LUKIM Samuel i kapsaitim wel long het bilong dispela man. Ol i save mekim dispela pasin long man bilong soim olsem God i bin makim em bilong kamap king. Jehova i tokim Samuel long kapsaitim wel long het bilong Sol. Dispela wel i narapela kain na em i gat naispela smel.

Sol i ting em i no gutpela man inap long kamap king. Em i tokim Samuel: ‘Mi bilong lain Benjamin, dispela lain i liklik tru long Israel. Olsem wanem na yu tok mi bai kamap king?’ Jehova i laikim Sol, long wanem, em i no mekim olsem em i gat biknem. Olsem na Jehova i makim em long kamap king.

Tasol Sol em i no man nating o man i no gat nem. Famili bilong em ol i maniman, na em i luk naispela tru na i longpela man. Em i longpela man winim olgeta man long Israel! Na tu, Sol em i man bilong ran spit tru, na em i strongpela man. Ol manmeri i amamas olsem Jehova i makim Sol long kamap king. Olgeta i singaut: ‘Em i ken i stap king planti yia!’

Ol birua bilong Israel ol i strong moa. Ol i wok yet long putim planti hevi long ol Israel. Sol i kamap king pinis na nau ol Amon i kam bilong pait long ol. Tasol Sol i bungim bikpela ami, na em i winim ol Amon long pait. Olsem na ol Israel i amamas long Sol i stap king.

Planti taim Sol i helpim ol Israel long daunim ol birua bilong ol. Na pikinini bilong Sol, nem bilong em Jonatan, em i wanpela strongpela man. Jonatan i helpim ol Israel long winim planti pait. Ol Filistia i stap yet olsem nambawan birua bilong ol Israel. Wanpela taim planti tausen tausen Filistia i kam bilong pait long ol Israel.

Samuel i tokim Sol long wet inap long em i kam mekim ofa long Jehova. Tasol Samuel i no kam kwik. Sol i pret olsem nogut ol Filistia i kirap long mekim pait, olsem na em yet i mekim ofa. Taim Samuel i kam, em i tokim Sol olsem em i bin sakim tok. Samuel i tok: ‘Jehova bai makim narapela man bilong kamap king bilong Israel.’

Bihain Sol i sakim tok gen. Olsem na Samuel i tokim em: ‘Pasin bilong harim tok bilong Jehova i winim pasin bilong givim gutpela sipsip long em olsem ofa. Yu bin sakim tok bilong Jehova, olsem na Jehova i no inap larim yu i stap king bilong Israel.’

Dispela inap lainim yumi long wanpela samting: Em i bikpela samting long oltaim yumi mas bihainim tok bilong Jehova. Na tu, em i soim olsem maski man i stap gutpela man, bihain em inap senisim pasin na kamap man nogut, olsem Sol i bin mekim. Yumi no laik kamap man nogut, a?