DISPELA yangpela man i bel hevi tru, a? Em Josep. Nau tasol ol brata bilong em i salim em long ol dispela man em ol i laik i go long Isip. Josep bai kamap wokboi nating long Isip. Bilong wanem ol brata bilong em i mekim dispela pasin nogut? Ol i mekim olsem, long wanem, ol i jeles long Josep.

Papa bilong ol, Jekop, em i laikim tumas Josep. Em i soim olsem em i laikim tru Josep taim em i givim wanpela naispela longpela saket long Josep. Taim 10-pela brata bilong Josep i lukim olsem Jekop i laikim tru Josep, ol i kirap jeles long Josep na ol i nolaik tru long em. Tasol i gat narapela as tu na ol i nolaik tru long em.

Josep i bin lukim tupela driman. Long tupela driman wantaim Josep i lukim ol brata bilong em i brukim skru long em. Taim Josep i tokim ol brata bilong em long dispela tupela driman, ol i nolaik tru long em.

Wanpela taim ol brata bilong Josep i stap lukautim ol sipsip bilong papa bilong ol na Jekop i salim Josep i go lukim ol. Taim ol brata bilong Josep i lukim em i kam, sampela bilong ol i tok: ‘Yumi kilim em i dai!’ Tasol Ruben, em bikpela brata bilong ol, em i tok: ‘Yumi no ken kilim em i dai.’ Olsem na ol i holim Josep na tromoim em i go insait long wanpela hul wara i drai pinis. Ol i mekim pinis na nau ol i sindaun na toktok long wanem samting ol bai mekim long em.

Long dispela taim, ol i lukim ol lain Ismael i kam. Juda i tokim ol brata bilong em: ‘Yumi salim em long ol dispela lain Ismael.’ Na ol i mekim olsem. Ol i salim Josep na lain Ismael i baim em long 20 mani silva. Ol i mekim pasin nogut tru!

Ol dispela brata bai tok wanem long papa bilong ol? Ol i kilim i dai wanpela meme na putim naispela saket bilong Josep long blut bilong en. Bihain ol i kisim dispela saket i go long papa bilong ol na ol i tok: ‘Mipela i painim dispela saket. Yu lukim, nogut em saket bilong Josep.’

Jekop i lukim olsem em saket bilong Josep na em i tok: ‘Ating wanpela wel animal i kilim i dai Josep.’ Ol brata bilong Josep i laik bai papa i ting olsem. Jekop i bel hevi tru. Inap planti de em i krai. Tasol Josep i no i dai. Orait, nau yumi ken stori long ol samting i painim em long Isip.