1-3. Wanem sampela samting i mekim na i dai bilong Jisas i narapela kain tru?

 LONG wanpela de klostu 2,000 yia i go pinis, wanpela man i no gat asua i sanap long kot, na kot i tok em i bin mekim ol pasin nogut, tasol em i no bin mekim. Na bihain ol man i givim bikpela pen long em i go inap long em i dai. Dispela i no namba wan taim ol man i mekim pasin nogut tru na kilim i dai nating wanpela man, na sori tru, i no laspela taim ol i mekim olsem. Tasol i dai bilong dispela man i narapela kain.

² Taim dispela man i karim bikpela pen long ol laspela aua bilong em i stap laip, ol samting i kamap long skai i soim olsem i dai bilong em i bikpela samting. Maski em belo, wantu ples i tudak. Olsem wanpela man bilong raitim Baibel i tok, “lait bilong san i pinis.” (Luk 23:44, 45) Paslain liklik long man i dai, em i mekim tok ol man i no inap lusim tingting long en: “Em pinis nau!” Tru tumas, long rot bilong i dai bilong em, em i kamapim wanpela gutpela samting tru. Ofa bilong em i kamapim tru pasin laikim, winim ol samting ol narapela man bilong graun i bin mekim bilong kamapim dispela pasin.​—Jon 15:13; 19:30.

³ Dispela man em Jisas Krais. Planti man i save long em i bin karim bikpela pen na i dai, dispela samting i kamap long Nisan 14, 33 C.E. Tasol planti ol i no tingim wanpela bikpela samting. Jisas i karim bikpela pen tru, tasol i gat wanpela man i karim bikpela pen moa yet. Wanpela man i mekim bikpela samting moa long dispela de—em i mekim nambawan bikpela samting i kamapim pasin laikim, winim olgeta lain long heven na graun. Em wanem samting? Bekim bilong dispela askim i kirapim yumi long tingim wanpela bikpela samting tru: Pasin laikim bilong Jehova.

4. Olsem wanem wanpela soldia bilong Rom i luksave olsem Jisas i no wanpela man nating? Dispela soldia i tok wanem?

⁴ Wanpela kepten bilong ami bilong Rom i bosim wok bilong kilim i dai Jisas, em i kirap nogut long tudak i kamap paslain long Jisas i dai na bihain bikpela guria i kamap. Em i tok: “Tru tumas, dispela em i Pikinini Bilong God.” (Matyu 27:54) Jisas i no wanpela man nating. Dispela soldia i bin helpim wok bilong kilim i dai dispela wanpela Pikinini Bilong God Antap Tru! Pasin bilong Papa long laikim dispela Pikinini i bikpela olsem wanem?

5. Paslain long Pikinini i kam long graun, em i bin stap hamas yia wantaim Papa bilong em long heven?

⁵ Baibel i kolim Jisas olsem “fesbon bilong olgeta samting God i bin wokim.” (Kolosi 1:15) Tingim, Pikinini Bilong Jehova i bin i stap paslain long taim graun na ples antap i kamap. Orait, Papa na Pikinini i bin stap wantaim inap hamas yia? Sampela saientis i tok, ples antap i bin stap 13 bilion yia. Yu inap kliagut long kain bikpela haptaim olsem? Maski dispela tok i stret o nogat, Pikinini Bilong Jehova i bin stap longpela taim tru, winim 13 bilion yia! Em i bin mekim wanem insait long dispela longpela haptaim?

6. (a) Pikinini Bilong Jehova i bin mekim wanem paslain long em i kamap man long graun? (b) Wanem kain pasin i stap namel long Jehova na Pikinini bilong em?

⁶ Pikinini i amamas long mekim wok bilong Papa olsem “saveman bilong wok.” (Provep 8:30) Baibel i tok: “I no gat wanpela samting i bin kamap long narapela rot, [long rot bilong Pikinini]” tasol. (Jon 1:3) Olsem na Jehova na Pikinini bilong em i wok wantaim bilong kamapim olgeta narapela samting. Ol i stap amamas wantaim! Planti man bai wanbel long tok olsem pasin laikim i stap namel long papamama na pikinini em i strong tru. Na pasin laikim “em i nambawan gutpela rot bilong mekim ol man i kamap wanbel.” (Kolosi 3:14) Olsem na i hatwok long yumi long save long pasin bilong tupela long pas strong tru wantaim insait long dispela bikpela haptaim. Tru tumas, dispela pasin laikim i stap namel long Jehova God na Pikinini bilong em i strong, i no gat narapela tupela man i bin pas strong olsem.

7. Taim Jisas i kisim baptais, Jehova i tok wanem bilong kamapim tingting bilong em?

 ⁷ Tasol Papa i salim Pikinini i kam na em i kamap wanpela bebi hia long graun. Dispela i mekim na winim 30 yia Jehova i no inap bung long heven wantaim dispela Pikinini em i laikim tumas. Long heven Jehova i lukluk i stap taim Jisas i wok long i go bikpela na kamap man i gutpela olgeta. Taim Jisas i gat 30 krismas samting, em i kisim baptais. Yumi inap save Jehova i pilim olsem wanem long Jisas. Papa yet i tokaut long heven olsem: “Dispela em i Pikinini bilong mi, mi laikim em tumas na mi amamas long em.” (Matyu 3:17) Jisas i mekim gut olgeta samting Baibel i bin tok profet long em, na em i mekim olgeta samting Jehova i askim em long mekim, olsem na Papa bilong em i amamas tru long em!​—Jon 5:36; 17:4.

8, 9. (a) Jisas i karim wanem ol hevi long Nisan 14, 33 C.E.? Dispela i mekim wanem long Papa bilong em long heven? (b) Bilong wanem Jehova i larim Pikinini bilong em i karim pen na i dai?

⁸ Tasol Jehova i pilim olsem wanem long Nisan 14, 33 C.E.? Em i pilim olsem wanem taim ol man i kamapim Jisas long ol birua na ol i holim em long nait? Na taim ol pren bilong Jisas i lusim em na ol man i wokim kot i no stret? Na taim ol i tok bilas long em, spetim em, na paitim em? Na taim ol i wipim em na dispela i brukim skin long baksait bilong em? Na taim ol i nilim han na lek bilong em long diwai pos na larim em i hangamap long en na ol man i tok nogut long em? Papa i pilim olsem wanem taim Pikinini em i laikim tumas i pilim bikpela pen tru na i krai long em? Jehova i pilim olsem wanem taim Jisas i pulim win laspela taim, na nau long namba wan taim kirap long taim Jehova i wokim ol samting na i kam, gutpela Pikinini bilong em i no stap moa?​—Matyu 26:14-16, 46, 47, 56, 59, 67; 27:38-44, 46; Jon 19:1.

⁹ Bai yumi tok wanem? Jehova i save pilim ol samting long bel, olsem na pen em i pilim taim Pikinini bilong em i dai i bikpela tru, yumi no inap mekim sampela tok i kamapim klia pen em i pilim. Tasol yumi inap mekim ol tok i kamapim as na Jehova i larim dispela samting i kamap. Bilong wanem Papa i larim em yet i pilim kain pen olsem? Jehova i kamapim wanpela gutpela tok tru long yumi long Jon 3:16. Em i wanpela bikpela ves bilong  Baibel, olsem na sampela i tok dispela ves i kamapim ol bikpela tok bilong ol Gutnius. Em i tok: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.” Olsem na as na Jehova i larim ol dispela samting i kamap em: pasin laikim. Presen bilong Jehova—em i salim Pikinini bilong em bilong karim pen na dai bilong helpim yumi—em i nambawan bikpela samting bilong kamapim pasin laikim, winim olgeta narapela pasin laikim.

10. Wanem samting i bikpela samting long ol man? Wanem samting i bin kamap long mining bilong dispela tok ‘pasin laikim’?

¹⁰ Wanem mining bilong dispela tok ‘pasin laikim’? Sampela i tok pasin laikim em i nambawan bikpela samting long ol man. Kirap long taim ol man i bon i go inap long taim ol i dai, ol i laik bai narapela i laikim ol, ol i stap gut taim narapela i laikim ol, na ol i no stap gut o dai taim i no gat man i laikim ol. Tasol i hatwok long kamapim gut mining bilong pasin laikim. Tru, ol man i save stori planti long pasin laikim. I gat planti buk, singsing, na ol stori long dispela pasin. Tasol olgeta dispela samting i no kamapim gut mining bilong pasin laikim. Ol man i save kamapim dispela tok planti taim tru, olsem na i hatwok moa long save long mining tru bilong en.

11, 12. (a) Yumi ken kisim we bikpela save long pasin laikim? Bilong wanem yumi inap kisim save long en long Baibel? (b) Tok Grik bilong bipo i stori long wanem narapela narapela pasin laikim? Long Ol Skripsa Grik ol i mekim wok planti taim long wanem tok bilong makim “pasin laikim”? (Lukim tu futnot.) (c) Taim Baibel i yusim tok a·gaʹpe, planti taim em i makim wanem samting?

¹¹ Tasol Baibel i lainim yumi gut long pasin laikim. Wanpela dikseneri (Vine’s Expository Dictionary of New Testament Words) i tok: “I gat wanpela rot tasol bilong save long pasin laikim em i wanem samting, em long rot bilong ol samting em i kirapim man long mekim.” Ol stori bilong Baibel long ol samting Jehova i bin mekim i lainim yumi long planti samting long pasin laikim bilong em—gutpela pasin bilong em long tingim tru ol man em i bin wokim. Olsem yumi bin stori pinis long en, i no gat narapela samting i kamapim gut dispela pasin olsem nambawan bikpela  samting Jehova i bin mekim bilong soim pasin laikim bilong em. Long ol sapta i kamap bihain, bai yumi kisim save long planti narapela samting i kamapim pasin laikim bilong Jehova. Na tu, yumi ken kisim sampela save moa long en long rot bilong ol tok i makim ‘pasin laikim’ olsem ol i bin raitim long Baibel long pastaim. Long tok Grik bilong bipo, i gat 4-pela tok i makim “pasin laikim.” a Tok ol i mekim wok long en planti taim long Ol Skripsa Grik em a·gaʹpe. Wanpela dikseneri bilong Baibel i kolim dispela olsem “nambawan strongpela tok i makim pasin laikim.” Bilong wanem i olsem?

¹² Planti taim long Baibel, a·gaʹpe i makim pasin laikim em ol stiatok i stiaim man long kamapim. Olsem na dispela pasin laikim i no olsem samting i kamap nating long bel taim narapela i mekim sampela pasin o tok. Planti samting moa i insait long en, na pasin bilong tingting na skelim gut ol samting i as bilong en. Na bikpela samting tru, man i gat pasin laikim Kristen em i save tingim tru narapela na i no tingim em yet. Lukim gen Jon 3:16. Husat dispela “olgeta manmeri bilong graun” em God i laikim tru, olsem na em i givim dispela wanpela Pikinini bilong em? Em ol manmeri ofa bilong Krais inap baim bek ol. Insait long dispela lain i gat planti manmeri i save mekim pasin nogut. Olsem wanem? Jehova i save laikim olgeta wan wan olsem pren bilong em, olsem em i bin laikim bilipman Abraham? (Jems 2:23) Nogat, tasol Jehova i mekim gutpela pasin long olgeta, maski em i mas givim bikpela samting tru bilong em yet bilong mekim olsem. Em i laik bai olgeta man i tanim bel na senisim pasin bilong ol. (2 Pita 3:9) Planti ol i save mekim olsem. Jehova i amamas long tok ol i pren bilong em.

13, 14. Wanem samting i soim olsem planti taim pasin laikim Kristen i gat pasin bilong sori na tingim tru man?

¹³ Tasol sampela i gat tingting kranki long mining bilong  dispela a·gaʹpe long Baibel. Ol i ting dispela pasin laikim em i samting bilong tingting tasol na i no kamap long bel. Tasol planti taim pasin laikim Kristen i gat gutpela pasin bilong sori na tingim tru narapela. Olsem: Taim Jon i raitim tok, “Papa i laikim tumas Pikinini,” em i mekim wok long wanpela pasin bilong kolim tok a·gaʹpe. (Jon 3:35) Yu ting pasin bilong tingim tru narapela i no stap insait long dispela pasin laikim namel long Papa na Pikinini? Long Jon 5:20, Jisas i tok olsem “Papa i laikim tumas Pikinini,” na em i mekim wok long wanpela pasin bilong kolim tok phi·leʹo. Planti taim pasin laikim bilong Jehova i gat pasin bilong sori na tingim tru man. Tasol i no gat wanpela taim ol samting em i pilim long bel tasol i bosim pasin laikim bilong em. Oltaim ol gutpela na stretpela stiatok bilong em i bosim dispela pasin.

¹⁴ Olsem yumi bin lukim, olgeta pasin bilong Jehova i nambawan tru, na i gutpela olgeta, na yumi laikim ol tru. Tasol yumi laikim moa yet pasin laikim, em i pulim yumi strong i go long Jehova. Gutpela tru na pasin laikim i nambawan bikpela pasin bilong em. Olsem wanem yumi ken save long dispela?

15. Baibel i tok wanem long pasin laikim bilong Jehova? Olsem wanem dispela tok i narapela kain? (Lukim tu futnot.)

¹⁵ Baibel i mekim wanpela tok long pasin laikim em i no mekim long ol narapela bikpela pasin bilong Jehova. Baibel i no tok God em i bikpela strong o God em i stretpela pasin o God em i savetingting. Em i gat ol dispela pasin, na em i As bilong ol dispela pasin, na i no gat narapela man inap kamapim ol olsem em i save mekim. Tasol Baibel i mekim wanpela bikpela tok long namba 4 pasin bilong em, em i tok: “God em i pasin laikim.” b (1 Jon 4:8) Wanem mining bilong dispela tok?

16-18. (a) Bilong wanem Baibel i tok “God em i pasin laikim”? (b) I gat planti samting long graun i gat laip, bilong wanem man tasol inap makim pasin laikim bilong Jehova?

 ¹⁶ Dispela tok “God em i pasin laikim” i no makim olsem “God i wankain olsem pasin laikim.” Nogat. Yumi no inap senisim dispela tok na tok “pasin laikim em i God.” Jehova i no wanpela pasin tasol. Em i wanpela Man i save pilim ol samting na i gat planti narapela narapela pasin moa long pasin laikim. Tasol pasin laikim i pulap tru long Jehova. Wanpela buk i tok long dispela ves olsem: “Pasin laikim em i pasin tru bilong God.” Yumi ken ting olsem long en: Strong bilong Jehova i mekim na em inap mekim ol samting. Stretpela pasin na savetingting bilong em i stiaim ol samting em i mekim. Tasol pasin laikim bilong Jehova i kirapim em long mekim ol samting. Na oltaim pasin laikim bilong em i stiaim em taim em i kamapim ol narapela pasin bilong em.

¹⁷ Planti taim yumi save tok Jehova em i makim pasin laikim. Olsem na sapos yumi laik kisim save long pasin a·gaʹpe, yumi mas kisim save long Jehova. Tru, yumi inap lukim dispela gutpela pasin i stap long ol manmeri tu. Tasol bilong wanem ol i gat dispela pasin? Taim Jehova i wokim ol samting, em i mekim dispela tok, ating long Pikinini bilong em: “Nau yumi mas wokim man i kamap olsem yumi yet.” (Stat 1:26) I gat planti samting long graun i gat laip, tasol ol man na meri tasol inap kamapim pasin laikim na long dispela rot ol i bihainim pasin bilong Papa bilong ol long heven. Tingim, Jehova i stori long narapela narapela animal bilong makim ol bikpela pasin bilong em. Tasol Jehova i mekim wok long nambawan gutpela samting long graun em i bin wokim—em man—bilong makim bikpela pasin bilong Em, em pasin laikim.​—Esekiel 1:10.

¹⁸ Taim yumi tingim ol narapela na laikim ol tru, na ol stiatok i bosim dispela pasin, yumi kamapim bikpela pasin bilong Jehova. Aposel Jon i tok: “Yumi mekim pasin laikim, long wanem, em i bin laikim yumi pastaim.” (1 Jon 4:19) Tasol long wanem ol rot Jehova i bin laikim yumi pastaim?

19. Bilong wanem yumi ken tok pasin laikim i bikpela samting tru long wok bilong Jehova long wokim ol samting?

¹⁹ Pasin laikim i no nupela samting. Tingim, wanem samting  i bin kirapim Jehova long wokim ol samting? I no olsem em i pilim em i stap wanpis na i laik poromanim sampela. Jehova i gutpela olgeta, em i no sot long wanpela samting em narapela inap givim long em. Tasol pasin laikim i kirapim em na em i laik givim amamas bilong i stap laip long ol lain husat inap amamas long kain presen olsem. Dispela wanpela Pikinini tru bilong God “em i kirap bilong ol samting God i bin wokim.” (Revelesen 3:14) Bihain Jehova i yusim dispela Saveman i Bosim Wok bilong kamapim olgeta narapela samting, pastaim ol i wokim ol ensel. (Jop 38:4, 7; Kolosi 1:16) Ol dispela strongpela spirit i stap fri, tingting bilong ol i sap, ol i pilim ol samting, olsem na ol inap kirap laikim ol narapela—ol narapela ensel, na bikpela samting moa, Jehova God. (2 Korin 3:17) Olsem na ol i kamapim pasin laikim, long wanem, God i laikim ol pastaim.

20, 21. Adam tupela Iv inap lukim wanem ol samting i kamapim klia olsem Jehova i laikim ol? Tasol ol i mekim wanem?

²⁰ I wankain long ol manmeri. Pastaim pasin laikim i pulap long laip bilong Adam tupela Iv. Long olgeta hap ol i lukluk long en long Paradais long Iden, ol inap lukim ol samting i kamapim klia pasin bilong Papa long laikim tru ol. Baibel i tok: “Jehova God i wokim wanpela gaden long Iden, long hap i go olsem long is, na long dispela hap em i putim man em i bin wokim.” (Stat 2:8) Olsem wanem? Wanpela taim yu bin go long wanpela naispela gaden o pak? Yu laikim wanem samting long en? Yu laikim lait i kam namel long ol lip bilong diwai? O planti naispela kala bilong ol plaua? O krai bilong liklik wara i ron, na singsing bilong ol pisin na binatang? Olsem wanem long gutpela smel bilong ol diwai, na prut, na plaua? Tasol i no gat wanpela pak long nau i gutpela olsem Iden. Bilong wanem i olsem?

²¹ Jehova yet i bin wokim dispela gaden! Olsem na em i mas naispela tru na nambawan olgeta. Dispela gaden i gat olgeta kain diwai i luk naispela tru o i gat switpela prut long en. Gaden i no sot long wara, na i gat bikpela spes, na kain kain gutpela animal i stap long en. Adam tupela Iv i gat olgeta samting bilong ol i ken stap gutpela na amamas, olsem gutpela wok na poroman. Jehova i bin laikim ol pastaim, na i gat as tru na ol i mas mekim wankain pasin long em. Tasol ol i no bin mekim olsem. Ol i no mekim pasin  laikim na harim tok bilong Papa bilong ol long heven, nogat; ol i bikhet long em.​—Stat, sapta 2.

22. Taim pasin bikhet i kamap long Iden, Jehova i mekim wanem bilong soim olsem oltaim em i save mekim pasin laikim?

²² Jehova i mas bel hevi tru long dispela! Tasol yu ting dispela pasin bikhet i mekim na em i bel nogut? Nogat! “Gutpela pasin laikim bilong em i save stap oltaim oltaim.” (Buk Song 136:1) Olsem na wantu em i stretim rot bilong kisim bek ol pikinini bilong Adam na Iv i gat gutpela bel. Olsem yumi stori pinis, bilong mekim olsem Papa i givim bikpela samting tru bilong em yet, em i givim Pikinini bilong em olsem ofa bilong baim bek ol man.​—1 Jon 4:10.

23. Wanem wanpela as na Jehova em i “God bilong amamas”? Sapta i kamap bihain long dispela bai skelim wanem bikpela askim?

²³ Yes, kirap long taim Jehova i bin wokim ol samting, em i bin go pas long soim olsem em i laikim tru ol man. Long kain kain rot, “em i bin laikim yumi pastaim.” Pasin laikim i kamapim pasin wanbel na amamas, olsem na i gat as na Baibel i tok Jehova em i “God bilong amamas.” (1 Timoti 1:11) Tasol wanpela bikpela askim i kamap. Jehova i save laikim yumi wan wan o nogat? Sapta i kamap bihain long dispela bai skelim dispela samting.