YU LUKIM dispela bikpela sta wanpela man long piksa i makim long han? Taim ol i lusim Jerusalem, dispela sta i kamap. Ol dispela man i bilong hap Is, na ol i save stadi long ol sta. Ol i ting dispela nupela sta bai bringim ol i go long wanpela bikman.

Taim ol i kamap long Jerusalem, ol i tok: ‘Dispela pikinini em bai kamap king bilong ol Juda, em i stap we?’ Dispela tok “ol Juda” em i narapela nem bilong lain Israel. Ol dispela man i tok: ‘Mipela i bin lukim sta bilong dispela pikinini taim mipela i stap long hap Is, na mipela i kam bilong lotu long em.’

Taim Herot, king bilong Jerusalem, em i harim dispela tok, em i kros. Em i no laik bai narapela king i senisim em. Olsem na Herot i singautim ol hetpris i kam, na em i tok: ‘Dispela king em God i bin tok promis long salim i kam, em bai kamap long wanem ples?’ Ol i tok: ‘Baibel i tok long Betlehem.’

Herot i singautim ol dispela man bilong hap Is na i tok: ‘Yupela go na painim dispela pikinini. Taim yupela i painim em pinis, orait yupela i mas toksave long mi. Mi tu i laik go na lotu long em.’ Tasol tru tru, Herot i laik kilim i dai dispela pikinini!

Orait nau sta i go paslain long ol dispela man na bringim ol i go long Betlehem, na sta i makim haus dispela pikinini i stap long en. Taim ol i go insait long haus, ol i lukim Maria na liklik Jisas. Ol i bringim ol presen na givim long Jisas. Tasol bihain, long rot bilong driman Jehova i toksave olsem ol i no ken i go bek long Herot. Olsem na ol i bihainim narapela rot na go bek long ples bilong ol.

Taim Herot i harim olsem ol dispela man i go pinis long ples bilong ol, em i kros nogut tru. Olsem na em i tok na ol i kilim i dai olgeta pikinini man long Betlehem em ol i no winim yet 2-pela krismas. Tasol paslain long dispela, long driman Jehova i toksave long Josep, na Josep i kisim famili bilong em na ol i go long Isip. Bihain, taim Josep i harim olsem Herot i dai pinis, em i kisim Maria na Jisas na ol i go bek long Nasaret. Na Jisas i go bikpela long Nasaret.

Yu ting husat i kamapim dispela nupela sta? Tingim, pastaim dispela sta i bringim ol saveman i go long Jerusalem. Satan i laik kilim i dai Pikinini Bilong God, na em i save King Herot bilong Jerusalem i laik mekim olsem. Olsem na yumi ken ting Satan i bin kamapim dispela sta.