1-3. (a) Wanem samting i kamap na klostu i brukim kongrigesen Kristen bilong pastaim? (b) Yumi inap kisim wanem helpim taim yumi skelim dispela stori bilong Buk Aposel?

 NAU tasol Pol na Barnabas i pinisim fes misineri raun bilong ol na ol i kam bek long taun Antiok bilong Siria na ol i amamas tru. Ol i amamas olsem Jehova i bin “opim rot long ol manmeri bilong ol arapela lain long kisim bilip.” (Apo. 14:26, 27) Tru tumas, ol manmeri long Antiok i amamas na stori long gutnius na “planti manmeri” bilong ol arapela lain i kam insait long kongrigesen long dispela hap.​—Apo. 11:20-26.

² I no longtaim na ol lain long Judia i harim olsem dispela kongrigesen i go bikpela. Tasol i no olgeta i amamas long harim dispela gutpela nius, nogat. Dispela i kirapim gen tok pait i bin stap longpela taim liklik long pasin bilong katim skin. Wanem pasin i mas stap namel long ol Juda i bilip na ol man bilong ol arapela lain i bilip? Na ol man bilong ol arapela lain i mas i gat wanem tingting long Lo Bilong Moses? Dispela samting i mekim na tok pait i go bikpela na klostu i brukim kongrigesen Kristen. Bai ol i stretim dispela hevi olsem wanem?

³ Taim yumi skelim ol dispela stori long samting i kamap long Buk Aposel, bai yumi kisim skul long planti gutpela samting. Ol dispela skul inap helpim yumi long bihainim savepasin taim ol hevi i kamap we inap brukim lain long nau.

4. Sampela Kristen i strong long ol narapela i mas bihainim wanem tingting kranki? Dispela i kamapim wanem askim?

⁴ Disaipel Luk i tok: “Sampela man i lusim Judia na kam na ol i kirap skulim ol brata olsem: ‘Yupela i mas bihainim kastam Moses i bin makim na katim skin. Sapos yupela i no mekim olsem, orait bai God i no kisim bek yupela.’” (Apo. 15:1) Baibel i no tok ol dispela man ol i Farisi paslain long ol i kamap Kristen. Tasol maski ol i Farisi o nogat, i luk olsem ol dispela man i larim ol tingting bilong ol Farisi long sait bilong lo i stiaim ol. Na tu, ating ol i giaman na tok ol i makim maus bilong ol aposel na ol  hetman long Jerusalem. (Apo. 15:23, 24) So bilong wanem ol Juda i strong yet long bihainim pasin bilong katim skin, maski inap 13 yia i go pinis God i bin tokim aposel Pita long welkamim ol man bilong ol arapela lain i kam insait long kongrigesen Kristen? a—Apo. 10:24-29, 44-48.

5, 6. (a) Bilong wanem sampela Juda Kristen i strong long bihainim yet pasin bilong katim skin? (b) Kontrak bilong katim skin i hap bilong kontrak bilong Abraham o nogat? Stori long dispela. (Lukim futnot.)

⁵ Ating i gat planti risen. Wanpela em olsem, Jehova yet i bin putim lo long ol man i mas katim skin, na dispela em wanpela mak i soim olsem ol i lain bilong em. Pasin bilong katim skin i stat long Abraham na ol wanhaus bilong em, dispela pasin i kirap paslain long Lo i kamap, na bihain i kamap hap bilong Lo. b (Wkp. 12:2, 3) Aninit long Lo Bilong Moses, ol man bilong ol arapela lain i mas katim skin bambai ol ken insait long ol bikpela bung, olsem kisim kaikai bilong Pasova. (Kis. 12:43, 44, 48, 49) Olsem na long tingting bilong ol Juda, sapos man i no katim skin, em i no klin na i samting nogut.​—Ais. 52:1.

⁶ Ol Juda Kristen i mas i gat bilip na pasin daun bambai ol inap bihainim dispela nupela tingting. Nupela kontrak i kisim ples bilong kontrak bilong Lo, olsem na sapos man i bon long lain Juda, dispela tasol i no makim olsem em i insait pinis long lain bilong God, nogat. Na long ol Juda Kristen husat i stap long ol komiuniti bilong ol Juda—na ol Kristen long Judia—ol i mas strongim bel bilong tokaut olsem ol i bilip long Krais na ol i orait long ol wanbilip bilong ol arapela lain husat i no bin katim skin.​—Jer. 31:31-33; Luk 22:20.

7. “Sampela man” i hatwok long kisimgut wanem tok?

⁷ Tru, ol lo bilong God i no bin senis. Samting i kamapim klia dispela, em nupela kontrak i kamapim astingting i stap long Lo Bilong Moses. (Mat. 22:36-40) Olsem: Long pasin bilong katim skin, Pol i tok: “Man i stap Juda long bel, em i Juda tru. Na pasin bilong em long katim skin em samting bilong bel na i kamap long rot bilong holi spirit, na i no long rot bilong wanpela lo ol i raitim.” (Rom 2:29; Lo 10:16) Tasol “sampela man” bilong Judia i no kisimgut ol dispela tok, ol i tok strong olsem God i no bin pinisim lo bilong katim skin. Yu ting ol bai redi long putim yau long tingting ol brata i kamapim?

8. Bilong wanem ol i bringim tok bilong katim skin i go long lain i bosim ol Kristen long Jerusalem?

⁸ Luk i tok moa: “Pol na Barnabas i wok long paitim toktok i go i kam wantaim ol dispela man na toktok i go bikpela. Olsem na ol i stretim rot long Pol na  Barnabas na sampela arapela bilong ol long i go long ol aposel na ol hetman long Jerusalem long stretim dispela tok.” c (Apo. 15:2) Ol i “paitim toktok i go i kam,” na dispela i kamapim klia olsem tupela sait wantaim i gat strongpela tingting na filings long dispela samting, na kongrigesen long Antiok i no inap stretim. Olsem na bilong pasin wanbel na bel isi i ken stap, kongrigesen i bihainim savetingting na ol i stretim rot long bringim dispela tok i go long “ol aposel na ol hetman long Jerusalem,” em lain i bosim ol Kristen. Yumi inap kisim wanem skul long ol elda bilong Antiok?

9, 10. Olsem wanem ol brata long Antiok na Pol na Barnabas i stap gutpela piksa long yumi long nau?

⁹ Wanpela gutpela skul yumi kisim em yumi mas trastim oganaisesen bilong God. Tingim: Ol brata long Antiok i save olsem lain i bosim ol Kristen, olgeta i bilong lain Juda. Tasol ol i bilip olsem dispela lain bai larim tok bilong God i stiaim ol long stretim dispela tok bilong katim skin. Bilong wanem i olsem? Kongrigesen i bilip olsem Jehova bai stiaim dispela samting long rot bilong holi spirit na Het bilong kongrigesen Kristen, em Jisas Krais. (Mat. 28:18, 20; Efe. 1:22, 23) Long nau, taim ol hevi i kamap, i gutpela yumi bihainim pasin bilong ol dispela bilipman long Antiok na trastim oganaisesen bilong God na Gavening Bodi bilong en, em ol Kristen God i bin makim.

¹⁰ Na tu, dispela i kirapim yumi long tingim olsem pasin daun na pasin bilong i no les kwik, i bikpela samting. Holi spirit yet i bin makim Pol na Barnabas long i go long ol man bilong ol arapela lain, tasol ol i no yusim dispela namba bilong stretim tok bilong katim skin long Antiok. (Apo. 13:2, 3) Na tu, Pol i tok: “Mi go [long Jerusalem], long wanem, Bikpela i tokim mi long go”—dispela i soim olsem God i stiaim dispela samting. (Gal. 2:2) Long nau, ol elda i wok  strong long mekim wankain pasin daun, na i no les kwik taim ol samting i kamap we inap brukim lain. Ol i no laik tok pait, nogat, ol i larim Jehova i helpim ol long rot bilong skelim ol tok bilong Baibel na ol i larim gutpela wokboi i gat savetingting i skulim na stiaim ol.​—Fili. 2:2, 3.

11, 12. Bilong wanem em i bikpela samting long wet long Jehova?

¹¹ Sampela taim, ating yumi mas wet long Jehova i kamapim klia wanpela samting. Tingim, ol brata long taim bilong Pol i mas wet i go 49 C.E. samting—klostu 13 yia kirap long taim holi spirit i makim Kornilius long 36 C.E.​—paslain long Jehova i stretim tok long ol man bilong ol arapela lain i mas katim skin o nogat. Bilong wanem planti yia i bin lus pastaim? Ating God i laik larim sampela haptaim i lus bambai ol Juda husat i gat gutpela bel i ken redi long mekim bikpela senis long tingting bilong ol. Tingim, dispela i no liklik samting! Olpela kontrak bilong katim skin em God i bin wokim wantaim gutpela tumbuna papa bilong ol, Abraham, i bin stap 1,900 yia.​—Jon 16:12.

¹² Man! Em wanpela gutpela samting tru taim gutpela Papa bilong yumi long heven husat i gat pasin bilong i no les kwik, i skulim na stretim stretim yumi! Oltaim dispela i save kamapim gutpela samting bilong helpim yumi. (Ais. 48:17, 18; 64:8) Olsem na yumi no ken strong long ol narapela i mas bihainim tingting bilong yumi, o toktok planti long ol senis i kamap long oganaisesen, o i no amamas long nupela save yumi kisim long sampela tok bilong Baibel. (Ekl. 7:8) Sapos yu luksave olsem dispela kain tingting i kamap long yu, orait beten na tingim tingim long bel ol stiatok i stap long Aposel sapta 15. d

13. Olsem wanem yumi ken bihainim pasin bilong Jehova long i no les kwik taim yumi mekim wok autim tok?

¹³ Yumi mas kisim pasin bilong i no les kwik, taim yumi stadi wantaim ol man long Baibel, na ol i hatwok long lusim ol bilip giaman o ol kastam i no stret wantaim Baibel. Long kain taim olsem, yumi mas larim sampela haptaim i lus na bai spirit bilong God i ken mekim wok long bel bilong sumatin. (1 Kor. 3:6, 7) Na tu, yumi mas beten long dispela samting, na long taim i stret, God bai helpim yumi long save long samting yumi mas mekim.​—1 Jon 5:14.

14, 15. Olsem wanem kongrigesen long Antiok i onarim Pol, Barnabas, na ol narapela i go wantaim ol? Olsem wanem ol dispela brata i strongim ol narapela wanbilip?

¹⁴ Luk i stori moa: “Kongrigesen i kisim ol dispela man i go na lusim ol long hap rot, na taim ol i wokabaut i go, ol i kamap long Fonisia na Samaria na ol i stori gut long olsem wanem ol manmeri bilong ol arapela lain i baut na i go long God. Na ol i mekim na ol brata i kisim bikpela amamas.” (Apo. 15:3) Kongrigesen i soim pasin laikim Kristen taim ol i wokabaut wantaim Pol, Barnabas, na ol narapela na lusim ol long hap rot. Dispela i soim olsem ol i onarim ol dispela brata na ol i laik bai God i ken blesing ol. Ol brata long Antiok i stap gutpela piksa long yumi  long dispela pasin tu! Olsem wanem? Yu save givim ona long ol bratasista Kristen bilong yu, na “moa yet long ol hetman husat i wok hat long tokaut long tok bilong God na skulim ol man long en”?​—1 Tim. 5:17.

¹⁵ Taim ol dispela brata i wokabaut i go, ol i strongim ol wanbilip Kristen long Fonisia na Samaria, ol i “stori gut” long ol ekspiriens ol i bin kisim taim ol i autim tok long ol man bilong ol arapela lain. Ating namel long ol man i harim tok, i gat ol Juda i bilip em ol i bin ranawe taim ol man i kilim Stiven i dai. Long nau tu, ol ripot i soim olsem Jehova i blesim wok bilong kamapim ol disaipel, na dispela i save strongim bel bilong ol brata bilong yumi, na moa yet ol brata i karim ol hevi. Olsem wanem? Yu kisim gutpela helpim long rot bilong ol kain ripot olsem taim yu go long ol miting Kristen, ol kibung, na long rot bilong ritim ol ekspiriens na laip stori long ol buk na nius bilong yumi o long jw.org?

16. Wanem samting i soim olsem tok bilong katim skin i go bikpela?

¹⁶ Bihain long ol i wokabaut inap 550 kilomita samting i go long hap saut, dispela lain husat i bin lusim Antiok i kamap long hap ol i laik go long en. Luk i tok: “Taim ol i kamap long Jerusalem, kongrigesen na ol aposel na ol hetman i tok welkam long ol. Na Pol na Barnabas i tokim ol long olgeta samting God i bin mekim long han bilong tupela.” (Apo. 15:4) Tasol “sampela bilong lain Farisi, em ol i bin kisim bilip, ol i lusim sia bilong ol na sanap na tok: ‘Orait ol bilipman i no bilong lain Juda i mas katim skin bilong ol na yupela i mas tokim ol long bihainim Lo Bilong Moses.’” (Apo. 15:5) I klia tru olsem dispela tok long ol man bilong ol arapela lain i kamap Kristen i mas katim skin, i go bikpela na ol i mas stretim.

17. Husat i insait long lain i bosim ol Kristen long Jerusalem? Bilong wanem “ol hetman” i insait long dispela lain?

¹⁷ Provep 13:10 i tok: “Savetingting i bilong ol man i save askim long kisim edvais.” Olsem dispela stiatok i makim, “ol aposel na ol hetman i bung wantaim long skelim [dispela tok bilong katim skin].” (Apo. 15:6) “Ol aposel na ol hetman” i makim maus bilong olgeta kongrigesen Kristen, wankain olsem lain Gavening Bodi i mekim long nau. Tasol bilong wanem “ol hetman” i wok wantaim ol aposel? Tingim, ol man i bin kilim aposel Jems i dai, na inap sampela haptaim, aposel Pita i stap long kalabus. Ating wankain samting inap painim ol narapela  aposel tu. Olsem na ol narapela man em God i bin makim long holi spirit, ol inap lukautim ol kongrigesen.

18, 19. Pita i mekim wanem tok i gat strong? Dispela mas i givim wanem tingting long ol man i harim tok bilong em?

¹⁸ Luk i tok moa: “Ol i toktok i go i kam inap longpela taim liklik, na Pita i sanap na tokim ol: ‘Ol brata, yupela i save pinis olsem long bipo God i bin makim mi namel long yupela bai ol manmeri bilong ol arapela lain i ken harim tok bilong gutnius na kisim bilip. God i save long tingting i stap long bel bilong man, na taim em i givim holi spirit long ol, em i kamapim klia olsem em i orait long ol, wankain olsem em i bin mekim long yumi. Na em i no mekim olsem ol i narapela kain long yumi, nogat. Ol i bilip na long dispela as em i mekim bel bilong ol i kamap klin.’” (Apo. 15:7-9) Wanpela buk i tok, tok Grik ol i tanim olsem “toktok i go i kam” long ves 7, inap makim tu “painim,” na ‘kwestenim.’ I luk olsem ol brata i gat narapela narapela tingting, na ol i autim tingting bilong ol.

¹⁹ Tok bilong Pita i gat strong i kirapim olgeta long tingim olsem em i bin stap taim God i makim ol fes man bilong ol arapela lain husat i no bin katim skin—Kornilius na wanhaus bilong em—long holi spirit long 36 C.E. So sapos Jehova i mekim wankain pasin long ol Juda na ol man bilong ol arapela lain, orait ol man i no gat rait long skelim ol. Na tu, bilip long Krais i mekim na man i gat klinpela bel long ai bilong God, na i no pasin bilong bihainim Lo Bilong Moses.​—Gal. 2:16.

20. Olsem wanem ol man husat i strong long katim skin, ol i “traim God”?

²⁰ Long rot bilong tok bilong God na holi spirit, Pita i pinisim tok olsem: “Orait bilong wanem yupela i laik traim God na putim wanpela hap plang antap long nek bilong ol disaipel? Em hap plang ol tumbuna bilong yumi na yumi tu i no inap karim. Tasol nau yumi ol Juda i bilip olsem God bai kisim bek yumi long rot bilong bikpela pasin helpim bilong Bikpela Jisas, na ol disaipel i no bilong lain Juda ol tu i bilip olsem.” (Apo. 15:10, 11) Tru tumas, ol man i strong long katim skin, ol i “traim God,” olsem ol i traim pasin bilong God long i no les kwik. Ol i strong long ol man bilong ol arapela lain i mas bihainim wanpela lo em ol Juda yet i no inap bihainim tru, olsem na lo i tok ol i mas i dai. (Gal. 3:10) Mobeta ol Juda husat i harim tok Pita i mekim, i mas pilim tru bikpela pasin helpim em God i kamapim long rot bilong Jisas.

21. Bilong helpim tok bilong ol aposel, Barnabas na Pol i stori long wanem samting?

²¹ I klia tru olsem tok bilong Pita i sutim tru bel bilong ol man i harim, bikos “olgeta manmeri i pasim maus na stap isi.” Bihain long dispela, Barnabas na Pol i stori long “ol mirakel na ol narakain samting em God i wokim long han bilong tupela namel long ol manmeri bilong ol arapela lain.” (Apo. 15:12) Em nau, ol aposel na ol hetman inap skelim gut ol samting na ol inap wokim disisen i kamapim klia laik bilong God long pasin bilong katim skin.

22-24. (a) Olsem wanem Gavening Bodi long nau i bihainim pasin bilong lain i bosim ol Kristen long bipo? (b) Olsem wanem olgeta elda inap soim rispek long ol man i go pas?

²² Long nau tu, taim ol memba bilong Gavening Bodi i bung, ol i save larim Tok  Bilong God i stiaim ol na ol i beten strong long kisim holi spirit. (Sng. 119:105; Mat. 7:7-11) Bilong wokim ol disisen we inap kamapim klia laik bilong God, olgeta wan wan memba bilong Gavening Bodi i save kisim wanpela lista bilong ol samting ol bai toktok long en long neks miting, bambai ol i ken tingim gut ol dispela samting na beten long en. (Prov. 15:28) Taim ol i bung, ol dispela brata em God i makim long holi spirit, ol i save kamapim tingting bilong ol na ol i mekim long pasin rispek. Na tu, ol i save mekim wok long Baibel planti taim long ol dispela miting.

²³ Ol elda bilong kongrigesen i mas bihainim dispela pasin. Sapos bihain long ol i skelim wanpela bikpela samting long miting bilong ol elda na ol i no inap stretim, orait lain elda i ken kisim helpim long brens ofis i stap long hap bilong ol, o ol i ken kisim helpim long ol brata em brens i makim, olsem ol wasman raun. Na ating brens inap raitim pas i go long Gavening Bodi, sapos ol i gat wok long mekim olsem.

²⁴ Tru tumas, Jehova i save blesim ol man husat i rispektim pasin tiokratik, bihainim pasin daun, stap gut long God, na i no les kwik. Olsem neks sapta bai kamapim, ol man husat i mekim olsem, God bai givim gutpela pe long ol, ol bai stap wanbel na bel isi tru, na em bai blesim ol.