1, 2. Pita na Jon i wokim wanem mirakel klostu long geit bilong tempel?

 PLANTI manmeri i go i kam long apinun taim san i lait i stap. Ol Juda husat i givim bel long lotu na ol disaipel bilong Krais i wok long i kam long hap we tempel i stap. Klostu nau em bai “taim bilong beten.” a (Apo. 2:46; 3:1) Pita na Jon i wokabaut namel long ol dispela manmeri na i go long geit bilong tempel, ol i kolim Naispela Geit. Namel long bikpela nois bilong ol manmeri i toktok na wokabaut i go i kam, wanpela man em mama i bin karim em lek nogut, na em i gat 40 krismas samting, i wok long singaut long mani.​—Apo. 3:2; 4:22.

² Taim Pita na Jon i kam klostu, dispela man lek nogut i singaut long mani olsem em i save mekim. Ol aposel i stop, na dispela man i lukluk long tupela na wet long kisim samting. Pita i tok: “Mi no gat silva na gol, tasol samting mi gat mi bai givim long yu. Long nem bilong Jisas Krais dispela Nasarin, yu kirap na wokabaut!” Piksaim long tingting samting i kamap, ol manmeri i kirap nogut taim Pita i holim han bilong dispela man lek nogut na—festaim long laip bilong em—em i sanap! (Apo. 3:6, 7) Olsem wanem? Yu inap piksaim long tingting dispela man i lukluk long tupela lek bilong em i kamap orait na em i traim long wokabaut isi isi? Em long dispela as na em i kirap long kalap kalap na singaut litimapim nem bilong God!

3. Ol manmeri wantaim man em lek bilong em i kamap orait, ol inap kisim wanem gutpela presen tru?

³ Ol manmeri i ran i go bungim Pita na Jon long veranda bilong Solomon, em ples we Jisas i bin sanap na skulim ol man long en. Long dispela hap, Pita i tokim ol long as tru bilong samting i bin kamap. (Jon 10:23) Em i tokim ol na dispela man em lek bilong em i kamap orait, long ol inap kisim presen i winim silva o gol. Dispela presen i no givim gutpela helt tasol long man, nogat. Ol inap tanim bel, na ol sin bilong ol i ken tekewe, na ol inap kamap ol disaipel bilong Man em Jehova i makim olsem “Nambawan Gopas bilong laip,” em Jisas Krais.​—Apo. 3:15.

4. (a) Mirakel bilong oraitim man lek nogut i kirapim wanem samting? (b) Bai yumi kisim bekim bilong wanem 2-pela askim?

 ⁴ Em wanpela narakain de! Lek bilong wanpela man i kamap orait na em inap wokabaut. Rot i op long planti tausen manmeri long kisim stretpela save na kliagut long tok bilong God bambai ol inap wokabaut long pasin God i laikim. (Kol. 1:9, 10) Na tu, ol samting i kamap long dispela de i kirapim ol bikman long birua long ol disaipel bilong Krais, na ol i traim long stopim ol disaipel long inapim wok bilong autim tok bilong Kingdom em Jisas i bin tokim ol long mekim. (Apo. 1:8) Yumi inap kisim wanem skul long pasin bilong Pita na Jon long autim tok long ol manmeri, em “tupela i no bin kisim bikpela skul na tupela i man nating tasol”? b (Apo. 4:13) Na olsem wanem yumi inap bihainim pasin bilong tupela na bilong ol arapela disaipel long karim hevi bilong pasin birua?

5. Yumi kisim wanem skul long pasin bilong Pita long autim tok long ol manmeri?

⁵ Pita na Jon i sanap long ai bilong ol manmeri, na ol i save olsem i no longtaim i go pinis, ating sampela bilong ol dispela manmeri i bin strong long ol i mas nilim Jisas long pos. (Mak 15:8-15; Apo. 3:13-15) Tingim pasin bilong Pita long i no pret taim em i tokaut olsem dispela man lek nogut i kamap orait long nem bilong Jisas. Pita i no daunim strong bilong tok i tru, nogat. Em i tokaut stret olsem ol dispela lain i gat asua long kilim Krais i dai. Tasol Pita i no bel nogut long ol dispela manmeri bikos ol ‘i no bin save na ol i mekim ol dispela samting.’ (Apo. 3:17) Em i tingim ol olsem ol wanlain Juda na em i toktok long ol gutpela samting Kingdom bai kamapim. Sapos ol i tanim bel na bilip long Krais, orait Jehova bai ‘givim nupela strong long ol.’ (Apo. 3:19) Yumi tu i mas strongim bel na tokaut stret long kot bilong God klostu nau bai kamap. Tasol yumi no ken mekim hatpela pasin o skelim man taim yumi autim tok long ol. Nogat, yumi mas tingim ol man yumi autim tok long ol olsem ol inap kamap ol wanbilip bilong yumi, na olsem Pita, yumi mas toktok long ol gutpela samting Kingdom bai kamapim.

6. Olsem wanem Pita na Jon i soim olsem ol i gat pasin daun na ol i save long mak bilong strong bilong ol?

⁶ Ol aposel i save long mak bilong strong bilong ol. Ol i no tingting long kisim biknem long mirakel ol i bin mekim. Pita i tokim ol manmeri: “Bilong wanem yupela i lukluk long mitupela, olsem yupela i ting strong bilong mitupela yet o pasin bilong mitupela long givim bel tru long God i mekim na dispela man i wokabaut?” (Apo. 3:12) Pita na ol narapela aposel i save olsem wok autim tok bilong ol inap kamapim gutpela kaikai long strong bilong God tasol, na i no long strong bilong ol yet. Olsem na long pasin daun ol i litimapim nem bilong Jehova na Jisas long ol gutpela wok ol i mekim.

7, 8. (a) Yumi inap givim wanem presen long ol man? (b) Olsem wanem truim bilong tok promis bilong “stretim bek olgeta samting” i kamap long nau?

⁷ Taim yumi autim tok bilong Kingdom, yumi mas soim wankain pasin daun.  Tru, spirit bilong God i no givim strong long ol Kristen long nau long wokim ol mirakel bilong oraitim ol man. Tasol maski i olsem, yumi inap helpim ol man long kisim pasin bilong bilip long God na Krais, na long kisim wankain presen em Pita i bin givim long ol wanlain Juda long bipo—olsem rot i op long sin bilong ol i ken tekewe, na Jehova i ken givim nupela strong long ol. Long olgeta yia, planti tausen manmeri i kisim dispela presen na ol i kamap ol disaipel bilong Krais i baptais pinis.

⁸ Tru tumas, yumi stap long taim bilong “stretim bek olgeta samting” em Pita i bin stori long en. Kingdom i kamap long heven long 1914 bilong truim tok God i bin mekim “long maus bilong ol profet holi bilong em long bipo.” (Apo. 3:21; Sng. 110:1-3; Dan. 4:16, 17) Bihain liklik long dispela, Krais i kirap bosim wok bilong kamapim bek lotu i tru long graun. Olsem na planti milion manmeri i kam insait long lain bilong God na stap wanbel, na ol i stap aninit long Kingdom Bilong God. Ol i rausim olpela pasin bilong ol na ol i “kisim nupela pasin em laik bilong God yet i as bilong en.” (Efe. 4:22-24) Olsem man lek nogut i bin kamap orait, dispela narakain wok i kamap long rot bilong spirit bilong God, na i no long strong bilong man. Olsem Pita, yumi mas yusim gut Tok Bilong God long skulim ol narapela na no ken pret. Taim yumi helpim ol man long kamap disaipel bilong Krais, dispela i kamap long strong bilong God, na i no long strong bilong yumi yet.

9-11. (a) Tok bilong Pita na Jon i mekim wanem long ol bikman Juda? (b) Ol aposel i tingting strong long mekim wanem?

⁹ Man bipo i lek nogut i kalap na singaut na ol tok bilong Pita i mekim na planti manmeri i kirap nogut na ol i toktok i go i kam. Olsem na kepten bilong tempel—em man ol i makim bilong bosim wok bilong was long eria bilong tempel—na ol bikpris i kam kwiktaim bilong painimaut samting i kamap. Ating ol dispela bikpris ol i Sadyusi, na ol i maniman na man i gat namba long wok politik. Ol i mekim ol samting bilong stap wanbel wantaim ol Rom, na ol i sakim lo ol i kisim long maus bilong ol man em lo ol Farisi i laikim tru, na ol i daunim bilip bilong kirap bek. c Ol i bel kaskas stret taim ol i lukim Pita na Jon i stap long tempel, na tupela i no surik long skulim ol man olsem Jisas i kirap bek pinis!

¹⁰ Ol dispela man i belhat na putim Pita na Jon long kalabus, na long de bihain ol i sanapim ol long ai bilong suprim kot bilong Juda. Long tingting bilong ol dispela bikman i gat pasin antap, Pita na Jon “i no bin kisim bikpela skul na tupela i man nating tasol” na tupela i no gat rait long skulim ol man long tempel. Tupela i no bin skul long ol bikpela skul bilong lotu. Tasol pasin bilong tupela long bilip strong na tokaut stret i mekim na ol man long kot i kirap nogut. Bilong wanem tok bilong Pita na Jon i gat strong? Long wanem, “bipo tupela i bin stap wantaim Jisas.” (Apo. 4:13) Bikpela bilong ol i bin skulim ol olsem man i gat namba na i no olsem ol saveman bilong lo.​—Mat. 7:28, 29.

¹¹ Kot i tokim ol aposel long ol i no ken autim tok moa. Long dispela taim, tok  bilong kot i gat bikpela strong. Sampela wik paslain long dispela, taim Jisas i sanap long ai bilong dispela kot, ol i tok: “Em i mas i dai.” (Mat. 26:59-66) Tasol Pita na Jon i no pret taim tupela i sanap long ai bilong ol dispela man i gat namba, planti mani, na ol winim bikpela skul. Long pasin rispek, tupela i tok: “Yupela i ting wanem pasin i stret long ai bilong God? Mitupela i mas bihainim tok bilong yupela o mitupela i mas bihainim tok bilong God? Yupela yet i ken skelim. Tasol mitupela i no inap pasim maus long ol samting mitupela i bin lukim na harim.”​—Apo. 4:19, 20.

12. Wanem samting inap helpim yumi long kisim pasin bilong bilip na strongim bel?

¹² Olsem wanem? Yu inap strongim bel olsem tupela aposel? Yu pilim olsem wanem taim rot i op long yu ken autim tok long ol maniman, ol saveman, o ol man i gat namba long komiuniti bilong yu? Olsem wanem sapos ol wanblut, wanskul, o ol wanwok i tok bilas long samting yu bilip long en? Bai yu pret? Sapos olsem, yu inap winim dispela pret. Taim Jisas i stap long graun, em i bin skulim ol aposel long pasin bilong sambai long bilip bilong ol na mekim olsem long pasin rispek. (Mat. 10:11-18) Bihain long Jisas i kirap bek, em i tok promis long ol disaipel olsem em bai stap yet wantaim ol long “olgeta de i go inap long pinis bilong dispela taim.” (Mat. 28:20) Long nau, Jisas i stiaim “gutpela wokboi i gat savetingting” na ol i skulim yumi long pasin bilong sambai long ol bilip bilong yumi. (Mat. 24:45-47; 1 Pita 3:15) Ol i mekim olsem long rot bilong ol tok yumi kisim long ol miting bilong kongrigesen, olsem long Kristen Laip na Wok Autim Tok, na long rot bilong ol buk na nius bilong Baibel olsem long ol atikol “Bible Questions Answered” long jw.org websait. Olsem wanem? Yu mekim gutpela wok long ol dispela samting? Sapos olsem, orait bilip na pasin bilong yu long strongim bel bai kamap strong moa. Na olsem ol aposel, bai yu no larim wanpela samting i pasim yu long tokaut long ol gutpela tok i tru bilong Baibel yu bin lainim.

13, 14. Yumi mas mekim wanem taim ol narapela i birua long yumi? Bilong wanem yumi mas mekim olsem?

¹³ Taim ol i larim Pita na Jon i go, wantu tupela i go bung wantaim ol narapela long kongrigesen. Na olgeta i “beten long God” i ken strongim ol long autim tok  yet. (Apo. 4:24) Pita i save olsem em i no savetingting long bilip long strong bilong em yet taim em i traim long mekim laik bilong God. Sampela wik paslain, em i bin tokim Jisas olsem: “Maski olgeta arapela i pundaun long samting i kamap long yu, bai mi no inap tru long pundaun!” Tasol olsem Jisas i bin tok profet, kwiktaim Pita i larim pasin bilong pret long man i kirapim em long tok em i no save long pren na tisa bilong em. Tasol Pita i kisim skul long dispela pasin kranki bilong em.​—Mat. 26:33, 34, 69-75.

¹⁴ Pasin bilong tingting strong long mekim samting, dispela tasol i no inap helpim yu long inapim wok bilong yu long autim tok bilong Krais. Bihainim gutpela piksa bilong Pita na Jon taim ol birua i laik bagarapim bilip bilong yu o traim stopim yu long autim tok. Beten long Jehova i ken strongim yu. Kisim helpim long kongrigesen, na tokim ol elda na ol strongpela bratasista long ol hevi yu karim. Ol beten bilong ol narapela i gat strong bilong helpim yu.​—Efe. 6:18; Jems 5:16.

15. Bilong wanem ol lain husat i lusim wok autim tok inap sampela haptaim, ol i no ken bel hevi?

¹⁵ Sapos presa i mekim na yu lusim wok autim tok inap sampela haptaim, orait no ken bel hevi. Tingim, ol aposel tu i bin lusim wok autim tok inap sampela haptaim bihain long Jisas i dai, tasol bihain ol i kirap mekim wok gen. (Mat. 26:56; 28:10, 16-20) No ken larim ol rong yu bin mekim bipo i daunim yu. I gutpela sapos yu kisim skul long ol hevi i bin painim yu na mekim wok long dispela bilong strongim ol narapela.

16, 17. Yumi inap kisim wanem skul long beten ol disaipel bilong Krais i mekim long Jerusalem?

¹⁶ Yumi mas beten long wanem samting taim ol bikman bilong graun i birua long yumi? Tingim, ol disaipel i no bin beten long ol hevi i no ken painim ol, nogat. Ol i tingim tok bilong Jisas: “Sapos ol i bin mekim nogut long mi, orait ol bai mekim nogut long yupela tu.” (Jon 15:20) Ol dispela gutpela disaipel i askim Jehova long “tingim” ol tok ol birua i mekim bilong pretim ol. (Apo. 4:29) Ol disaipel i holim stretpela tingting, ol i save olsem pasin birua ol man i mekim long ol, dispela i truim tok profet. Olsem Jisas i bin lainim ol long beten, ol i save olsem laik bilong God “i mas kamap long graun,” maski ol hetman bilong graun i mekim wanem tok.​—Mat. 6:9, 10.

¹⁷ Bilong mekim laik bilong God, ol disaipel i beten long Jehova olsem: “Helpim ol wokboi bilong yu long autim yet tok bilong  yu na no ken pret.” Wantu Jehova i mekim wanem? “Dispela hap ol i bung long en i guria. Na holi spirit i pulap long olgeta bilong ol na ol i autim tok bilong God na ol i no pret.” (Apo. 4:29-31) I no gat wanpela samting inap pasim laik bilong God long kamap. (Ais. 55:11) Maski i luk olsem i no gat rot, o ol birua bilong yumi i strong tru, sapos yumi beten long God, yumi ken bilip olsem em bai strongim yumi long autim tok bilong em na i no pret.

18. Ol disaipel bilong kongrigesen long Jerusalem i mekim wanem bilong helpim narapela narapela?

¹⁸ I no longtaim na dispela nupela kongrigesen long Jerusalem i go bikpela na i gat winim 5,000 disaipel. d Maski ol i bilong narapela narapela sindaun, ol i stap “wanbel.” Ol i holim wankain tingting na laik. (Apo. 4:32; 1 Kor. 1:10) Ol disaipel i beten long Jehova i blesim hatwok bilong ol, na tu, ol i strongim bilip bilong narapela narapela na helpim ol taim ol i sot long ol samting. (1 Jon 3:16-18) Olsem: Disaipel Josep, narapela nem bilong em Barnabas, i bin salim graun bilong em, na em i givim dispela mani olgeta bilong helpim ol nupela disaipel i kam long ol longwe ples bambai ol inap stap longpela taim liklik long Jerusalem bilong kisim sampela moa save long nupela bilip bilong ol.

19. Bilong wanem Jehova i kilim Ananaias na Safaira i dai?

¹⁹ Tupela marit, Ananaias na Safaira tu i bin salim graun bilong ol na i givim mani olsem kontribiusen. Ol i giaman olsem ol i givim mani olgeta, tasol “long pasin hait [ol] i holim bek sampela mani.” (Apo. 5:2) Jehova i kilim tupela i dai, i no olsem mani ol i givim i liklik tumas, nogat, astingting bilong ol long givim mani i no stret na ol i mekim pasin giaman. Ol i “no bin giamanim ol man, nogat, [ol i] laik giamanim God.” (Apo. 5:4) Olsem ol man bilong tupela maus em Jisas i bin tok strong long ol, Ananaias na Safaira i laik bai ol man i litimapim nem bilong ol na ol i no tingim pasin bilong God long orait long ol.​—Mat. 6:1-3.

20. Yumi kisim wanem skul long pasin bilong givim samting long Jehova?

²⁰ Planti milion Witnes long nau i bihainim pasin bilong ol gutpela disaipel long Jerusalem long taim bilong ol aposel, na long laik bilong ol yet, ol i givim ol kontribiusen bilong sapotim wok autim tok long olgeta hap. I no gat wanpela i fosim ol long givim taim o mani bilong ol bilong sapotim dispela wok. Tru tumas, Jehova i no laik bai yumi bel hevi long mekim wok bilong em o yumi mekim wok bilong em bikos ol narapela i fosim yumi. (2 Kor. 9:7) Taim yumi givim ol samting, Jehova i no tingting long hamas yumi givim, nogat, em i tingim wanem samting i kirapim yumi long givim. (Mak 12:41-44) Yumi no laik kamap olsem Ananaias na Safaira, na larim laik bilong kisim biknem o pasin bilong tingim yumi yet i kirapim yumi long mekim wok bilong God. Olsem Pita, Jon, na Barnabas, pasin bilong laikim tru God na ol narapela i mas kirapim yumi long mekim wok bilong Jehova.​—Mat. 22:37-40.