1-3. (a) Planti man i ting olsem wanem long wok bilong ol? (b) Baibel i kirapim yumi long kisim wanem kain tingting long wok? Bai yumi skelim wanem ol askim long dispela sapta?

 LONG planti man long nau, wok em i no samting ol i amamas long en. Ol i mas lusim planti aua long wok ol i no laikim, na ol i no amamas long i go long wok. Wanem samting inap kirapim ol man i gat kain tingting olsem long tingim wok bilong ol na kisim amamas long wok ol i mekim?

² Baibel i kirapim yumi long kisim stretpela tingting long wok. Em i tok wok na ol samting wok i kamapim i wanpela blesing. Solomon i tok: “Yumi mas kaikai na dring na amamas long olgeta samting yumi mekim. Dispela i olsem presen God i givim yumi.” (Saveman 3:13) Jehova i save laikim yumi na em i laik helpim tru yumi, na em i laik bai yumi kisim amamas long wok yumi mekim na long ol samting wok bilong yumi i kamapim. Bilong i stap insait yet long pasin laikim bilong em, yumi mas mekim ol samting i stret wantaim tingting bilong em na ol stiatok bilong em long ol samting bilong wok.​—Saveman 2:24; 5:18.

³ Long dispela sapta, bai yumi skelim fopela askim: Olsem wanem yumi ken amamas long wok yumi mekim? Ol Kristen tru i no ken mekim wanem kain ol wok? Olsem wanem yumi ken balensim wok mani  wantaim ol wok lotu? Na wanem wok i nambawan bikpela wok yumi ken mekim? Orait pastaim yumi ken skelim pasin bilong tupela nambawan man bilong mekim wok​—God Jehova na Jisas Krais.

4, 5. Olsem wanem Baibel i soim olsem wok bilong Jehova i save karim kaikai?

⁴ Jehova em i Nambawan Man Bilong Wok. Stat 1:1 i tok: “Bipo bipo tru God i mekim kamap skai na graun na olgeta samting i stap long en.” Taim God i pinisim wok bilong em long wokim graun na ol samting long en, em i tok ol ‘i gutpela tru.’ (Stat 1:31) Em i amamas tru long wok em i bin mekim long graun. Jehova, em i “God bilong amamas,” na em i kisim bikpela amamas tru long wok bilong em i karim kaikai.​—1 Timoti 1:​11, NW.

⁵ God bilong yumi i save wok long olgeta taim. Longpela taim bihain long God i wokim pinis graun na olgeta samting i stap long en, Jisas i tok: “Papa bilong mi em i save wok oltaim i kam inap long nau.” (Jon 5:17) Papa i bin mekim wanem samting? Long ples bilong em long heven, em i bin mekim bikpela wok long stiaim na lukautim ol lain manmeri. Em i bin kamapim “wanpela nupela samting,” em ol Kristen God i bin makim na ol bai mekim wok king wantaim Jisas long heven. (2 Korin 5:​17, NW) Em i bin wok i stap bilong inapim ol samting em i tingting pinis long mekim bilong helpim ol man​—ol man husat i laikim em ol bai kisim laip oltaim long nupela taim. (Rom 6:23) Ating Jehova i amamas tru long ol samting dispela wok i bin kamapim. Planti milion manmeri i bin harim na  bihainim tok bilong Kingdom, na God i bin bringim ol i kam long em na ol i stretim wokabaut bilong ol bambai ol i ken i stap insait yet long pasin laikim bilong em.​—Jon 6:44.

6, 7. Jisas i gat wanem kain nem long pasin bilong mekim wok?

⁶ Jisas i gat nem olsem man i bin wok strong inap longtaim tru. Taim Jisas i no kamap man yet long graun, God i makim em long stap olsem “saveman i bosim wok” long olgeta samting God i wokim “long heven na long graun.” (Sindaun 8:​22-31; Kolosi 1:​15-17) Taim Jisas i stap long graun, em i man bilong wok hat. Taim em i yangpela yet, em i lainim wok bilong sanapim ol haus samting, na ol man i kolim em olsem “dispela kapenta.” (Mak 6:​3, NW) Man i mas wok hat bilong mekim wok kapenta na em i mas i gat save long mekim kain kain samting​—na moa yet long taim i no gat ol somil, ol stua, na ol pawa tul. Olsem wanem? Yu inap piksaim long tingting olsem Jisas i go painim ol diwai​—ating em i katim ol diwai na pulim i kam long hap em i wok long en? Yu inap piksaim em i wokim ol haus​—redim ol sparen na putim long rup, wokim ol dua, na wokim tu sampela sia na tebol? Jisas i save long amamas em man i save kisim taim em i wok hat na i mekim gut wok bilong em.

⁷ Jisas i wok strong tru long mekim wok bilong em long autim tok. Inap tripela yia na hap, em i givim bel tru long dispela bikpela wok. Em i laik bungim planti man, olsem na em i no westim taim, em i save kirap hariap long moning na wok i go inap long nait. (Luk 21:​37, 38; Jon 3:2) Em i raun “long ol taun na ol ples na em i wok long autim gutnius bilong kingdom bilong God long ol manmeri.” (Luk 8:1) Jisas i raun inap  planti handet kilomita, em i wokabaut long ol rot i gat planti das long en bilong kisim gutnius i go long ol manmeri.

8, 9. Olsem wanem yumi save olsem Jisas i bin amamas long wok em i mekim?

⁸ Olsem wanem? Jisas i amamas long wok bilong em long autim tok? Yes, em i amamas! Em i planim kaikai bilong tok i tru bilong Kingdom, na bihain dispela kaikai long ol gaden i mau na i redi bilong kisim. Pasin bilong mekim wok bilong God i givim bikpela strong long Jisas, olsem na em i redi long lusim kaikai tru bambai em i ken inapim wok bilong God. (Jon 4:​31-38) Tingim bikpela amamas em i kisim long pinis bilong wok bilong em long graun, taim em inap tru long tokim Papa bilong em olsem: “Mi bin soim biknem na strong bilong yu long ol manmeri bilong dispela graun. Mi pinisim pinis dispela wok yu bin givim mi long mekim.”​—Jon 17:4.

⁹ Jehova na Jisas ol i nambawan gutpela piksa long pasin bilong amamas long wok ol i mekim. Pasin bilong yumi long laikim tru Jehova i kirapim yumi long “bihainim ol pasin em yet i save mekim.” (Efesus 5:1) Yumi laikim tru Jisas na dispela i kirapim yumi long “bihainim gut lek mak bilong en.” (1 Pita 2:​21, NW) Orait nau yumi ken skelim olsem wanem yumi tu i ken amamas long wok yumi mekim.

10, 11. Wanem samting inap helpim yumi long kisim stretpela tingting long wok yumi mekim?

¹⁰ Planti Kristen i save mekim wok mani. Yumi laik kisim amamas long wok yumi mekim, tasol ating i hatwok long mekim olsem sapos yumi no laikim tumas  wok mani bilong yumi. Sapos yumi gat dispela hevi, olsem wanem yumi ken kisim amamas long wok?

¹¹ Kisim stretpela tingting. I no olgeta taim yumi inap senisim ol samting long i stap bilong yumi, tasol yumi inap senisim tingting bilong yumi. Pasin bilong skelim long bel ol tingting bilong God inap helpim yumi long kisim stretpela tingting long wok. Olsem, sapos yu het bilong famili, yu ken tingim olsem wok mani bilong yu​—maski em i wanpela wok i no gat nem​—i helpim yu long lukautim famili bilong yu long ol samting bilong skin. Wok bilong yu long lukautim famili em i no liklik samting long ai bilong God. Baibel i tok man i no lukautim famili bilong em, em i “man nogut tru. Ol haiden yet i no save mekim dispela kain pasin nogut.” (1 Timoti 5:8) Taim yu tingim wok bilong yu olsem rot bilong inapim wok em God i bin givim long yu, dispela inap helpim yu long kisim sampela amamas long wok na yu pilim olsem wok yu mekim i gat as bilong en, ating em samting ol wanwok bilong yu i no save pilim.

12. Pasin bilong wok hat na mekim stretpela pasin long ples wok inap kamapim wanem ol gutpela samting?

¹² Wok hat na mekim pasin i stret. Pasin bilong wok strong na lain long mekim gut wok, dispela inap kamapim ol gutpela samting. Ol bos i save amamas long ol wokman i wok hat na i gat save long mekim gut wok bilong ol. (Sindaun 12:24; 22:29) Yumi ol Kristen tru i mas bihainim pasin i stret long ples wok​—yumi no ken stilim mani, ol samting bilong ples wok, o taim bilong kampani. (Efesus 4:28) Olsem yumi lukim long sapta i kamap paslain long dispela, pasin i stret i save kamapim ol gutpela samting. Ol narapela inap trastim wokman husat i gat nem olsem man bilong mekim pasin i stret.  Na maski sapos bos bilong yumi i lukim pasin bilong yumi long wok hat o em i no lukim, yumi ken amamas olsem bel bilong yumi i no gat tok, na yumi save olsem yumi mekim ol samting i stret long ai bilong dispela God yumi save laikim tru.​—Hibru 13:18; Kolosi 3:​22-24.

13. Gutpela pasin bilong yumi long ples wok inap kamapim wanem samting?

¹³ Tingim olsem pasin bilong yumi inap givim biknem long God. Taim yumi bihainim gutpela pasin Kristen long ples wok bilong yumi, ol narapela bai luksave long dispela. Dispela bai kamapim wanem samting? Yumi bai “givim biknem long dispela tok yumi save autim, em tok tru bilong God, em Man bilong kisim bek yumi.” (Taitus 2:​9, 10) Yes, gutpela pasin bilong yumi inap mekim na ol narapela i luksave long gutpela samting long lotu bilong yumi, na ol bai laikim lotu bilong yumi. Tingim: Yu bai amamas tru sapos gutpela pasin bilong yu long ples wok i mekim na wanpela wanwok bilong yu i laik save long tok i tru! Tasol bikpela samting tru, yu mas tingim dispela: Yu bai kisim bikpela amamas tru taim yu save olsem gutpela pasin bilong yu i litimapim nem bilong Jehova na i mekim bel bilong em i amamas.​—Sindaun 27:11; 1 Pita 2:12.

14-16. Taim yumi mas wokim disisen long wok mani, yumi mas skelim wanem ol bikpela askim?

¹⁴ Baibel i no kolim stret wanem kain wok yumi ken mekim na wanem kain wok yumi no ken mekim. Tasol dispela i no makim olsem yumi ken mekim olgeta kain wok, maski wanem samting i insait long en. Nogat. Baibel inap helpim yumi long makim gutpela wok i stret long ai bilong God na abrusim ol wok em i no laikim.  (Sindaun 2:6) Taim yumi mas wokim disisen long wok mani, i gat tupela bikpela askim yumi mas tingim.

¹⁵ Sapos yumi mekim dispela wok, bai yumi insait long samting em Baibel i tambuim? Baibel i tambuim pasin stil, tok giaman, na pasin bilong wokim ol imis. (Kisim Bek 20:4; Aposel 15:29; Efesus 4:28; KTH 21:8) Yumi bai sakim olgeta kain wok mani we yumi mas mekim ol kain pasin olsem. Pasin bilong yumi long laikim Jehova bai i no larim yumi long kisim wok we yumi bai insait long sampela pasin i brukim ol lo bilong God.​—1 Jon 5:3.

 ¹⁶ Sapos yumi mekim dispela wok, dispela bai mekim na yumi gat asua long wanpela rong o yumi kirapim ol narapela long insait long en? Tingim dispela eksampel: I no gat rong long wok long risepsen. Tasol olsem wanem sapos Kristen inap kisim wok risepsenis long klinik bilong rausim bel? Tru, ating taim em i wok long risepsen, em i no insait stret long wok bilong rausim bel. Tasol taim em i wok long risepsen bilong dispela klinik, em i sapotim wok bilong dispela klinik long rausim bel​—em wanpela samting Baibel i tambuim. (Kisim Bek 21:​22-24) Yumi ol man i laikim tru Jehova, yumi no laik insait long ol pasin em Baibel i no orait long en.

17. (a) Yumi ken tingim wanem ol askim taim yumi wokim disisen long wok mani? (Lukim  blok long pes 203.) (b) Olsem wanem maus bilong bel bilong yumi inap helpim yumi long wokim ol disisen em God i laikim?

¹⁷ Yumi inap kisim bekim bilong planti askim i save kamap long wok mani long rot bilong skelim gut bekim bilong tupela bikpela askim i stap long paragraf 15 na 16. Na i gat sampela narapela samting tu yumi mas skelim taim yumi wokim disisen long wok mani. a Yumi no ken ting lain gutpela wokboi bai kamapim ol lo long olgeta samting inap kamap. Nogat. Yumi mas i gat pasin bilong skelim gut ol samting. Olsem yumi lainim long Sapta 2, yumi mas skulim maus bilong bel bilong yumi long rot bilong kisim save long pasin bilong bihainim Tok Bilong God long olgeta wokabaut bilong yumi. Taim yumi skulim “tingting” bilong yumi long rot bilong “traim planti taim long skelim wanem ol pasin i gutpela na wanem ol pasin i nogut,” maus bilong  bel bilong yumi inap helpim yumi long wokim ol disisen em God i laikim na i helpim yumi long i stap insait yet long pasin laikim bilong em.​—Hibru 5:14.

18. Bilong wanem em i no isi long wokim ol disisen em oltaim Jehova i amamas long en?

¹⁸ Long dispela “taim bilong las de” we “planti hevi  nogut tru bai i kamap,” em i no isi long wokim ol disisen em oltaim Jehova i amamas long en. (2 Timoti 3:1) Ating i hatwok tru long painim na holim wok mani. Yumi ol Kristen tru, yumi save em i bikpela samting long wok strong long lukautim famili bilong yumi. Tasol sapos yumi no was gut, presa yumi kisim long ples wok o tingting yumi inap kisim long ol man bilong graun long laikim tumas mani kago, dispela inap bagarapim wok yumi mekim bilong lotuim God. (1 Timoti 6:​9, 10) Nau yumi ken skelim olsem wanem yumi ken holim stretpela tingting, na “skelim gut wanem ol samting i bikpela samting moa.”​—Filipai 1:​10, NW.

19. Bilong wanem Jehova em Man inap tru long yumi ken bilip long em? Taim yumi bilip long em, dispela i helpim yumi long abrusim wanem samting?

¹⁹ Bilip tru long Jehova. (Sindaun 3:​5, 6) Em Man  inap tru long yumi ken bilip long em. Em i save wari long yumi. (1 Pita 5:7) Em i save long ol samting yumi mas kisim, winim yumi yet, na han bilong em i no sot. (Song 37:25) Olsem na i gutpela yumi putim yau taim Baibel i tokim yumi olsem: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’” (Hibru 13:5) Planti fultaim sevan inap stori long pasin bilong God long lukautim yumi long ol samting yumi nidim. Sapos yumi bilip tru olsem Jehova bai lukautim yumi, bai yumi no tingting planti tumas long wok bilong lukautim famili bilong yumi long sait bilong skin. (Matyu 6:​25-32) Bai yumi no larim wok mani i mekim na yumi lusim sampela wok lotu, olsem wok bilong autim gutnius na go long ol miting.​—Matyu 24:14; Hibru 10:​24, 25.

20. Pasin bilong lukluk long wanpela samting tasol i makim wanem samting? Olsem wanem yumi ken mekim olsem?

²⁰ Lukluk long wanpela samting tasol. (Matyu 6:​22, 23, NW) Pasin bilong lukluk long wanpela samting tasol i makim olsem yumi no kisim planti samting i save pulim nabaut tingting. Ai bilong Kristen i lukluk long wanpela samting tasol​—em bilong mekim laik bilong God. Sapos ai bilong yumi i lukluk stret, bai yumi no tingting strong long kisim gutpela sindaun tru na wok mani i gat bikpela pe. Na bai yumi no wok strong long kisim ol nupela nupela samting em ol man i wokim ol edvetaismen i laik bai yumi ting yumi mas kisim bilong i stap amamas. Olsem wanem ai bilong yu i ken lukluk long wanpela samting tasol?  Sapos yu inap, no ken kisim dinau. No ken bungim bungim ol samting i save pulim bikpela hap taim na strong bilong yu. Bihainim tok bilong Baibel na holim tingting olsem “kaikai na laplap samting” yu gat  pinis em inap long yu. (1 Timoti 6:8) Traim long lusim sampela samting i save pulim taim na strong bilong yu.

21. Bilong wanem yumi mas makim ol samting i bikpela samting? Wanem samting i mas i stap namba wan long laip bilong yumi?

²¹ Putim ol samting bilong spirit i stap namba wan, na no ken larim wanpela samting i pasim yu. I gat mak bilong ol samting yumi inap mekim, olsem na yumi mas makim wanem ol samting i bikpela samting. Sapos yumi no mekim olsem, ol samting i no bikpela samting inap kisim bikpela hap taim bilong yumi, na nau yumi no mekim ol bikpela samting. Wanem samting i mas i stap namba wan long laip bilong yumi? Planti man bilong graun i putim bikpela skul i stap nambawan bikpela samting na bai ol i ken kisim gutpela wok mani. Tasol Jisas i tokim ol disaipel bilong em long “wok yet long painim kingdom pastaim.” (Matyu 6:​33, NW) Yes, yumi ol Kristen tru i putim Kingdom Bilong God i stap namba wan long laip bilong yumi. Wokabaut bilong yumi​—ol disisen yumi wokim, ol mak yumi putim, na ol samting yumi mekim​—i mas soim olsem ol wok bilong Kingdom na laik bilong God i bikpela samting tru, winim ol samting bilong skin na wok mani.

22, 23. (a) Wanem nambawan bikpela wok bilong ol Kristen tru? Olsem wanem yumi ken soim olsem dispela wok i bikpela samting long yumi? (Lukim  blok long pes 206.) (b) Sapos yu mekim wok mani, yu mas tingting strong long mekim wanem?

²² Yumi save olsem las de i klostu pinis, olsem na yumi putim tingting bilong yumi long nambawan wok bilong ol Kristen tru​—em wok autim tok na kamapim  ol disaipel. (Matyu 24:14; 28:​19, 20) Olsem Jisas, em Man i stap gutpela piksa bilong yumi ken bihainim, yumi laik givim bel tru long dispela wok bilong helpim ol man long kisim laip. Olsem wanem yumi ken soim olsem dispela wok i bikpela samting long yumi? Planti manmeri long lain bilong God ol i mekim wok olsem ol pablisa bilong kongrigesen na ol i givim bel tru long mekim wok autim tok. Sampela i bin stretim ol samting long sindaun bilong ol bambai ol i ken mekim wok painia o wok misineri. Planti papamama i save olsem ol mak bilong spirit i bikpela samting, olsem na ol i strongim ol pikinini bilong ol long insait long fultaim sevis. Olsem wanem? Ol man bilong givim bel long autim tok bilong Kingdom i amamas long wok ol i mekim? Yes, ol i amamas! Pasin bilong givim bel olgeta long mekim wok bilong Jehova em i rot bilong i stap amamas, stap belgut, na kisim planti blesing.​—Sindaun 10:22.

²³ Planti bilong yumi i mas lusim planti aua long mekim wok mani bilong lukautim famili bilong yumi long sait bilong skin. Tingim, Jehova i laik bai yumi amamas long wok yumi mekim. Taim tingting na ol pasin bilong yumi i stret wantaim tingting na ol stiatok bilong em, bai yumi kisim amamas long wok bilong yumi. Tasol yumi mas tingting strong olsem yumi no ken larim wok mani i pulim yumi na yumi no mekim nambawan bikpela wok bilong yumi​—em wok bilong autim gutnius bilong Kingdom Bilong God. Taim yumi putim dispela wok i go pas, yumi soim pasin bilong yumi long laikim tru Jehova na long dispela rot yumi ken i stap insait yet long pasin laikim bilong em.