YU LUKSAVE long dispela buk em liklik meri hia wantaim ol pren bilong em i ritim? Yes, em dispela buk yu wok long ritim​—⁠Baibel Stori Buk Bilong Mi. Na ol i ritim wankain stori olsem nau yu ritim⁠—​“Rot Bilong i Stap Oltaim.”

Yu save ol i lainim wanem samting? Olsem: Sapos yumi laik i stap oltaim, yumi mas kisim save long Jehova na Pikinini bilong em, Jisas. Baibel i tok: ‘Rot bilong i stap oltaim i olsem. Kisim save long God tru, na Pikinini em i bin salim i kam long graun, em Jisas Krais.’

Olsem wanem yumi inap kisim save long God Jehova na Pikinini bilong em Jisas? Wanpela rot em long ritim olgeta stori bilong Baibel Stori Buk Bilong Mi. Dispela buk i stori long planti samting bilong Jehova na Jisas, a? Em i stori long ol samting ol i mekim pinis, na ol samting ol bai mekim bihain. Yumi mas ritim dispela buk, tasol i gat sampela samting moa yumi mas mekim.

Yu lukim dispela narapela buk i stap long plua? Em Baibel. Yu mas tokim wanpela man long ritim long yu ol hap bilong Baibel i kamapim ol stori bilong dispela buk. Baibel i tokim yumi long olgeta samting yumi mas mekim na yumi inap mekim stret wok bilong Jehova na bai yumi kisim laip oltaim. Olsem na yumi mas kisim pasin bilong stadi long Baibel long olgeta taim.

Yumi mas kisim save long God Jehova na Jisas Krais, tasol i gat narapela samting moa yumi mas mekim. Yumi inap kisim bikpela save long God na Krais na ol samting ol i skulim yumi long en, tasol yumi inap lus long kisim laip oltaim. Yu save wanem samting moa yumi mas mekim?

Yumi mas bihainim ol tok yumi lainim. Yu tingim Judas Iskariot? Em i wanpela bilong ol 12-pela man em Jisas i bin makim bilong kamap aposel. Judas i gat bikpela save long Jehova na Jisas. Tasol wanem samting i kamap long em? Bihain em i tingim em yet tasol, na em i kamapim Jisas long ol birua na bai em i ken kisim 30 mani silva. Olsem na Judas i no inap kisim laip oltaim.

Yu tingim Gehasi, em yumi bin lain long em long Stori 69? Em i aigris long laplap na mani bilong narapela man. Olsem na em i mekim tok giaman na bai em i ken kisim ol dispela samting. Tasol Jehova i givim strafe long em. Sapos yumi no bihainim ol lo bilong God, em bai givim strafe long yumi tu.

Tasol i gat planti gutpela man em ol i bin i stap gut long wok bilong Jehova. Yumi laik bihainim pasin bilong ol, a? Liklik Samuel i stap gutpela piksa yumi ken bihainim. Tingim, olsem yumi bin lain long Stori 55, em i gat 4-pela o 5-pela krismas tasol taim em i kirap mekim wok bilong Jehova long haus lotu sel. Olsem na maski yu liklik yet, yu inap mekim wok bilong Jehova.

Na yumi olgeta i laik bihainim pasin bilong Jisas Krais. Olsem yumi bin lain long Stori 87, taim em i liklik yet em i stap long haus lotu na tokim ol narapela long Papa bilong em long heven. I gutpela yumi bihainim pasin bilong em. Yumi mas tokim ol man long gutpela God bilong yumi, Jehova, na Pikinini bilong em, Jisas Krais. Sapos yumi mekim ol dispela samting, bai yumi inap i stap oltaim long nupela Paradais God bai kamapim long graun.