1, 2. Jehova i pilim olsem wanem taim em i lukim yumi wok strong long mekim onest pasin?

 WANPELA de bihain long skul, taim wanpela mangi i wokabaut i go long haus, em i lukim wanpela paus i pulap long mani i slip long graun. Em bai mekim wanem? Em inap kisim dispela mani. Tasol nogat, em i givim bek paus long papa bilong paus. Taim mama bilong dispela mangi i harim stori long samting em i mekim, mama i amamas tru long em.

² Planti papamama i save amamas taim ol pikinini bilong ol i mekim onest pasin. Papa bilong yumi long heven, Jehova, em “God bilong mekim pasin tru tasol,” na em i save amamas taim yumi mekim onest pasin. (Buk Song 31:5) Yumi laik amamasim em na ‘long olgeta samting yumi mekim, yumi laik bihainim onest pasin.’ (Hibru 13:18) Yumi ken stori long 4-pela eria long laip we i hatwok long mekim onest pasin. Na bihain yumi ken stori long sampela gutpela samting inap kamap taim yumi feisim ol dispela hatwok.

3-5. (a) Olsem wanem yumi ken onest long yumi yet? (b) Wanem samting bai helpim yumi long onest long yumi yet?

³ Bilong mekim onest pasin long ol narapela, pastaim  yumi mas onest long yumi yet. Sampela taim em i no isi long mekim. Long taim bilong ol aposel, ol brata long kongrigesen bilong Laodisia i giamanim ol yet na ting ol i amamasim God, tasol tru tru ol i no mekim olsem. (Revelesen 3:17) Yumi tu inap giamanim yumi yet na ting yumi gutpela man.

⁴ Disaipel Jems i tok: “Sapos wanpela man i ting em i lotuim God, tasol em i no bosim gut maus bilong em, orait dispela man i giamanim bel bilong em yet na em i lotu nating tasol.” (Jems 1:26) Yumi inap giamanim yumi yet na ting sapos yumi bin mekim ol gutpela samting, orait God i no inap wari taim yumi mekim toktok i bagarapim narapela, o tok pilai i daunim narapela, o yumi mekim tok giaman. Wanem samting inap helpim yumi long abrusim pasin bilong giamanim yumi yet?

⁵ Taim yumi lukluk long mira, yumi inap lukim lukluk bilong yumi long ausait. Na taim yumi ritim Baibel, yumi inap lukim yumi wanem kain man long insait. Baibel inap helpim yumi long luksave long ol gutpela pasin na pasin kranki bilong yumi. Yumi inap luksave long ol senis yumi mas mekim long tingting, pasin na toktok bilong yumi. (Ritim Jems 1:23-25.) Tasol sapos yumi tokim yumi yet olsem yumi no gat ol pasin kranki, bai yumi no inap senisim ol pasin em yumi gat wok long senisim. Olsem na yumi mas yusim Baibel na yumi mas onest long skelim gut yumi yet. (Krai 3:40; Hagai 1:5) Prea tu inap helpim yumi long lukim gut yumi yet na save yumi wanem kain man tru. Long prea yumi ken askim Jehova long skelim yumi na helpim yumi long lukim ol pasin kranki bilong yumi na bai yumi ken stretim ol. (Buk Song 139:23, 24) Yumi mas tingim olsem “Jehova i save heitim man bilong mekim pasin giaman, tasol em i save pas gut wantaim man bilong mekim stretpela pasin.”—Provep 3:32.

6. Wai na tupela marit i mas onest long narapela narapela?

⁶ Onest pasin i bikpela samting tru insait long famili. Taim man marit na meri marit i toktok gut wantaim na i no haitim wanpela samting, ol bai pilim olsem ol i stap seif na ol i ken trastim tru narapela narapela. Pasin bilong i no onest inap kamap long kain kain rot. Olsem, wanpela poroman marit inap kirap tok gris long narapela o watsim ponografi o long pasin hait em i prenim narapela. Tingim tok em man bilong raitim song i mekim: “Mi no save bung wantaim ol man bilong giaman, na mi no save raun wantaim ol man i save haitim pasin tru bilong ol.” (Buk Song 26:4) Sapos yu no onest long poroman marit bilong yu, maski yu mekim olsem long tingting bilong yu tu, dispela inap bagarapim marit bilong yu.

7, 8. Olsem wanem yu ken yusim Baibel long skulim ol pikinini long onest pasin?

 ⁷ Ol pikinini tu i mas kisim save olsem onest pasin i bikpela samting. Ol papamama i ken yusim Baibel long skulim ol long dispela. Baibel i stori long ol eksampel nogut bilong ol man husat i no bin mekim onest pasin, olsem: Akan, husat i bin kamap stilman; Gehasi, husat i bin giaman bambai em i ken kisim mani; na Judas, husat i bin stilim mani na bihain em i putim Jisas long han bilong ol birua na kisim 30 silva koin.—Josua 6:17-19; 7:11-25; 2 King 5:14-16, 20-27; Matyu 26:14, 15; Jon 12:6.

⁸ Baibel i stori tu long planti gutpela eksampel bilong ol man husat i bin mekim onest pasin, olsem: Jekop, husat i bin kirapim ol pikinini man bilong em long givim bek mani ol i bin painim; Jepta na pikinini meri bilong em, husat i bin bihainim promis ol i mekim long God; na Jisas, husat i bin onest long taim bilong hevi tu. (Stat 43:12; Hetman 11:30-40; Jon 18:3-11) Ol dispela eksampel inap helpim ol pikinini long kliagut olsem onest pasin i bikpela samting.

9. Sapos papamama i onest, olsem wanem dispela inap helpim ol pikinini?

⁹ Ol papamama inap kisim skul long dispela bikpela stiatok bilong Baibel: “Olsem wanem? Yu save skulim ol arapela, tasol yu no save skulim yu yet? Yu husat i tokim ol man, ‘No ken stil,’ yu yet yu save stil?” (Rom 2:21) Ol pikinini inap luksave taim papamama i toktok long mekim wanpela samting, tasol ol yet i mekim narapela samting. Sapos yumi tokim ol pikinini long mekim onest pasin, tasol yumi yet i no mekim onest pasin, ol pikinini bai paul. Sapos ol pikinini i lukim papamama i giaman, maski long ol liklik samting tu, ating ol tu bai mekim wankain. (Ritim Luk 16:10.) Tasol sapos ol pikinini i lukim  papamama i onest, dispela inap helpim ol long bihain taim ol yet i gat ol pikinini, na ol i ken stap olsem papamama ol narapela i trastim ol.—Provep 22:6; Efesus 6:4.

10. Olsem wanem yumi ken mekim onest pasin taim yumi toktok wantaim ol wanbilip Kristen?

¹⁰ Yumi mas mekim onest pasin tu long ol bratasista Kristen bilong yumi. Em i isi long stori yumi mekim long olgeta de i tanim i kamap tok baksait, na olsem tok bilong bagarapim tu gutnem bilong narapela. Sapos yumi kamapim gen stori we yumi yet i no save sapos em i tru o nogat, yumi inap spredim ol giaman stori. I gutpela moa long yumi ‘kontrolim lips bilong yumi.’ (Provep 10:19) Onest pasin i no min olsem yumi mas tokaut long olgeta samting yumi tingting long en, save long en, o yumi bin harim stori long en. Maski sapos tok yumi laik mekim em i tru, ating em i no bisnis bilong yumi long toktok long en, o ating i no gat wok long yumi kamapim gen na dispela i no soim gutpela pasin. (1 Tesalonaika 4:11) Sampela man i bagarapim ol narapela long toktok bilong ol na ol i mekim eskius na tok: “Mi tok tru.” Tasol yumi ol manmeri bilong Jehova, olsem na oltaim yumi laik bai ol tok yumi mekim i gutpela.—Ritim Kolosi 4:6.

11, 12. (a) Olsem wanem man i mekim sin inap mekim hevi i go bikpela taim em i no onest long dispela? (b) Yumi ken tingim wanem ol askim? (c) Olsem wanem yumi ken onest long oganaisesen bilong Jehova?

¹¹ Jehova i givim wok long ol elda long helpim kongrigesen. Em i isi moa long ol elda long helpim yumi taim yumi onest long ol. Bilong wanem? Sapos yu sik na yu go long dokta long kisim helpim, bai yu haitim sampela samting yu pilim long sik bilong yu? Sapos yu mekim olsem, hau bai em i helpim yu? Olsem tasol sapos yumi bin  mekim bikpela rong, yumi no ken giaman. Yumi mas go long ol elda na onest na tokim ol long samting yumi bin mekim. (Buk Song 12:2; Aposel 5:1-11) Orait nau tingim narapela samting we inap kamap: Olsem wanem sapos yu painimaut olsem pren bilong yu i mekim wanpela bikpela rong? (Wok Pris 5:1) Bai yu tok: “Sapos mi pren tru bilong em, mi bai kipim dispela sikret”? O bai yu tingim olsem ol elda i stap bilong givim helpim we em i nidim bambai em i ken stretim na strongim pasin bilong em long pas gut wantaim Jehova?—Hibru 13:17; Jems 5:14, 15.

¹² Yumi mas onest tu long oganaisesen bilong Jehova taim yumi raitim ol ripot, olsem long taim yumi putim ripot long wok autim tok bilong yumi. Na yumi onest taim yumi aplai long mekim wok painia o mekim ol narapela wok long fultaim sevis.—Ritim Provep 6:16-19.

13. Sapos yumi mekim wok wantaim wanbilip Kristen long sait bilong bisnis, olsem wanem yumi inap mekim onest pasin?

¹³ Ol bratasista Kristen i no ken bungim ol samting bilong wok bisnis wantaim lotu. Olsem, yumi no save stori long samting bilong wok bisnis taim yumi stap long Haus Kingdom o long taim bilong autim tok. Na taim yumi mekim wok bisnis, yumi tingim tru ol bratasista na yumi no mekim nabaut long ol. Sapos yu kisim ol bratasista long wok, orait yu mas peim ol wokman bilong yu long taim stret, givim mak bilong pe yu promis long givim, na givim ol helpim, olsem wok benefit, em lo i makim. Ating medikal insurens na pe man i kisim taim em i kisim de-of long wok i insait long dispela. (1 Timoti 5:18; Jems 5:1-4) Na sapos wanpela Witnes i kisim yu long wok, orait no ken ting yu mas kisim spesel tritmen. (Efesus 6:5-8) Yu mas wok long hamas aua yutupela i wanbel long en na mekim wok em i peim yu long mekim.—2 Tesalonaika 3:10.

14. Ol Kristen i mas mekim wanem paslain long mekim wok bisnis wantaim narapela?

 ¹⁴ Olsem wanem sapos yumi wok bisnis wantaim wanpela brata o sista? Ating em long sait bilong wanpela invesmen o wanpela loun. Long kain samting olsem, i gat wanpela stiatok bilong Baibel: Raitim olgeta samting long pepa! Taim profet Jeremaia i baim wanpela hap graun, em i raitim tupela kopi bilong agrimen, ol witnes i sainim wanpela kopi, na em i putim gut tupela pepa long wanpela hap bambai em i ken lukim gen long bihain. (Jeremaia 32:9-12; lukim tu Stat 23:16-20.) Sampela i pilim olsem sapos ol i raitim wanpela agrimen, dispela bai i luk olsem ol i no trastim brata bilong ol. Tasol tru tru, pasin bilong raitim agrimen inap helpim yu long abrusim kros, bel hevi, na tok pait. Long sait bilong bisnis tu, tingim olsem pasin wanbel insait long kongrigesen i bikpela samting moa winim ol bisnis agrimen.—1 Korin 6:1-8; lukim Futnot 30.

15. Jehova i pilim olsem wanem long pasin giaman insait long wok bisnis?

¹⁵ Yumi mas onest long olgeta man, na long ol man i no Witnes Bilong Jehova tu. Em i bikpela samting long Jehova olsem yumi mas mekim onest pasin. “Pasin bilong yusim skel long giamanim ol man, dispela i stingpela samting long ai bilong Jehova, tasol pasin bilong yusim stretpela skel i save givim amamas long em.” (Provep 11:1; 20:10, 23) Long taim bilong ol man i bin raitim Baibel, planti taim ol i save yusim ol skel long baim na salim ol samting. Tasol sampela bisnisman i save giamanim ol kastama na givim ol samting aninit long mak ol i wanbel long givim o ol i tokim ol long peim ekstra mani. Long nau, wankain long taim bilong ol man i bin raitim  Baibel, pasin giaman i save kamap planti insait long wok bisnis. Long bipo, Jehova i heitim pasin giaman, na long nau tu em i heitim dispela pasin.

16, 17. Yumi mas abrusim wanem ol pasin giaman?

¹⁶ Yumi olgeta inap feisim kain kain samting we i mekim na yumi inap giaman—olsem long taim yumi aplai long wok, pulapim ol fom bilong gavman, o long taim bilong skul eksem. Planti i ting olsem i no gat rong long giaman, edim sampela tok nating, o givim ol giaman bekim. Yumi no kirap nogut long dispela. Baibel i tok profet olsem long taim bilong las de, ol manmeri bai “laikim ol yet tasol, ol bai laikim tumas mani, . . . ol bai i no laikim ol gutpela pasin.”—2 Timoti 3:1-5.

¹⁷ Sampela taim i luk olsem ol samting ol man bilong giaman i mekim i save kamap gutpela. (Buk Song 73:1-8) Ol inap rausim wanpela Kristen long wok, giamanim em na kisim mani bilong em, o mekim nogut long em long ples wok bikos em i save mekim onest pasin. Tasol taim man i mekim onest pasin, dispela i winim tru olgeta samting em inap lusim. Bilong wanem?

18. Wai na gutpela nem i bikpela samting tru?

¹⁸ Man i gat nem olsem onest man na ol narapela inap trastim na bilip long em, kain man olsem i dia tumas na i no gat planti man olsem long dispela graun. Yumi olgeta wan wan i gat rot long kisim kain nem olsem. (Maika 7:2) Tru, sampela man inap tok bilas long yu na kolim yu longlong man bikos yu save mekim onest pasin. Tasol ol narapela bai tingim tru onest pasin bilong yu na ol bai trastim yu. Long olgeta hap bilong graun, ol Witnes Bilong Jehova i gat nem long mekim onest pasin. Sampela bosman i amamas long kisim ol Witnes long wok bikos ol i save olsem ol Witnes bai mekim onest pasin. Taim ol i  pinisim ol arapela wokman long wok bikos long pasin giaman, ol Witnes i save holim yet wok bilong ol.

19. Onest pasin bai mekim wanem long pasin pren bilong yu wantaim Jehova?

¹⁹ Taim yu onest long olgeta samting, dispela bai mekim na maus bilong bel bilong yu i stap stret na bel i stap isi. Yumi ken bihainim pasin bilong Pol, em i tok: “Mipela i bilip olsem maus bilong bel bilong mipela i stap stret.” (Hibru 13:18) Bikpela samting moa, gutpela Papa bilong yu, Jehova, bai luksave long dispela na tingim tru hatwok bilong yu long mekim onest pasin long olgeta samting.—Ritim Buk Song 15:1, 2; Provep 22:1.