Yu ting i hatwok long bihainim pasin i stret?— Planti man i ting em i hatwok. Tasol Baibel i stori long wanpela liklik boi, nem bilong em Josaia, em i wok strong long bihainim pasin i stret. Em i gat ol gutpela pren husat i bin helpim em. Yumi laik save long stori bilong Josaia na ol pren bilong em.

Papa bilong Josaia em Emon, em wanpela king bilong Juda. Emon em i man nogut na em i save lotuim ol stetiu bilong ol god giaman. Taim papa bilong Josaia i dai, Josaia i kamap king bilong Juda. Em i gat 8-pela krismas tasol! Yu ting em i bihainim pasin nogut bilong papa bilong em?— Nogat, em i no mekim olsem!

Maski Josaia i liklik boi, em i laik bihainim tok bilong Jehova. Olsem na em i pren wantaim ol man husat i laikim Jehova. Na ol i helpim Josaia long bihainim pasin i stret. Husat sampela pren bilong Josaia?

Wanpela pren bilong em, em Sefanaia. Sefanaia em i wanpela profet husat  i givim tok lukaut long ol manmeri bilong Juda olsem hevi bai painim ol sapos ol i lotu long ol stetiu. Josaia i harim tok bilong Sefanaia na em i lotuim Jehova.

Narapela pren bilong Josaia em Jeremaia. Ol i gat wankain krismas na ol i go bikpela wantaim. Tupela i stap gutpela pren tru, olsem na taim Josaia i dai, Jeremaia i raitim wanpela spesel singsing i stori long hau em i misim Josaia. Jeremaia na Josaia i helpim narapela narapela long bihainim pasin i stret na bihainim tok bilong Jehova.

Yu kisim wanem skul long stori bilong Josaia?— Maski Josaia em liklik boi tasol, em i laik bihainim pasin i stret. Em i save olsem em i mas pren wantaim ol manmeri i laikim Jehova. Olsem na em i bikpela samting long gat ol pren em ol i laikim Jehova, na ol inap helpim yu long bihainim pasin i stret!