1-3. Pita i lukim wanem visen? Bilong wanem em i bikpela samting long yumi kliagut long en?

 EM OKTOBA samting long yia 36 C.E. San i hatim skin bilong Pita taim em i wok long beten i stap antap long fletpela rup bilong wanpela haus i stap klostu long solwara long taun Jopa we i gat haba. Pita i stap olsem visita long dispela haus inap sampela de nau. Dispela i soim olsem em i no save luk daun long ol narapela. Papa bilong dispela haus, em Saimon. Em i man bilong kisim skin bilong ol animal na redim bilong wokim ol arapela samting. Sampela Juda i no laik stap wantaim ol kain man olsem. a Maski i olsem, klostu nau Pita bai kisim skul long pasin bilong Jehova long tingim ol man bilong olgeta lain.

² Taim Pita i beten i stap, em i lukim wanpela visen. Sapos wanpela Juda i lukim kain visen olsem, em bai tingting planti. Wanpela samting i kain olsem traipela laplap i lusim heven na kam daun. Dispela laplap i gat ol animal i no klin long sait bilong Lo. Wanpela nek i tokim Pita long kilim ol dispela animal na kaikai. Pita i tok: “I no gat wanpela taim mi bin kaikai wanpela samting i doti na i no klin.” Tasol inap 3-pela taim nek i tokim Pita: “Ol samting God i mekim i kamap klin pinis, yu no ken tok ol i doti.” (Apo. 10:14-16) Dispela visen i mekim na Pita i paul, tasol i no longtaim na em bai kliagut long mining bilong en.

³ Wanem mining bilong dispela visen? Em i bikpela samting long yumi kliagut long en, bikos visen i kamapim klia tingting Jehova i gat long ol man. Yumi ol Kristen tru, olsem na yumi mas i gat wankain tingting olsem God long ol man bambai yumi inap autim gut tru tok bilong Kingdom Bilong God. Bilong kisimgut mining bilong visen Pita i lukim, yumi ken skelim ol samting i bin kamap.

4, 5. Kornilius em i husat? Wanem samting i kamap taim em i wok long beten?

⁴ Pita i no bin save olsem long de paslain long dispela, inap 50 kilomita long hap not long Sisaria, wanpela man nem bilong em Kornilius i bin lukim tu wanpela visen i kam long God. Kornilius, em wanpela ofisa i bosim 100 soldia bilong Rom, na em i “wanpela lotuman.” b Na tu, em i stap olsem gutpela het bilong famili, bikos “em wantaim ol wanhaus bilong em ol i save pret long God.” Kornilius i no bin joinim lotu Juda; em i man bilong arapela lain i no bin katim skin. Tasol em i save mekim pasin sori long ol Juda i stap rabis, na em i save givim ol samting bilong helpim ol. Oltaim dispela man i gat gutpela bel “i save beten strong long God.”​—Apo. 10:2.

⁵ Long 3 klok samting long apinun, Kornilius i wok long beten taim em i lukim wanpela visen we ensel i tokim em: “Ol beten na pasin bilong yu long marimari na helpim ol rabisman, dispela samting i go kamap long God na em i tingim.” (Apo. 10:4) Ensel i tokim Kornilius long salim ol man i go kisim aposel Pita i kam. Klostu nau rot bai op long Kornilius i harim gutnius bilong God i kisim bek ol man, em fes taim long kain samting olsem i kamap long man bilong arapela lain i no bin katim skin.

6, 7. (a) Kamapim wanpela ekspiriens i soim olsem God i save harim beten bilong ol man i gat gutpela bel em ol i laik kisim stretpela save long em. (b) Ol kain ekspiriens olsem i givim wanem save long yumi?

⁶ Olsem wanem? Long nau God i save harim beten bilong ol man i gat gutpela bel em ol i laik kisim stretpela save long em? Tingim dispela ekspiriens. Wanpela meri long Albenia i kisim Wastaua i gat stori long pasin bilong mekim bikpela long ol pikinini. c Em i bin tokim Witnes husat i kam long haus bilong em: “Man! Nau tasol mi wok long beten askim God long helpim mi long mekim bikpela long ol pikinini meri bilong mi, na em i salim yu i kam! Ol tok yu mekim i stret tru long samting mi laik save long en!” Dispela meri na ol pikinini meri bilong em i kirap stadi, na bihain man bilong em tu i stadi.

 ⁷ Olsem wanem? Dispela samting i save kamap wan wan taim tasol? Nogat! Ol kain ekspiriens olsem i save kamap planti taim long olgeta hap—na yumi no inap tok dispela samting i kamap nating tasol. Dispela i givim wanem save long yumi? Namba 1, Jehova i save harim beten bilong ol man i gat gutpela bel em ol i wok long painim em. (1 Kin. 8:41-43; Sng. 65:2) Namba 2, ol ensel i save sapotim wok autim tok bilong yumi.​—Rev. 14:6, 7.

8, 9. Holi spirit i kamapim klia wanem samting long Pita? Em i mekim wanem?

⁸ Pita i stap yet long rup bilong haus na “i wok long tingting planti” long mining bilong dispela visen taim ol man em Kornilius i salim, ol i kam klostu long haus. (Apo. 10:17) Yu ting Pita—man husat i bin tok 3-pela taim olsem em i no inap kaikai ol samting i no klin long sait bilong Lo—bai redi long go wantaim ol dispela man long haus bilong wanpela man bilong arapela lain? Long sampela kain rot, holi spirit i kamapim klia laik bilong God long dispela samting. Nek i tokim Pita olsem: “Harim! Tripela man i wok long askim long yu. Yu kirap na go daun na go wantaim ol, na yu no ken kisim tupela tingting, long wanem, mi bin salim ol i kam.” (Apo. 10:19, 20) Dispela visen bilong ol animal i no klin em Pita i bin lukim, i redim em long larim holi spirit i stiaim em.

⁹ Pita i kisim save olsem God i bin tokim Kornilius long salim ol dispela man i kam long em, olsem na Pita i tokim ol long kam insait long haus bilong em na ol i “stap wantaim em.” (Apo. 10:23a) Dispela gutpela aposel i senisim pinis sampela tingting bilong em taim em i kisim sampela save moa long laik bilong God.

10. Olsem wanem Jehova i save stiaim lain bilong em? I gutpela yumi givim wanem ol askim long yumi yet?

¹⁰ I kam inap long nau, Jehova i stiaim lain bilong em na isi isi em i wok long kamapim klia ol samting long ol. (Prov. 4:18-19) Long rot bilong holi spirit, Jehova i stiaim “gutpela wokboi i gat savetingting.” (Mat. 24:45) Ating sampela taim, yumi kisim sampela nupela save long tok bilong Baibel o i gat sampela senis i kamap long ol wok bilong oganaisesen. I gutpela yumi askim yumi yet: ‘Mi save mekim wanem taim ol senis i kamap? Mi daun long wok bilong spirit bilong God long stiaim ol dispela samting?’

11, 12. Pita i mekim wanem taim em i kamap long Sisaria? Em i bin kisim save long wanem samting?

¹¹ Long de bihain long Pita i lukim visen, em wantaim 9-pela arapela—3-pela man em Kornilius i bin salim, na “6-pela brata [Juda]” bilong Jopa—ol i go long Sisaria. (Apo. 11:12) Kornilius i save olsem Pita bai kam, olsem na em i bungim “ol wanblut na ol gutpela pren bilong em,” olgeta i bilong ol arapela lain. (Apo. 10:24) Taim Pita i kamap, em i mekim wanpela samting em bipo em i ting em i no inap mekim: Em i go insait long haus bilong wanpela man bilong arapela lain i no bin katim skin! Pita i tok: “Yupela i save olsem i tambu tru long wanpela Juda i go klostu o toktok wantaim wanpela man bilong narapela lain, tasol God i soim mi olsem mi no ken  tok long wanpela man olsem em i doti o em i no klin.” (Apo. 10:28) Nau Pita i kliagut olsem skul em i kisim long dispela visen, i no makim tasol ol kaikai em man i no ken kisim, nogat. Em i “no ken tok long wanpela man [na man bilong arapela lain tu] olsem em i doti.”

¹² Olgeta man husat i bung i laik harim tok Pita bai mekim. Kornilius i tok: “Mipela olgeta i kam stap long ai bilong God bilong harim olgeta tok Jehova i bin givim long yu bilong tokim mipela.” (Apo. 10:33) Ating bai yu amamas sapos wanpela husat i laik kisim save long Jehova, em i mekim kain tok olsem! Bilong kirapim tok, Pita i mekim dispela tok i gat strong: “Tru tumas, nau mi luksave olsem God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” (Apo. 10:34, 35) Pita i bin kisim save olsem Jehova i no save larim skin kala, kantri, lain, na lukluk bilong man, i stiaim tingting Em i gat long ol. Pita i kirap autim tok long wok Jisas i bin mekim, indai, na kirap bek bilong em.

13, 14. (a) Wanem samting i kamap taim Kornilius na ol manmeri bilong ol arapela lain i kamap Kristen long 36 C.E.? (b) Bilong wanem yumi no ken skelim ol man long lukluk bilong ol?

¹³ Wanpela narakain samting i kamap. Taim “Pita i toktok yet,” holi spirit i kam daun long “ol manmeri bilong ol arapela lain.” (Apo. 10:44, 45) Long dispela hap tasol, Baibel i stori olsem holi spirit i kam daun long ol man paslain long ol i kisim baptais. Pita i luksave olsem God i orait long ol, olsem na “em i tokim ol [dispela manmeri bilong ol arapela lain] long kisim baptais.” (Apo. 10:48) Ol dispela manmeri i kamap Kristen long 36 C.E., na dispela i makim olsem haptaim we God i mekim gut long ol Juda tasol i pinis. (Dan. 9:24-27) Pita i go pas long autim tok long ol na em i yusim namba 3 ki, em laspela bilong “ol ki bilong Kingdom.” (Mat. 16:19) Dispela ki i opim dua long ol manmeri bilong ol arapela lain i ken kamap ol Kristen God i bin makim long holi spirit.

¹⁴ Yumi ol manmeri bilong autim tok bilong Kingdom long nau i luksave olsem “God i save skelim ol man long wankain pasin.” (Rom 2:11) God i laik “kisim bek olgeta kain man.” (1 Tim. 2:4) Olsem na yumi no ken skelim ol man long lukluk bilong ol. Wok bilong yumi em bilong autim gut tru tok bilong Kingdom Bilong God, na dispela i makim olsem yumi mas autim tok long olgeta man, maski ol i bilong wanem skin kala, kantri, lotu, na ol i luk olsem wanem.

15, 16. Bilong wanem sampela Juda Kristen i tok pait wantaim Pita? Olsem wanem Pita i stori gut long as bilong ol samting em i bin mekim?

¹⁵ Ating Pita i amamas long bringim dispela ripot i go long Jerusalem. Tasol i luk olsem nius bilong ol man bilong ol arapela lain i no katim skin ol i bin “kisim tok bilong God,” i go kamap long Jerusalem paslain long Pita. Taim Pita i kamap, “ol lain i strong long bihainim pasin bilong katim skin, ol i kirap long tok pait wantaim em.” Ol i no amamas bikos em i bin go long “haus bilong ol man i no bin katim skin na kaikai wantaim ol.” (Apo. 11:1-3) Ol i no gat tok long ol manmeri bilong ol arapela lain i kamap ol disaipel bilong Krais, nogat. Tasol ol dispela disaipel Juda i  strong olsem ol manmeri bilong ol arapela lain i mas bihainim Lo—na pasin bilong katim skin i insait long en—bambai ol i ken lotuim Jehova long pasin em i laikim. I klia tru olsem sampela disaipel Juda i hatwok long bilip olsem Lo Bilong Moses i pinis.

¹⁶ Olsem wanem Pita i stori gut long as bilong ol samting em i bin mekim? Long Aposel 11:4-16, em i kolim 4-pela samting i kamapim klia olsem God i stiaim ol samting: (1) visen em i lukim i kam long God (Ves 4-10); (2) holi spirit i tokim em long mekim samting (Ves 11, 12); (3) ensel i bin go lukim Kornilius (Ves 13, 14); na (4) holi spirit i bin kam daun long ol manmeri bilong ol arapela lain. (Ves 15, 16) Bilong pinisim tok, Pita i kamapim wanpela askim i kirapim tingting bilong ol: “Sapos God i bin givim dispela wankain presen [bilong holi spirit] long ol [ol manmeri bilong ol arapela lain i bilip] olsem em i bin givim long yumi [ol Juda] ol lain i bilip long Bikpela Jisas Krais, orait mi husat na mi inap pasim samting God i mekim?”​—Apo. 11:17.

17, 18. (a) Ol tok bilong Pita i mekim na ol Kristen Juda i mas mekim wanem? (b) Bilong wanem i no isi long holimpas pasin wanbel insait long kongrigesen? I gutpela yumi givim wanem ol askim long yumi yet?

¹⁷ Ol tok Pita i kamapim i mekim na ol Kristen Juda i mas wokim disisen. Olsem wanem? Bai ol i redi long lusim pasin bilong luk daun long ol narapela lain, na orait long ol man bilong ol arapela lain i baptais nupela, na tingim ol olsem ol wanbilip Kristen bilong ol? Baibel i tok: “Taim ol [ol aposel na ol narapela Kristen Juda] i harim ol dispela tok, ol i stop long tok pait na ol i givim glori long God na tok: ‘Tru tumas, God i opim rot tu long ol manmeri bilong ol arapela lain long ol i ken tanim bel na kisim laip.’” (Apo. 11:18) Dispela stretpela tingting i lukautim pasin wanbel insait long kongrigesen.

¹⁸ Long nau, i no isi long ol man i lotu tru long God long holimpas pasin wanbel, bikos ol i “bilong olgeta kantri na olgeta traib na olgeta lain pipol na olgeta tokples.” (Rev. 7:9) Olsem na insait long planti kongrigesen i gat ol man bilong kain kain skin kala, kalsa, na sindaun. So i gutpela long askim yumi yet: ‘Mi lusim tru pasin bilong luk daun long ol man bilong ol arapela lain? Mi tingting strong long sakim pasin bilong dispela graun long brukim lain—olsem apim nem bilong kantri, klen, kalsa na tingim skin kala—i stiaim pasin mi mekim long ol brata Kristen bilong mi?’ Tingim  samting i bin kamap long Pita (Sifas) sampela yia bihain long ol fes lain bilong ol arapela lain i kamap Kristen. Em i larim pasin bilong luk daun long ol arapela i stiaim em na “em i no bung moa wantaim” ol Kristen bilong arapela lain, olsem na Pol i mas stretim em. (Gal. 2:11-14) Olsem na oltaim yumi mas was gut bambai pasin bilong luk daun long ol narapela i no stiaim yumi.

19. Ol Kristen Juda long Antiok i kirap autim tok long husat? Wanem samting i kamap?

¹⁹ Olsem wanem? Ol disaipel bilong Jisas i kirap autim tok long ol man bilong ol arapela lain i no bin katim skin? Tingim samting i bin kamap long Antiok bilong Siria. d Planti Juda i stap long dispela taun, tasol i no gat bikpela pasin birua namel long ol Juda na ol man bilong ol arapela lain. Olsem na Antiok i stap olsem gutpela teritori bilong autim tok long ol man bilong narapela lain. Em long dispela hap, sampela disaipel Juda i kirap autim gutnius “long ol manmeri i save mekim tok Grik.” (Apo. 11:20) Ol i autim tok long ol Juda i save mekim tok Grik, na tu, long ol man bilong ol arapela lain i no bin katim skin. Jehova i blesim dispela wok, na “planti manmeri i bilip.”​—Apo. 11:21.

20, 21. Olsem wanem Barnabas i soim pasin daun? Olsem wanem yumi inap kamapim pasin daun taim yumi autim tok?

²⁰ Bilong autim tok long ol dispela manmeri i redi long harim tok, kongrigesen long Jerusalem i salim Barnabas i go long Antiok. Planti manmeri i laik harim gutnius, olsem na em i bikpela wok tumas long wanpela man tasol long mekim. Man husat inap helpim Barnabas, em Sol, em bihain em i kamap aposel em God i salim i go long ol manmeri bilong ol arapela lain. (Apo. 9:15; Rom 1:5) Olsem wanem? Barnabas bai ting olsem Sol i laik resis wantaim em? Nogat. Barnabas i mekim pasin daun. Em i go long Tarsus bilong painim Sol, na bringim em i kam bek long Antiok bambai Sol i ken helpim em. Inap 1-pela yia, tupela wantaim i strongim ol disaipel long kongrigesen long dispela hap.​—Apo. 11:22-26a.

²¹ Olsem wanem yumi inap soim olsem yumi gat pasin daun taim yumi mekim wok autim tok? Pasin daun bai helpim yumi long luksave long ol samting yumi no inap mekim. Yumi olgeta i gat narapela narapela save bilong mekim gut ol wok. Olsem: Ating sampela inap mekim gut wok bilong autim tok long kain kain taim na ples o autim tok long ol haus, tasol ol i hatwok liklik long mekim ol gobek o kirapim ol Baibel stadi. Sapos yu laik kamap gutpela moa long sampela pasin bilong autim tok, orait askim wanpela long helpim yu. Taim yu mekim olsem, ating bai wok autim tok bilong yu i kamap gutpela moa na bai yu kisim bikpela amamas tru.​—1 Kor. 9:26.

22, 23. Ol brata long Antiok i mekim wanem bilong kamapim pasin bilong laikim ol brata? Olsem wanem lain bilong God long nau i save mekim wankain?

²² Long Antiok, “ol disaipel i kisim nem Kristen long namba 1 taim. God i bin  stiaim dispela samting.” (Apo. 11:26b) Dispela nem God i orait long en, i makim stret ol man husat i bihainim lek mak bilong Krais. Taim ol manmeri bilong ol arapela lain i kamap Kristen, yu ting pasin bilong stap brata brata i kamap namel long ol na ol Juda Kristen? Tingim samting i bin kamap taim bikpela hangre i kamap long 46 C.E. samting. e Long bipo, ol rabisman i save kisim taim stret long taim bilong bikpela hangre. Ol i no gat ekstra mani o kaikai bilong helpim ol. Long dispela taim, ating planti bilong ol Kristen Juda long Judia i stap rabis na ol i nidim kaikai samting. Ol brata long Antiok—na ol Kristen bilong ol arapela lain—i kisim save long dispela, na ol i salim “ol samting bilong helpim ol brata i stap long Judia.” (Apo. 11:29) Man! Ol brata i kamapim tru pasin bilong ol long laikim tru narapela narapela!

²³ Em i wankain tu long ol lain bilong God long nau. Taim yumi kisim save olsem ol brata bilong yumi—long narapela kantri o long hap bilong yumi—i nidim helpim, yumi redi long helpim ol. Kwiktaim ol Brens Komiti i save stretim rot long kamapim ol Disasta Rilif Komiti bilong helpim ol brata i kisim hevi long ol bikpela disasta olsem saiklon, guria, o sunami samting. Ol kain wok olsem i kamapim klia pasin bilong ol bratasista long laikim tru narapela narapela.​—Jon 13:34, 35; 1 Jon 3:17.

24. Olsem wanem yumi soim olsem yumi tingim tru mining bilong visen em Pita i bin lukim?

²⁴ Yumi ol Kristen tru, olsem na yumi mas tingim tru mining bilong visen em Pita i bin lukim antap long rup bilong haus long Jopa long taim bilong ol aposel. Yumi lotuim God husat i save mekim wankain pasin long olgeta man. Em laik bilong em olsem yumi mas autim gut tru tok bilong Kingdom bilong em long olgeta man, maski ol i bilong wanem skin kala, kantri, o sindaun. Olsem na yumi mas tingting strong long autim gutnius long olgeta man husat i laik harim tok.​—Rom 10:11-13.