1. Husat tasol inap tokim yumi long wanem rot long lotuim God?

PLANTI lotu i tok ol i save skulim ol man long God. Tasol dispela i no stret, long wanem, ol lotu i gat narapela narapela tingting long God em i husat na olsem wanem yumi mas lotuim em. Olsem wanem yumi inap luksave long lotu i tru? Jehova wanpela tasol inap tokim yumi long wanem rot yumi ken lotuim em.

2. Olsem wanem yu inap kisim save long lotu i tru?

² Jehova i givim yumi Baibel na bai yumi inap kisim save long wanem lotu em lotu i tru. Olsem na stadi long Baibel, na Jehova bai helpim yu long kisim helpim long ol tok bilong em, long wanem, em i tingim yu tru.—Aisaia 48:17.

3. God i laik yumi mas mekim wanem?

³ Sampela man i tok God i orait long olgeta lotu, tasol Jisas i no tok olsem. Em i tok: “I no olgeta man husat i kolim mi, ‘Bikpela, Bikpela,’ bai i go insait long Kingdom bilong heven, nogat. Man i bihainim laik bilong Papa bilong mi long heven, em tasol bai i go insait.” Olsem na yumi mas kisim save long laik bilong God na mekim laik bilong em. Dispela em i bikpela samting, long wanem, Jisas i tok ol man i no bihainim tok bilong God ol i olsem “ol man nogut!”—Matyu 7:21-23.

4. Jisas i tok wanem samting bai painim yumi taim yumi mekim laik bilong God?

⁴ Jisas i givim tok lukaut olsem taim yumi laik mekim laik bilong God, bai i gat ol hatwok bilong en. “Yupela i mas go insait long liklik geit, long wanem, rot i go long  bagarap i bikpela na geit bilong en i op tumas, na planti manmeri i bihainim dispela rot na i go. Tasol geit i go long laip em i liklik na rot i go long dispela hap em i liklik tru. Na wan wan manmeri tasol i save lukim na bihainim dispela rot.” (Matyu 7:13, 14) Liklik rot, o lotu i tru i bringim man long laip oltaim. Bikpela rot, o lotu giaman i bringim man long dai. Tasol Jehova i no laik bai wanpela man i dai. Em i givim rot long ol man long kisim save long em.—2 Pita 3:9.

5. Olsem wanem yu inap luksave wanem lotu em lotu i tru?

⁵ Jisas i tok yumi inap luksave long wanem lotu em lotu i tru. Yumi inap mekim olsem long rot bilong skelim ol man i bihainim dispela lotu ol i bilip long wanem samting na pasin bilong ol. Em i tok: “Kaikai ol i kamapim bai helpim yupela long luksave long ol.” Na em i tok moa: “Olgeta gutpela diwai i save karim gutpela kaikai.” (Matyu 7:16, 17) Dispela i no makim olsem ol man i lotuim God ol i gutpela olgeta. Tasol oltaim ol wokman bilong God i traim long mekim ol samting i stret. Orait nau yumi ken skelim wanem ol samting bai helpim yumi long luksave long lotu i tru.

6, 7. Olsem wanem Baibel i as bilong olgeta tok lotu tru i skulim ol man long en? Pasin bilong Jisas i skulim yumi long wanem samting?

⁶ Baibel i as bilong ol tok lotu tru i skulim ol man long en. Baibel i tok: “God em i as bilong olgeta tok i stap long Rait Holi, na ol i gutpela long skulim man, stretim man, mekim ol samting i kamap stret, na skulim ol man long stretpela pasin, olsem bai wokman bilong God i ken i stap inap tru na redi long mekim olgeta kain gutpela wok.” (2 Timoti 3:16, 17) Aposel Pol i raitim pas long ol Kristen olsem: “Taim yupela i bin kisim tok bilong God, em yupela i bin harim long mipela, yupela i no kisim olsem  tok bilong ol man, nogat. Yupela i kisim olsem tok bilong God.” (1 Tesalonaika 2:13) Baibel i as bilong ol tok lotu i tru skulim ol man long en. Tingting bilong ol man o pasin bilong ples i no as bilong ol bilip na pasin bilong lotu i tru.

⁷ Ol tok Jisas Krais i lainim ol man long en i kam long Baibel. (Ritim Jon 17:17.) Planti taim em i kamapim tok bilong Baibel. (Matyu 4:4, 7, 10) Ol wokman tru bilong God ol i save bihainim pasin bilong Jisas na olgeta tok ol i skulim ol manmeri long en, tok bilong Baibel i as bilong en.

8. Jisas i skulim yumi olsem wanem long pasin bilong lotuim Jehova?

⁸ Yumi mas lotuim Jehova wanpela tasol. Song 83:18 i tok: “Yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.” Jisas i laik bai ol man i save long God tru em i husat na em i skulim ol manmeri long nem bilong God. (Ritim Jon 17:6.) Jisas i tok: “Yu mas lotu long Jehova, God bilong yu, na yu mas mekim wok bilong em wanpela tasol.” (Matyu 4:10) Olsem na, yumi ol wokman bilong God i mas bihainim pasin bilong Jisas. Yumi lotuim Jehova wanpela tasol, yumi yusim nem bilong em, na yumi lainim ol narapela man long nem bilong God, na long ol samting em bai mekim bilong helpim yumi.

9, 10. Olsem wanem yumi soim olsem yumi laikim narapela narapela?

⁹ Yumi mas laikim tru ol narapela manmeri. Jisas i skulim ol disaipel bilong em long laikim narapela narapela. (Ritim Jon 13:35.) Yumi mas laikim narapela narapela maski yumi bilong wanem hap, wanem kalsa bilong yumi, o yumi maniman o rabisman. Pasin bilong yumi long laikim narapela narapela i mekim yumi pas gut tru wantaim olsem wanpela lain bratasista. (Kolosi 3:14) Olsem na yumi no insait long pait na kilim i dai ol manmeri. Baibel i tok: “Samting i kamapim klia husat ol i pikinini bilong God na husat  ol i pikinini bilong Devil i olsem: Olgeta man husat i no bihainim stretpela pasin ol i no stap long sait bilong God, na ol man i no laikim brata bilong ol, ol tu i no stap long sait bilong God.” Na em i tok moa olsem: “Yumi mas laikim tru narapela narapela. Yumi no ken bihainim pasin bilong Kein, em i stap long sait bilong Satan na kilim i dai brata bilong em.”—1 Jon 3:10-12; 4:20, 21.

¹⁰ Yumi givim taim, strong, na mani samting bilong yumi bilong helpim na strongim bel bilong ol narapela. (Hibru 10:24, 25) Yumi “mekim gutpela pasin long olgeta man.”—Galesia 6:10.

11. Bilong wanem yumi mas bihainim tok bilong Jisas?

¹¹ Yumi mas bilip olsem Jisas Krais em i rot bilong God long kisim bek ol man. Baibel i tok: “I no gat narapela man inap kisim bek yumi, long wanem, i no gat narapela nem long graun em God i makim namel long ol manmeri bilong kisim bek yumi.” (Aposel 4:12) Long Sapta 5 bilong dispela buk, yumi kisim save olsem Jehova i salim Jisas i kam bilong givim laip bilong em olsem pe bilong baim bek ol man i harim tok. (Matyu 20:28) Jehova i makim Jisas long i stap King na bosim graun olgeta. Olsem na Baibel i tok yumi mas bihainim tok bilong Jisas sapos yumi laik kisim laip i stap oltaim.—Ritim Jon 3:36.

12. Bilong wanem yumi no insait long ol wok politik?

¹² Yumi no ken insait long ol wok politik. Jisas i no insait long ol wok politik. Taim em i sanap long kot em i tokim Pailat, bikman bilong Rom, olsem: “Kingdom bilong mi i no bilong dispela graun.” (Ritim Jon 18:36.) Olsem Jisas, yumi stap gut long Kingdom bilong God long heven, na long dispela risen, maski yumi stap long wanem hap, yumi no insait long ol wok politik. Tasol Baibel i tokim yumi long “aninit long ol gavman.” (Rom 13:1) Yumi bihainim ol lo bilong kantri em yumi stap long en. Tasol taim  lo bilong kantri i pait wantaim lo bilong God, yumi bihainim pasin bilong ol aposel em ol i bin tok olsem: “Mipela i mas bihainim tok bilong God tasol, na mipela i no ken bihainim tok bilong ol man.”—Aposel 5:29; Mak 12:17.

13. Yumi autim wanem tok long Kingdom Bilong God?

¹³ Yumi bilip olsem Kingdom Bilong God tasol inap pinisim ol hevi. Jisas i tok olsem ol bai autim “gutnius bilong Kingdom” long olgeta hap bilong graun. (Ritim Matyu 24:14.) I no gat wanpela gavman bilong ol man inap mekim ol samting em Kingdom Bilong God tasol inap mekim bilong helpim yumi. (Song 146:3) Jisas i lainim yumi long beten long Kingdom Bilong God taim em i tok olsem: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) Baibel i tok Kingdom Bilong God bai bagarapim olgeta gavman bilong ol man na “em wanpela tasol bai stap oltaim oltaim.”—Daniel 2:44.

14. Yu ting wanem lotu i lotuim God long pasin i stret?

¹⁴ Taim yu skelim pinis ol dispela samting, askim yu yet: ‘Wanem lotu i save kisim olgeta tok bilong en long Baibel? Na wanem lotu i save tokim ol narapela long nem bilong God? Wanem lain i laikim narapela narapela, na bilip olsem God i salim Jisas i kam bilong kisim bek yumi? Wanem lain i no save insait long ol wok politik? Wanem lain i save autim tok olsem Kingdom Bilong God tasol bai stretim ol hevi bilong yumi?’ Em ol Witnes Bilong Jehova tasol.—Aisaia 43:10-12.

15. Yumi mas mekim wanem sapos yumi laik bai God i orait long lotu bilong yumi?

¹⁵ Pasin bilong bilip olsem God i stap, dispela tasol i no inap. Ol spirit nogut tu i save bilip olsem God i stap, tasol ol i no save bihainim tok bilong em. (Jems 2:19) Bilong  God i ken orait long lotu bilong yumi, yumi mas bilip olsem em i stap, na tu, yumi mas bihainim tok bilong em.

16. Bilong wanem yumi mas lusim lotu giaman?

¹⁶ Sapos yumi laik bai God i orait long lotu bilong yumi, orait yumi mas lusim lotu giaman. Profet Aisaia i tok: “Lusim em na go aut, yupela i mas stap klin.” (Aisaia 52:11; 2 Korin 6:17) Olsem na yumi mas sakim olgeta samting i insait long lotu giaman.

17, 18. “Bikpela Babilon” em wanem samting? Na bilong wanem em bikpela samting long yu mas lusim em?

¹⁷ Lotu giaman em wanem samting? Em lotu i skulim yumi long lotuim God long pasin i no stret wantaim tok i stap long Baibel. Baibel i kolim olgeta lotu giaman olsem “Bikpela Babilon.” (Revelesen 17:5) Bilong wanem? Bihain long Bikpela Tait long taim bilong Noa, planti bilip na pasin bilong ol lotu giaman i kirap long taun Babilon. Ol dispela bilip giaman i go long olgeta hap bilong graun. Olsem: Ol man i stap long Babilon i bin lotuim ol god triwan. Long nau tu planti lotu i skulim ol man long God Triwan, tasol Baibel i kamapim klia olsem i gat wanpela trupela God tasol, em Jehova, na Jisas em i Pikinini bilong em. (Jon 17:3) Ol man i stap long Babilon i bilip tu olsem taim man i dai, em i gat wanpela hap bilong em i stap laip yet na inap pilim bikpela pen long hel. Dispela i no tru.—Lukim Futnot long pes 213, 214 na 215.

¹⁸ God i bin tok profet olsem klostu nau olgeta lotu giaman bai bagarap. (Revelesen 18:8) Olsem wanem? Yu luksave long as na em i bikpela samting long yu mas lusim lotu giaman? God Jehova i laik bai yu mekim olsem taim haptaim i stap yet bilong mekim olsem.—Revelesen 18:4.

19. Taim yu tingting long lotuim Jehova, olsem wanem em bai lukautim yu?

¹⁹ Taim yu laik lusim lotu giaman na lotuim Jehova,  ating sampela pren o famili bilong yu bai i no kliagut long as na yu laik lusim lotu giaman na ol inap putim hevi long yu. Tasol Jehova i no inap lusim yu. Yu bai insait long wanpela bikpela famili bilong planti milion manmeri em ol i stap long olgeta hap, na ol i laikim tru narapela narapela, na yu bai wet long kisim laip long nupela taim God bai kamapim. (Mak 10:28-30) Ating bihain, sampela bilong ol pren na famili bilong yu em ol i bin birua long yu taim yu kirap lotuim Jehova, ol tu bai kirap stadi long Baibel.

20. Bilong wanem em i bikpela samting long lotuim God long pasin i stret?

²⁰ Klostu nau God bai pinisim pasin nogut na Kingdom bilong em bai bosim olgeta hap graun. (2 Pita 3:9, 13) Dispela taim bai i gutpela tru! Olgeta man bai lotuim Jehova long pasin em i laikim. Olsem na em i bikpela samting long yu mekim ol samting nau na lotuim God long pasin i stret.