1, 2. Bilong wanem yumi mas was gut taim yumi makim ol amamas?

 TINGIM olsem yu laik kaikai wanpela prut na yu luksave olsem wanpela hap bilong en i bagarap. Bai yu mekim wanem? Bai yu kaikai tasol? Bai yu tromoi i go? O bai yu katim na rausim hap i bagarap na kaikai hap i gutpela?

² Long sampela rot ol amamas i wankain long dispela prut. Ating bai yu enjoim sampela amamas, tasol bikpela hap bilong en i nogut bikos long pasin pamuk samting, pait, o wok bilong ol dimon. So taim yu laik makim amamas, yu save tok: “Em laik bilong mi. Mi ken makim  wanem kain amamas mi laikim”? O yu tok: “Olgeta amamas i nogut”? O yu save skelim gut ol amamas na abrusim ol amamas nogut, na enjoim ol gutpela amamas?

3. Yumi mas tingim wanem samting taim yumi makim ol amamas bilong yumi?

³ Yumi olgeta i nidim sampela amamas, na yumi laik makim gut ol amamas. Yumi mas askim yumi yet, ol amamas yumi makim inap mekim wanem long pasin bilong yumi long lotuim Jehova?

4. Wanem wanpela stiatok bilong Baibel inap helpim yumi long makim ol amamas bilong yumi?

⁴ Taim yumi dediketim yumi yet long Jehova, yumi tok promis long em olsem yumi bai yusim laip bilong yumi long mekim wok bilong em. (Ritim Eklisiastis 5:4.) Yumi promis long “mekim olgeta samting bilong givim glori long God.” (1 Korin 10:31) Dispela i makim olsem yumi stap olsem man i dediket long God long olgeta taim, long taim yumi rileks o enjoim ol amamas tu, i no long taim bilong miting o autim tok tasol.

5. Yumi mas lotuim Jehova long wanem kain pasin?

⁵ Olgeta samting yumi mekim long laip i insait long pasin bilong yumi long lotuim Jehova. Pol i eksplenim dispela taim em i tok: “Givim bodi bilong yupela olsem sakrifais i stap laip, na i stap holi, na God i orait long en.” (Rom 12:1) Jisas i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Oltaim yumi laik givim bes bilong yumi long Jehova. Long Israel bilong bipo, taim ol man i sakrifaisim animal  long Jehova, ol i mas givim animal i no gat sik o bagarap long skin. Sapos dispela sakrifais i gat wanpela bagarap long en, God i no inap orait long en. (Wok Pris 22:18-20) Long wankain pasin, Jehova i no inap orait long pasin bilong yumi long mekim lotu. Hau?

6, 7. Ol amamas inap mekim wanem long pasin bilong yumi long lotuim Jehova?

⁶ Jehova i tokim yumi: “Yupela i mas i stap holi, long wanem, mi holi.” (1 Pita 1:14-16; 2 Pita 3:11) Jehova bai orait long pasin bilong yumi long mekim lotu sapos lotu bilong yumi i holi, o klin. (Lo 15:21) Pasin bilong mekim lotu i no inap stap klin sapos yumi mekim ol samting Jehova i heitim, olsem pasin pamuk samting, pait, o insait long wok bilong ol dimon. (Rom 6:12-14; 8:13) Tasol Jehova i no inap amamas tu sapos yumi kisim amamas long ol dispela pasin. Dispela inap mekim na pasin bilong yumi long mekim lotu i kamap doti na Jehova i no inap orait long en, na dispela inap bagarapim pasin pren bilong yumi wantaim Jehova.

⁷ So olsem wanem yumi inap bihainim savetingting na makim gut ol amamas? Wanem ol stiatok bai helpim yumi long luksave long ol gutpela amamas na amamas nogut?

8, 9. Yumi mas abrusim wanem kain amamas? Bilong wanem?

⁸ I gat planti kain kain amamas i stap long nau. Sampela bilong ol i orait long ol Kristen, tasol planti bilong ol, nogat. Pastaim yumi ken skelim wanem ol amamas yumi mas abrusim.

⁹ Planti muvi, web-sait, ol TV program, vidio gem, na ol singsing, ol i stori long pasin pamuk samting, pait, o wok bilong ol dimon. Taim ol i soim ol samting nogut,  ol i save mekim long wei we i luk olsem em i gutpela na i fani. Tasol ol Kristen i mas was gut na sakim ol amamas we i no stret wantaim ol klinpela lo bilong Jehova. (Aposel 15:28, 29; 1 Korin 6:9, 10) Taim yumi sakim ol kain amamas olsem, yumi soim Jehova olsem yumi heitim pasin nogut.—Buk Song 34:14; Rom 12:9.

10. Wanem samting inap kamap taim yumi makim ol amamas i no stret?

¹⁰ Tasol sampela i pilim olsem i no gat rong long ol amamas i kamapim pasin pait, pasin pamuk samting, o wok bilong ol dimon. Ol i ting: ‘Hau bai dispela i bagarapim mi? Mi no inap long mekim tru ol dispela pasin.’ Sapos yumi gat dispela tingting, yumi giamanim yumi yet. Baibel i tok: “Bel bilong ol man i save tingting oltaim long mekim pasin giaman, na tingting bilong man em i nogut tru.” (Jeremaia 17:9) Sapos yumi kisim amamas long ol pasin we Jehova i no orait long en, hau bai yumi tok yumi heitim ol dispela pasin? Sapos oltaim yumi wok long kisim amamas long ol dispela pasin, yumi bai stat long orait long ol na ting olsem em nomol tasol. Bihain maus bilong bel bilong yumi bai i no strong moa long givim tok lukaut long yumi taim yumi makim ol amamas i no stret.—Buk Song 119:70; 1 Timoti 4:1, 2.

11. Olsem wanem tok bilong Galesia 6:7 inap helpim yumi long makim gut amamas?

¹¹ Tok Bilong God i tokim yumi: “Samting man i planim, dispela samting tasol em bai kamautim.” (Galesia 6:7) Dispela tok em i tru, sapos yumi kisim amamas long ol dispela pasin, bihain bai yumi yet i mekim ol dispela pasin. Olsem, ol amamas bilong pasin pamuk samting i mekim na sampela i kirap long mekim pasin pamuk. Tasol Jehova i givim helpim yumi nidim taim yumi laik makim gut amamas bilong yumi.

12. Wanem samting bai helpim yumi long mekim gutpela disisen long ol amamas?

¹² Long sampela amamas, em i klia tru olsem Jehova i no orait long ol, na yumi save yumi mas abrusim. Tasol olsem wanem sapos yumi no klia long wanem amamas i stret? Jehova i no givim yumi wanpela lista bilong ol lo long ol samting yumi ken watsim na ol samting yumi no ken watsim, harim, o ritim, nogat. Em i laik bai yumi yusim maus bilong bel em Baibel i trenim pinis. (Ritim Galesia 6:5.) Jehova i givim yumi ol stiatok, em ol tok i tru i skulim yumi long tingting bilong em long ol samting. Ol dispela stiatok i helpim yumi long trenim maus bilong bel bilong yumi. Ol i helpim yumi long save “long laik bilong Jehova” na bai yumi ken mekim ol disisen i amamasim em.—Efesus 5:17.

13. Bilong wanem ol Kristen i no save mekim wankain disisen long ol amamas? Tasol olgeta Kristen i mas tingim wanem samting?

¹³ Planti taim, amamas em wanpela Kristen i makim bai i no wankain long narapela Kristen. Bilong wanem? Yumi olgeta i save laikim narapela narapela samting. Na tu, samting wanpela i orait long en, ating narapela bai no orait long en. Maski i olsem, bilong mekim gutpela disisen, olgeta Kristen i mas larim ol stiatok bilong Baibel i stiaim ol. (Filipai 1:9) Dispela bai helpim yumi long makim ol amamas we God i orait long en.—Buk Song 119:11, 129; 1 Pita 2:16.

14. (a) Yumi mas tingim wanem bikpela samting long sait bilong yusim gut taim? (b) Pol i givim wanem edvais long ol Kristen?

¹⁴ Narapela samting bilong tingim em hamas taim yumi spendim long ol amamas. Dispela inap kamapim  klia olsem ol amamas i bikpela samting long yumi o nogat. Yumi ol Kristen, olsem na wok bilong Jehova i bikpela samting long laip bilong yumi. (Ritim Matyu 6:33.) Tasol yumi inap larim amamas i kisim bikpela haptaim bilong yumi na yumi no luksave dispela. Pol i edvaisim ol Kristen olsem: “Was gut tru long wokabaut bilong yupela. Yupela i no ken wokabaut olsem ol man i no gat savetingting, nogat, yupela i mas wokabaut olsem ol man i gat savetingting. Yupela i mas yusim gut taim.” (Efesus 5:15, 16) Olsem na yumi mas putim mak long hamas taim yumi spendim long amamas, na oltaim putim wok bilong God i stap namba 1 long laip bilong yumi.—Filipai 1:10.

15. Hau bai yumi banisim yumi yet long ol amamas we inap bagarapim pasin pren bilong yumi wantaim Jehova?

 ¹⁵ Em klia tru olsem yumi mas sakim ol amamas we yumi save Jehova i no orait long en. Tasol olsem wanem long ol amamas we yumi gat tupela tingting long ol? Yu ting yumi mas lukaut yet long ol? Tingim dispela. Sapos yu wokabaut long wanpela rot long maunten, bai yu wokabaut i go long arere tru bilong maunten? Nogat. Sapos yu tingim laip bilong yu i bikpela samting, bai yu stap longwe tru long arere na yu no inap kisim bagarap. Em i wankain tu long ol amamas yumi makim. Baibel i tokim yumi: “Tanim lek bilong yu na go longwe long ol samting nogut.” (Provep 4:25-27) So yumi no abrusim tasol ol amamas em yumi save ol i nogut, nogat, yumi stap longwe tu long ol amamas we yumi ting i no gutpela long yumi na inap bagarapim pasin pren bilong yumi wantaim Jehova.

16. (a) Wanem sampela pasin em Jehova i heitim? (b) Olsem wanem yumi inap soim olsem yumi heitim ol samting Jehova i heitim?

¹⁶ Man bilong raitim song i tok: “Yupela ol manmeri i save laikim Jehova, yupela i mas heitim tru pasin nogut.” (Buk Song 97:10) Baibel i skulim yumi long tingting bilong Jehova long ol samting na em i pilim olsem wanem long ol dispela samting. Askim yu yet long hau ol samting yu lainim inap helpim yu long kisim tingting bilong Jehova. Olsem, yumi kisim save olsem Jehova i heitim “maus i save giaman, na ol han i save kapsaitim blut bilong ol man i no gat asua, bel i save wokim ol plen nogut, na lek i save ran kwik long mekim pasin nogut.” (Provep 6:16-19) Yumi kisim save olsem yumi mas abrusim “pasin pamuk, . . . lotuim imis, olkain wok bilong ol spirit  nogut, . . . jeles, belhat tumas, . . . bel nogut, dring longlong, mekim pati i gat planti pairap, na olkain pasin olsem.” (Galesia 5:19-21) Yu inap lukim hau ol dispela stiatok bilong Baibel i ken helpim yu long makim ol amamas? Yumi laik bihainim ol lo bilong Jehova long olgeta samting long laip bilong yumi, long taim yumi stap wantaim ol narapela na long taim yumi stap yumi yet. (2 Korin 3:18) Tru tumas, ol samting yumi makim taim yumi stap yumi yet, planti taim dispela i kamapim klia yumi wanem kain man tru.—Buk Song 11:4; 16:8.

17. Paslain long yumi makim ol amamas, yumi mas givim wanem ol askim long yumi yet?

¹⁷ So taim yu makim ol amamas, askim yu yet: ‘Ol amamas mi makim inap mekim wanem long pasin pren bilong mi wantaim Jehova? Dispela bai mekim wanem long maus bilong bel bilong mi?’ Bai yumi skelim sampela stiatok moa we inap helpim yumi long makim ol amamas.

18, 19. (a) Pol i givim wanem edvais long ol Kristen? (b) Wanem ol stiatok bai helpim yumi long makim ol amamas?

¹⁸ Taim yumi makim ol amamas, yumi makim ol samting em yumi laik pulapim long tingting bilong yumi. Pol i tok: “Yupela i mas wok yet long tingim ol dispela samting, olsem: Ol samting i tru, ol bikpela samting, ol samting i stretpela, ol samting i klin, ol samting i kirapim pasin laikim, ol samting i gat gutnem, ol samting i gutpela, na ol samting i stret long ol man i litimapim.” (Filipai 4:8) Taim yumi pulapim tingting bilong yumi long ol dispela gutpela samting, yumi ken tok: “Mi laik bai ol tok long maus bilong mi na tingting i stap long bel bilong mi i orait long ai bilong yu, O Jehova.”—Buk Song 19:14.

¹⁹ Askim yu yet: ‘Mi pulapim tingting bilong mi long  wanem ol samting? Bihain long mi watsim wanpela muvi o program, mi save pilim gut na tingting bilong mi i stap long ol gutpela samting? Mi pilim bel i stap isi, na maus bilong bel i stap gut? (Efesus 5:5; 1 Timoti 1:5, 19) Mi pilim olsem mi inap beten long Jehova na bel i no gat tok? O mi pilim nogut? Dispela amamas i mekim na mi tingting long pasin bilong pait o pasin pamuk samting? (Matyu 12:33; Mak 7:20-23) Amamas mi makim i soim olsem mi “wokabaut . . . long wankain pasin olsem ol man bilong dispela taim i save bihainim”?’ (Rom 12:2) Ol onest bekim bilong yumi inap helpim yumi long luksave long samting yumi mas mekim bilong strongim yet pasin pren bilong yumi wantaim Jehova. Yumi laik beten olsem man bilong raitim song i bin mekim: “Helpim mi na ai bilong mi i no ken lukluk long ol samting i no gutpela.” *—Buk Song 119:37.

20, 21. Bilong wanem yumi mas tingim filings bilong ol narapela taim yumi makim ol amamas?

²⁰ Narapela bikpela stiatok yumi mas tingim em dispela: “I orait long mekim olgeta samting, tasol i no olgeta samting inap strongim yumi. Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet.” (1 Korin 10:23, 24) Yumi stap fri long mekim samting, tasol dispela i no min olsem yumi mas mekim dispela samting. Yumi mas tingim gut olsem disisen bilong yumi bai mekim wanem long ol bratasista.

 ²¹ Maus bilong bel bilong olgeta i no wankain. Olsem, ating maus bilong bel bilong yu i orait long yu watsim wanpela TV program. Tasol bihain yu kisim save olsem dispela seim program i mekim na maus bilong bel bilong brata o sista bilong yu i gat tok. Bai yu mekim wanem? Maski yu gat rait long watsim dispela program, ating bai yu wokim tingting long no ken watsim. Bilong wanem? Bikos yu no laik ‘mekim sin long brata bilong yu’—o “mekim sin long Krais.” (1 Korin 8:12) Yumi no laik mekim wanpela samting bilong pundaunim wanbilip Kristen.—Rom 14:1; 15:1; 1 Korin 10:32.

22. Hau bai yumi soim olsem yumi gat gutpela tingting taim narapela Kristen i makim ol amamas bilong em?

²² Tasol olsem wanem sapos maus bilong bel bilong yu i no orait long yu watsim, ritim, o mekim samting em narapela i pilim olsem i orait long mekim? Yu laikim na rispektim brata bilong yu, olsem na yu no inap putim presa long em long makim wankain samting olsem yu. Man i draivim kar i save olsem ating ol narapela draiva bai spit moa o draiv isi moa long em, tasol ol i stap yet olsem gutpela draiva. Long wankain pasin, ating yu na narapela brata i bihainim ol stiatok bilong Baibel, tasol yutupela i gat narapela narapela tingting liklik long wanem ol amamas i orait long makim.—Eklisiastis 7:16; Filipai 4:5.

23. Wanem samting bai helpim yumi long makim gut ol amamas?

²³ So wanem samting bai helpim yumi long makim gut ol amamas? Taim yumi yusim maus bilong bel em yumi trenim pinis long ol stiatok bilong Baibel, na yumi tingim tru ol bratasista bilong yumi, orait bai yumi makim gutpela amamas. Na yumi bai amamas olsem yumi “mekim olgeta samting bilong givim glori long God.”