pasim yu long mekim ol samting yu laik mekim, nogat. Yu dediketim laip bilong yu long Jehova, long wanem, yu laik bihainim ol tok bilong em long i stap bilong yu.

● Baptais i opim rot long God i kisim bek yu.

Tru. Baptais em i bikpela samting we i opim rot long God i ken kisim bek yu. (1 Pita 3:21) Baptais em i no wankain olsem insurens em yu baim bilong lukautim yu yet sapos hevi painim yu, nogat. Yu kisim baptais bikos yu laikim Jehova na yu laik givim bel olgeta long mekim wok bilong em inap oltaim oltaim.—Mak 12:29, 30.

● Sapos yu no baptais, God i no inap kotim yu long ol pasin yu mekim.

I no tru. Jems 4:17 i tok: “Sapos man i save long stretpela pasin em i mas mekim, tasol em i no mekim, orait em i mekim sin”—maski em i baptais o nogat. So sapos yu save long samting i stret long mekim, na yu bikpela inap long skelim gut ol samting long laip, ating yu ken toktok wantaim papa o mama o wanpela strongpela Kristen long dispela samting. Long dispela rot yu inap kisim save long olsem wanem yu ken wok strong i go bilong kisim baptais.

● Sapos ol pren bilong yu i kisim baptais, dispela i makim olsem yu tu i redi long kisim baptais.

I no tru. Baptais em samting bel bilong yu yet i mas kirapim yu long mekim. (Buk Song 110:3) Yu mas kisim baptais taim yu kliagut pinis long ol samting yu mas mekim olsem wanpela Witnes Bilong Jehova na yu save tru olsem yu redi na amamas long mekim dispela samting.—Eklisiastis 5:4, 5.

Baptais Em i Wanpela Bikpela Samting

Baptais em i wanpela bikpela samting we i opim rot long yu kisim planti blesing. Tasol long wankain taim, i gat bikpela wok i insait long en—em olsem yu mas inapim tok promis yu bin mekim long Jehova taim yu dediket long em.

Yu redi long dediket long Jehova? Sapos olsem, em samting bilong amamas. Gutpela samting tru i wetim yu—em long givim bel olgeta long mekim wok bilong Jehova na bihainim ol pasin i kamapim klia olsem yu dediket tru long em.—Matyu 22:36, 37.

BIKPELA SKRIPSA

“Givim bodi bilong yupela olsem sakrifais i stap laip, na i stap holi, na God i orait long en. Dispela em wanpela wok bilong God yupela i mekim wantaim gutpela tingting.”—Rom 12:1.

TRAIM DISPELA

Papamama inap helpim yu long painim wanpela long kongrigesen husat i ken helpim yu long go klostu long Jehova.—Aposel 16:1-3.

YU SAVE LONG DISPELA . . . ?

Baptais em wanpela bikpela hap bilong “mak” i makim olsem God bai kisim bek yu.—Esekiel 9:4-6.

 EKSEN PLEN!

Bilong wok strong i go inap mi kisim baptais, mi bai wok long kliagut moa long ol dispela tok bilong Baibel: ․․․․․

Samting mi laik askim papamama long en long dispela topik em ․․․․․

YU TING WANEM?

● Wai na baptais i bikpela samting?

● Wanem samting inap mekim na wanpela yangpela i hariap long kisim baptais?

● Wanem as na wanpela yangpela i surik long dediket na kisim baptais?

[Bikpela Tok]

“Mi tingim olsem mi baptais na dispela i helpim mi long wokim ol gutpela disisen na em i helpim mi tu long no ken mekim ol samting we inap bagarapim laip bilong mi.”​—Holly

[Blok/​Piksa]

Ol Askim Ol Man i Gat Long Baptais

Baptais i makim wanem samting? Taim yu go insait long wara, dispela i makim olsem yu dai pinis long olpela pasin na taim yu kam ausait long wara, dispela i makim olsem yu statim nupela laip, em long mekim laik bilong God.

Taim yu dediketim laip bilong yu long Jehova dispela i makim wanem samting? Em i makim olsem yu givim baksait long laik bilong yu yet, na yu tok promis long putim laik bilong God i stap nambawan long olgeta samting. (Matyu 16:24) Sampela haptaim paslain long yu baptais, yu mas beten long Jehova na yu tokim em olsem yu givim yu yet long em bilong mekim laik bilong em.

Paslain long yu kisim baptais yu mas mekim wanem ol samting? Long i stap bilong yu, yu mas bihainim Tok Bilong God na tokim ol narapela long bilip bilong yu. Yu mas wok long kamap pren bilong God long rot bilong beten na stadi long Tok bilong em. Yu mas mekim wok bilong Jehova bikos yu yet i gat laik long mekim olsem—i no bikos wanpela i subim yu long mekim.

Man i mas i gat hamas krismas na bai em i ken baptais? Krismas i no bikpela samting. Tasol long bel na tingting yu mas stap olsem man i bikpela pinis—na yu kliagut long as na yu mekim dispela tok promis long Jehova.

Olsem wanem sapos yu laik kisim baptais tasol papamama i tok yu mas wet pastaim? Ating ol i laik bai pasin bilong yu long mekim wok bilong Jehova i kamap gutpela moa. Tingim gut edvais bilong ol i bikpela samting na yusim gut dispela taim long wok long pas gut wantaim Jehova.—1 Samuel 2:26.

[Blok]

Eksasais Pepa

Yu Tingting Long Kisim Baptais?

Skelim ol askim na tok i stap daunbilo na sekim sapos yu redi long kisim baptais o nogat? Yu mas ritim ol skripsa paslain long yu raitim ol bekim bilong yu.

Long wanem ol rot nau yu soim olsem yu bilip long Jehova?​—Buk Song 71:5. ․․․․․

Olsem wanem yu soim olsem yu kliagut long wanem samting i stret na wanem samting i no stret?​—Hibru 5:14. ․․․․․

Yu save beten hamas taim? ․․․․․

Long ol beten bilong yu, yu save kolim stret ol samting yu tingting long en? Olsem wanem beten bilong yu i soim olsem yu laikim Jehova?​—Buk Song 17:6. ․․․․․

Raitim ol mak yu laik winim long sait bilong ol beten bilong yu. ․․․․․

Hamas taim yu save mekim pesenel stadi bilong yu long Baibel?​—Josua 1:8. ․․․․․

Yu save stadi long wanem samting? ․․․․․

Raitim ol mak yu laik winim long sait bilong pesenel stadi bilong yu. ․․․․․

Yu save amamas long autim tok? (Olsem: Yu inap eksplenim wanpela bikpela tok bilong Baibel long ol narapela? Yu save mekim gobek long ol man i amamas long harim tok? Yu wok long painim wanpela Baibel stadi?)

□ Yes □ Nogat

Yu save insait long autim tok maski papamama i no go wantaim yu?​—Aposel 5:42.

□ Yes □ Nogat

Raitim ol mak yu laik winim long sait bilong autim tok.​—2 Timoti 2:15. ․․․․․

Yu save go long olgeta miting o yu save go wan wan taim tasol?​—Hibru 10:25. ․․․․․

Yu save mekim wanem ol samting bilong insait long ol miting? ․․․․․

Yu save go long ol miting maski papamama bilong yu i no inap go (sapos ol i larim yu long go long ol miting)?

□ Yes □ Nogat

Yu inap tok olsem yu amamas tru long mekim laik bilong God?​—Buk Song 40:8.

□ Yes □ Nogat

Yu inap raitim wanpela taim stret we ol wankrismas bilong yu i laik pulim yu long mekim wanpela samting i no stret na yu sakim ol?​—Rom 12:2. ․․․․․

Yu bai mekim wanem long strongim yet pasin bilong yu long laikim Jehova.​—Jut 20, 21. ․․․․․

Yu bai lotuim Jehova yet maski papamama na ol pren bilong yu i stop long mekim olsem?​—Matyu 10:36, 37.

□ Yes □ Nogat

[Piksa]

Wankain olsem marit, baptais em i bikpela samting—na yu mas skelim gut paslain long yu wokim dispela disisen