1, 2. Wanem samting i kamap na Jisas i kros? Bilong wanem em i kros?

 JISAS i kros tru—na i gat as na em i kros. Ating yu hatwok long tingim olsem Jisas i kros, long wanem, em i man bilong pasin isi. (Matyu 21:5) Em i no kros na mekim nabaut, em i kamapim kros i stret long kamapim. a Tasol wanem samting i bin sikirapim bel bilong dispela man i laikim tru pasin bilong bel isi? Ol man i mekim pasin i no stret.

² Jisas i laikim tru tempel long Jerusalem. Long olgeta hap bilong graun, dispela tempel tasol em i ples holi bilong lotuim Papa bilong em long heven. Ol Juda bilong planti kantri i raun long longpela rot bilong kam lotu long dispela tempel. Ol man i daun long God tasol ol i no bilong lain Juda ol tu i kam, ol i go insait long wanpela banis bilong tempel i bilong ol. Tasol sotpela taim bihain long Jisas i kirap mekim wok bilong em, em i go insait long hap bilong tempel na em i lukim wanpela samting nogut tru. Tempel i olsem ples maket na i no olsem ples bilong lotu! Em i pulap long ol bisnisman na ol man bilong senisim mani. Tasol olsem wanem dispela pasin i no stret? Long ol dispela man, tempel bilong God em ples bilong pulim ol samting bilong ol manmeri—o stilim ol samting bilong ol. Bilong wanem yumi tok olsem?​—Jon 2:14.

3, 4. Wanem pasin bilong mangal na pulim ol samting bilong narapela i kamap long haus bilong Jehova? Jisas i mekim wanem bilong stretim dispela samting?

³ Ol hetman bilong lotu i bin putim lo olsem ol man inap yusim wanpela kain koin tasol bilong baim takis bilong tempel. Ol  man i kam long narapela ples, ol i mas senisim mani bilong ol bilong kisim dispela kain koin. Ol man bilong senisim mani ol i putim tebol bilong ol insait stret long tempel, na ol i kisim pe long olgeta mani ol i senisim. Wok bisnis bilong salim ol animal tu i rot bilong kisim bikpela winmani. Ol man i laik mekim ofa ol inap baim ol animal long ol bisnisman i stap long taun, tasol ol bikman bilong tempel inap tok ol dispela ofa i no gutpela. Tasol ol i orait long ol ofa ol man i baim insait long banis bilong tempel. Ol bisnisman i save olsem ol man i mas baim ol animal long ol, olsem na sampela taim ol i makim pe i bikpela tru. b Dispela i nogut moa long pasin bilong mekim wok bisnis. Em i pasin stil!

⁴ Jisas i no inap orait long ol dispela pasin i no stret. Dispela em haus bilong Papa bilong em! Em i kisim ol rop na wokim wanpela wip na rausim ol bulmakau na sipsip long tempel. Em i go long ol man i senisim mani na kapsaitim tebol bilong ol. Tingim ol dispela koin i flai nabaut long floa! Em i tok strong long ol man i maketim ol pisin: “Rausim ol dispela samting long hia!” (Jon 2:15, 16) I luk olsem i no gat wanpela man i laik sakim tok bilong dispela man i no pret.

5-7. (a) Olsem wanem i stap bilong Jisas paslain long em i kam long graun i bin stiaim tingting bilong em long ol samting i makim stretpela pasin? Taim yumi skelim pasin bilong em, yumi kisim save long wanem samting? (b) Krais i bin mekim wanem bilong stretim ol tok i daunim wok bos bilong Jehova na nem bilong em?

⁵ Tasol ol bisnisman i kam bek. Inap 3-pela yia bihain, Jisas i mas stretim gen wankain pasin i no stret. Long dispela taim em i kamapim tok Jehova yet i bin mekim bilong kotim ol man i mekim haus bilong Em i kamap “ples hait bilong ol stilman.” (Jeremaia 7:11; Matyu 21:13) Yes, taim Jisas i lukim ol bisnisman i mekim pasin gridi na pulim ol samting bilong ol man na mekim tempel bilong God i kamap doti, em i pilim wankain olsem Papa bilong  em i pilim. Na yumi no kirap nogut long dispela. Inap planti milion yia, Papa bilong Jisas long heven i bin skulim em. Olsem na Jisas i bin kisim tingting bilong Jehova long stretpela pasin. Sapos yumi laik kisim gutpela save long stretpela pasin bilong Jehova, nambawan gutpela rot bilong mekim olsem em yumi ken skelim gut pasin bilong Jisas Krais.​—Jon 14:9, 10.

⁶ Dispela Pikinini tru bilong Jehova i stap taim Satan i sutim tok long Jehova God na tok Jehova i giaman na em i no mekim wok bos bilong Em long stretpela pasin. Em i bagarapim tru nem bilong Jehova! Bihain, Pikinini i harim tu tok Satan i sutim long ol man olsem pasin bilong laikim tru Jehova i no as na ol i mekim wok bilong Jehova. Ol dispela tok giaman i bagarapim tru gutpela bel bilong Pikinini. Em i mas amamas tru taim em i kisim save olsem em bai mekim bikpela wok bilong stretim ol dispela tok giaman! (2 Korin 1:20) Em bai mekim dispela olsem wanem?

⁷ Olsem yumi lainim long Sapta 14, Jisas Krais i stretim tru dispela tok Satan i bin sutim, olsem ol lain Jehova i bin wokim ol bai i no stap gut long em. Olsem na Jisas i mekim ol samting bilong stretim bek nem holi bilong God, em Jehova—na stretim tu dispela tok giaman olsem pasin bilong Jehova long mekim wok bos i no stret. Jisas em i Nambawan Gopas bilong Jehova long kamapim stretpela pasin bilong God long heven na graun. (Aposel 5:31) Wokabaut bilong em long graun tu i kamapim stretpela pasin bilong God. Jehova i tok long em olsem: “Mi bai putim spirit bilong mi long em. Na long olgeta lain manmeri em bai kamapim klia stretpela pasin i wanem samting.” (Matyu 12:18) Olsem wanem Jisas i truim dispela tok?

8-10. (a) Olsem wanem ol lo bilong ol hetman bilong lotu Juda yet i kirapim ol man long daunim ol man i no bilong lain Juda na ol meri? (b) Olsem wanem ol lo ol man yet i kamapim i mekim na lo bilong Jehova long de Sabat i putim hevi long ol man?

⁸ Jisas i laikim tru Lo Bilong Jehova na i bihainim. Tasol ol hetman bilong lotu long taim bilong em i bin paulim tok bilong Lo.  Jisas i tokim ol: “Yupela ol saveman bilong Lo na yupela ol Farisi, yupela ol man bilong tupela maus, yupela lukaut! . . . Yupela i no tingim ol bikpela tok bilong Lo, olsem stretpela pasin na pasin marimari na pasin bilong bilip.” (Matyu 23:23) Tru tumas, ol dispela tisa bilong Lo bilong God ol i no kamapim klia “stretpela pasin i wanem samting.” Nogat. I olsem ol i haitim stretpela pasin bilong God. Olsem wanem ol i mekim? Yumi ken skelim sampela stori olsem.

⁹ Jehova i tokim lain bilong em long ol i no ken bung wantaim ol haiden i stap klostu long ol. (1 King 11:1, 2) Tasol sampela hetman bilong lotu i kirapim ol man long ting olsem olgeta man i no bilong lain Juda ol i samting nating. Buk Misna i gat dispela lo: “No ken lusim ol bulmakau long ol haus pasindia bilong ol haiden, long wanem, sampela i tok ol i save mekim pasin sem wantaim ol animal.” Ol i tingting nogut long olgeta man i no bilong lain Juda, dispela pasin i no stret na i pait wantaim pasin tru bilong Lo Bilong Moses. (Wok Pris 19:34) Sampela narapela lo ol man yet i kamapim i daunim ol meri. Ol i tok, meri marit i mas wokabaut baksait long man bilong em, meri i no ken wokabaut wantaim em. Man i no ken toktok wantaim meri long pablik ples, maski em meri bilong em yet. Olsem ol wokboi nating, ol meri i no ken mekim tok long kot. I gat wanpela beten ol man i mekim bilong tok tenkyu long God olsem ol i no meri.

¹⁰ Ol hetman bilong lotu i mekim na Lo bilong God i hait aninit long planti lo ol man yet i kamapim. Olsem, Lo bilong Sabat i tambuim ol man long mekim wok long de Sabat, em i de bilong lotuim God, go klostu long em, na malolo. Tasol ol Farisi i mekim na dispela lo i putim hevi long ol man. Ol i ting em wok bilong ol yet long makim wanem samting i olsem wok. Ol i makim 39 narapela narapela samting na tok ol i wok, olsem kamautim kaikai long gaden o painim abus. Dispela i kamapim planti askim. Olsem: Sapos man i kilim laus long de Sabat, em i painim abus? Sapos man i kisim sampela pikinini wit na kaikai long taim em i wokabaut, em i kamautim kaikai long gaden? Sapos em i oraitim man i gat sik, em i mekim wok? Bilong bekim dispela kain askim, ol i kamapim ol strongpela lo long ol liklik liklik samting.

11, 12. Jisas i tok wanem bilong soim olsem em i no orait long ol lo bilong ol Farisi em Baibel i no as bilong en?

 ¹¹ Taim dispela kain pasin i stap, olsem wanem Jisas inap helpim ol man long kliagut long stretpela pasin em wanem samting? Long rot bilong ol tok em i skulim ol man long en na long pasin bilong em long wokabaut, em i no pret long sakim ol dispela hetman bilong lotu. Pastaim tingim sampela tok em i bin mekim. Jisas i no orait long ol lo ol man i kamapim, em i tok: “Long rot bilong ol kastam yupela i skulim ol arapela long en, yupela i mekim olsem tok bilong God i samting nating.”​—Mak 7:13.

¹² Jisas i strong long skulim ol man olsem ol Farisi i gat tingting kranki long lo bilong de Sabat—ol i no klia liklik long as na dispela lo i stap. Em i tok, Mesaia em i “Bikpela bilong de Sabat,” olsem na em i gat rait long oraitim ol sikman long de Sabat. (Matyu 12:8) Bilong strongim dispela tok, em i stap ples klia na wokim ol mirakel na oraitim ol sikman long de Sabat. (Luk 6:7-10) Ol dispela mirakel i olsem piksa bilong samting em bai kamapim long olgeta hap bilong graun long taim bilong Wan Tausen Yia. Dispela Wan Tausen Yia yet i olsem nambawan bikpela de Sabat, long dispela taim olgeta manmeri i stap gut long God, ol bai malolo long ol hevi em sin na dai i bin kamapim inap planti tausen yia pinis.

13. Wanem lo i kamap taim Krais i mekim wok bilong em hia long graun? Olsem wanem dispela lo i narapela kain long Lo Bilong Moses?

¹³ “Lo bilong Krais” em i nupela lo i kamap taim Jisas i pinisim wok bilong em hia long graun, na long dispela rot tu Jisas i kamapim klia stretpela pasin em wanem samting. (Galesia 6:2) Dispela nupela lo i no olsem Lo Bilong Moses. Nupela lo i no gat planti lo ol i raitim, nogat, em i gat planti stiatok. Tasol dispela nupela lo i gat sampela lo i tokaut stret long ol samting man i mas mekim. Wanpela bilong ol dispela lo Jisas i kolim olsem “nupela lo.” Jisas i tokim olgeta disaipel bilong em long narapela i mas laikim tru narapela wankain olsem em i save laikim ol. (Jon 13:34, 35) Yes, pasin bilong daunim sampela laik bilong ol yet na laikim tru ol narapela, em i nambawan bikpela mak bilong ol man i bihainim “lo bilong Krais.”

14, 15. Olsem wanem Jisas i soim olsem em i save em i no gat namba long mekim olgeta samting? Bilong wanem dispela i mekim gut bel bilong yumi?

¹⁴ Jisas i lainim ol man long pasin bilong laikim tru narapela, tasol em i no mekim dispela samting tasol. Em i bihainim “lo bilong Krais” long olgeta wokabaut bilong em. Dispela i kamap klia long ol samting em i mekim. Tingim tripela rot we pasin bilong Jisas i kamapim klia stretpela pasin em wanem samting.

¹⁵ Namba wan, Jisas i strong tru long em i no ken mekim wanpela pasin i no stret. Ating yu bin lukim planti pasin i no stret i kamap taim ol man i hambak na mekim ol samting ol i no gat namba long mekim. Jisas i no bin mekim olsem. Wanpela taim, wanpela man i kam long Jisas na i tok: “Tisa, tokim brata bilong mi long tilim ol samting bilong Papa na givim hap long mi.” Em i tokim dispela man: “Husat i makim mi long stap jas bilong yutupela o man bilong makim samting yutupela i mas mekim?” (Luk 12:13, 14) Em i narapela kain, a? Save bilong Jisas, pasin bilong em long skelim ol samting, na namba God i givim em i bikpela tru, winim olgeta man long graun. Tasol em i no laik insait long samting bilong tupela brata hia, long wanem, em i no bin kisim namba long mekim olsem. Oltaim Jisas i mekim pasin daun olsem, em i mekim tu long taim em i stap long heven planti tausen tausen yia paslain long em i kam long graun. (Jut 9) Long pasin daun Jisas i larim Jehova i makim wanem samting i stret, na dispela i kamapim klia olsem em i gat gutpela pasin tru.

16, 17. (a) Olsem wanem Jisas i bihainim stretpela pasin taim em i autim gutnius bilong Kingdom Bilong God? (b) Olsem wanem Jisas i kamapim stretpela pasin taim em i mekim pasin marimari?

¹⁶ Namba tu, Jisas i kamapim stretpela pasin taim em i autim gutnius bilong Kingdom Bilong God. Em i no tingim sampela man tasol. Nogat. Em i wok strong long toktok wantaim olgeta kain man, maski ol i maniman o rabisman. Tasol ol Farisi i daunim ol man nating i stap rabis na i kolim wanpela nem nogut long ol, olsem ʽam-ha·ʼaʹrets, o “ol manmeri bilong graun.” Jisas i no pret long stretim dispela pasin i no stret. Taim em i skulim ol man long gutnius—o taim em i kaikai wantaim ol, givim kaikai long ol, oraitim sik bilong ol, o kirapim bek ol—em i bihainim  stretpela pasin bilong dispela God i laik kisim bek “olgeta kain man.” c—1 Timoti 2:4.

¹⁷ Namba tri, Jisas i kamapim stretpela pasin taim em i mekim pasin marimari. Em i wok strong long helpim ol sinman. (Matyu 9:11-13) Em i amamas long helpim ol man i no gat strong long lukautim ol yet. Jisas i no wanbel wantaim ol hetman bilong lotu, ol i tokim ol man long ol i no ken trastim ol man bilong narapela lain. Long pasin marimari em i helpim na lainim sampela bilong ol, maski namba wan wok bilong em i bilong helpim ol Juda. Em i orait long wokim mirakel bilong helpim wanpela ami ofisa bilong Rom, na em i tok: “Mi no bin lukim wanpela man long Israel i gat bikpela bilip olsem dispela man.”​—Matyu 8:5-13.

18, 19. (a) Olsem wanem Jisas i givim biknem long ol meri? (b) Olsem wanem pasin bilong Jisas i helpim yumi long save olsem pasin bilong i gat strongpela bel i poroman wantaim stretpela pasin?

¹⁸ Na tu, Jisas i no wanbel long tingting ol man i gat long ol meri long dispela taim. Em i strongim bel na mekim pasin i stret. Ol Juda i ting ol meri Samaria i no klin wankain olsem ol manmeri bilong ol narapela lain. Tasol Jisas i no surik long autim tok long meri Samaria long hulwara bilong Sikar. Na em long dispela meri Jisas i bin tokaut long namba wan taim olsem em i dispela Mesaia God i bin tok promis long en. (Jon 4:6, 25, 26) Ol Farisi i tok, i no gutpela long skulim ol meri long Lo Bilong God, tasol Jisas i lusim bikpela haptaim na strong bilong skulim ol meri. (Luk 10:38-42) Ol tumbuna i tok, ol meri i no inap kamapim trupela tok long kot samting, tasol Jisas i givim biknem long planti meri na larim ol i kamap namba wan lain i lukim em bihain long em i kirap bek. Na Jisas i tokim ol meri long go tokim ol disaipel man long dispela bikpela samting!​—Matyu 28:1-10.

¹⁹ Yes, Jisas i kamapim klia long ol man olsem stretpela pasin  em wanem samting. Planti taim em i mekim olsem, maski em inap kisim bagarap long dispela. Pasin bilong Jisas i helpim yumi long save olsem man i mas i gat strongpela bel na bai em i ken bihainim stretpela pasin tru. I stret Baibel i kolim Jisas olsem “dispela Laion i kamap long traib bilong Juda.” (Revelation 5:5) Tingim, laion i makim pasin bilong i gat strongpela bel na i no pret long mekim stretpela pasin. Klostu nau Jisas bai mekim bikpela samting bilong kamapim stretpela pasin. Em bai ‘kamapim stretpela pasin long graun.’​—Aisaia 42:4.

20, 21. Long taim bilong yumi, olsem wanem King Mesaia i bin kamapim stretpela pasin long olgeta hap graun na insait long kongrigesen Kristen?

²⁰ Kirap long taim Jisas i kamap King Mesaia long 1914, em i bin kamapim stretpela pasin long graun. Em i bin mekim dispela olsem wanem? Em i bin helpim wok bilong truim tok profet i stap long Matyu 24:14. Ol disaipel bilong Jisas long graun i bin skulim ol man bilong olgeta kantri long tok i tru bilong Kingdom Bilong Jehova. Olsem Jisas, ol i no tingim sampela man tasol na autim tok. Ol i laik bai olgeta man—ol yangpela na lapun, ol maniman na rabisman, ol man na meri—i gat rot long kisim save long Jehova, em God bilong stretpela pasin.

²¹ Jisas i kamapim tu stretpela pasin insait long kongrigesen Kristen, em i Het bilong en. Olsem tok profet bilong Baibel i kamapim, Jisas i givim “ol man olsem ol presen,” em ol gutpela elda Kristen husat i go pas long lukautim wok bilong kongrigesen. (Efesus 4:8-12) Taim ol i mekim wok wasman bilong lukautim ol gutpela sipsip bilong God, ol i bihainim pasin bilong Jisas Krais long kamapim stretpela pasin. Oltaim ol i tingim olsem Jisas i laik bai ol man i mekim stretpela pasin long ol sipsip bilong em—maski ol i gat biknem, namba, na mani kago o nogat.

22. Jehova i ting olsem wanem long ol pasin i no stret i bikpela tru long dispela graun long nau? Em i bin makim Pikinini bilong em long mekim wanem?

²² Tasol klostu nau, Jisas bai mekim stretpela pasin i kamap hia long graun. Pasin i no stret i go bikpela tru long dispela graun  nogut. Olgeta pikinini husat i dai pinis long hangre, em asua bilong ol man i bin mekim pasin i no stret. Yumi pilim tru dispela samting taim yumi tingim taim na mani ol man i tromoi bilong wokim ol samting bilong woa, na bilong inapim laik bilong ol man i painim ol amamas bilong skin. Planti milion man i dai nating long olgeta yia na dispela em i wanpela bilong planti pasin i no stret i save kamap, em olgeta dispela pasin i kirapim kros bilong Jehova. Em i bin makim Pikinini bilong em long mekim stretpela pait long daunim pasin nogut bilong dispela graun na pinisim tru olgeta pasin i no stret.​—Revelesen 16:14, 16; 19:11-15.

23. Taim Armagedon i pinis, olsem wanem Krais bai strongim stretpela pasin i go inap long olgeta taim bihain?

²³ Stretpela pasin bilong Jehova i mekim na ol man nogut i mas bagarap, tasol i no dispela samting tasol. Jehova i bin makim tu Pikinini bilong em long bosim graun olsem “Prins Bilong Bel Isi.” Taim pait bilong Armagedon i pinis, wok king bilong Jisas bai kamapim bel isi long olgeta hap bilong graun, na em bai mekim “stretpela pasin.” (Aisaia 9:6, 7) Jisas bai amamas long pinisim olgeta pen na hevi long graun em pasin i no stret i bin kamapim. I go inap oltaim oltaim, em bai strongim stretpela pasin bilong Jehova. Olsem na em i bikpela samting long yumi mas bihainim stretpela pasin bilong Jehova long nau. Orait yumi ken skelim olsem wanem yumi inap mekim olsem.