INAP tupela mun bihain long ol Israel i bin lusim Isip, ol i kamap long maunten Sainai, ol i kolim tu maunten Horep. Em dispela ples bipo God i bin toktok wantaim Moses long diwai i paia. Ol Israel i sanapim haus sel bilong ol na sindaun inap liklik taim.

Moses i go antap long maunten na ol Israel i wet daunbilo. Antap long maunten, Jehova i tokim Moses olsem Em i laik bai ol Israel i mas bihainim tok bilong Em na bai ol i kamap lain bilong Em. Taim Moses i lusim maunten na i go daun, em i tokim ol Israel long dispela tok bilong Jehova. Na ol Israel i tok ol bai bihainim tok bilong Jehova, long wanem, ol i laik kamap lain bilong em.

Nau Jehova i mekim narapela kain samting. Em i mekim smok i kamap long het bilong maunten na klaut i pairap. Na em i toktok long ol Israel: ‘Mi Jehova, mi God bilong yupela. Mi bin helpim yupela long lusim Isip.’ Na em i givim lo long ol, olsem: ‘Yupela i no ken lotuim ol narapela god, mi wanpela tasol.’

God i givim 9-pela lo moa long ol Israel. Ol Israel i pret nogut tru. Ol i tokim Moses: ‘Yu givim tok bilong God long mipela, long wanem, mipela i pret nogut God yet i toktok long mipela na bai mipela i dai.’

Bihain Jehova i tokim Moses: ‘Kam antap long maunten. Bai mi givim tupela hap ston long yu em mi raitim pinis ol dispela lo mi laik bai ol manmeri i bihainim.’ Olsem na Moses i go antap gen long maunten. Em i stap inap 40 de na 40 nait.

God i givim planti lo long ol manmeri bilong em. Moses i raitim ol dispela lo. Na tu, God i givim dispela tupela hap ston long Moses. Long ol dispela ston, God yet i bin raitim dispela Tenpela Lo long en.

Ol Tenpela Lo i bikpela lo. Tasol i wankain tu long ol arapela lo em God i bin givim long ol Israel. Wanpela bilong ol dispela lo i tok: ‘Yu mas laikim tru Jehova long bel olgeta na tingting olgeta na strong olgeta bilong yu.’ Na narapela lo i olsem: ‘Yu mas laikim wantok bilong yu olsem yu laikim yu yet.’ Pikinini Bilong God, em Jisas Krais, em i tok dispela tupela lo i bikpela lo winim olgeta narapela lo Jehova i bin givim long ol Israel. Bihain yumi bai lainim planti samting long Pikinini Bilong God na ol samting em i skulim ol man long en.