Sampela taim wanpela i bin tokim yu long wanpela tok we em i no bin tokim ol narapela long en?— * Sapos olsem, orait dispela em i wanpela tok hait bikos i no gat narapela man i save long en. Baibel i kolim wanpela bikpela tok hait olsem “tok hait holi.” Em i holi bikos em i kam long God. Na em i wanpela tok hait bikos ol man i no save long en. Ol ensel tu i laik save long dispela tok hait. Yu tu i laik save long dispela tok hait?—

Bipo bipo tru, God i wokim fes man na meri. Nem bilong tupela em Adam na Iv. God i givim ol wanpela naispela ples long stap long en, em gaden Iden. Sapos Adam na Iv i bihainim tok bilong God, tupela na ol pikinini bilong ol inap mekim graun olgeta i kamap Paradais olsem dispela gaden. Na ol bai stap long Paradais inap oltaim oltaim. Tasol yu inap tingim samting Adam na Iv i mekim?—

Adam na Iv i sakim tok bilong God, em as na yumi no stap long Paradais long nau. Tasol God i tok em bai mekim graun i kamap Paradais gen na ol man bai stap amamas oltaim long en. Olsem wanem God bai kamapim gen Paradais long graun? Inap longtaim nau, ol man i no save long hau God bai kamapim gen Paradais long graun. Dispela em i wanpela tok hait.

Taim Jisas i kam long graun, em i skulim ol man long sampela save moa bilong dispela tok hait. Em i tok Kingdom Bilong God bai kamapim Paradais long graun. Jisas i tokim ol man long beten long dispela Kingdom i mas i kam. Na Kingdom tasol bai mekim graun i kamap naispela ples Paradais.

Yu amamas long save long dispela tok hait?— Tingim, ol manmeri i bihainim tok bilong Jehova, ol tasol bai stap long Paradais. Baibel i stori long planti man na meri em ol i bin bihainim tok bilong Jehova. Yu laik kisim save long stori bilong ol?— Yumi ken stori long sampela bilong ol na hau yumi ken bihainim pasin bilong ol.