Jehova i singautim olgeta kain man long i go klostu long em long rot bilong beten. (Song 65:2) Tasol em i no save harim o orait long olgeta beten. Olsem, God i no inap harim beten bilong man husat i save mekim nogut long meri bilong em. (1 Pita 3:7) Na tu, taim lain Israel i strong long mekim ol pasin nogut, God i no bin harim beten bilong ol. Tasol beten em i wanpela gutpela samting tru yumi inap mekim. Sapos man i mekim bikpela rong na tanim bel tru, God bai harim beten bilong em.​—Ritim Aisaia 1:15; 55:7.

Lukim Vidio Olsem Wanem? God i Save Harim Olgeta Beten?

Beten em i hap lotu bilong yumi, olsem na yumi mas beten tasol long Krieta bilong yumi, em Jehova. (Matyu 4:10; 6:9) Na tu, yumi sinman olsem na yumi mas beten long nem bilong Jisas, long wanem, em i dai bilong rausim olgeta sin bilong yumi. (Jon 14:6) Jehova i no laik yumi kolim wankain beten planti taim o kolim beten i stap long wanpela buk, nogat. Em i laik yumi mas mekim ol beten yumi pilim tru long bel.​—Ritim Matyu 6:7; Filipai 4:6, 7.

Krieta bilong yumi i ken harim tu ol beten yumi kolim long tingting. (1 Samuel 1:12, 13) Em i laik yumi beten long olgeta taim, olsem long kirap na pinis bilong de, long taim bilong kaikai, na long taim yumi karim hevi.​—Ritim Song 55:22; Matyu 15:36.

Em i no isi long i go klostu long God, long wanem, yumi stap namel long ol man i no bilip long God na ol i save tok bilas long promis bilong God long kamapim bel isi long  graun. (2 Timoti 3:1, 4; 2 Pita 3:3, 13) Olsem na yumi mas bung wantaim ol wanbilip bilong strongim narapela narapela.​—Ritim Hibru 10:24, 25.

Pasin bilong bung wantaim ol manmeri i laikim God, dispela i save helpim yumi long i go klostu long God. Ol miting bilong ol Witnes Bilong Jehova i gutpela rot bilong kisim helpim long bilip bilong ol narapela.​—Ritim Rom 1:11, 12.

Yu ken go klostu long Jehova long rot bilong tingim tingim long bel ol tok bilong Baibel em yu bin kisim save pinis long en. Tingim ol wok, ol skultok, na ol promis bilong Jehova. Pasin bilong beten na tingim long bel ol dispela samting, inap helpim yu long pilim tru savetingting na pasin laikim bilong God.​—Ritim Josua 1:8; Song 1:1-3.

Yu inap pas gut wantaim God sapos yu bilip tru na trastim em. Tasol bilip i olsem wanpela plaua. Yu mas mekim sampela samting na bai plaua i gro, olsem givim wara long en. Na olsem tasol yu mas mekim ol samting bilong strongim bilip bilong yu long rot bilong skelim as bilong bilip bilong yu.​—Ritim Matyu 4:4; Hibru 11:1, 6.

Jehova i save tingim ol manmeri husat i laikim em tru. Em inap lukautim ol long ol samting we inap bagarapim bilip bilong ol na ol i lus long kisim laip oltaim, em samting ol i bilip na wet long en. (Song 91:1, 2, 7-10) Em i givim tok lukaut long yumi long abrusim rot we inap bagarapim helt na amamas bilong yumi. Tru tumas, Jehova i skulim yumi long nambawan gutpela rot bilong bihainim.​—Ritim Song 73:27, 28; Jems 4:4, 8.