1, 2. Raun bilong Pol long sip bai wanem kain? Ating em i tingting planti long wanem ol samting?

 POL i wok long tingim tingim tok bilong Festus, bikos dispela tok bai mekim bikpela samting long em long bihain. Gavana Festus i bin tok: “Bai yu go long Sisar.” Pol i bin stap tasol long kalabus inap 2-pela yia, olsem na dispela longpela raun bilong em i go long Rom, bai givim sans long em long lukim ol narapela samting. (Apo. 25:12) Tasol planti memori bilong Pol long ol raun bilong em long ol sip i no gutpela tumas. Dispela raun bilong i go sanap long ai bilong Sisar inap kamapim planti bikpela askim long tingting bilong Pol.

² Planti taim Pol i “kisim bagarap long solwara,” inap 3-pela taim sip em i stap long en i bagarap, na em i trip long solwara inap 1-pela nait na 1-pela de. (2 Kor. 11:25, 26) Na tu, dispela raun i no wankain olsem ol misineri raun em i bin mekim taim em i stap fri. Nau Pol bai raun olsem kalabusman na em bai go longwe tru—inap 3,000 kilomita—kirap long Sisaria i go long Rom. Bagarap bai painim em o nogat? Maski em i no kisim bagarap long sip, yu ting em bai kisim taim long han bilong Sisar? Tingim, em bai sanap long ai bilong nambawan strongpela empera bilong graun em Satan i bosim long dispela taim bipo.

3. Pol i tingting strong long mekim wanem? Bai yumi skelim wanem samting long dispela sapta?

³ Taim yu ritim ol samting i bin painim Pol, yu ting em i pilim olsem i no gat rot long abrusim hevi bai painim em? Nogat! Em i save olsem ol hevi bai painim em, tasol em i no save ol dispela hevi bai wanem kain. I no gat as na em i wari long ol samting em i no inap stopim, na larim dispela i daunim amamas bilong em long mekim wok autim tok. (Mat. 6:27, 34) Pol i save olsem Jehova i laik bai em i mas autim gutnius bilong Kingdom Bilong God long olgeta taim rot i op, na long ol bikman bilong gavman tu. (Apo. 9:15) Pol i tingting strong long inapim wok bilong em, maski wanem hevi i kamap. Yumi tu i mas i gat wankain tingting. Orait nau  yumi ken bihainim Pol long dispela bikpela raun bilong em, na yumi ken skelim olsem wanem eksampel bilong em i ken helpim yumi.

4. Pol i kirapim raun bilong em long wanem kain sip? Husat i go wantaim em?

⁴ Wanpela ofisa bilong Rom, nem bilong em Julius, i kisim wok bilong lukautim Pol na sampela kalabusman. Julius i tok long ol i mas kalap long kago sip i kam sua long Sisaria. Dispela sip i bin kam long Adramitium, em wanpela haba long wes kos bilong Esia Maina, na i stap long hapsait bilong taun Mitilini long ailan Lesbos. Dispela sip bai ron i go long hap not na bihain long hap wes, na sip bai stop long ol haba bilong rausim na kisim kago. Ol i no bin wokim ol kain sip olsem bilong karim ol pasindia, na moa yet ol kalabusman. (Lukim blok “ Raun Long Solwara na Ron Bilong Ol Kago Sip.”) Gutpela tru na i no Pol wanpela tasol i Kristen namel long ol dispela kalabusman. Tupela wanbilip i go wantaim em—em Aristarkus na Luk. Luk i raitim stori bilong raun bilong ol. Yumi no save sapos dispela tupela man i baim sipfea bilong ol o ol i go olsem wokboi bilong Pol.​—Apo. 27:1, 2.

5. Pol inap bungim husat long Saidon? Yumi inap kisim wanem skul long dispela?

⁵ Bihain long sip i bin ron inap 1-pela de i go long hap not inap 110 kilomita, sip i kam sua long Saidon, long nambis bilong Siria. I luk olsem Julius i no mekim wankain pasin long Pol olsem em i mekim long ol narapela kalabusman, ating bikos Pol i sitisen bilong Rom na kot i no bin painim rong long em. (Apo. 22:27, 28; 26:31, 32) Taim sip i sua, Julius i larim Pol i go lukim ol wanbilip Kristen. Ol bratasista i amamas tru long lukautim dispela aposel bihain long em i bin kalabus inap longpela taim. Yu inap tingim wanpela taim we rot i op long yu mekim gutpela pasin long ol narapela na dispela i bin strongim yu?​—Apo. 27:3.

6-8. Raun bilong Pol long Saidon i go long Nidus i olsem wanem? Taim rot i op long autim tok, Pol i mekim wanem?

 ⁶ Sip i lusim Saidon na i bihainim nambis i go abrusim Silisia, klostu long Tarsus em taun Pol i bin kamap bikpela long en. Luk i no stori long ol i stop long sampela narapela hap, tasol em i tok “win i sakim mipela.” (Apo. 27:4, 5) Yumi inap tingim olsem Pol i autim gutnius long olgeta taim, taim rot i op. Em i autim tok long ol wankalabus na ol man i stap long sip, olsem ol boskru na ol soldia, na tu, ol manmeri em i bungim long ol haba we sip i sua long en. Olsem wanem? Yumi bihainim pasin bilong Pol na autim tok long olgeta taim, taim rot i op?

⁷ Bihain, sip i kamap long Maira, em wanpela haba long nambis bilong Esia Maina long hap saut. Long hap, Pol na ol narapela i mas kalap long narapela sip we bai kisim ol i go long Rom, em hap ol i laik go long en. (Apo. 27:6) Long dispela taim, Rom i save kisim wit long Isip, na ol kago sip bilong ol Isip i karim wit, i save sua long Maira. Julius i painim wanpela sip olsem, na i tokim ol soldia na ol kalabusman long kalap long en. Dispela sip i bikpela, winim fes sip ol i bin raun long en. Dispela sip i karim planti wit na 276 manmeri—ol boskru, ol soldia, ol kalabusman, na ating ol narapela husat i laik go long Rom. Taim ol i senisim sip, teritori bilong Pol long autim tok i go bikpela, na yumi ken save olsem em i no stap nating, em i autim tok.

⁸ Neks hap ol i stop long en em Nidus, long hap saut-wes bilong Esia Maina. Taim win i ron gut, sip inap go long dispela hap insait long 1-pela de. Tasol Luk i tok “sip i ran isi isi inap planti de liklik na i hatwok, tasol mipela i kamap long Nidus.” (Apo. 27:7a) Weda i go nogut. (Lukim blok “ Ron Bilong Win Long Solwara Mediterenian.”) Tingim ol manmeri i stap long sip taim solwara i raf na strongpela win i sakim sip.

9, 10. Wanem ol hevi i kamap klostu long Krit?

⁹ Kepten bilong sip i plen long i go yet, lusim Nidus na i go long hap wes, tasol Luk i tok “win i pasim rot mipela i laik bihainim.” (Apo. 27:7b) Taim sip i lusim meinlan, em i abrusim tait bilong wara klostu long nambis, na bihain strongpela win i kam long hap not-wes na i subim strong sip i go long hap saut. Pastaim ailan Saiprus i bin banisim sip long ol strongpela win, na nau ailan Krit i mekim olsem. Taim sip i abrusim klif maunten bilong Salmone long hap is bilong Krit, win i no strong tumas. Bilong wanem? Sip i kamap long hap saut bilong ailan, olsem na ailan i banisim sip long ol strongpela win. Tingim bikpela bel isi ol man long sip i kisim long dispela taim. Tasol taim sip i stap yet long solwara, ol boskru i mas tingim olsem taim bilong kol i laik kamap. I gat as na ol i tingting planti.

¹⁰ Luk i tok: “I hatwok, tasol sip i bihainim nambis bilong dispela hap [Krit]. Na bihain mipela i kamap long hap ol i kolim Gutpela Pasis.” Maski ailan i  pasim win, i hatwok long kontrolim sip. Tasol bihain, ol i painim hap we ol i ken anka long en long wanpela liklik bei, ating klostu long hap we nambis i baut i go long hap not. Ol i stap hamas de long hap? Luk i tok “planti de,” tasol ol i mas hariap na go. Septemba na Oktoba i no gutpela taim long ron long solwara.​—Apo. 27:8, 9.

11. Pol i givim wanem edvais long ol man i stap long sip? Ol i wokim wanem disisen?

¹¹ Ating sampela pasindia i askim edvais bilong Pol, bikos em i bin raun long solwara Mediterenian. Em i tok mobeta sip i no ken go. Sapos sip i go, “birua bai painim raun bilong sip na planti samting bai lus,” na ating sampela man bai dai tu. Tasol kepten na papa bilong sip i laik go yet, ating ol i ting ol i mas painim hariap wanpela hap i seif moa. Ol i kirapim Julius na planti narapela long ting olsem ol i mas traim long i go long Finiks, em wanpela haba i stap antap liklik long ailan Krit. Ating dispela haba i bikpela na i gutpela hap moa bilong stap long en long taim bilong kol. Olsem na taim win bilong hap saut i kirap na i no strong tumas, ol i ting em gutpela taim long seil, na ol i go.​—Apo. 27:10-13.

12. Bihain long sip i lusim Krit, wanem ol hevi i painim sip? Ol boskru i mekim wanem bilong abrusim bagarap?

¹² Sampela hevi moa i kamap. “Strongpela win” i kirap long hap not-is. Inap liklik taim, ol i painim ples hait baksait long wanpela “liklik ailan ol i kolim Kauda,” em i stap longwe long Gutpela Pasis inap 65 kilomita. Tasol win inap sakim sip i go long hap saut we em bai paitim hip wesan i stap long solwara klostu long nambis bilong Afrika. Ol seila i hariap long mekim samting bilong abrusim dispela hevi, na ol i pulim dingi em sip i pulim, i kam antap long sip. Ol i taitim bun long mekim olsem, bikos dingi i pulap long wara. Orait nau ol i wok strong long tromoi ol baklain o sen i go aninit long sip na raunim bilong strongim sip. Ol i daunim rigin na bikpela seil, na ol i wok strong long stiaim sip long strongpela win. Piksaim long tingting hau ol i pret nogut tru! Ol samting ol i mekim i no inap, na “traipela win i sakim [sip] nogut tru.” Long namba 3 de, ol i kisim ol rop bilong apim seil na tromoi i go long solwara bilong helpim sip long trip.​—Apo. 27:14-19.

13. Ol man i stap olsem wanem long sip long taim bilong strongpela win na ren?

¹³ Olgeta i pret nogut tru. Tasol Pol na ol poroman bilong em i bilip olsem ol bai abrusim bagarap. Bikpela i bin tokim Pol olsem em bai autim tok long Rom, na bihain wanpela ensel i strongim dispela tok. (Apo. 19:21; 23:11) Tasol strongpela win na ren i stap yet long san na nait i go inap 2-pela wik. Bikpela ren na ol klaut i pasim lait bilong san na ol sta, olsem na kepten i no inap save sip i stap we na i go long wanem hap. Ol man long sip i no inap kaikai, bikos ples i kol, ren i pundaun, ol i sisik, na pret.

14, 15. (a) Taim Pol i toktok long ol wanpasindia bilong em, bilong wanem em i kamapim gen tok lukaut em i bin mekim bipo? (b) Yumi inap kisim wanem skul long gutpela tok bilong Pol?

¹⁴ Orait nau Pol i sanap. Em i kamapim gen tok lukaut em i bin mekim, tasol  em i no mekim bilong krosim ol seila, nogat. Ol samting i wok long kamap i soim olsem i gutpela moa sapos ol i harim tok bilong em. Bihain em i tok: “Nau mi tokim yupela long no ken pret, long wanem, i no gat wanpela bilong yupela bai lusim laip bilong em, nogat, sip tasol bai lus.” (Apo. 27:21, 22) Ol dispela tok i mekim gut bel bilong ol dispela man. Pol tu i amamas tru olsem Jehova i bin givim em dispela gutpela tok bilong autim long ol man long sip. Em i bikpela samting long yumi tingim olsem Jehova i save tingim laip bilong olgeta wan wan man. Olgeta man i bikpela samting long ai bilong em. Aposel Pita i tok: “Jehova . . . i no laik bai wanpela i kisim bagarap. Em i laik bai olgeta i tanim bel.” (2 Pita 3:9) Em i bikpela samting tru olsem yumi mas wok strong long autim gutpela tok bilong Jehova long planti man! Laip bilong ol man i dia tumas, inap lus.

¹⁵ Pol i bin autim tok long planti man long sip olsem em i ‘bilip na wetim truim bilong promis God i bin mekim.’ (Apo. 26:6; Kol. 1:5) Tasol nau, i luk olsem sip bai bagarap, na Pol i tokim ol man olsem ol bai abrusim bagarap. Em i tok: “Long nait wanpela ensel . . . i kam sanap klostu long mi na i tok: ‘Pol, yu no ken pret, yu mas sanap long ai bilong Sisar. Na harim! God bai lukautim laip bilong olgeta man i stap wantaim yu long sip.’” Na Pol i tokim ol: “Olsem na yupela i no ken pret, mi bilipim God na ol samting bai kamap wankain  stret olsem mi bin harim. Tasol win bai tromoi yumi i go long wanpela ailan.”​—Apo. 27:23-26.

16, 17. Pol i beten long wanem kain taim? Dispela i kamapim wanem samting? (b) Olsem wanem tok bilong Pol i kamap tru?

¹⁶ Bihain long 2-pela wik we planti samting bilong pretim ol i bin kamap na win i sakim sip i go inap 870 kilomita, ol seila i pilim olsem senis bai kamap, ating ol i harim ol weiv i bruk long nambis. Ol i daunim ol anka i stap long stan o baksait bilong sip bambai sip i no ken trip na ol i ken stiaim fran bilong sip i go long nambis na sua long en. Long dispela taim, ol i traim long lusim sip, tasol ol soldia i pasim ol. Pol i bin tokim ami ofisa na ol soldia olsem: “Ol dispela man i mas stap long sip, sapos nogat, yupela i no inap abrusim bagarap.” Nau sip i no meknais tumas, olsem na Pol i tokim ol man long kaikai, na i tokim ol gen olsem ol bai abrusim bagarap. Pol i “tenkyu long God long ai bilong ol.” (Apo. 27:31, 35) Taim em i mekim dispela beten bilong tok tenkyu, em i stap gutpela piksa long Luk, Aristarkus, na ol Kristen long nau. Olsem wanem? Ol beten yu save mekim long ai bilong ol narapela i strongim na mekim gut bel bilong ol?

¹⁷ Bihain long prea bilong Pol, “olgeta i no pret moa na ol i kirap kisim sampela kaikai.” (Apo. 27:36) Ol i tromoi ol beg wit i go long solwara na bai sip i no hevi tumas na inap trip antap liklik na i go sua long nambis. Taim san i kam antap, ol boskru i katim baklain bilong ol anka, slekim ol baklain bilong tupela stia o pul bilong sip long baksait, na apim liklik sel long fran bambai ol inap stiaim sip i go pas long nambis. Tasol nau fran bilong sip i pas, ating long wesan o graun malumalum, na ol strongpela weiv i wok long paitim baksait bilong sip na brukim. Sampela soldia i laik kilim i dai ol kalabusman bambai ol i no ken ranawe, tasol Julius i stopim ol. Em i tokim olgeta long swim o trip i go long nambis. Samting Pol i bin tok profet long en i kamap tru—olgeta 276 manmeri i stap laip. Yes, “olgeta i kamap gut long nambis.” Tasol ol i stap we?​—Apo. 27:44.

18-20. Olsem wanem ol manmeri bilong Malta “i mekim gutpela pasin tru”? God i wokim wanem mirakel long rot bilong Pol?

¹⁸ Ol dispela man i abrusim bagarap ol i kamap long ailan Malta, long hap saut bilong Sisili. (Lukim blok “ Malta i Stap We?”) Ol man bilong dispela ailan “i mekim gutpela pasin tru” long ol. (Apo. 28:2) Ol i wokim paia bilong ol dispela man husat i bin kamap long nambis, em ol i wet na kol nogut tru. Paia i hatim skin bilong ol, maski ples i kol na ren i pundaun. Taim ol i laitim paia, wanpela mirakel i kamap.

¹⁹ Pol i mekim samting bilong helpim olgeta. Em i bungim sampela liklik han diwai na tromoi long paia. Taim em i mekim olsem, wanpela posin snek i kam na planim tit bilong em long han bilong Pol. Ol manmeri bilong Malta i ting dispela em i strafe i kam long ol god. a

²⁰ Ol manmeri bilong Malta husat i lukim olsem snek i bin kaikaim Pol, ol i ting “bodi bilong en bai solap.” Wanpela buk i tok, tok Grik i stap long dispela ves em “tok ol dokta i save yusim.” Yumi no kirap nogut long “Luk, dispela dokta yumi laikim tumas” i yusim dispela kain tok. (Apo. 28:6; Kol. 4:14) Pol i seksekim han na snek i pundaun na Pol i no kisim bagarap.

21. (a) Kolim sampela eksampel long stori bilong Luk we em i kolim stret ol samting? (b) Pol i wokim wanem mirakel? Dispela i mekim wanem long ol manmeri bilong Malta?

²¹ Publius, em maniman i gat hap graun, na em i stap long dispela hap. Ating em i wanpela ofisa bilong Rom i stap long Malta. Luk i tok em i “namba 1 hetman bilong ailan,” Luk i yusim wankain biknem em ol i bin painim long tupela olpela rait bilong ol Malta. Inap 3-pela de, Publius i mekim gutpela pasin long Pol na ol poroman bilong em. Tasol papa bilong Publius i sik. Luk i stori stret long sik bilong em. Em i tok dispela man “i skin hat na pekpek wara.” Pol i beten na putim han antap long dispela man, na em i kamap orait. Ol manmeri bilong Malta i pilim tru dispela mirakel, na ol i bringim ol narapela sikman i kam bilong Pol i ken oraitim ol, na ol i bringim ol presen na ol samting em Pol na ol poroman bilong em i nidim.​—Apo. 28:7-10.

22. (a) Wanpela profesa i tok wanem long stori bilong Luk long raun bilong ol i go long Rom? (b) Bai yumi skelim wanem samting long neks sapta?

²² Dispela stori long raun bilong Pol long solwara em yumi bin skelim, i stret na i tru. Wanpela profesa i tok: “Stori Luk i raitim . . . em wanpela bilong ol stori long Baibel we i kamapim gut tru ol samting i bin kamap. Em i stori gut tru long save bilong ol seila long stiaim sip na i stori stret long weda samting long hap is bilong Mediterenian,” olsem na stori i mas kam long nouts wanpela man i bin raitim. Ating Luk i bin raitim ol dispela stori taim em i raun wantaim Pol. Sapos olsem, em i gat planti stori moa bilong raitim long neks hap bilong dispela raun. Wanem samting bai painim Pol taim ol i kamap long Rom? Bai yumi lukim.