LUKIM Jisas i holim dispela liklik mangi. Yu inap luksave olsem Jisas i tingim tru ol liklik pikinini, a? Ol man i sanap lukluk em ol aposel. Jisas i tok wanem long ol? Orait yumi ken stori long dispela.

Jisas na ol aposel bilong em i stap long wanpela ples longwe na ol i bin wokabaut i kam. Taim ol i kam yet long rot ol aposel i tok pait namel long ol yet. Olsem na taim ol i kamap pinis long ples, Jisas i tok: ‘Long rot yupela i mekim wanem toktok?’ Jisas i save pinis long samting ol i bin tok pait long en. Tasol em i laik bai ol aposel i mas kamapim.

Ol aposel i no bekim tok, long wanem, ol i bin tok pait long husat i bikpela namel long ol. Sampela disaipel i laik stap antap long ol arapela. Olsem wanem bai Jisas i stretim tingting bilong ol?

Em i singautim dispela liklik mangi, na sanapim em long ai bilong ol. Nau em i tokim ol disaipel bilong em: ‘Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong God. Man i gat biknem tru long kingdom em man husat i daunim em yet na kamap olsem dispela liklik pikinini.’ Yu save bilong wanem Jisas i tok olsem?

Em i tok olsem, long wanem, ol liklik pikinini ol i no save tingting long winim ol narapela o kisim biknem. Olsem na ol aposel i mas kamap olsem ol liklik pikinini na ol i no ken tok pait long husat em i namba wan namel long ol.

Planti taim Jisas i soim olsem em i tingim tru ol liklik pikinini. Sampela mun bihain long dispela ol manmeri i bringim ol pikinini bilong ol i kam long Jisas. Ol aposel i laik pasim ol. Tasol Jisas i tokim ol aposel: ‘Larim ol pikinini i kam long mi, na yupela i no ken pasim ol. Kingdom bilong God em i bilong ol man i olsem ol dispela pikinini.’ Na Jisas i holim ol pikinini na blesim ol. Jisas i laikim ol liklik pikinini, na yumi amamas long dispela, a?