1, 2. (a) Wanem samting i painim Pol? (b) Pol i apil long Sisar, dispela i kamapim wanem askim?

 POL i kalabus i stap long Sisaria na ol gad i was long em. Tupela yia paslain long dispela, em i bin go bek long Judia, na sampela de bihain inap 3-pela taim ol Juda i traim long kilim em i dai. (Apo. 21:27-36; 23:10, 12-15, 27) I kam inap nau, ol birua bilong em i no inap mekim olsem, tasol ol i no givap. Taim Pol i luksave olsem ol man inap putim em long han bilong ol Juda, em i tokim Gavana Festus: “Mi apil long Sisar!”​—Apo. 25:11.

² Olsem wanem? Jehova i sapotim disisen bilong Pol long apil long empera bilong Rom? Bekim bilong dispela askim i bikpela samting long yumi husat i autim gut tru tok bilong Kingdom Bilong God long dispela taim bilong las de. Pol i bin “strongim sait bilong gutnius long rot bilong kot,” na yumi laik save sapos yumi mas bihainim dispela pasin bilong em.​—Fili. 1:7.

3, 4. (a) Bilong wanem ol Juda i laik bai Pol i go long Jerusalem? Olsem wanem em i abrusim dai? (b) Olsem wanem Jehova i strongim ol wokboi bilong em long nau, olsem em i bin mekim long Pol?

³ Inap 3-pela de bihain long Festus i kamap nupela gavana bilong Judia, em i go long Jerusalem. a Long hap, em i harim ol tok ol bikpris na ol bikman Juda i sutim long Pol, olsem em i bin mekim ol bikpela rong. Ol i save olsem dispela nupela gavana i gat wok long strongim pasin wanbel namel long ol bikpris na ol bikman Juda wantaim ol narapela Juda. Olsem na ol i askim Festus long mekim wanpela samting: Bringim Pol i kam long Jerusalem na kotim em long hap. Tasol ol dispela birua i plen long kilim i dai Pol long rot namel long Sisaria na Jerusalem. Festus i no orait long samting ol i askim em long en, na em i tok: “Larim ol bikman bilong yupela i kam wantaim mi [long Sisaria] na sapos tru dispela man i bin mekim wanpela rong, orait ol i ken sutim tok long em.” (Apo. 25:5) Olsem na Pol i abrusim dai gen.

 ⁴ Long olgeta wan wan taim Pol i sanap long kot, Jehova i bin strongim em long rot bilong Bikpela Jisas Krais. Tingim, long visen Jisas i tokim dispela aposel: “Strongim bel!” (Apo. 23:11) Long nau tu, ol wokboi bilong God i bungim ol hevi na ol man i mekim ol tok bilong pretim ol. Tru, Jehova i no banisim yumi long olgeta hevi, tasol em i givim savetingting na strong long yumi bilong karim ol hevi. Oltaim yumi ken bilip olsem yumi bai “kisim dispela strong i winim strong bilong yumi ol man,” em strong gutpela God bilong yumi i save givim.​—2 Kor. 4:7.

5. Festus i mekim wanem long Pol?

⁵ Sampela de bihain, Festus i “sindaun long ples kot” long Sisaria. b Pol na ol man i sutim tok long em, ol i sanap long ai bilong Festus. Bilong bekim ol tok ol i sutim nating long em, Pol i tok: “Mi no bin mekim wanpela sin long Lo bilong ol Juda o long tempel o long Sisar, nogat.” Dispela aposel i no gat asua na i stret em i mas i go fri. Festus bai wokim wanem disisen? Festus i laik bai ol Juda i laikim em, olsem na em i askim Pol: “Olsem wanem? Yu laik i go antap long Jerusalem na sanap long ai bilong mi na kot long ol dispela samting?” (Apo. 25:6-9) Dispela askim i no stret liklik! Sapos ol i salim Pol i go bek long Jerusalem, ol man i sutim tok long em bai kamap jas bilong em na dai bai painim em. Long dispela taim, Festus i tingim ol samting i helpim wok politik bilong em na em i no tingim tumas stretpela pasin. Wanpela gavana bilong bipo,  Pontius Pailat, i bin mekim wankain pasin long narapela kalabusman—em Jisas. (Jon 19:12-16) Ol jas bilong nau tu inap mekim ol disisen i no stret bambai ol bikman bilong gavman i ken orait long ol. Olsem na yumi no ken kirap nogut taim ol kot i no bihainim stretpela pasin taim ol i skelim lain bilong God.

6, 7. Bilong wanem Pol i apil long Sisar? Pol i mekim wanem em ol Kristen tru long nau i ken bihainim?

⁶ Festus i laik bai ol Juda i laikim em na dispela bai mekim na dai inap painim Pol. Olsem na Pol i yusim raits bilong em olsem sitisen bilong Rom. Em i tokim Festus olsem: “Mi sanap pinis long ples kot bilong Sisar we i stret long mi kisim kot. Mi no bin mekim wanpela rong long ol Juda, em samting nau yu wok long save gut long en. . . . Mi apil long Sisar!” Taim wanpela i mekim kain apil olsem, em i no inap senisim. Festus i laik kamapim klia dispela samting na em i tok: “Yu apil pinis long Sisar, olsem na bai yu go long Sisar.” (Apo. 25:10-12) Pol i apil long man i gat bikpela namba moa long sait bilong lo, na dispela i makim pasin ol Kristen tru long nau i ken bihainim. Taim ol birua i laik “kamapim trabel long nem bilong lo” long ol Witnes Bilong Jehova, ol Witnes i kisim helpim long sait bilong lo bilong sambai long gutnius. c—Sng. 94:20.

⁷ Olsem na bihain long Pol i bin kalabus inap 2-pela yia long ol pasin nogut em i no bin mekim, rot i op long em i kamapim keis bilong em long Rom. Tasol paslain long em i go, narapela bikman i laik lukim em.

8, 9. Bilong wanem King Agripa i visitim Sisaria?

⁸ Sampela de bihain long Festus i harim Pol i apil long Sisar, King Agripa na susa bilong em Bernaisi i kam bilong “givim gude na soim rispek” long nupela gavana. d Long taim bilong ol Rom, em pasin bilong ol bikman bilong gavman long mekim kain visit olsem long ol nupela gavana. Taim Agripa i tok amamas long wok Festus i bin kisim, em i laik strongim pasin pren namel long ol na wok politik bilong ol, dispela inap helpim em long bihain.​—Apo. 25:13.

⁹ Festus i stori long Pol long Agripa, na Agripa i laik bungim Pol. Long neks de, dispela tupela bikman i sindaun long ples kot. Tasol bikpela namba na bilaspasin bilong ol i olsem samting nating taim dispela kalabusman i kirap mekim tok long ai bilong ol.​—Apo. 25:22-27.

10, 11. Olsem wanem Pol i soim rispek long Agripa? Pol i tokim king long wanem samting long laip bilong em yet long bipo?

¹⁰ Long pasin rispek Pol i tenkyu long King Agripa long em inap kamapim sait bilong em long dispela king. Em i tok olsem king i save gut tru long ol kastam na ol tok pait bilong ol Juda. Bihain Pol i stori long laip bilong em long bipo: “Mi wanpela Farisi, em wanpela lain long lotu bilong mipela i save strik  stret.” (Apo. 26:5) Olsem wanpela Farisi, Pol i bin bilip na wetim Mesaia long kam. Nau olsem wanpela Kristen, em i tokaut olsem Jisas Krais em i dispela Mesaia ol i bin wet long em inap longtaim pinis. As na Pol i sanap long kot long dispela de, em samting Pol yet na ol man i sutim tok long em i bilip long en, olsem God bai truim tok promis em i bin mekim long ol tumbuna papa bilong ol. Dispela i kirapim moa yet laik bilong Agripa long harim tok Pol bai mekim. e

¹¹ Pol i stori long hatpela pasin em bin mekim long ol Kristen: “Mi bin ting mi mas mekim planti samting bilong birua long Jisas dispela Nasarin. . . . Mi belhat nogut tru long ol [ol disaipel bilong Krais], olsem na mi mekim nogut long ol long ol arapela taun tu.” (Apo. 26:9-11) Tok bilong Pol i tru. Planti man i save olsem bipo em i bin pait na bagarapim ol Kristen. (Gal. 1:13, 23) Ating Agripa i tingting, ‘Wanem samting inap senisim kain man olsem?’

12, 13. (a) Pol i tok em i kamap Kristen olsem wanem? (b) Olsem wanem Pol i bin “kikim stik i gat sap”?

¹² Ol tok Pol i mekim nau i bekim dispela askim: “Mi wokabaut i go long Damaskus, long wanem, ol bikpris i bin givim namba na wanpela wok long mi. Yes King, long belo samting mi lukim wanpela lait long rot i winim lait bilong san. Dispela lait i sut i kam long skai na i lait long mi wantaim ol man i wokabaut wantaim mi. Mipela olgeta i pundaun long graun na mi harim wanpela  nek i mekim tok Hibru long mi olsem: ‘Sol, Sol, bilong wanem yu mekim nogut long mi? Yu wok long kikim stik i gat sap na dispela i givim hevi long yu.’ Na mi tok: ‘Bikpela, yu husat?’ Na Bikpela i tok: ‘Mi Jisas, dispela man yu wok long mekim nogut long em.’” f—Apo. 26:12-15.

¹³ Paslain long dispela narakain samting i kamap, i olsem Pol i bin “kikim stik i gat sap.” Sapos animal i kikim stik i gat sap, em bai bagarapim em yet, na olsem tasol taim Pol i mekim ol samting i pait wantaim laik bilong God, em i no inap pas gut wantaim God. Taim Jisas husat i kirap bek pinis i kamap long Pol long rot i go long Damaskus, em i helpim dispela man i gat gutpela bel long senisim tingting bilong em, em bipo em i bin bihainim tingting kranki.​—Jon 16:1, 2.

14, 15. Pol i tok wanem long ol senis em i bin mekim long laip bilong em?

¹⁴ Tru tumas, Pol i bin mekim bikpela senis long laip bilong em. Em i tokim Agripa olsem: “Mi no bikhet long samting mi lukim long skai, nogat. Mi go long ol lain long Damaskus pastaim, na bihain mi go long ol lain i stap long Jerusalem na long olgeta hap bilong Judia, na long ol man bilong ol arapela lain tu. Mi go long ol na bringim tok olsem ol i mas tanim bel na baut i go long God long rot bilong mekim ol wok i stret long man i tanim bel pinis.” (Apo. 26:19, 20) Inap planti yia, Pol i bin inapim wok em Jisas Krais i bin givim em long dispela visen. Wanem ol samting i kamap? Ol man i harim gutnius Pol i autim, ol i tanim bel na lusim olkain pasin  nogut, na baut i go long God. Ol kain man olsem i kamap ol gutpela sitisen, ol i rispektim na bihainim lo bilong kantri.

¹⁵ Tasol ol Juda husat i birua long Pol, ol i tingim ol dispela gutpela samting i samting nating. Pol i tok: “Dispela i as na ol Juda i holim mi long tempel na traim long kilim mi i dai. Tasol mi kisim helpim i kam long God, olsem na inap long nau mi autim tok yet long ol man nating na long ol bikman wantaim.”​—Apo. 26:21, 22.

16. Olsem wanem yumi inap bihainim pasin bilong Pol taim yumi toktok long ol jas na ol bikman bilong gavman long bilip bilong yumi?

¹⁶ Yumi ol Kristen tru, olsem na ‘oltaim yumi mas redi long bekim tok’ bilong sambai long bilip bilong yumi. (1 Pita 3:15) Taim yumi toktok long ol jas na ol bikman bilong gavman long bilip bilong yumi, na yumi bihainim pasin bilong Pol long toktok long Agripa na Festus, dispela inap helpim yumi. Long pasin rispek, yumi inap tokim ol long olsem wanem tok i tru bilong Baibel i bin senisim laip bilong ol man—bilong yumi yet na bilong ol man husat i harim tok yumi autim—dispela inap senisim tingting bilong ol dispela bikman.

17. Festus i mekim wanem taim Pol i kamapim sait bilong em? Olsem wanem ol man long nau i gat wankain tingting olsem Festus?

¹⁷ Taim dispela 2-pela bikman i harim tok bilong Pol, dispela i kirapim tingting bilong ol. Tingim samting i kamap: “Pol i wok long kamapim sait bilong em na Festus i singaut: ‘Pol, yu kamap longlong! Yu kisim bikpela skul tumas na dispela i mekim yu kamap longlong!’” (Apo. 26:24) Kain tok em Festus i autim inap kamapim tingting ol man i gat long nau tu. Planti man i ting ol man husat i skulim ol man long tok bilong Baibel, ol i strong tumas long bihainim lotu. Ol man i gat bikpela save bilong dispela graun, planti bilong ol i hatwok long bilip long tok bilong Baibel olsem ol man i dai pinis ol bai kirap bek.

18. Pol i bekim wanem tok long Festus? Agripa i mekim wanem tok?

¹⁸ Tasol Pol i bekim tok long gavana olsem: “Bikman Festus, mi no kamap longlong, mi mekim ol tok i tru na tok bilong man em tingting bilong en i klia. Na mi no surik long toktok long dispela king hia, em i save gut long ol dispela samting. . . . King Agripa, yu bilipim tok bilong ol Profet o nogat? Mi save olsem yu bilip.” Na Agripa i tokim Pol: “Insait long sotpela taim tasol yu bai kirapim mi long kamap wanpela Kristen.” (Apo. 26:25-28) Maski tok bilong em i tru o nogat, tok dispela king i mekim i soim olsem em i pilim tok bilong Pol.

19. Festus na Agripa i kisim wanem tingting long Pol?

¹⁹ Orait nau Agripa na Festus i kirap sanap bilong makim olsem bung i pinis. “Taim ol i lusim dispela hap ol i toktok namel long ol yet olsem: ‘Dispela man i no mekim wanpela samting inap long em i mas i dai o stap kalabus.’ Na Agripa i tokim Festus olsem: ‘Sapos dispela man i no bin apil long Sisar, em inap long i go fri.’” (Apo. 26:31, 32) Ol i save olsem dispela man husat i sanap long ai bilong ol i no gat asua. Ating nau, tingting bilong ol long ol Kristen bai senis liklik.

20. Taim Pol i autim tok long ol bikman, dispela i kamapim wanem samting?

²⁰ I luk olsem dispela tupela bikman i no kisim gutnius bilong Kingdom Bilong God. Olsem wanem? Pol i bihainim savetingting taim em i go na sanap long ai bilong ol dispela man? Yes. Taim Pol i bin ‘sanap long ai bilong ol king na ol hetman’ long Judia, dispela i opim rot long ol bikman bilong gavman bilong Rom long harim gutnius. (Luk 21:12, 13) Na tu, ol samting i painim em na pasin bilong em long sanap strong long taim bilong hevi, i strongim bel bilong ol bratasista wanbilip.​—Fili. 1:12-14.

21. Taim yumi mekim yet wok bilong Kingdom, dispela inap kamapim wanem ol gutpela samting?

²¹ I wankain long nau tu. Taim yumi mekim yet ol wok bilong Kingdom maski i gat hevi na ol man i birua, dispela inap kamapim planti gutpela samting. Yumi inap autim tok long sampela bikman bilong gavman em yumi no save bungim ol taim yumi autim tok long ol haus. Pasin bilong yumi long sanap strong na karim hevi inap strongim bel bilong ol bratasista Kristen bilong yumi. Dispela inap kirapim ol long autim gut tru tok bilong Kingdom Bilong God na i no pret.