1-3. (a) Planti man i pilim olsem wanem long wok bilong ol? (b) Bai yumi skelim wanem ol askim long dispela sapta?

 OL MANMERI long olgeta hap bilong graun i save wok hat long sapotim ol yet na famili bilong ol. Planti man i no laikim wok ol i mekim, sampela i no save amamas long go wok long olgeta wan wan de. Sapos yu pilim olsem, yu ken mekim wanem na bai yu enjoim wok bilong yu? Olsem wanem yu inap pilim gut long wok yu mekim?

² Jehova i tokim yumi: “Olgeta man i mas kaikai na dring na kisim amamas long olgeta wok ol i taitim bun long mekim. Dispela em presen i kam long God.” (Eklisiastis 3:13) Jehova i wokim yumi na i putim laik bilong mekim wok long yumi na yumi save yumi mas mekim wok. Em i laik bai yumi pilim gut long ol samting yumi mekim.—Ritim Eklisiastis 2:24; 5:18.

³ So wanem samting inap helpim yumi long enjoim wok bilong yumi? Ol Kristen i mas abrusim wanem ol wok? Olsem wanem yumi inap balensim wok mani na wok lotu bilong yumi long Jehova? Na wanem namba wan bikpela wok yumi ken mekim?

4, 5. Jehova i gat wanem tingting long wok?

⁴ Jehova yet i save amamas long mekim wok. Stat 1:1 i tok: “Taim God i stat long wokim ol samting, em i wokim  ples antap na graun.” Taim God i wokim pinis graun na olgeta samting long en, em i tok olgeta samting em i wokim i “gutpela tru.” (Stat 1:31) Krieta bilong yumi i amamas long ol samting em i bin wokim.—1 Timoti 1:11.

⁵ Jehova i no stop long mekim wok. Jisas i tok: “Papa bilong mi i wok i stap i kam inap long nau.” (Jon 5:17) Yumi no save long olgeta gutpela samting Jehova i wok long mekim, tasol yumi save long sampela bilong ol. Em i wok yet long makim ol manmeri husat bai mekim wok king wantaim Pikinini bilong em, Jisas Krais, long Kingdom. (2 Korin 5:17) Na tu, Jehova i wok yet long stiaim na lukautim ol manmeri. Long rot bilong wok autim tok long olgeta hap bilong graun, planti milion manmeri i wok long kisim save long Jehova, na ol i gat hop long stap laip oltaim long Paradais long graun.—Jon 6:44; Rom 6:23.

6, 7. Jisas em i wanem kain wokman?

⁶ Olsem Papa bilong em, Jisas tu i save amamas long mekim wok. Paslain long em i kam long graun, God i putim Jisas i stap olsem “saveman bilong wok,” na em i insait long wok bilong krietim olgeta samting long heven na long graun. (Provep 8:22-31; Kolosi 1:15-17) Taim Jisas i stap long graun, em i save wok hat tru. Taim em i yangpela, em i lainim wok kapenta na em i save gut long mekim dispela wok, i luk olsem em i bin wokim ol tebol na sia samting na bildim ol haus. Jisas i mekim gut wok bilong em, olsem na ol i kolim em “dispela kapenta.”—Mak 6:3.

⁷ Tasol namba wan bikpela wok Jisas i mekim long graun, em wok bilong autim gutnius na skulim ol manmeri long Jehova. Em i gat 3 na hap yia long pinisim wok autim tok bilong em, na em i wok hat kirap long bikmoning i go inap leit long nait. (Luk 21:37, 38; Jon 3:2) Jisas i wokabaut planti handret kilomita long ol rot i pulap  long das, na em i serim gutnius wantaim planti manmeri em inap bungim.—Luk 8:1.

8, 9. Wai na Jisas i enjoim wok em i mekim?

⁸ Long Jisas, pasin bilong mekim wok bilong God i olsem kaikai. Dispela wok i givim em strong. I gat sampela de we Jisas i bin wok hat tru na em i no gat taim bilong kaikai. (Jon 4:31-38) Em i painim kain kain rot long helpim ol man long kisim save long Papa bilong em. Olsem na em inap tokim Jehova: “Long graun, mi bin givim glori long yu, na mi pinisim dispela wok yu bin givim mi long mekim.”—Jon 17:4.

⁹ Em i klia tru, Jehova na Jisas i save wok hat tru na ol i kisim amamas na belgut long wok bilong ol. Yumi laik “bihainim pasin bilong God,” na yumi laik “bihainim gut lek mak bilong [Jisas].” (Efesus 5:1; 1 Pita 2:21) Olsem na yumi mas wok hat na traim bes long wanem wanem wok yumi mekim.

10, 11. Wanem samting inap helpim yumi long holim stretpela tingting long wok mani?

¹⁰ Yumi ol manmeri bilong Jehova i save wok hat long sapotim yumi yet na famili bilong yumi. Yumi laik pilim gut long wok yumi mekim, tasol dispela inap stap olsem wanpela salens. So yumi ken mekim wanem sapos yumi no enjoim wok mani bilong yumi?

¹¹ Holim stretpela tingting. Ating yumi no inap senisim hap yumi wok long en o hamas wok yumi mekim, tasol yumi inap senisim tingting yumi holim. Taim yumi kliagut long samting Jehova i ekspektim yumi long mekim, dispela inap helpim yumi. Olsem: Jehova i ekspektim het bilong famili long mekim olgeta samting bilong lukautim famili  bilong em long ol samting ol i nidim. Baibel i tok man i no lukautim famili bilong em, “em i man nogut moa winim man i no gat bilip.” (1 Timoti 5:8) Sapos yu wanpela het bilong famili, yu mas wok hat long painim ol samting bilong lukautim famili. Maski yu laikim wok yu mekim o nogat, yu save olsem taim yu painim ol samting bilong lukautim famili, yu wok long amamasim Jehova tu.

12. Olsem wanem pasin bilong wok hat na mekim onest pasin inap helpim yumi?

¹² Mas wok hat na mekim onest pasin. Dispela inap mekim na isi long yu enjoim wok bilong yu. (Provep 12:24; 22:29) Taim yu mekim olsem, bos bilong yu bai trastim yu. Ol bos i save tingim tru ol onest wokman bikos ol i no inap stilim mani, ol samting bilong ples wok, o taim. (Efesus 4:28) Na moa yet, Jehova i save taim yu wok hat na yu onest. ‘Maus bilong bel bilong yu bai stap stret’ bikos yu save olsem yu amamasim God yu laikim.—Hibru 13:18; Kolosi 3:22-24.

13. Wanem narapela samting inap kamap bikos long onest pasin yumi mekim long ples wok?

¹³ Luksave olsem pasin yu mekim long ples wok inap preisim Jehova. Dispela em narapela risen long yumi pilim gut long wok bilong yumi. (Taitus 2:9, 10) Ating wanpela wanwok bilong yu bai gat laik long stadi long Baibel bikos long gutpela eksampel bilong yu.—Ritim Provep 27:11; 1 Pita 2:12.

14-16. Yumi mas tingim wanem ol samting taim yumi makim wanpela wok mani?

¹⁴ Baibel i no kolim lista bilong ol wok em wanpela Kristen i mas kisim o em i no ken kisim. Tasol Baibel i gat ol stiatok we i ken helpim yumi long mekim ol gutpela disisen  long sait bilong wok. (Provep 2:6) Yumi ken yusim ol stiatok bilong Baibel na givim ol dispela askim long yumi yet.

¹⁵ Dispela wok mani bai mekim na mi insait long samting we Jehova i tok i no stret? Yumi bin kisim save long ol pasin Jehova i heitim, olsem pasin bilong stil na giaman. (Kisim Bek 20:4; Aposel 15:29; Efesus 4:28; Revelesen 21:8) So yumi mas was gut na abrusim ol wok we i pait wantaim ol lo bilong Jehova.—Ritim 1 Jon 5:3.

¹⁶ Dispela wok mani i sapotim o strongim wanpela pasin Jehova i tambuim? Eksampel, olsem wanem sapos yu  kisim wok olsem risepsenis long wanpela klinik bilong rausim bel? I no gat rong long yu wok olsem risepsenis. Tasol yu save long samting Jehova i pilim long pasin bilong rausim bel. So maski sapos yu yet i no insait long wok bilong rausim bel, bai yu pilim olsem long ai bilong Jehova yu tu i gat asua long dispela?—Kisim Bek 21:22-24.

17. Wanem samting i ken helpim yumi long mekim ol disisen i amamasim God?

¹⁷ Taim yumi yusim ol stiatok bilong Baibel, yumi ken kamap ol kain man em Hibru 5:14 i stori long ol, “em ol man i bin yusim save bilong ol planti taim long skelim ol samting na long dispela rot ol i lainim gut tingting bilong ol long kliagut long wanem samting i stret na wanem samting i no stret.” Askim yu yet: ‘Sapos mi kisim dispela wok mani, mi bai pundaunim ol narapela? Dispela wok mani bai mekim na mi mas lusim poroman marit na ol pikinini bilong mi na go long narapela kantri? Dispela bai mekim wanem long ol?’

18. Wai na i hatwok long putim lotu bilong yumi i stap namba wan?

¹⁸ Long dispela “taim nogut” we i “givim hatwok long ol man,” em i no isi long putim lotu bilong yumi long Jehova i stap namba wan. (2 Timoti 3:1) I hatwok tru long painim wanpela wok mani na holim yet dispela wok. Yumi mas lukautim famili bilong yumi, tasol yumi save olsem lotu bilong yumi i mas stap namba wan. Yumi no ken larim ol samting bilong skin i stap bikpela samting tru long laip bilong yumi. (1 Timoti 6:9, 10) So olsem wanem yumi ken “skelim gut wanem ol samting i bikpela samting moa” na long seim taim painim ol samting bilong lukautim famili?—Filipai 1:10.

19. Olsem wanem pasin bilong trastim Jehova i ken helpim yumi long holim stretpela tingting long wok?

 ¹⁹ Putim olgeta trast bilong yu long Jehova. (Ritim Provep 3:5, 6.) Yumi save olsem God i save long wanem samting stret yumi nidim na em i save tingim tru yumi. (Buk Song 37:25; 1 Pita 5:7) Baibel i tokim yumi olsem: “Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela. Long wanem, God i tok: ‘Mi no inap tru long lusim yu, na mi no inap givim baksait long yu.’” (Hibru 13:5) Jehova i no laik bai yumi wari oltaim long olsem wanem yumi bai painim ol samting bilong lukautim famili. Em i soim yumi gen na gen olsem em inap givim ol samting ol manmeri bilong em i nidim. (Matyu 6:25-32) Maski yumi mekim wanem wok, oltaim yumi mas stadi long Tok Bilong God, autim gutnius, na go long ol miting Kristen.—Matyu 24:14; Hibru 10:24, 25.

20. Yumi ken mekim wanem na bai laip bilong yumi i simpol?

²⁰ Ai bilong yu i mas lukluk long wanpela samting tasol. (Ritim Matyu 6:22, 23.) Dispela i min olsem laip bilong yumi i mas simpol bambai yumi ken putim tingting long mekim wok bilong Jehova. Yumi save olsem em i longlong pasin long larim mani, naispela laipstail, o ol leitest fon o tablet samting i stap bikpela samting tru long yumi winim pasin pren bilong yumi wantaim God. Olsem na wanem samting bai helpim yumi long putim ol namba wan samting i stap namba wan? Yumi mas traim bes long no ken gat dinau. Sapos yu gat dinau, mekim gutpela plen long daunim o peim of dinau bilong yu. Sapos yumi no was gut, ol samting bilong skin inap kisim bikpela haptaim na strong bilong yumi, na ating bai yumi no gat taim long beten, stadi, o autim tok. Yumi no  laik larim ol samting bilong skin i mekim na laip bilong yumi i gat planti hatwok, nogat, yumi laik lain long holim tingting olsem ol samting yumi gat pinis olsem “kaikai na laplap samting,” em inap long yumi. (1 Timoti 6:8) Na maski yumi gat wanem kain sindaun, sampela taim i gutpela long skelim i stap bilong yumi na lukim hau yumi ken mekim bikpela wok moa bilong Jehova.

21. Wai na yumi mas skelim wanem samting i mas i stap namba wan long laip bilong yumi?

²¹ Makim ol samting i stret long stap bikpela samting. Yumi mas yusim gut taim, strong, na ol samting bilong skin. Sapos yumi no was gut, ol samting i no bikpela  samting olsem ediukesen o mani, bai kisim haptaim bilong yumi we i dia tumas. Jisas i tok: “Wok yet long painim Kingdom pastaim.” (Matyu 6:33) Ol samting yumi makim, ol samting yumi mekim long olgeta taim, ol wok yumi mekim long olgeta wan wan de, na ol mak yumi putim, olgeta dispela samting i kamapim klia wanem samting i stap namba wan long bel bilong yumi.

22, 23. (a) Wanem nambawan bikpela wok yumi ol Kristen inap mekim? (b) Wanem samting bai helpim yumi long enjoim wok bilong yumi?

²² Namba wan bikpela wok yumi gat em long mekim wok bilong Jehova na autim gutnius long ol narapela. (Matyu 24:14; 28:19, 20) Olsem Jisas, yumi laik mekim olgeta samting yumi inap mekim long dispela wok. Sampela i go mekim wok long ol hap we i gat bikpela nid long ol man bilong autim tok. Ol narapela i lainim nupela tokples bambai ol i ken autim tok long ol man bilong dispela tokples. Toktok wantaim ol lain i bin mekim ol dispela wok, na askim ol long stori long en. Ol bai tokim yu olsem laip bilong ol i gat bikpela amamas moa na i gat mining bilong en.—Ritim Provep 10:22.

²³ Long nau, planti bilong yumi i mas spendim planti aua long wok mani o yumi holim 2-pela o 3-pela wok bilong lukautim famili long ol samting ol i nidim. Jehova i save long dispela, na em i pilim tru olgeta samting yumi mekim bilong lukautim famili. So yumi olgeta i mas wok yet long bihainim pasin bilong Jehova na Jisas long wok hat, maski yumi mekim wanem kain wok. Na yumi mas tingim olsem namba wan bikpela wok bilong yumi em long mekim wok bilong Jehova na autim gutnius bilong Kingdom Bilong God. Dispela bai givim yumi amamas tru.