LUKIM dispela man insait long wara. Bikpela hevi i painim em, a? Dispela pis i laik daunim em! Yu save dispela man em i husat? Nem bilong em Jona. Orait yumi ken stori long olsem wanem hevi i painim em.

Jona em i wanpela profet bilong Jehova. Bihain liklik long profet Elisa i dai, Jehova i tokim Jona: ‘Yu go long bikpela taun Ninive. Ol manmeri bilong dispela taun i mekim planti pasin nogut, na mi laik bai yu mas toktok long ol long dispela samting.’

Tasol Jona i no laik i go. Olsem na em i kalap long wanpela sip bilong i go long narapela hap. Jehova i no amamas long Jona i ranawe. Olsem na em i kirapim bikpela win. Win i strong tru na sip i laik bagarap. Ol boskru i pret nogut tru na ol i singaut long ol god bilong ol long helpim ol.

Bihain Jona i tokim ol: ‘Mi save lotuim Jehova, em God i bin wokim heven na graun. Em i bin givim wanpela wok long mi, tasol mi no laik mekim na mi ranawe long em.’ Olsem na ol boskru i tok: ‘Bai mipela i mekim wanem long yu na bai win i dai?’

Jona i tok: ‘Tromoi mi i go daun, na bai solwara i stap isi.’ Ol boskru i no laik mekim olsem, tasol biksi i strong moa yet, olsem na ol i tromoi Jona i go daun. Wantu tasol bikpela win i dai, na solwara i stap isi.

Jona i go daun insait long wara na dispela bikpela pis i daunim em. Tasol em i no i dai. Inap 3-pela de na 3-pela nait em i stap long bel bilong pis. Jona i sori tru olsem em i no bin bihainim tok bilong Jehova na go long Ninive. Yu save em i mekim wanem?

Jona i beten askim Jehova long helpim em. Jehova i kirapim pis long trautim Jona long nambis. Bihain Jona i go long Ninive. Dispela i lainim yumi olsem em i bikpela samting long yumi mas mekim olgeta samting Jehova i tokim yumi long mekim.