JISAS i stap long maunten Oliv. Dispela 4-pela man i stap wantaim em, em ol aposel bilong em. Em tupela brata, Andru na Pita, na narapela tupela brata, Jems na Jon. Long baksait yu inap lukim haus lotu bilong God long Jerusalem.

Em 2-pela de bihain long taim Jisas i bin sindaun long donki na i go insait long Jerusalem. Nau em Tunde. Long moningtaim Jisas i bin i go long haus lotu. Na ol pris i laik holim Jisas na kilim em i dai. Tasol ol i bin pret long mekim olsem, long wanem, ol manmeri i laikim Jisas.

Jisas i kolim ol dispela hetman bilong lotu olsem ol ‘snek nogut!’ Na Jisas i tok God bai givim strafe long ol, long wanem, ol i bin mekim planti pasin nogut. Bihain Jisas i go antap long maunten Oliv, na dispela 4-pela aposel i kirap givim sampela askim long em. Yu save long ol samting ol i askim Jisas long en?

Ol aposel i askim Jisas long ol samting bai kamap bihain. Ol i save olsem Jisas bai pinisim olgeta pasin nogut long graun. Tasol ol i laik save long wanem taim dispela samting bai kamap. Wanem taim bai Jisas i kam bek gen bilong mekim wok olsem King?

Jisas i save olsem ol disaipel bilong em long graun bai i no inap lukim em taim em i kam bek. Ol bai i no inap lukim em, long wanem, em bai i stap long heven. Olsem na Jisas i tokim ol aposel long sampela samting bai kamap long graun taim em i mekim wok king long heven. Wanem sampela samting bai kamap?

Jisas i tok bai i gat ol bikpela pait, na planti man bai sik na hangre, pasin nogut bai i go bikpela, na bai i gat ol bikpela bikpela guria. Jisas i tok tu olsem ol bai autim gutnius bilong Kingdom Bilong God long olgeta hap bilong graun. Olsem wanem? Yumi lukim ol dispela samting i kamap long taim bilong yumi? Yes! Olsem na yumi ken save, Jisas i mekim pinis wok king long heven. Klostu nau bai em i pinisim olgeta pasin nogut long graun.