1-3. Jisas i mekim wanem taim em i laik lusim ol aposel? Wanem ol askim i kamap?

 OL APOSEL i amamas tru long ol gutpela samting i bin kamap long ol wik i go pinis, na ol i no laik bai dispela i pinis! Kirap bek bilong Jisas i mekim na bel hevi bilong ol i pinis na ol i amamas gen. Insait long 40 de, Jisas i kamap long ol disaipel inap planti taim, em i skulim ol na strongim bel bilong ol. Tasol nau em laspela taim Jisas bai kamap long ol.

² Ol aposel i sanap long maunten Oliv wantaim Jisas, na ol i putim gut yau long olgeta tok Jisas i mekim. Taim em i pinisim tok—ol i pilim olsem tok i pinis i hariap tumas—em i apim tupela han bilong em na blesim ol. Orait nau em i kirap lusim graun na wok long i go antap. Ol aposel i lukluk i stap long em taim em i go antap. Bihain, klaut i haitim em na ol i no  inap lukim em moa. Jisas i go pinis, tasol ol aposel i lukluk yet i go antap long skai.​—Luk 24:50; Apo. 1:9, 10.

³ Dispela samting i kamapim bikpela senis long laip bilong ol aposel bilong Jisas. Bikman bilong ol, Jisas Krais, i go pinis long heven, olsem na ol bai mekim wanem? Yumi ken bilip tru olsem Bikman bilong ol i bin redim ol long mekim wok em i bin kirapim. Olsem wanem em i redim ol long mekim dispela bikpela wok, na ol i mekim wanem? Dispela i mekim wanem long ol Kristen long nau? Namba 1 sapta bilong Buk Aposel i bekim gut ol dispela askim.

4. Olsem wanem Luk i kirapim ol tok bilong em long Buk Aposel?

⁴ Bilong kirapim Buk Aposel, Luk i raitim tok i go long Tiofilus, em seim man Luk i bin raitim tok i go long em long Gutnius Bilong Luk. a Long kirap bilong Buk Aposel, Luk i kamapim gen ol bikpela tok i stap long pinis bilong Gutnius em i bin raitim, na long dispela rot em i soim olsem Buk Aposel i mekim sampela tok moa long ol samting dispela Gutnius i stori long en. Tasol em i yusim ol narapela wed na kamapim sampela nupela save.

5, 6. (a) Wanem samting i helpim ol disaipel bilong Jisas long stap strong long bilip? (b) Olsem wanem bilip bilong ol Kristen long nau i gat as tru bilong en?

⁵ Wanem samting i helpim ol disaipel bilong Jisas long stap strong long bilip? Aposel 1:3 i tok: “Em i mekim planti samting bilong kamapim klia long ol olsem em i stap laip.” Long Baibel, Luk tasol, em “dispela dokta” i yusim tok “kamapim klia.” (Kol. 4:14) Em wanpela tok ol i yusim long taim ol i raitim ol samting i stori long marasin samting bilong makim samting i stap ples klia, o i kamapim samting we i gat risen long bilip long en. Samting i painim Jisas i kamapim klia kain samting olsem. Sampela taim Jisas i kamap long 1-pela o 2-pela aposel, na sampela taim long olgeta aposel, na wanpela taim em i kamap long winim 500 bilipman. (1 Kor. 15:3-6) Olgeta dispela samting i strongim tru bilip bilong ol disaipel bilong Jisas!

⁶ Long nau tu, i gat “planti samting bilong kamapim klia” olsem bilip bilong ol trupela Kristen i gat as tru bilong en. Olsem wanem? I gat ol samting i kamapim klia olsem Jisas i bin stap long graun, na em i bin dai bilong baim bek sin bilong yumi, na kirap bek? Yes, i gat! Stori bilong ol man long Baibel husat i bin lukim ol dispela samting, i olsem evidens bilong ol dispela samting. Pasin bilong stadi gut long ol dispela stori na beten askim God long helpim yumi long bihainim ol dispela tok, inap strongim tru bilip bilong yumi. Tingim, taim yumi gat ol evidens, bilip bilong yumi i gat as tru bilong en, na i no olsem yumi bilip nating tasol, nogat. Yumi mas i gat bilip bambai yumi ken kisim laip oltaim.​—Jon 3:16.

7. Olsem wanem Jisas i stap gutpela piksa long ol disaipel long pasin bilong autim tok na skulim ol man?

 ⁷ Na tu, Jisas i bin tokaut “long ol samting bilong Kingdom Bilong God.” Olsem, em i kamapim mining bilong ol tok profet i soim olsem Mesaia i mas karim pen na i dai. (Luk 24:13-32, 46, 47) Taim Jisas i stori gut long wok bilong em olsem Mesaia, em i kamapim klia tok bilong Kingdom Bilong God, bikos em i Man Bilong Kamap King. Oltaim Jisas i autim tok bilong Kingdom, na ol disaipel bilong em long nau i save autim tok long wankain samting.​—Mat. 24:14; Luk 4:43.

8, 9. (a) Ol aposel bilong Jisas i gat wanem 2-pela tingting kranki? (b) Olsem wanem Jisas i stretim tingting bilong ol aposel? Dispela i givim wanem skul long ol Kristen long nau?

⁸ Taim ol aposel i bung long maunten Oliv, ol i mekim laspela bung bilong ol wantaim Jisas long graun. Ol i askim em: “Bikpela, ating yu bai stretim bek kingdom bilong Israel long nau?” (Apo. 1:6) Long rot bilong dispela askim, ol aposel i kamapim klia olsem ol i gat 2-pela tingting kranki. Namba 1, ol i ting Kingdom Bilong God bai kamap long lain Israel. Namba 2, ol i ting dispela Kingdom bai kirap mekim wok wantu tasol “long nau”—long taim bilong ol aposel. Olsem wanem Jisas i bin helpim ol long stretim tingting bilong ol?

⁹ Jisas i save olsem i no longtaim na ol disaipel bai kisim stretpela tingting long dispela namba 1 samting ol i bin tingting kranki long en. Inap 10-pela de bihain, ol disaipel bai lukim nupela lain i kamap, em lain Israel bilong God. Lain Israel bilong skin bai i no stap moa olsem lain bilong God. Bilong stretim namba 2 tingting kranki bilong ol, Jisas i tokim ol olsem: “Em i no samting bilong yupela long save long ol taim na ol de. Papa i tok em samting bilong em yet long makim.” (Apo. 1:7) Jehova em i Man Bilong Bosim Taim. Taim Jisas i stap long graun, em yet i tok olsem Pikinini tu i no save long “dispela de na dispela aua” em pinis bai kamap, “Papa tasol i save.” (Mat. 24:36) Long nau tu, sapos ol Kristen i tingting tumas long wanem taim pinis bilong pasin nogut bilong dispela graun bai kamap, i olsem ol i tingting planti long samting em i no wok bilong ol long wari long en.

10. Yumi mas kisim wanem pasin bilong ol aposel? Bilong wanem yumi mas mekim olsem?

¹⁰ Tasol nogut yumi kisim tingting kranki long ol aposel bilong Jisas, em ol man i gat strongpela bilip. Long pasin daun ol i kisim tok bilong stretim ol. Na maski tingting kranki i kirapim ol long mekim dispela askim, em i kamapim klia olsem ol i gat gutpela bel. Planti taim Jisas i bin tokim ol disaipel bilong em olsem: “Yupela i mas was i stap.” (Mat. 24:42; 25:13; 26:41) Ol i was i stap na tingim tok bilong God, na ol i wet long lukim ol samting i kamapim klia olsem klostu nau Jehova bai mekim sampela samting. Yumi tu i mas mekim olsem long nau. Yumi stap long “taim bilong las de,” olsem na em i bikpela samting moa long yumi mas was i stap.​—2 Tim. 3:1-5.

11, 12. (a) Jisas i givim wanem wok long ol disaipel? (b) Bilong wanem i stret Jisas i stori long holi spirit taim em i givim wok bilong autim tok?

¹¹ Jisas i tokim ol aposel long samting ol i mas tingim tru. Em i tok: “Yupela bai  kisim strong taim holi spirit i kam i stap long yupela. Na yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) Pastaim ol i mas autim tok long kirap bek bilong Jisas long Jerusalem, em ples we ol man i bin kilim Jisas i dai. Na bihain, dispela tok bai i go long olgeta hap bilong Judia, na long Samaria, na long olgeta narapela hap.

¹² I stret Jisas i tokim ol long mekim wok bilong autim tok bihain long em i promis gen long salim holi spirit i kam bilong helpim ol. Dispela em i wanpela bilong winim 40 taim em Buk Aposel i kolim tok “holi spirit.” Planti taim dispela buk bilong Baibel i kamapim klia olsem yumi no inap mekim laik bilong Jehova sapos holi spirit i no helpim yumi. Olsem na em i bikpela samting long oltaim yumi mas beten askim God long givim dispela spirit long yumi! (Luk 11:13) Long nau yumi nidim tru holi spirit, winim olgeta taim bipo.

13. Wok autim tok em God i givim long lain bilong em long nau, i bikpela olsem wanem? Bilong wanem yumi mas givim bel long mekim dispela wok?

¹³ Long nau, mining bilong dispela tok “i go inap long olgeta hap bilong graun” i no wankain olsem long taim bilong ol aposel. Tasol olsem Sapta 1 i kamapim, ol Witnes Bilong Jehova i amamas long kisim dispela asainmen long mekim wok witnes. Ol i save olsem God i laik bai olgeta kain man i mas harim gutnius bilong Kingdom bilong em. (1 Tim. 2:3, 4) Olsem wanem? Yu insait tru long dispela wok i helpim ol man long kisim laip? I no gat narapela wok inap givim bikpela bel isi na amamas long yu olsem dispela wok! Jehova bai strongim yu na bai yu inap mekim wok bilong em. Buk Aposel i stori planti long ol gutpela rot bilong autim tok na tingting yumi mas holim bambai wok i karim gutpela kaikai.

14, 15. (a) Ol ensel i tok wanem long kam bek bilong Krais? Wanem mining bilong tok bilong ol? (Lukim tu futnot.) (b) Olsem wanem Krais i kam bek “long wankain pasin” olsem em i bin lusim graun?

¹⁴ Olsem kirap bilong dispela sapta i kamapim, Jisas i lusim graun na i go antap na ol aposel i no lukim em moa. Tasol 11-pela aposel i sanap yet i stap na lukluk i go antap long skai. Bihain, tupela ensel i kamap long ol na i tokim ol: “Yupela ol man bilong Galili, bilong wanem yupela i sanap na lukluk i go antap long skai? Dispela Jisas, em God i bin kisim em i go antap long skai, em bai kam long wankain pasin olsem yupela i bin lukim em i go antap.” (Apo. 1:11) Yu ting ol ensel i tok Jisas bai kam bek long wankain bodi olsem sampela lotu i lainim ol man long en? Nogat, ol i no tok olsem. Olsem wanem yumi save long dispela?

¹⁵ Ol ensel i tok Jisas bai kam bek “long wankain pasin.” b Em i lusim graun long wanem kain pasin? Taim ol ensel i toktok, ol aposel i no inap lukim Jisas moa. Sampela man tasol, em ol aposel, i kliagut olsem Jisas i lusim graun na i wok long i go long Papa bilong em long heven. Krais i kam bek long wankain pasin. Long nau, ol lain husat i kliagut long tok bilong Baibel, ol tasol i save olsem Jisas i kam bek pinis olsem king. (Luk 17:20) Yumi mas luksave long ol samting  i kamapim klia olsem Jisas i kam i stap pinis, na tokim ol narapela long en bambai ol tu i ken save olsem taim i sot pinis.

16-18. (a) Long Aposel 1:13, 14, yumi kisim wanem save long ol bung Kristen bilong mekim lotu? (b) Yumi kisim wanem skul long pasin bilong Maria, mama bilong Jisas? (c) Bilong wanem ol miting Kristen i bikpela samting long nau?

¹⁶ Yumi no kirap nogut long ol aposel i “amamas tru na go bek long Jerusalem.” (Luk 24:52) Tasol olsem wanem? Ol aposel bai bihainim ol tok Krais i mekim bilong skulim na stiaim ol? Long ves 13 na 14 bilong Aposel sapta 1, Baibel i tok ol i bung long “rum antap,” na yumi inap kisim sampela save moa long ol kain bung olsem. Ol haus long Palestain long dispela taim bipo i gat wanpela rum antap, na ol man inap go long en long rot bilong ol step i stap ausait. Yumi no save sapos dispela “rum antap” i stap long haus bilong mama bilong Mak, em Aposel 12:12 i stori long en. Tasol maski em dispela haus o nogat, em wanpela rum i no gat planti samting na i gutpela hap bilong ol disaipel bilong Krais i ken mekim bung. Tasol husat i kam bung, na ol i mekim wanem?

¹⁷ Tingim, dispela bung i no bilong ol aposel o ol man tasol, nogat. I gat “sampela meri” i stap long dispela bung, na Maria tu i stap, em mama bilong Jisas. Dispela em laspela taim Baibel i stori long em. I stret yumi tingim Maria olsem meri i gat pasin daun na i bung bilong mekim lotu wantaim ol bratasista Kristen bilong em, na em i no tingting long kisim biknem. Fopela narapela pikinini man bilong em, em ol i no bin kamap bilipman taim Jisas i stap laip, ol i stap nau wantaim Maria na dispela i mekim gut bel bilong em. (Mat. 13:55; Jon 7:5) Kirap long taim brata bilong ol i bin dai na kirap bek, tingting na pasin bilong ol i senis.​—1 Kor. 15:7.

¹⁸ Tingim tu as na ol disaipel i mekim bung. Baibel i tok: “Ol dispela man i stap wanbel na ol i wok long beten i stap.” (Apo. 1:14) Kirap long bipo na i kam inap long nau, pasin bilong bung wantaim em i bikpela samting insait long lotu Kristen. Yumi bung bilong strongim bel bilong narapela narapela, kisim tok bilong skulim na stretim yumi, na moa yet, yumi bung bilong lotuim Papa bilong yumi long heven, Jehova. Ol beten na singsing bilong litimapim nem bilong Jehova em yumi mekim long ol dispela bung, i save amamasim Jehova na ol i bikpela samting long yumi. Yumi no ken tru lusim ol dispela bung holi i save strongim yumi!​—Hib. 10:24, 25.

19-21. (a) Pita i go pas long wok bilong inapim wanpela nid insait long kongrigesen, dispela i givim wanem save long yumi? (b) Bilong wanem ol i mas senisim Judas? Yumi inap kisim wanem skul long pasin ol i bihainim long mekim olsem?

¹⁹ Ol dispela disaipel bilong Krais i mas inapim wanpela nid insait long kongrigesen, na aposel Pita i go pas dispela. (Apo. 1:15-26) Yumi amamas long save olsem Pita i bin senis maski sampela wik i go pinis, inap 3-pela taim em i bin tok olsem em i no save long Bikman bilong em. (Mak 14:72) Yumi olgeta i save mekim sin, na yumi mas tingim olsem Jehova i ‘gutpela tru na i save rausim sin’ bilong ol man husat i tanim bel tru.​—Sng. 86:5.

 ²⁰ Pita i save olsem, ol i mas kisim senis bilong Judas, em aposel husat i bin kamapim Jisas long ol birua. Tasol husat bai senisim em? Pita i tok, dispela nupela aposel i mas wanpela man husat i bin bihainim Jisas taim em i bin mekim wok autim tok bilong em, na i lukim Jisas i kirap bek. (Apo. 1:21, 22) Dispela i stret wantaim tok promis Jisas i bin mekim: “Yupela ol man i bin bihainim mi, yupela tu bai sindaun long 12-pela sia king, na stap olsem jas na skelim 12-pela traib bilong Israel.” (Mat. 19:28) I luk olsem Jehova i laik bai dispela 12-pela aposel husat i bin bihainim Jisas taim em i mekim wok autim tok long graun, i kamap “12-pela ston faundesen” bilong Nupela Jerusalem. (Rev. 21:2, 14) Olsem na God i helpim Pita long save olsem dispela tok profet, “narapela man i ken kisim wok bilong en,” i makim olsem narapela man i mas kisim ples bilong Judas.​—Sng. 109:8.

²¹ Olsem wanem ol i makim nupela aposel? Ol i pilai satu, em pasin ol i save mekim long taim bilong ol man i raitim Baibel. (Prov. 16:33) Tasol dispela em laspela taim we Baibel i stori long pasin bilong pilai satu bilong makim man. Bihain, taim holi spirit i kapsait long ol disaipel, i no gat wok moa long mekim olsem. Tasol tingim as na ol i pilai satu. Ol aposel i beten olsem: “Jehova, yu save long bel bilong olgeta man. Yu ken soim mipela wanem man long dispela tupela yu makim.” (Apo. 1:23, 24) Ol i laik bai Jehova yet i makim man na em i makim Matias. Ating Matias em wanpela bilong 70 disaipel em Jisas i bin salim ol i go bilong autim tok. Olsem na Matias i kamap wanpela bilong ol “12-pela aposel.” c—Apo. 6:2.

22, 23. Bilong wanem yumi mas daun na harim tok bilong ol man i go pas long mekim wok insait long kongrigesen long nau?

²² Dispela stori i kirapim yumi long tingim olsem em i bikpela samting long stretim gut ol wok insait long oganaisesen bilong God. I kam inap long nau, ol i save makim ol man long mekim wok wasman insait long kongrigesen. Ol elda i save skelim gut ol mak Baibel i kolim em ol wasman i mas winim, na ol i beten long holi spirit i ken stiaim ol. Olsem na kongrigesen i tingim ol dispela man olsem ol man em holi spirit i makim bilong mekim wok. Yumi mas daun long ol na harim tok bilong ol, long dispela rot yumi strongim pasin bilong wok gut wantaim insait long kongrigesen.​—Hib. 13:17.

²³ Ol disaipel i lukim Jisas bihain long em i kirap bek, na kongrigesen i stretim gut ol wok, olsem na ol i kisim strong na ol i redi long ol samting bai kamap bihain. Neks sapta bai stori long dispela samting.