1-3. (a) Wai na wanpela mama i mas sekim gut olsem liklik boi bilong em i stap klin? (b) Wai na Jehova i laik ol manmeri bilong em i mas i stap klin?

 TINGIM wanpela mama i gat pasin laikim, em i redim liklik boi bilong em long go long skul. Em i mas sekim gut olsem pikinini i waswas pinis na ol klos bilong em i stap stret na klin. Long dispela rot, pikinini i stap helti na dispela i soim ol narapela olsem papamama bilong em i save lukautim em gut.

² Papa bilong yumi, Jehova, i laik bai yumi stap klin.  (Buk Song 18:26) Em i save olsem sapos yumi stap klin, dispela bai helpim yumi. Na taim yumi stap klin, yumi givim ona long em.—Esekiel 36:22; ritim 1 Pita 2:12.

³ Yumi mas mekim wanem bilong stap klin? Wai na pasin bilong stap klin i gutpela long yumi? Taim yumi skelim ol dispela askim, ating bai yumi luksave long sampela senis yumi yet i mas mekim.

4, 5. (a) Wai na yumi mas stap klin? (b) Ol samting Jehova i wokim i givim wanem skul long yumi long tingting bilong em long pasin bilong stap klin?

⁴ Yumi kisim save long pasin bilong stap klin long eksampel bilong Jehova yet. (Wok Pris 11:44, 45) So nambawan risen na yumi mas stap klin em olsem, yumi laik “bihainim pasin bilong God.”—Efesus 5:1.

⁵ Ol samting Jehova i wokim i skulim yumi long tingting bilong em long pasin bilong stap klin. Jehova i wokim wanpela sistem we win na wara inap klinim ol yet. (Jeremaia 10:12) Tingim planti rot we graun inap klinim em yet bihain long ol man i bin bagarapim. Olsem, Jehova i bin disainim ol liklik samting tru i gat laip em ol i kolim maikrobs, em man inap lukim long masin maikroskop. Ol maikrobs inap senisim ol rabis i gat posin na mekim i kamap gutpela samting. Dispela wok i gat bikpela strong. Ol saientis i save yusim tu sampela bilong ol dispela maikrobs long stretim bek ol samting nogut em polusen i save kamapim.—Rom 1:20.

6, 7. Olsem wanem Lo Bilong Moses i soim olsem ol man i lotuim Jehova, ol i mas stap klin?

⁶ Long Lo Jehova i givim long ol Israel long rot bilong Moses, yumi lukim tu olsem em i bikpela samting long stap klin. Olsem, ol manmeri i mas stap klin long sait  bilong skin bambai Jehova i ken orait long lotu bilong ol. Long De Bilong Karamapim Sin, hetpris i mas waswas tupela taim. (Wok Pris 16:4, 23, 24) Na paslain long ol narapela pris i ofaim ol sakrifais, ol i mas wasim hanlek bilong ol. (Kisim Bek 30:17-21; 2 Stori 4:6) Long sampela samting, pe bilong brukim ol lo long sait bilong stap klin, em dai.—Wok Pris 15:31; Namba 19:17-20.

⁷ Olsem wanem long nau? Yumi ken lainim planti samting long Lo em Jehova i givim. (Malakai 3:6) Dispela i kamapim klia olsem ol man i lotuim Jehova, ol i mas stap klin. Ol lo bilong Jehova i no senis. Long nau, em i ekspektim yet ol man i lotuim em long stap klin.—Jems 1:27.

8. Yumi mas stap klin long wanem ol rot?

⁸ Long tingting bilong Jehova, pasin bilong stap klin i no makim tasol wok bilong lukautim bodi, klos, na haus bilong yumi long i stap klin, nogat. Pasin bilong stap klin i mas karamapim olgeta samting long laip bilong yumi. Lotu, pasin, na tingting bilong yumi i insait long dispela. Yes, bilong Jehova i ken tingim yumi olsem lain i stap klin, yumi mas stap klin long olgeta samting yumi mekim long laip bilong yumi.

9, 10. Yumi mas mekim wanem bilong stap klin long sait bilong lotu?

⁹ Lotu i klin. Yumi no ken insait long wanpela samting bilong lotu giaman. Taim ol Israel i stap kalabus long Babilon, ol i stap namel long ol manmeri i save mekim pasin pamuk taim ol i mekim lotu. Aisaia i tok profet olsem ol Israel bai go bek long ples bilong ol na kirapim gen lotu i klin. Jehova i tokim ol: “Lusim dispela hap, no ken tatsim wanpela samting i doti! Lusim em na go aut, yupela i mas stap klin.” Ol i no ken bungim pasin  bilong lotuim God wantaim ol bilip, pasin, o kastam bilong lotu giaman bilong Babilon.—Aisaia 52:11.

¹⁰ Long nau, ol Kristen tru i save sakim lotu giaman. (Ritim 1 Korin 10:21.) Long olgeta hap bilong graun, ol bilip bilong lotu giaman i as bilong planti bung ol man i save mekim, kastam, na bilip ol man i gat. Olsem, long planti kalsa, ol man i bilip olsem i gat wanpela samting insait long yumi i save stap laip yet bihain long yumi dai, na dispela bilip i as bilong planti kastam. (Eklisiastis 9:5, 6, 10) Ol Kristen i mas sakim ol kain kastam olsem. Ol famili inap putim presa long yumi long insait long sampela bilong ol dispela kastam. Tasol yumi laik bai Jehova i tingim yumi olsem lain i stap klin, olsem na yumi no ken larim kain presa olsem i mekim na yumi insait long ol dispela pasin.—Aposel 5:29.

11. Yumi mas mekim wanem bilong stap klin long pasin bilong yumi?

¹¹ Pasin i klin. Bilong Jehova i ken tingim yumi olsem lain i stap klin, yumi mas sakim olgeta kain pasin pamuk. (Ritim Efesus 5:5.) Long Baibel, Jehova i tokim yumi long “ranawe long pasin pamuk.” Em i kamapim klia olsem ol man i save mekim pasin pamuk na ol i no tanim bel, ol “bai i no inap i go insait long Kingdom Bilong God.”—1 Korin 6:9, 10, 18; lukim Futnot 22.

12, 13. Wai na yumi mas stap klin long tingting?

¹² Tingting i klin. Planti taim tingting i save kirapim yumi long mekim samting. (Matyu 5:28; 15:18, 19) Klinpela tingting bai kirapim yumi long bihainim klinpela pasin. Tru, yumi no gutpela olgeta, olsem na sampela taim bai yumi kisim rong tingting. Taim dispela tingting i kamap, wantu yumi mas sakim. Sapos yumi no mekim olsem, bihain bel bilong yumi bai i no inap stap  klin moa. Ating bai yumi laik mekim ol samting yumi tingting tumas long en. Yumi mas pulapim tingting bilong yumi long ol klinpela tingting. (Ritim Filipai 4:8.) So yumi mas sakim ol amamas i gat pasin pamuk o pait long en. Yumi mas skelim gut na makim samting yumi ritim, watsim, na stori long en.—Buk Song 19:8, 9.

¹³ Bilong stap yet insait long pasin laikim bilong God, yumi mas stap klin long sait bilong lotu, pasin, na tingting bilong yumi. Tasol em i bikpela samting tu long Jehova olsem yumi mas stap klin long sait bilong skin.

14. Wai na em i bikpela samting long stap klin long sait bilong skin?

¹⁴ Taim yumi lukautim bodi na eria bilong yumi na ol i stap klin, dispela bai helpim yumi na ol man i stap klostu long yumi. Bai yumi pilim gutpela, na ol narapela bai laik stap klostu long yumi. Tasol i gat wanpela bikpela risen na yumi mas stap klin long sait bilong skin. Taim yumi stap klin, dispela i givim ona long Jehova. Tingim: Sapos yu lukim wanpela pikinini i stap doti oltaim, ating bai yu kisim tingting kranki long papamama bilong em. Long wankain pasin, sapos yumi no lukautim gut yumi yet na mekim ol samting bilong stap klin, ol man inap kisim tingting kranki long Jehova. Pol i tok: “Mipela i no laik bai ol man i sutim tok long wok bilong mipela, olsem na mipela i no save mekim wanpela samting bilong pundaunim ol; tasol long olgeta kain rot mipela i kamapim klia olsem mipela ol wokman bilong God.”—2 Korin 6:3, 4.

15, 16. Yumi yet inap mekim wanem bilong stap klin?

¹⁵ Bodi na klos bilong yumi. Pasin bilong stap klin i mas stap olsem samting yumi mekim long olgeta de.  Olsem, sapos inap, yumi mas waswas long olgeta de. Yumi mas wasim han wantaim sop na wara, moa yet paslain long kuk o kaikai, na bihain long yumi yusim toilet o tatsim wanpela samting i doti. Pasin bilong wasim han inap luk olsem liklik samting, tasol em i bikpela samting bilong stopim ol binatang jem na sik long spred. Dispela pasin inap seivim laip tu. Sapos yumi no gat toilet o suris sistem, yumi inap painim ol narapela gutpela rot long rausim rabis. Long Israel bilong bipo, ol i no gat suris sistem, so ol i save digim graun na karamapim pekpek, ol i mekim olsem longwe long ol haus na ol wara.—Lo 23:12, 13.

¹⁶ Ol klos bilong yumi i no mas stail tumas, ekspensiv, o bihainim nupela stail. Tasol ol i mas stap gut na klin. (Ritim 1 Timoti 2:9, 10.) Oltaim yumi laik bai lukluk bilong yumi i givim ona long Jehova.—Taitus 2:10.

17. Wai na yumi laik lukautim haus na eria bilong yumi na ol i stap klin?

 ¹⁷ Haus na eria bilong yumi. Maski yumi stap long wanem hap, yumi mas lukautim gut haus na haus i stap klin. Na tu, yumi mas lukautim gut kar, motobaik, baisikol, o wanem kain trenspot yumi gat bambai ol i stap klin, moa yet sapos yumi yusim bilong go long ol miting o autim tok. Taim yumi autim tok, yumi save stori long gutpela laip long wanpela klinpela paradais long graun. (Luk 23:43; Revelesen 11:18) Lukluk bilong haus na eria bilong yumi inap soim olsem yumi redi nau long stap laip long dispela klinpela nupela taim.

18. Wai na yumi laik bai ples bilong yumi long mekim lotu i stap klin?

¹⁸ Ples bilong yumi long mekim lotu. Yumi soim olsem pasin bilong stap klin em i bikpela samting long yumi taim yumi lukautim miting ples bilong yumi na ol i stap klin, maski em Haus Kingdom o ples we yumi mekim ol kibung. Taim ol man i kam long wanpela Haus Kingdom long festaim, planti taim ol i luksave olsem ples i klin. Dispela i save givim ona long Jehova. Yumi ol memba bilong kongrigesen, olsem na yumi olgeta i gat rot long klinim Haus Kingdom bilong yumi na stretim ol samting i bagarap na em i ken stap gut.—2 Stori 34:10.

19. Yumi mas sakim wanem ol samting?

¹⁹ Maski Baibel i no kolim stret olgeta pasin nogut yumi mas sakim, em i givim ol stiatok bilong helpim yumi long kliagut long hau Jehova i pilim long ol dispela pasin. Em i no laik bai yumi smok o kalabus long alkohol o drak. Sapos yumi pren bilong God, bai yumi sakim ol dispela samting. Wai? Bikos yumi rispektim tru  presen bilong laip. Ol kain pasin olsem inap sotim laip bilong yumi, bagarapim helt bilong yumi, na bagarapim ol narapela i stap klostu long yumi. Planti man i traim long stopim ol dispela pasin doti bikos long helt bilong ol. Tasol yumi pren bilong Jehova, olsem na i gat gutpela risen long stopim ol dispela pasin—yumi laikim God. Wanpela yangpela meri i tok: “Wantaim helpim bilong Jehova, mi klinim laip bilong mi na lusim ol samting mi kalabus long en. . . . Long strong bilong mi yet, mi ting mi bai hat tru long mekim senis.” Nau bai yumi skelim 5-pela stiatok bilong Baibel we inap helpim man long stopim ol pasin we inap bagarapim em yet.

20, 21. Jehova i laik bai yumi no stap kalabus long wanem kain ol pasin?

²⁰ “Ol pren mi laikim tumas, yumi kisim pinis ol dispela promis, olsem na yumi mas rausim olgeta pasin doti bilong skin na bilong tingting. Yumi mas pret long God na wok oltaim long kamap holi.” (2 Korin 7:1) Jehova i laik bai yumi no stap kalabus long ol pasin doti we inap bagarapim tingting o bodi bilong yumi.

²¹ Wanpela bikpela risen long “rausim olgeta pasin doti” i stap long 2 Korin 6:17, 18. Jehova i tokim yumi: “No ken tatsim samting i no klin.” Na em i tok promis olsem: “Bai mi kisim yupela. . . . Na mi bai kamap papa bilong yupela, na yupela bai kamap ol pikinini man na pikinini meri bilong mi.” Yes, Jehova bai laikim yumi olsem papa i save laikim ol pikinini bilong em sapos yumi sakim ol samting we inap mekim yumi i no stap klin long ai bilong em.

22-25. Wanem ol stiatok bilong Baibel i ken helpim yumi long sakim ol pasin doti?

²² “Yu mas laikim Jehova, God bilong yu. Yu mas  laikim em long bel olgeta bilong yu, na long laip olgeta bilong yu, na long tingting olgeta bilong yu.” (Matyu 22:37) Dispela em nambawan bikpela lo i winim ol narapela lo. (Matyu 22:38) I stret yumi mas laikim tru Jehova. Hau bai yumi laikim em tru sapos yumi mekim samting we inap sotim laip bilong yumi o bagarapim kru bilong yumi? Yumi laik mekim olgeta samting bilong soim rispek long laip em i bin givim yumi.

²³ “[Jehova] i givim laip na win na olgeta samting long olgeta manmeri.” (Aposel 17:24, 25) Sapos wanpela pren i givim yu wanpela spesel presen, bai yu tromoi o bagarapim dispela presen? Laip em wanpela gutpela presen i kam long Jehova. Yumi pilim tru dispela presen. So yumi laik yusim laip bilong yumi long rot we inap givim glori long em.—Buk Song 36:9.

²⁴ “Yu mas laikim ol arapela man olsem yu laikim yu yet.” (Matyu 22:39) Ol pasin doti i no save bagarapim yumi tasol, nogat. Ol i save bagarapim tu ol man i stap klostu long yumi, planti taim em ol man yumi laikim tumas. Olsem, man i stap wantaim man bilong smok long seim haus, em inap kisim bikpela hevi long helt bilong em long rot bilong pulim smok i kam long dispela man. Tasol taim yumi stopim ol pasin doti, yumi soim ol man i stap klostu long yumi olsem yumi laikim ol.—1 Jon 4:20, 21.

²⁵ “Wok yet long kirapim tingting bilong ol long ol i mas daun long ol gavman na long ol man i gat namba na ol i mas bihainim tok bilong ol.” (Taitus 3:1) Long planti kantri, lo i tambuim pasin bilong holim o yusim sampela kain drak. Jehova i tokim yumi long soim rispek long ol gavman, olsem na yumi mas bihainim ol dispela lo.—Rom 13:1.

26. (a) Yumi mas mekim wanem bambai Jehova i ken orait long lotu bilong yumi? (b) Wai na pasin bilong stap klin long ai bilong God em bes wei long stap laip?

 ²⁶ Sapos yumi laik stap pren bilong Jehova, ating bai yumi luksave olsem yumi mas mekim sampela senis. Sapos olsem, yumi mas stat nau. Planti taim em i no isi long stopim wanpela pasin doti, tasol yumi inap stopim! Jehova i promis long helpim yumi. Em i tok: “Mi Jehova, mi God bilong yupela, mi tasol mi save skulim yupela long ol samting we inap helpim yupela, mi tasol mi save stiaim yupela long rot yupela i mas wokabaut long en.” (Aisaia 48:17) Taim yumi traim bes long stap klin, yumi ken bilip tru olsem yumi givim ona long God bilong yumi.