Jehova i laik bai ol marit i stap gut long tok promis ol i bin mekim taim ol i marit. Taim Jehova i wokim marit bilong namba wan man na meri, em i tok: “Man i save . . . pas wantaim meri bilong en, na tupela i kamap wanpela bodi tasol.” Bihain, Jisas Krais i kamapim gen dispela tok na i tok moa: “Olsem na samting God i pasim pinis, em man i no ken katim.” (Stat 2:24; Matyu 19:​3-6) Em nau, Jehova na Jisas i tingim marit olsem samting bilong i stap oltaim na marit i pinis taim wanpela poroman i dai. (1 Korin 7:39) Marit em samting i holi, olsem na yumi no ken ting pasin bilong katim marit, olsem divos, em liklik samting. Nogat. Jehova i heitim pasin bilong katim marit taim dispela i no stret wantaim tok bilong Baibel.​—Malakai 2:​15, 16.

Baibel i kamapim wanem as na man o meri i ken katim marit? Jehova i heitim pasin adaltri na pasin pamuk. (Stat 39:9; 2 Samuel 11:​26, 27; Song 51:4) Tru tumas, Jehova i tingim pasin pamuk olsem samting i nogut tru, olsem na taim dispela samting i kamap, Jehova i orait long man i ken katim marit. (Bilong save long ol samting i insait long pasin pamuk, lukim Sapta 9, paragraf 7, i stori long mining bilong pasin pamuk.) Jehova i larim poroman marit husat i no gat asua long makim olsem em bai stap yet wantaim poroman husat i mekim pasin pamuk o em bai katim marit. (Matyu 19:9) Olsem na sapos poroman marit husat i no gat asua em i laik katim marit, em i no mekim samting Jehova i heitim, nogat. Tasol kongrigesen Kristen i no save kirapim man long katim marit. Sampela samting inap mekim na poroman i no gat asua bai stap yet wantaim poroman i gat asua, na moa yet sapos poroman husat i mekim rong em i tanim bel tru. Tasol ol lain i katim marit taim dispela i stret wantaim tok bilong Baibel, ol i mas wokim disisen bilong ol yet  na redi long karim wanem wanem hevi dispela inap kamapim.​—Galesia 6:5.

Taim sampela bikpela hevi tru i kamap, sampela Kristen i katim marit o lusim poroman, olsem seperet, maski poroman marit bilong ol i no bin mekim pasin pamuk. Long kain taim olsem, Baibel i tok man i lusim poroman “em i mas i stap nating o em i mas kamap wanbel gen.” (1 Korin 7:​11, NW) Kain Kristen olsem i no stap fri long prenim narapela bilong maritim em, nogat. (Matyu 5:32) Skelim sampela bikpela hevi tru em sampela i ting em i as na ol i ken seperet long poroman marit.

I no laik tru long lukautim famili. Ating famili i stap rabis tru na ol i no gat ol samting bilong laip ol i nidim, long wanem, man marit i no lukautim ol long ol dispela samting maski em inap long mekim olsem. Baibel i tok: “Sapos wanpela man i no lukautim . . . ol wanhaus bilong en, orait em i givim baksait pinis long bilip na em i nogut moa winim man i no gat bilip.” (1 Timoti 5:​8, NW) Sapos kain man olsem i no laik senisim pasin bilong em, orait meri i mas wokim disisen olsem em bai kisim tok orait long kot long seperet long man bambai em i ken lukautim em yet na ol pikinini, o nogat. Taim wanpela sista i tokim ol elda Kristen olsem man bilong em i no laik lukautim famili long ol samting bilong skin, orait ol elda i mas skelim gut dispela samting. Man inap raus long kongrigesen sapos em i no laik lukautim famili.

Paitim poroman nogut tru. Man o meri i gat pasin bilong pait em inap paitim nogut tru poroman marit bilong em, i go inap long mak we helt bilong poroman inap bagarap o em inap i dai. Sapos wanpela Kristen i gat dispela kain pasin, ol elda bilong kongrigesen i mas painimaut gut olsem dispela samting i tru o nogat. Kongrigesen inap rausim man sapos em i gat pasin bilong belhat tru na paitim narapela.​—Galesia 5:​19-21.

 Pasim tru poroman long mekim ol wok bilong lotu. Man o meri inap traim long mekim ol samting bilong pasim poroman long mekim ol wok bilong lotu i tru o em inap traim long fosim poroman long brukim sampela lo bilong God. Long kain taim olsem, poroman i gat dispela hevi i mas skelim olsem em bai kisim tok orait long kot long seperet long poroman bambai em i ken ‘bihainim tok bilong God tasol na no ken bihainim tok bilong ol man,’ o nogat.​—Aposel 5:29.

Taim ol dispela kain bikpela hevi tru i kamap, ol narapela i no ken subim poroman i no gat asua long lusim poroman bilong em o long stap wantaim em. Ol narapela Kristen na ol elda inap helpim em na kamapim sampela gutpela tok bilong Baibel, tasol ol i no save long olgeta samting i wok long kamap namel long tupela marit. Jehova tasol inap lukim dispela samting. Meri Kristen bai i no givim biknem long God o long marit sapos em i giaman olsem ol hevi bilong marit bilong em i bikpela tru na nau em i ken lusim man bilong em, na bai i wankain long man tu sapos em i mekim olsem. Jehova i save long olgeta pasin giaman em man o meri i mekim bilong em i ken lusim poroman, maski em i traim long haitim dispela. Tru tumas, “olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Tasol sapos bikpela hevi tru i wok long painim wanpela Kristen, orait ol narapela i no ken toktok planti sapos em i lusim poroman marit bilong em. Em nau, “bai yumi olgeta i sanap long kot bilong God.”​—Rom 14:​10-12.