1, 2. (a) Ol nupela marit i hop long wanem ol samting? (b) Bai yumi stori long wanem ol askim long dispela sapta?

 PIKSAIM man na meri i amamas long weding de bilong ol. Ol i amamas tru long samting bai kamap long laip bilong ol long bihain na ol i gat bikpela hop na ol i gat laik long mekim planti samting. Ol i hop olsem marit bilong ol bai stap longpela taim na i stap amamas.

² Tasol planti marit em pastaim ol i stat gut, bihain ol i no stap moa olsem. Bilong helpim marit i ken stap oltaim na amamas, tupela marit i nidim tok bilong God long stiaim ol. So nau yumi ken stori long bekim bilong Baibel long ol dispela askim: Wanem ol gutpela samting long marit? Sapos yu laik marit, hau bai yu makim gut poroman marit? Hau bai yu stap gutpela man marit o gutpela meri marit? Na wanem samting bai helpim marit long stap oltaim?—Ritim Provep 3:5, 6.

3. Yu ting man o meri i mas marit bambai em i ken stap amamas? Stori long dispela.

³ Sampela i tok man o meri i no inap stap amamas sapos em i no marit. Tasol dispela tok i no tru. Jisas i tok, stap singel i olsem wanpela presen. (Matyu 19:11, 12) Na  aposel Pol i tok stap singel i gat ol gutpela samting bilong en. (1 Korin 7:32-38) Em samting bilong yu yet long makim sapos yu laik marit o nogat. Yu no ken larim ol pren, famili, o kalsa i putim presa long yu long marit.

4. Wanem ol gutpela samting bilong gutpela marit?

⁴ Baibel i tok marit tu em i wanpela presen i kam long God na i gat ol gutpela samting bilong en. Jehova i tok long fes man, Adam: “I no gutpela long man i stap wanpis olsem. Mi bai wokim wanpela helpim bilong em, olsem poroman bilong em.” (Stat 2:18) Jehova i wokim Iv olsem meri bilong Adam, na tupela i kamap fes famili. Sapos tupela marit i gat ol pikinini, marit bilong ol i mas stap olsem gutpela ples we ol i ken mekim bikpela long ol pikinini bilong ol. Tasol wok bilong kamapim pikinini, dispela tasol i no risen na man na meri i marit.—Buk Song 127:3; Efesus 6:1-4.

5, 6. Olsem wanem marit i ken stap olsem “3-pela rop em ol i tanim wantaim”?

⁵ King Solomon i tok: “Tupela i gutpela moa winim wanpela bikos ol bai kisim gutpela pe long wok ol i taitim bun long mekim. Long wanem, sapos wanpela i pundaun, orait poroman bilong em i ken helpim em long kirap sanap. Tasol wanem samting bai kamap long man husat i pundaun na i no gat wanpela bilong helpim em long kirap sanap? . . . Na 3-pela rop em ol i tanim wantaim, i no inap bruk hariap long tupela hap.”—Eklisiastis 4:9-12.

⁶ Gutpela marit inap stap olsem ol bes pren em ol i helpim narapela narapela, mekim isi bel, na lukautim gut narapela narapela. Pasin laikim inap mekim marit i stap strong, tasol marit bai kamap strong moa taim man marit na meri marit i lotuim Jehova. Long dispela rot, marit bilong ol bai kamap olsem “3-pela rop em ol i  tanim wantaim.” Kain rop olsem i strong moa winim tupela rop ol i tanim wantaim. Marit bai kamap strong taim Jehova i stap insait long marit.

7, 8. Pol i givim wanem edvais long marit?

⁷ Bihain long man na meri i marit pinis, ol inap kisim amamas long inapim laik bilong narapela narapela long mekim maritpasin. (Provep 5:18) Tasol sapos man o meri i marit bikos em i laik inapim tasol dispela laik, ating em i no inap bihainim savetingting na makim gut poroman marit. Olsem na Baibel i tok man i mas marit taim “em i no yangpela tumas,” bikos taim em i yangpela tumas, laik bilong mekim maritpasin i save strong tru. (1 Korin 7:36) I gutpela long wet inap dispela filings i no strong na man i marit. Long dispela taim, man inap tingting klia moa na mekim gutpela disisen.—1 Korin 7:9; Jems 1:15.

⁸ Sapos yu tingting long marit, i gutpela long kisim stretpela tingting long marit na save olsem olgeta marit bai gat ol salens bilong ol. Pol i tok ol manmeri i marit ol “bai karim pen na hevi long bodi bilong ol.” (1 Korin 7:28) Ol gutpela marit tu i save karim hevi. Olsem na sapos yu tingting long marit, yu mas skelim na makim gut poroman marit bilong yu.

9, 10. Wanem samting inap kamap sapos yumi maritim wanpela i no lotuim Jehova?

⁹ Wanpela bikpela stiatok bilong Baibel long tingim taim wanpela i laik makim man o meri bilong maritim, em: “Yupela i no ken pas wantaim ol man i no bilip.” (2 Korin 6:14) Aposel Pol i tingim pasin bilong pasim tupela animal wantaim bilong mekim wok gaden taim em i mekim dispela tok. Sapos tupela animal i gat narapela narapela sais na strong, fama i no inap pasim tupela  wantaim long mekim wok long gaden. Sapos em i mekim olsem, em i no mekim gutpela pasin long tupela animal, bikos tupela wantaim bai kisim bagarap. Olsem tasol, sapos wanpela i lotuim Jehova i maritim wanpela i no lotuim Jehova, dispela inap kamapim planti hevi. Olsem na Baibel i givim gutpela edvais long maritim “man i bihainim Bikpela.”—1 Korin 7:39.

¹⁰ Sampela taim, sampela Kristen i pilim olsem mobeta ol i maritim man i no lotuim Jehova na bai ol i no stap wanpis. Tasol sapos yumi sakim ol tok bilong Baibel, planti taim dispela i kamapim hevi na yumi no stap amamas. Olsem ol manmeri i lotuim Jehova, pasin bilong mekim wok bilong em i bikpela samting tru long laip bilong yumi. Bai yu pilim olsem wanem sapos yu no inap toktok wantaim poroman marit bilong yu long dispela bikpela samting long laip bilong yu? Planti i mekim disisen long stap singel bambai ol i no ken maritim wanpela husat i no laikim Jehova na lotuim em.—Ritim Buk Song 32:8.

11. Olsem wanem yu inap makim gut poroman marit?

¹¹ Dispela i no makim olsem wanpela husat i lotuim Jehova em inap stap gutpela man o meri bilong yu. Sapos yu tingting long marit, painim wanpela em yu laikim tru na yu inap stap gut wantaim em. Wet inap long yu painim wanpela husat i laik mekim ol wankain samting long laip olsem yu na em i putim wok bilong God i stap namba wan. Lusim sampela haptaim long ritim na tingim tingim long bel ol gutpela edvais long marit i stap long ol pablikesen em gutpela wokboi i kamapim.—Ritim Buk Song 119:105.

12. Yumi kisim wanem skul long Baibel long pasin bilong papamama long makim poroman marit?

¹² Long sampela kalsa, papamama i save makim  poroman marit bilong pikinini man o pikinini meri bilong ol. Ol i pilim olsem papamama i save gut long husat i gutpela inap long maritim pikinini bilong ol. Dispela kastam i stap tu long taim bilong ol man i bin raitim Baibel. So sapos famili bilong yu i makim olsem ol bai bihainim kain kastam olsem, Baibel inap helpim papamama long save long ol pasin we ol i ken lukluk long en. Olsem, taim Abraham i laik makim meri bilong pikinini man bilong em, Aisak, mani o namba i no bikpela samting long em, nogat; dispela meri i mas laikim Jehova.—Stat 24:3, 67; lukim Futnot 25.

13-15. (a) Olsem wanem man inap redi long stap olsem gutpela man marit? (b) Olsem wanem meri inap redi long stap olsem gutpela meri marit?

¹³ Sapos yu tingting long marit, yu mas save gut olsem yu redi. Ating yu ting olsem yu redi, tasol yumi ken stori long ol samting i insait long pasin bilong redi gut long marit. Ating bai yu kirap nogut long dispela.

¹⁴ Baibel i soim olsem man marit na meri marit i gat narapela narapela wok insait long famili. Olsem na dispela i givim tingting olsem, sapos yu man o yu meri, samting yutupela i mekim bilong redi long marit, em i no inap wankain. Sapos man i tingting long marit, em i mas askim em yet sapos em i redi long stap olsem het bilong famili. Jehova i laik bai man i lukautim gut meri na ol pikinini bilong em long ol samting bilong skin na long sait bilong tingting na bel. Bikpela samting moa, man marit i mas go pas long famili long lotuim God. Baibel i tok man husat i no lukautim gut famili bilong em, em i “man nogut moa winim man i no gat bilip.” (1 Timoti 5:8) Olsem na sapos yu wanpela man i laik marit, tingim hau yu inap bihainim dispela stiatok bilong Baibel: “Redim ol wok bilong yu long ausait, na redim olgeta samting long gaden; na bihain wokim haus bilong yu.” Dispela i makim olsem, paslain long yu marit, yu mas mekim ol samting em Jehova i laik bai ol man marit i mas mekim.—Provep 24:27.

¹⁵ Meri husat i tingting long marit i mas askim em yet sapos em i redi long mekim ol wok bilong meri marit na ating bilong mama. Baibel i kolim sampela rot em gutpela meri marit i mas bihainim bilong lukautim gut man na ol pikinini bilong em. (Provep 31:10-31) Long  nau, planti man na meri i tingting tasol long ol samting em poroman marit i ken mekim long ol. Tasol Jehova i laik bai yumi tingting long ol samting em yumi ken mekim long poroman marit bilong yumi.

16, 17. Sapos yu tingting long marit, yu mas tingim tingim long bel wanem samting?

¹⁶ Paslain long yu marit, tingim tingim long bel tok Jehova i mekim long ol man marit na meri marit. Bilong stap het bilong famili dispela i no makim olsem man i mas mekim hatpela pasin, paitim o bagarapim bel na tingting bilong famili. Gutpela het bilong famili i save bihainim pasin bilong Jisas, em man i save laikim na mekim gut long ol man i stap aninit long lukaut bilong em. (Efesus 5:23) Long sait bilong meri, em i mas tingting long wanem samting em i mas mekim bilong sapotim ol disisen bilong man na wok gut wantaim em. (Rom 7:2) Em i mas askim em yet sapos em bai amamas long stap aninit long man husat i no gutpela olgeta. Sapos em i ting olsem em i no inap, ating em bai wokim disisen olsem i gutpela sapos em i stap singel pastaim.

¹⁷ Man marit na meri marit i mas tingim moa ol samting bilong mekim poroman bilong ol i stap amamas winim amamas bilong ol yet. (Ritim Filipai 2:4.) Pol i tok: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong em.” (Efesus 5:21-33) Man na meri wantaim i mas pilim olsem poroman i laikim na rispektim em. Tasol bilong marit i ken stap gut, man i mas save olsem meri bilong em i rispektim em, na meri i mas save olsem man bilong em i laikim em.

18. Bilong wanem man na meri i mas was gut long taim ol i pren?

¹⁸ Taim man na meri i pren, em taim we tupela i amamas  na save gut long narapela narapela. Na tu, em taim bilong ol long tingim ol samting tru i save kamap na ol i mas onest bambai ol inap wokim disisen sapos ol i laik tru long stap wantaim long laip olgeta bilong ol, o nogat. Taim tupela i pren, man na meri i lain long toktok gut wantaim narapela narapela na traim long save long samting i stap insait long bel bilong narapela narapela. Taim pasin pren bilong tupela i kamap strong moa, em nomol long tupela bai pilim olsem ol i laik stap klostu long narapela narapela. Tasol ol i mas kontrolim hau ol i kamapim ol dispela filings paslain long ol i marit na  bai ol i no ken mekim pasin pamuk. Pasin laikim tru bai helpim ol long bosim bel na banisim ol long mekim samting we inap bagarapim pasin pren bilong tupela yet na pasin pren bilong tupela wantaim Jehova.—1 Tesalonaika 4:6.

19, 20. Ol Kristen i gat wanem tingting long marit?

¹⁹ Planti buk na muvi i save pinisim ol stori wantaim ol bikpela weding i gat amamas. Tasol long laip tru tru, weding em stat tasol. Jehova i laik bai marit i mas stap oltaim.—Stat 2:24.

²⁰ Long nau, planti i ting marit i bilong stap sotpela taim tasol. Em isi long marit na isi long divos. Sampela i pilim olsem taim hevi i stat long kamap, em taim bilong lusim poroman marit na brukim marit. Tasol tingim tok piksa bilong Baibel long strongpela rop em ol i wokim long 3-pela rop ol i tanim wantaim. Kain rop olsem i no inap bruk maski i gat bikpela presa. Taim yumi lukluk i go long Jehova long helpim yumi, marit bilong yumi bai stap strong. Jisas i tok: “Samting God i pasim pinis, man i no ken katim.”—Matyu 19:6.

21. Wanem samting bai helpim man marit na meri marit long laikim narapela narapela?

²¹ Yumi olgeta i gat ol gutpela pasin na ol pasin kranki. Em i isi long tingim ol pasin kranki bilong ol narapela, moa yet bilong poroman marit bilong yumi. Tasol sapos yumi mekim olsem bai yumi no stap amamas. Sapos yumi tingim ol gutpela pasin bilong poroman marit bilong yumi, marit bilong yumi bai stap amamas. Yu ting yumi inap holim kain tingting long poroman marit husat i no gutpela olgeta? Yes! Jehova i save olsem yumi  no gutpela olgeta, tasol em i save tingim ol gutpela pasin bilong yumi. Tingim sapos em i no mekim olsem! Man bilong raitim song i tok: “O Ja, sapos yu save putim was long olgeta sin bilong mipela, orait, Jehova, husat inap winim kot bilong yu?” (Buk Song 130:3) Man marit na meri marit inap bihainim pasin bilong Jehova taim ol i lukluk long ol gutpela pasin bilong poroman marit na redi long fogivim em.—Ritim Kolosi 3:13.

22, 23. Olsem wanem Abraham na Sara i stap gutpela eksampel long ol marit?

 ²² Bihain long sampela yia i lus, marit bai kamap strong moa. Marit bilong Abraham na Sara i stap longpela taim na ol i stap amamas. Taim Jehova i tokim Abraham long lusim ples bilong ol long taun Ur, Sara i winim pinis 60 krismas samting. Piksaim long tingting hatwok em pilim taim em i lusim gutpela haus bilong em na i go stap long haus sel. Tasol Sara i stap gutpela pren na gutpela poroman bilong man bilong em, na em i rispektim tru Abraham. Olsem na em i sapotim ol disisen bilong Abraham na mekim samting bambai ol disisen bilong em i kamapim gutpela samting.—Stat 18:12; 1 Pita 3:6.

²³ Tru, gutpela marit i no makim olsem oltaim man marit na meri marit bai wanbel long olgeta samting. Wanpela taim Abraham i no wanbel wantaim Sara, na Jehova i tokim em: “Harim tok bilong em.” Abraham i mekim olsem, na gutpela samting i kamap. (Stat 21:9-13) Sapos sampela taim yu na poroman marit bilong yu i no wanbel long sampela samting, no ken bel hevi. Bikpela samting em maski yutupela i no wanbel, yutupela i mas laikim na rispektim yet narapela narapela.

24. Olsem wanem marit bilong yumi inap givim ona long Jehova?

²⁴ Insait long kongrigesen Kristen, i gat planti tausen marit em ol i stap amamas. Sapos yu laik marit, tingim olsem wok bilong makim poroman marit em bikpela disisen yu bai mekim. Dispela bai mekim sampela samting long laip olgeta bilong yu, olsem na lukluk i go long Jehova bilong stiaim yu. Sapos yu mekim olsem, orait yu inap makim gut poroman marit, redi gut long marit, na wok strong long pas gut wantaim na strongim pasin laikim na dispela bai givim ona long Jehova.