JISAS i raun long planti hap na oraitim ol sikman. Tok bilong ol dispela mirakel i go nabaut long olgeta ples na taun. Olsem na ol man i kisim ol lek nogut, aipas, yaupas, na ol arapela sikman i kam long em. Jisas i oraitim sik bilong ol.

Jon i baptaisim Jisas, na nau winim 3-pela yia i lus pinis. Jisas i tokim ol aposel, klostu nau bai em i go long Jerusalem na ol man bai kilim em i dai, na bihain em bai kirap bek. Tasol pastaim em i wok yet long oraitim ol sikman.

Wanpela taim Jisas i wok long skulim ol man long wanpela de Sabat. Sabat em de malolo bilong ol Juda. Dispela meri yu lukim long piksa i gat bikpela sik. Inap 18 yia bun bilong baksait bilong em i krungut, na em i no inap sanap stret. Olsem na Jisas i putim han long em na nau em i sanap stret. Em i kamap orait!

Dispela i mekim na ol bikman bilong lotu i kros. Wanpela bilong ol i singaut strong long ol manmeri: ‘I gat 6-pela de bilong mekim wok. Sapos yupela i laikim man i oraitim sik bilong yupela, orait kam long ol dispela de, na no ken kam long Sabat!’

Tasol Jisas i tok: ‘Yupela man nogut. Long de Sabat yupela olgeta i save lusim donki bilong yupela na kisim i go dring wara. Olsem na dispela meri em i bin sik inap 18 yia, ating i no stret long oraitim em long de Sabat, a?’ Tok bilong Jisas i mekim ol dispela man nogut i sem.

Bihain Jisas na ol aposel i wokabaut i go long Jerusalem. Taim ol i kamap long Jeriko, tupela aipas i harim olsem Jisas i wokabaut i kam. Olsem na ol i singaut: ‘Jisas, helpim mipela!’

Jisas i singautim tupela na i tok: ‘Yutupela i laik bai mi mekim wanem long yutupela?’ Ol i tok: ‘Bikpela, opim ai bilong mitupela.’ Jisas i putim han long ai bilong tupela, na wantu tasol ol inap lukluk! Yu save bilong wanem Jisas i wokim ol dispela gutpela mirakel? Em i mekim olsem, long wanem, em i laikim ol man na em i laik bai ol i mas bilip long em. Olsem na yumi ken bilip tru olsem taim em i mekim wok king, bai i no gat wanpela man i sik.