1, 2. Sol i laik mekim wanem long Damaskus?

 OL MAN i belhat wantaim na i wok long kam long Damaskus, ol i gat tingting long mekim samting nogut long dispela hap. Ol bai rausim ol disaipel bilong Jisas long haus bilong ol, pasim ol long rop, semim ol, na pulim ol i go long Jerusalem bilong Sanhedrin i ken givim strafe long ol.

² Lida bilong ol dispela man, em Sol, na em i gat asua pinis long blut bilong man. a I no longtaim i go pinis, em i lukim na i orait long ol man i stonim Stiven i dai, em wanpela gutpela disaipel bilong Jisas. (Apo. 7:57–8:1) Sol i mekim nogut long ol disaipel bilong Jisas long Jerusalem, na em i laik kirapim dispela pasin birua long ol narapela hap tu. Em i laik pinisim tru dispela lain ol i kolim “Rot Bilong Bikpela.”​—Apo. 9:1, 2; lukim blok “ Namba Sol i Holim Long Damaskus.”

3, 4. (a) Wanem samting i bin painim Sol? (b) Bai yumi skelim wanem ol askim?

³ Wantu, wanpela strongpela lait i raunim Sol. Ol man i kam wantaim em, ol i lukim lait na ol i kirap nogut na ol i no inap mekim wanpela tok. Sol i kamap aipas na em i pundaun long graun. Em i no inap lukluk, tasol em i harim wanpela nek long heven i tok: “Sol, Sol, bilong wanem yu wok long mekim nogut long mi?” Sol i kirap nogut na em i askim: “Bikpela, yu husat?” Bekim Sol i kisim i sutim tru bel bilong em. Nek i tok: “Mi Jisas, mi dispela man yu wok long mekim nogut long en.”​—Apo. 9:3-5; 22:9.

⁴ Yumi inap kisim wanem skul long tok Jisas i mekim long Sol? Olsem wanem pasin bilong skelim ol samting i bin kamap long taim Sol i kamap Kristen inap helpim yumi? Bihain long Sol i kamap Kristen, kongrigesen i stap bel isi. Yumi inap kisim wanem skul long pasin kongrigesen i mekim long dispela haptaim?

5, 6. Yumi inap kisim wanem skul long tok Jisas i mekim long Sol?

⁵ Taim Jisas i stopim Sol long rot i go long Damaskus, em i no askim Sol olsem: “Bilong wanem yu wok long mekim nogut long ol disaipel bilong  mi?” Olsem yumi stori pinis, em i tok: “Bilong wanem yu wok long mekim nogut long mi?” (Apo. 9:4) Tru tumas, Jisas i save pilim tru ol hevi ol disaipel bilong em i karim.​—Mat. 25:34-40, 45.

⁶ Sapos ol man i mekim nogut long yu bikos yu bilip long Jisas, yu ken save olsem Jehova na Jisas i luksave long hevi yu karim. (Mat. 10:22, 28-31) Ating Jehova i no inap rausim dispela hevi long nau. Tingim, Jisas i bin lukim ol samting Sol i mekim taim ol i kilim i dai Stiven, na em i lukim Sol i pulim ol gutpela disaipel i kam ausait long haus bilong ol long Jerusalem. (Apo. 8:3) Tasol long dispela taim Jisas i no bin mekim wanpela samting. Maski i olsem, long rot bilong Krais, Jehova i givim strong long Stiven na ol narapela disaipel bambai ol i ken stap gut yet long Em.

7. Yu mas mekim wanem bambai yu ken sanap strong taim ol man i mekim nogut long yu?

⁷ Yu tu inap sanap strong taim ol man i mekim nogut long yu sapos yu mekim ol dispela samting: (1) Pasim tok long bel long stap gut long Jehova, maski wanem samting i kamap. (2) Askim Jehova long helpim yu. (Fili. 4:6, 7) (3) Larim Jehova i bekim rong. (Rom 12:17-21) (4) Bilip olsem Jehova bai givim yu strong long karim hevi i go inap long taim em i lukim olsem i stret long em i tekewe dispela hevi.​—Fili. 4:12, 13.

8, 9. Ating Ananaias i pilim olsem wanem long wok em i kisim?

⁸ Bihain long Jisas i bekim askim bilong Sol, “Bikpela, yu husat?” Jisas i tokim em: “Kirap na go insait long taun, na wanpela man bai tokim yu long wanem samting yu mas mekim.” (Apo. 9:6) Ol man i kisim Sol husat i aipas i go long Damaskus long haus we em bai stap long en. Long hap, em i beten na tambu long kaikai inap 3-pela de. Long wankain taim, Jisas i tokim wanpela disaipel bilong dispela taun long Sol. Dispela disaipel em Ananaias, na ol Juda long Damaskus “i tok em i gutpela man.”​—Apo. 22:12.

⁹ Piksaim long tingting samting Ananaias i pilim, ating em i amamas na tingting planti wantaim! Het bilong kongrigesen, em Jisas Krais husat i bin kirap bek  long dai, i wok long toktok long em, na i makim em long mekim wanpela spesel wok. Man! Em wanpela gutpela samting tru, tasol em wanpela narakain wok! Taim Jisas i tokim em olsem em i mas toktok long Sol, Ananaias i tok: “Bikpela, mi bin harim planti man i toktok long dispela man. Ol i toktok long em i bin mekim nogut long ol manmeri holi bilong yu long Jerusalem. Na ol bikpris i bin givim namba long em long arestim olgeta manmeri i singaut long nem bilong yu.”​—Apo. 9:13, 14.

10. Yumi kisim wanem skul long pasin Jisas i mekim long Ananaias?

¹⁰ Jisas i no krosim Ananaias taim em i kamapim wari bilong em. Tasol Jisas i tokim em klia long ol samting em i mas mekim. Na Jisas i soim olsem em i tingim tru Ananaias taim em i tokim Ananaias long as na em i laik bai Ananaias  i mekim dispela narakain wok. Jisas i tok long Sol olsem: “Dispela man i olsem wanpela sospen mi makim bilong karim nem bilong mi i go long ol lain manmeri, na long ol king na long ol manmeri bilong Israel. Na mi bai soim em ples klia tru long ol pen na hevi em i mas karim long nem bilong mi.” (Apo. 9:15, 16) Kwiktaim Ananaias i bihainim tok bilong Jisas. Em i go painim Sol, man bilong mekim nogut long ol Kristen, na i tokim em: “Sol, brata bilong mi. Bikpela Jisas husat i bin kamap long yu long rot taim yu wok long i kam, em i salim mi i kam na bai yu inap lukluk gen na holi spirit i ken pulap long yu.”​—Apo. 9:17.

11, 12. Yumi kisim wanem skul long ol samting em Jisas, Ananaias, na Sol i mekim?

¹¹ Ol samting em Jisas, Ananaias, na Sol i mekim i kamapim klia sampela bikpela samting. Olsem: Jisas i stiaim wok bilong autim tok, olsem em i bin tok promis long en. (Mat. 28:20) Tru, Jisas i no toktok stret wantaim ol wan wan man long nau, tasol em i stiaim wok bilong autim tok long rot bilong gutpela wokboi husat em i bin makim bilong lukautim olgeta arapela wokboi. (Mat. 24:45-47) Gavening Bodi i save salim ol pablisa na painia i go painim ol man husat i laik kisim sampela save moa long Krais. Olsem yumi stori pinis long sapta 7, planti bilong ol dispela man i bin beten long God i ken helpim ol na bihain ol Witnes Bilong Jehova i go bungim ol.​—Apo. 9:11.

¹² Ananaias i amamas long mekim wok na em i kisim blesing. Olsem wanem? Yu save bihainim tok long mekim gut wok autim tok, maski sapos dispela wok i mekim yu tingting planti? Long sampela, pasin bilong go autim tok long ol haus na bungim ol man em ol i no save long ol, i mekim ol i tingting planti. Na sampela i hatwok long autim tok long ol man long ol ples wok, long rot, o long telefon na ol pas. Ananaias i winim pasin bilong pret na i kisim gutpela wok bilong helpim Sol long kisim holi spirit. b Wok bilong Ananaias i karim kaikai bikos em i trastim Jisas na em i tingim Sol olsem man husat inap kamap wanbilip bilong em. Olsem Ananaias, yumi tu inap winim pasin bilong pret sapos yumi bilip olsem Jisas i stiaim wok autim tok, yumi pilim hevi bilong ol man, na yumi tingim ol man em yumi pret long ol, olsem ol man husat inap kamap ol wanbilip bilong yumi.​—Mat. 9:36.

13, 14. Sapos yu wok long stadi long Baibel na yu no kisim baptais yet, yu inap kisim wanem skul long pasin bilong Sol?

¹³ Kwiktaim Sol i bihainim ol tok em i bin lainim. Bihain long em inap lukluk gen, em i kisim baptais na i kirap bung wantaim ol disaipel long Damaskus. Tasol em i mekim sampela samting moa. “Em i go stret long ol sinagog na autim  tok long ol man long Jisas, olsem dispela man em i Pikinini Bilong God.”​—Apo. 9:20.

¹⁴ Sapos yu wok long stadi long Baibel na yu no kisim baptais yet, bai yu bihainim pasin bilong Sol na kwiktaim bihainim ol tok yu lainim? Tru, Sol yet i bin lukim mirakel Jisas i bin wokim, na dispela i kirapim em long mekim sampela samting. Ol narapela tu i bin lukim ol mirakel Jisas i wokim, tasol ol i no mekim wanpela samting. Olsem: Wanpela lain Farisi i lukim Jisas i oraitim wanpela man han nogut, na planti Juda i save olsem Jisas i bin kirapim bek Lasarus. Tasol planti bilong ol i no tingim tumas samting Jisas i mekim, na sampela i birua long em. (Mak 3:1-6; Jon 12:9, 10) Tasol Sol i no olsem, em i tanim bel. Bilong wanem Sol i tanim bel na ol narapela i no mekim olsem? Long wanem, em i daun long God, ol man, nogat. Na em i pilim tru pasin marimari Krais i bin mekim long em. (Fili. 3:8) Sapos yu mekim wankain, bai yu no larim wanpela samting i pasim yu long insait long wok bilong autim tok na long winim mak bilong kisim baptais.

15, 16. Sol i mekim wanem insait long ol sinagog? Ol Juda long Damaskus i mekim wanem?

¹⁵ Yu inap piksaim long tingting ol manmeri i kirap nogut, na kros tru taim Sol i kirap long autim tok bilong Jisas insait long ol sinagog? Ol i tok: “Em dispela man tasol i bin mekim nogut tru long ol manmeri long Jerusalem husat i save singaut long dispela nem.” (Apo. 9:21) Taim Sol i stori gut long as na em i senisim tingting bilong em long Jisas, em i “kamapim ol tok i soim klia tru olsem Jisas em i dispela Krais.” (Apo. 9:22) Tasol maski yu eksplenim gut wanpela samting, dispela i no inap senisim tingting bilong olgeta man, olsem ol man i strong long bihainim ol kastam o ol man i gat pasin antap. Maski i olsem, Sol i no givap.

¹⁶ Tripela yia bihain, ol Juda long Damaskus i wok yet long birua long Sol. Bihain ol i laik kilim em i dai. (Apo. 9:23; 2 Kor. 11:32, 33; Gal. 1:13-18) Taim Sol i kisim save long dispela, em i bihainim savepasin na larim ol i putim em long wanpela basket na slekim em i go daun long hul i stap long banis bilong taun na em i go. Luk i tok ol man husat i bin helpim Sol long ranawe long dispela nait em “ol disaipel bilong [Sol].” (Apo. 9:25) Ating dispela i makim olsem sampela husat i bin harim Sol i autim tok long Damaskus, ol i bilip na kamap ol disaipel bilong Krais.

17. (a) Ol man i mekim wanem taim ol i harim tok i tru bilong Baibel? (b) Yumi mas wok yet long mekim wanem? Bilong wanem?

¹⁷ Long fes taim yu tokim ol famili, pren, na ol narapela long ol gutpela samting yu lainim, ating yu bin ting olgeta bai bilipim tok i tru bilong Baibel bikos ol dispela tok i klia stret. Ating sampela i bin bilipim ol dispela tok, tasol planti, nogat. Na ating sampela long famili i bin birua long yu. (Mat. 10:32-38) Tasol sapos yu wok yet long kamap gutpela moa long pasin bilong kamapim klia ol tok bilong Baibel na sapos yu bihainim yet ol pasin Kristen, ating bihain ol man husat i birua long yu ol inap senisim tingting.​—Apo. 17:2; 1 Pita 2:12; 3:1, 2, 7.

18, 19. (a) Taim Barnabas i tokaut olsem Sol i bin kamap wanpela disaipel, wanem samting i kamap? (b) Olsem wanem yumi inap bihainim pasin bilong Barnabas na Sol?

 ¹⁸ Taim Sol i go long Jerusalem, ol disaipel i no bilip olsem nau em i kamap wanpela disaipel. Tasol taim Barnabas i tokaut olsem Sol i bin kamap wanpela disaipel, ol aposel i orait long em, na em i stap wantaim ol inap sampela taim. (Apo. 9:26-28) Sol i bihainim savetingting taim em i autim tok, na em i no sem long gutnius. (Rom 1:16) Em i no pret long autim tok long Jerusalem, em ples we em i bin kirap long birua nogut tru long ol disaipel bilong Jisas Krais. Ol Juda long Jerusalem i kirap nogut taim ol i save olsem man husat i bin go pas long pinisim tru ol Kristen, em yet i kamap wanpela Kristen, na nau ol i laik kilim em i dai. Baibel i tok: “Taim ol brata i kisim save long dispela samting, ol i bringim [Sol] i go daun long Sisaria na salim em i go long Tarsus.” (Apo. 9:30) Sol i bihainim tok Jisas i givim long rot bilong kongrigesen. Sol na kongrigesen i kisim helpim long dispela rot.

¹⁹ Tingim, Barnabas i bin go pas long helpim Sol. Gutpela pasin bilong Barnabas i strongim pasin pren i kamap namel long dispela tupela gutpela wokman bilong Jehova. Olsem Barnabas, yu redi long helpim ol nupela man insait long kongrigesen, wok wantaim ol long autim tok, na helpim ol long kamap strong long tok i tru? Sapos yu mekim olsem, yu bai kisim gutpela blesing tru. Sapos yu wanpela nupela pablisa bilong autim gutnius, yu redi long kisim helpim ol narapela i givim long yu, olsem Sol i bin mekim? Taim yu wok wantaim ol pablisa husat i save gut long pasin bilong autim tok, yu bai lain long mekim gut dispela wok, amamas bilong yu bai i go bikpela, na bai yu kisim ol gutpela pren em ol bai stap pren bilong yu inap oltaim.

20, 21. Olsem wanem ol wokman bilong God long bipo na long nau i mekim gutpela wok insait long haptaim i gat “bel isi”?

²⁰ Bihain long Sol i kamap Kristen na lusim Jerusalem, “long olgeta hap bilong Judia, Galili, na Samaria, kongrigesen i stap bel isi.” (Apo. 9:31) Ol disaipel i mekim wanem insait long dispela taim bilong bel isi? (2 Tim. 4:2) Baibel i tok, ol i “kamap strong.” Ol aposel na ol narapela brata, i strongim bilip bilong ol disaipel na i go pas long helpim kongrigesen long “wokabaut long pasin bilong pret long Jehova na i kisim bel isi long rot bilong holi spirit.” Olsem: Pita i mekim wok long dispela haptaim long strongim ol disaipel long taun Lida long hap bilong Saron. Pasin bilong em long wok strong i kirapim planti long dispela hap long baut na “i go long Bikpela.” (Apo. 9:32-35) Ol disaipel i no larim ol narapela samting i pulim tingting bilong ol, nogat, ol i wok strong tru long helpim narapela narapela na long autim gutnius. Olsem na kongrigesen “i wok long kamap bikpela moa.”

²¹ Klostu long yia 2000, long planti kantri ol Witnes Bilong Jehova i stap long haptaim i gat “bel isi” long en. Ol strongpela gavman we i bin mekim nogut tru  long lain bilong God inap planti yia, wantu wok bos bilong ol i pinis. Long sampela kantri we bipo i gat tambu, wok autim tok i kamap isi moa o ol i pinisim tambu. Rot i op long planti tausen Witnes long autim tok long ples klia na planti gutpela samting i kamap.

22. Olsem wanem yu inap mekim gutpela wok long haptaim i no gat hevi?

²² Olsem wanem? Yu mekim gutpela wok long haptaim we i no gat hevi? Sapos yu stap long kantri we i no gat tambu long mekim wok lotu, Satan i laik pulim yu long wok strong long kisim mani kago, na wok bilong Kingdom, nogat. (Mat. 13:22) No ken larim dispela i pulim tingting bilong yu. Mekim gutpela wok long haptaim i no gat hevi. Tingim olsem dispela i opim rot long yu inap autim gut tok na strongim kongrigesen. Tingim, sindaun bilong yu inap senis wantu tasol.

23, 24. (a) Yumi lainim wanem ol bikpela samting long stori bilong Tabita? (b) Yumi mas tingting strong long mekim wanem?

²³ Tingim samting i painim disaipel Tabita, narapela nem bilong em Dorkas. Em i stap long Jopa, wanpela taun i stap klostu long Lida. Dispela gutpela sista i yusim gut taim na ol samting bilong em long “mekim planti samting bilong helpim ol arapela na oltaim em i save givim ol samting long ol rabisman.” Tasol wantu sik i painim em na em i dai. c Dai bilong em i mekim na ol disaipel long Jopa i bel hevi tru, na moa yet ol wido meri em i bin mekim gut long ol. Taim Pita i kamap long haus we ol i bin redim bodi bilong Tabita bilong planim, em i wokim mirakel em ol arapela aposel bilong Jisas Krais i no bin mekim bipo. Pita i beten na Tabita i kirap bek! Yu inap piksaim long tingting amamas bilong ol wido meri na ol narapela disaipel, taim Pita i singautim ol i kam long rum na ol i lukim Tabita i stap laip gen? Dispela samting i strongim ol long karim ol hevi bai painim ol bihain! I no longtaim na “olgeta manmeri long Jopa i harim stori bilong dispela samting, na planti ol i bilip long Bikpela.”​—Apo. 9:36-42.

²⁴ Yumi lainim 2-pela bikpela samting long stori bilong Tabita. (1) Yumi stap laip sotpela taim tasol, olsem na em i bikpela samting olsem yumi mas kisim gutpela nem long ai bilong God taim yumi stap laip yet! (Ekl. 7:1) (2) Bilip bilong kirap bek em i samting tru. Jehova i lukim planti gutpela pasin Tabita i bin mekim na Jehova i bin blesim em. Jehova bai tingim olgeta hatwok  yumi mekim na em bai kirapim bek yumi sapos yumi dai paslain long Armagedon. (Hib. 6:10) Olsem na sapos nau yumi karim hevi long “taim nogut” o yumi stap long taim bilong “bel isi,” yumi mas wok strong long autim gut tok long Krais.​—2 Tim. 4:2.