1, 2. Husat i save amamas long lukim ol lain i kisim baptais?

 SAPOS yu bin mekim wok bilong Jehova inap planti yia pinis, ating yu bin harim planti tok bilong baptais long ol kibung bilong yumi. Tasol maski yu bin stap long planti kibung pinis, ating yu save pilim tru long bel taim yu lukim ol lain i sindaun long fran ol i sanap na i redi long kisim baptais. Ol lain long odiens i amamas tru na ol i paitim han strong. Ating aiwara i pulap long ai bilong yu taim yu lukim ol dispela gutpela manmeri i laik stap insait long lain bilong Jehova. Yumi save amamas tru long ol kain taim olsem!

² Ating inap tupela o tripela taim long yia yumi save lukim ol lain i kisim baptais, tasol ol ensel i save lukim dispela samting planti taim moa. Tingim bikpela “amamas i save kamap long heven,” taim ol i lukim planti tausen manmeri long olgeta hap bilong graun i kam insait long oganaisesen bilong Jehova long olgeta wik. (Luk 15:​7, 10) Tru tumas, ol ensel i amamas tru long lukim lain bilong Jehova i go bikpela!​—Aisaia 2:2.

3. Bilong wanem Satan i raun “olsem wanpela laion i singaut strong”? Em i laik mekim wanem?

³ Tasol i gat ol narapela spirit em ol i save kros taim ol  i lukim ol lain i kisim baptais. Satan na ol spirit nogut bilong em i belhat taim ol i lukim planti tausen man i givim baksait long pasin nogut bilong dispela graun. Satan i bin hambak na tok i no gat wanpela man i lotuim Jehova long wanem em i laikim Jehova, na i no gat wanpela man bai i stap gut long Jehova taim traim i kamap. (Jop 2:​4, 5) Taim wanpela i laik dediketim laip bilong em long Jehova, dispela i soim olsem tok bilong Satan i no tru. Taim planti tausen manmeri i mekim olsem long olgeta wik bilong yia, i olsem ol i semim Satan. Olsem na em i “raun olsem wanpela laion i singaut strong na i painim ol man bilong kaikai”! (1 Pita 5:​8, NW) Dispela “laion” i laik daunim yumi long ol samting bilong spirit, em i laik mekim na bai yumi bagarapim pasin bilong yumi long pas gut wantaim God.​—Song 7:​1, 2; 2 Timoti 3:12.

4, 5. (a) Jehova i bin pasim rot bilong Satan long wanem tupela bikpela samting? (b) Ol Kristen tru inap bilip long wanem tok bilong Baibel?

 ⁴ Maski yumi gat strongpela birua, i no gat as na yumi larim pret i daunim yumi. Bilong wanem? Long wanem, long tupela bikpela samting Jehova i bin pasim rot bilong dispela “laion i singaut strong.” Em wanem ol samting? Namba wan, Jehova i bin tok profet olsem “planti manmeri tru” em ol Kristen tru, ol bai abrusim bagarap long taim bilong bikpela hevi tru em klostu nau bai kamap. (KTH 7:​9, 14) Ol tok profet bilong God i save kamap tru long olgeta taim. Olsem na Satan i mas save olsem em i no inap kisim ol manmeri bilong God, olsem wanpela lain olgeta, long umben bilong em.

⁵ Namba tu samting i kamap ples klia long wanpela tok tru em wanpela gutpela wokboi bilong God long bipo i bin mekim. Profet Asaria i tokim King Asa olsem: “Sapos yupela i stap klostu long Bikpela, orait bai em i stap wantaim yupela.” (2 Stori 15:2; 1 Korin 10:13) Planti stori bilong Baibel i kamapim klia olsem long bipo Satan i no inap daunim ol wokboi bilong God husat i stap klostu long God. (Hibru 11:​4-40) Long nau, ol Kristen husat i stap klostu long God, ol inap sakim na winim Satan. Baibel i tok: “Yupela i mas sakim Satan, na em bai i lusim yupela na ranawe.”​—Jems 4:7.

6. Olsem wanem Satan i save pait long ol wan wan Kristen?

⁶ Satan i no inap winim pait, tasol em inap bagarapim yumi wan wan sapos yumi no was i stap. Satan i save olsem em inap bagarapim yumi sapos em i daunim pasin bilong yumi long pas gut wantaim Jehova. Olsem wanem Satan i traim long mekim dispela samting? Long rot bilong pait strong long yumi, pait long yumi wan  wan, na mekim ol pasin trik. Orait nau yumi ken skelim dispela tripela bikpela rot bilong Satan long pait long yumi.

7. Bilong wanem Satan i pait strong long lain bilong Jehova?

⁷ Pait strong. Aposel Jon i tok: “Dispela graun olgeta em i stap aninit long strong bilong Satan.” (1 Jon 5:19) Ol dispela tok i gat tok lukaut i go long olgeta Kristen tru. Satan i kisim pinis olgeta man nogut, olsem na em i putim tingting bilong em na strongim pasin bilong em long pait long ol man i no kirap yet long bihainim em​—em lain bilong Jehova. (Maika 4:1; Jon 15:19; KTH 12:​12, 17) Em i kros nogut tru, long wanem, em i save olsem taim bilong em i sot pinis. Olsem na em i putim bikpela presa moa long yumi. Long nau, yumi stap long laspela hap bilong pait nogut bilong Satan long bagarapim pasin bilong yumi long pas gut wantaim Jehova. Olsem na long nau em i bikpela samting moa long yumi mas ‘save long as bilong ol samting i kamap na long wanem samting yumi mas mekim.’​—1 Stori 12:32.

8. Wanem mining bilong tok bilong aposel Pol taim em i tok yumi mekim pait resling wantaim ol spirit nogut?

⁸ Pait long yumi wan wan. Aposel Pol i mekim tok lukaut long ol wanbilip Kristen, olsem: “Yumi pait long olgeta spirit nogut i stap antap.” (Efesus 6:12) Tok Grik ol i tanim olsem “pait” i makim “pait resling,” olsem tupela man i pait wantaim long han. Olsem na taim Pol i yusim dispela tok, em i kamapim klia olsem yumi olgeta wan wan i mas pait long ol spirit nogut. Maski yumi stap long kantri we planti man i bilip long ol spirit nogut o nogat, yumi no ken lusim tingting olsem taim yumi bin dediketim yumi yet long Jehova, i olsem yumi insait long wanpela pait resling. Kirap long taim yumi dediket na i kam, olgeta wan wan Kristen i insait long dispela pait. Olsem  na i gat as na inap planti taim liklik Pol i tokim ol Kristen long Efesus long “sanap strong.”​—Efesus 6:​11, 13, 14.

9. (a) Bilong wanem Satan na ol spirit nogut i save yusim kain kain pasin trik? (b) Bilong wanem Satan i traim long bagarapim tingting bilong yumi? Olsem wanem yumi ken sakim dispela samting? (Lukim  blok long pes 220-21.) (c) Nau bai yumi skelim wanem pasin trik?

⁹ Ol pasin trik. Pol i tokim ol Kristen long sanap strong na sakim ‘olgeta kain trik na giaman’ bilong Satan. (Efesus 6:11) Pol i tok long olgeta kain trik bilong Satan. Ol spirit nogut i save yusim planti kain kain pasin trik​—na i gat as na ol i save mekim olsem. Sampela bilipman husat i bin sanap strong taim wanpela kain traim i painim ol, bihain ol i pundaun taim narapela kain traim i kamap. Olsem na Satan na ol spirit nogut i save lukluk gut long pasin bilong yumi olgeta wan wan bilong luksave long ol samting yumi no strong long en, na nau ol i mekim wok long dispela samting yumi no strong tumas long en. Tasol gutpela tru, yumi inap luksave long planti pasin trik bilong Satan, long wanem, Baibel i kamapim klia ol dispela trik. (2 Korin 2:11) Long dispela buk yumi bin skelim pinis sampela bilong ol dispela trik, olsem pasin bilong laikim tumas mani kago, ol poroman nogut, na pasin pamuk. Nau yumi ken skelim wanpela moa pasin trik bilong Satan​—wok bilong ol spirit nogut.

10. (a) Wok bilong ol spirit nogut em wanem samting? (b) Jehova i ting olsem wanem long wok bilong ol spirit nogut? Yu gat wanem tingting long en?

¹⁰ Taim man i mekim wok bilong ol spirit nogut, em i wok stret wantaim ol. Sampela wok bilong ol spirit nogut em wok glasman, wok sanguma, wok marila, na toktok wantaim ol man i dai pinis. Yumi save gut olsem Jehova i tingim ol dispela kain wok olsem ol i samting nogut tru.  (Lo 18:​10-12; KTH 21:8) Yumi tu i mas “givim baksait tru long pasin nogut,” olsem na yumi no ken tru mekim wok bilong ol spirit nogut. (Rom 12:9) Sapos yumi mekim olsem, yumi mekim pasin nogut tru​—yumi givim baksait long Papa bilong yumi long heven, em Jehova!

11. Bilong wanem Satan bai win tru sapos em inap pulim yumi long mekim wok bilong ol spirit nogut? Stori long dispela.

¹¹ Wok bilong ol spirit nogut em wanpela pasin we man i givim baksait tru long Jehova, olsem na Satan i strong long pulim sampela bilong yumi long insait long en. Taim em i pulim wanpela Kristen long mekim wok bilong ol spirit nogut, em nau Satan i win. Bilong wanem i olsem? Tingim dispela: Sapos wanpela inap grisim wanpela soldia long givim baksait long ami bilong em na joinim ami bilong birua, orait komanda bilong lain birua bai amamas tru. Em inap hambak olsem em i winim dispela soldia olsem wanpela prais, na em i mekim olsem bilong bagarapim bel bilong olpela komanda bilong soldia. Na olsem tasol, sapos Kristen i kirap mekim wok bilong ol spirit nogut, long laik bilong em yet em i givim baksait long Jehova na i putim em yet aninit stret long wok komanda bilong Satan. Tingim bikpela amamas Satan bai kisim long hambak olsem em i winim dispela Kristen olsem wanpela prais bilong pait! Olsem wanem? Yumi laik bai Satan i win olsem? Nogat tru! Yumi no man bilong givim baksait long Jehova.

12. Satan i yusim wanem trik bilong stiaim tingting bilong yumi long wok bilong ol spirit nogut?

¹² Taim yumi nolaik tru long wok bilong ol spirit nogut, Satan i no inap yusim dispela bilong pulim yumi. Olsem na em i save olsem em i mas senisim tingting bilong yumi. Olsem wanem em bai mekim olsem? Em i painim  rot bilong paulim tingting bilong ol Kristen na sampela bai ting olsem “pasin nogut em i gutpela na gutpela pasin em i nogut.” (Aisaia 5:20) Bilong mekim olsem, Satan i save yusim wanpela trik bilong em bilong bipo yet​—em i save kamapim ol askim bilong kirapim man long kisim tupela tingting.

13. Olsem wanem Satan i bin kamapim ol askim bilong kirapim ol man long kisim tupela tingting?

¹³ Tingim olsem wanem Satan i bin yusim dispela trik long bipo. Long Iden em i askim Iv olsem: “Ating God i tambuim yutupela long kaikai pikinini bilong olgeta diwai bilong gaden, a?” Long taim bilong Jop, long taim ol ensel i bung long heven, Satan i kamapim dispela askim: “Yu ting bai Jop i aninit long yu sapos em i no kisim wanpela samting long han bilong yu, a?” Na long kirap bilong wok bilong Jisas long graun, Satan i tromoi tok long Krais olsem: “Sapos i tru yu Pikinini Bilong God, orait yu tok na ol dispela ston i ken tanim na i kamap bret.” Tingim​—Satan i no sem long tok bilas long Jehova long tok Em i bin mekim 6-pela wik paslain long dispela, olsem: “Dispela em i Pikinini bilong mi. Mi laikim em tumas. Bel bilong mi em i amamas long em.”​—Stat 3:1; Jop 1:9; Matyu 3:17; 4:3.

14. (a) Olsem wanem Satan i save yusim trik bilong em bilong kirapim ol man long kisim tupela tingting long wok bilong ol spirit nogut? (b) Nau bai yumi skelim wanem samting?

¹⁴ Long nau, Satan i save yusim wankain trik bilong kirapim ol man long kisim tupela tingting long wok bilong ol spirit nogut, olsem tru tru em i samting nogut o nogat. Sori tru, em i bin kirapim sampela bilipman long kisim tupela tingting. Ol i kirap tok olsem ‘ating’ sampela wok bilong ol spirit nogut i no nogut tumas. (2 Korin 11:3) Olsem wanem yumi ken helpim kain lain olsem long stretim tingting bilong ol? Yumi ken mekim  wanem na bai dispela trik bilong Satan i no ken paulim yumi? Bilong bekim ol dispela askim, yumi ken skelim tupela samting we Satan i bin putim sampela wok bilong ol spirit nogut insait long en. Dispela tupela samting em ol amamas na pasin bilong lukautim helt.

15. (a) Long Yurop na Amerika samting, planti man i gat wanem tingting long wok bilong ol spirit nogut? (b) Olsem wanem tingting bilong dispela graun long wok bilong ol spirit nogut i bin stiaim tingting bilong sampela Kristen?

¹⁵ Long Yurop na Amerika samting, planti man i ting ol kain kain pawa na majik, na ol narapela wok bilong ol spirit nogut i no samting nogut. Planti moa muvi, buk, TV program, na kompiuta gem i stori long ol wok bilong ol spirit nogut olsem kleva samting, samting bilong amamas, na i no inap bagarapim man. I gat sampela muvi na buk i stori long kain kain pawa na majik em planti man tru i save laikim, na ol dispela man i kamapim ol grup bilong ol man i laikim ol dispela samting. Tru tumas, ol spirit nogut i kirapim ol man long ting olsem ol kain kain pawa na majik i no samting nogut. Olsem wanem? Dispela kain tingting i bin stiaim ol Kristen? Yes, tingting bilong sampela i bin senis. Senis olsem wanem? Wanpela Kristen i bin lukim muvi i stori long kain kain pawa na majik, na em i tok: “Mi lukim dispela muvi, tasol mi no mekim wok bilong ol spirit nogut.” Bilong wanem kain tingting olsem inap kamapim bikpela hevi?

16. Sapos yumi makim ol amamas i stori long wok bilong ol spirit nogut, bilong wanem dispela inap kamapim bikpela hevi?

¹⁶ Tru, pasin bilong mekim wok bilong ol spirit nogut em i no wankain long pasin bilong lukim dispela samting, tasol dispela i no makim olsem pasin bilong lukim  ol muvi i stori long wok bilong ol spirit nogut i no inap kamapim hevi, nogat. Bilong wanem i olsem? Tingim dispela: Baibel i tok Satan na ol spirit nogut ol i no inap save long ol samting yumi tingting long en. a Tasol olsem yumi bin stori pinis, bilong save long tingting bilong yumi na luksave long ol samting yumi no strong long en, ol spirit nogut i save lukluk gut long ol samting yumi mekim​—ol i save lukluk tu long ol amamas yumi insait long en. Taim pasin bilong Kristen i soim olsem em i amamas long lukim ol muvi na ritim ol buk i stori long ol mausman bilong ol spirit nogut, majik, spirit nogut i stap insait long man, o kain samting olsem, i olsem em i salim toksave i go long ol spirit nogut. Em i tokim ol long samting em i no strong long en! Dispela bai kirapim ol spirit nogut long pait strong moa long dispela Kristen bambai ol i ken mekim wok long dispela samting em i no gat strong long sakim, na ol bai pait i go inap long ol i daunim em. Ol amamas i stori long wok bilong ol spirit nogut i bin kirapim tingting bilong sampela long kisim save long dispela samting, na bihain ol yet i kirap mekim wok bilong ol spirit nogut.​—Galesia 6:7.

17. Satan inap yusim wanem trik bilong pulim ol sikman?

¹⁷ Satan i traim long mekim wok nogut long laik bilong yumi long kisim amamas, na tu, long ol samting bilong lukautim helt. Olsem wanem em i mekim olsem? Kristen em helt bilong em i wok long i go nogut maski em i bin traim kain kain rot bilong oraitim sik, em inap  kisim tingting olsem sik bilong em i no inap pinis. (Mak 5:​25, 26) Dispela inap opim rot long Satan na ol spirit nogut bilong em long mekim wok nogut bilong ol. Ol i save olsem Baibel i mekim tok lukaut long ol Kristen long ol i no ken kisim helpim long “ol man bilong mekim pasin nogut.” (Aisaia 31:2) Bilong kirapim Kristen long sakim dispela tok lukaut, ol spirit nogut inap kirapim sikman husat i gat bikpela laik tru long painim rot bilong oraitim sik, long bihainim ol pasin bilong oraitim sik we ol i save “mekim wok long narapela kain strong” o wok bilong ol spirit nogut​—em dispela samting inap bagarapim tru man. Sapos dispela trik bilong ol spirit nogut i wok, dispela bai mekim na pasin bilong sikman long pas gut wantaim God bai i no strong moa. Long wanem rot?

18. Kristen bai sakim wanem ol pasin? Bilong wanem em i mekim olsem?

¹⁸ Jehova i mekim tok lukaut long ol Israel husat i “mekim wok long narapela kain strong,” em i tok: “Taim yupela i apim han na prea long mi, bai mi no ken lukim yupela. Maski yupela i prea planti taim, bai mi pasim yau bilong mi.” (Aisaia 1:​13, 15; NW) Oltaim yumi laik abrusim ol samting inap pasim Jehova long harim beten bilong yumi na yumi no kisim helpim long em​—na moa yet long taim yumi gat sik. (Song 41:3) Olsem na sapos sampela pasin bilong glasim o oraitim sik i gat sampela wok bilong ol spirit nogut i insait long en, orait Kristen tru i mas sakim ol dispela pasin. b (Matyu 6:13) Long dispela rot, em i ken save olsem Jehova bai helpim em.​—Lukim  blok “ Tru Tru Em Wok Bilong Ol Spirit Nogut?” long pes 222.

19. (a) Satan i bin giamanim planti man long ting olsem wanem long strong bilong em? (b) Ol Kristen tru i no ken stori long wanem samting?

¹⁹ Planti man long Yurop na Amerika samting ol i no ting Satan i gat bikpela strong tumas, tasol long sampela narapela kantri ol man i gat narapela kain tingting olgeta long dispela. Long ol dispela kantri Satan i bin giamanim planti man long bilip olsem em i gat bikpela strong tru, winim skel tru bilong strong bilong em. Sampela manmeri i save sindaun kirap wantaim pasin bilong pret long ol spirit nogut. I gat planti stori long ol strongpela wok ol spirit nogut i mekim. Planti taim ol man i save mekim ol dispela kain stori bilong amamasim ol man; na ol man i gat laik long harim ol kain stori olsem. Olsem wanem? I stret yumi kamapim ol dispela kain stori long ol narapela? Nogat, i gat tupela bikpela as na ol wokboi bilong God i no ken mekim olsem.

20. Olsem wanem wanpela inap autim ol tok giaman em Satan i save kamapim bilong pulim ol man, maski em i no gat tingting long mekim olsem?

²⁰ Namba wan, taim man i stori long ol samting ol  spirit nogut i mekim, em i helpim wok bilong Satan. Bilong wanem i olsem? Baibel i kamapim klia olsem Satan inap mekim ol strongpela wok, tasol Baibel i mekim tok lukaut tu olsem Satan i save mekim ol “giaman mirakel” na ‘giamanim ol manmeri.’ (2 Tesalonaika 2:​9, 10) Satan em i nambawan man bilong giaman, olsem na em i save long rot bilong stiaim tingting bilong ol man husat i laik save long wok bilong ol spirit nogut, na em i save long rot bilong kirapim ol long bilip long ol samting i no tru. Ol kain lain olsem i save bilip tru olsem ol i lukim na harim sampela kain samting, na ol i save tokim ol narapela long en olsem em samting tru i bin kamap. Na taim ol man i tokim ol narapela long ol dispela stori, ol i save skruim sampela tok moa long en na stori i senis. Sapos Kristen i mekim ol kain stori olsem, em bai  mekim samting Satan i laikim​—“em i papa tru bilong pasin bilong tok giaman.” Dispela Kristen bai autim ol tok giaman em Satan i save kamapim bilong pulim ol man.​—Jon 8:44; 2 Timoti 2:16.

21. Yumi laik toktok long wanem samting?

²¹ Namba tu, maski sapos tru tru long bipo ol spirit nogut i bin mekim sampela samting long wanpela Kristen, em i no ken stori planti taim long dispela samting bilong amamasim ol wanbilip. Bilong wanem? Baibel i tok: “Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hibru 12:2) Yes, yumi mas lukluk i go long Krais, na i no long Satan. Tingim, taim Jisas i stap long graun, em i no stori long ol spirit nogut bilong amamasim ol disaipel bilong em, maski em inap mekim planti stori long ol samting Satan inap mekim o i no inap mekim. Jisas i stori long Kingdom. Olsem na yumi laik bihainim pasin bilong Jisas na ol aposel, na yumi laik toktok long “ol strongpela wok bilong God.”​—Aposel 2:11; Luk 8:1; Rom 1:​11, 12.

22. Yumi ken wok yet long mekim wanem na bai i gat ‘amamas i kamap long heven’?

²² Tru, Satan i save yusim kain kain pasin trik, na wok bilong ol spirit nogut tu, bilong bagarapim pasin bilong yumi long pas gut wantaim Jehova. Tasol taim yumi nolaik tru long ol samting nogut na yumi pas long ol gutpela samting, yumi no givim rot long Satan long daunim strong bilong yumi long sakim olgeta kain wok bilong ol spirit nogut. (Efesus 4:27) Tingim bikpela ‘amamas i kamap long heven’ sapos yumi wok yet long “sanap strong na sakim olgeta kain pasin bilong trik na giaman Satan i save hait na mekim,” i go inap long taim em i no stap moa!​—Efesus 6:11.