SAPTA 16
Sakim Devil
“Sakim Devil, na em bai lusim yupela na ranawe.”—JEMS 4:7.
1, 2. Yumi mas kliagut long wanem samting long Satan na ol dimon?
LAIP long nupela taim Jehova bai kamapim em bai gutpela tru. Sindaun bilong yumi bai kamap olsem sindaun em God i bin tingting long kamapim long pastaim tru. Tasol long nau yumi stap long dispela graun em Satan na ol dimon bilong em i kontrolim. (2 Korin 4:4) Maski yumi no inap lukim ol, ol i stap na ol i gat bikpela strong tru.
2 Long dispela sapta, bai yumi stori long hau yumi inap stap klostu long Jehova na banisim yumi yet long Satan. Jehova i tok promis olsem em bai helpim yumi. Tasol yumi mas kliagut long ol rot em Satan na ol dimon i yusim bilong trikim na pundaunim yumi.
“OLSEM WANPELA LAION I SINGAUT STRONG”
3. Satan i laik mekim wanem long yumi?
3 Satan i tok olsem ol man i lotuim Jehova bikos ol i tingim ol samting ol inap kisim long em na sapos bikpela hevi samting i painim ol, ol bai stop long lotuim God. (Ritim Jop 2:4, 5.) Taim wanpela i soim olsem em i laik kisim save long Jehova, Satan na ol dimon i luksave long dispela, na ol bai traim long stopim em. Ol i kros taim wanpela i dediketim em yet long Jehova na kisim baptais. Baibel i tok Satan i olsem “wanpela laion i singaut strong na i painim ol man bilong kaikai.” (1 Pita 5:8) Satan i laik bagarapim pasin pren bilong yumi wantaim Jehova.—Buk Song 7:1, 2; 2 Timoti 3:12.
Satan i kros taim yumi dediketim yumi yet long Jehova
4, 5. (a) Satan i no inap mekim wanem? (b) Wanem insait bilong dispela tok “sakim Devil”?
4 Tasol yumi no ken pret long Satan na ol dimon bilong em. Jehova i no larim ol i mekim olgeta samting ol i laik mekim long yumi. Jehova i tok promis olsem “bikpela lain manmeri” bilong ol Kristen tru bai abrusim “dispela traipela hevi tru.” (Revelesen 7:9, 14) I no gat wanpela samting em Devil inap mekim bilong stopim dispela samting long kamap, bikos Jehova i save banisim ol manmeri bilong Em.
5 Sapos yumi stap klostu long Jehova, Satan i no inap bagarapim pasin pren bilong yumi wantaim Jehova. Tok Bilong God i strongim yumi olsem: “Jehova bai stap wantaim yupela sapos yupela i stap wantaim em.” (2 Stori 15:2; ritim 1 Korin 10:13.) Planti bilipman na bilipmeri bilong bipo, olsem Abel, Inok, Noa, Sara, na Moses, i bin sakim Satan long rot bilong stap klostu long Jehova. (Hibru 11:4-40) Yumi inap mekim wankain. Baibel i tok promis olsem: “Sakim Devil, na em bai lusim yupela na ranawe.”—Jems 4:7.
‘YUMI GAT PAIT’
6. Satan i mekim wanem bilong pundaunim yumi?
6 Satan i save olsem Jehova i no larim em i mekim olgeta samting em i laik mekim long yumi, tasol em bai traim yet kain kain rot bilong bagarapim pasin bilong yumi long pas gut wantaim Jehova. Long nau, Devil i laik pundaunim yumi long kain kain rot, na em i yusim ol samting em i bin yusim inap planti tausen yia pinis. Wanem sampela bilong ol dispela samting?
7. Bilong wanem Satan i wok long traim ol manmeri bilong Jehova?
7 Aposel Jon i tok: “Dispela graun olgeta i stap long han bilong Satan.” (1 Jon 5:19) Satan i kontrolim dispela graun nogut na em i laik kontrolim tu ol manmeri bilong Jehova. (Maika 4:1; Jon 15:19; Revelesen 12:12, 17) Devil i save olsem taim bilong em i sot pinis, olsem na em i putim bikpela presa long yumi olgeta wan wan na bai yumi no stap gut long God. Sampela taim ol traim bilong Devil i stap ples klia, tasol sampela taim em i mekim long ol rot we yumi no inap luksave long en.
8. Ol wan wan Kristen i mas save long wanem samting?
8 Yumi ritim long Efesus 6:12 olsem: “Yumi pait wantaim . . . ol spirit nogut i stap antap.” Olgeta wan wan Kristen i gat pait long mekim wantaim Devil na ol dimon. Yumi mas save olsem olgeta manmeri husat i dediket long Jehova ol i insait long dispela pait. Long pas aposel Pol i raitim long ol Efesus, em i strongim ol Kristen 3-pela taim long “sanap strong.”—Efesus 6:11, 13, 14.
9. Satan na ol dimon i traim long mekim wanem long yumi?
9 Satan na ol dimon i traim long giamanim yumi long kain kain rot. Sapos yumi bin sakim wanpela traim bilong Satan, dispela i no min olsem em i no inap pundaunim yumi long narapela traim, nogat. Devil i traim long painim ol samting we yumi no strong long en bambai em i ken makim ol trap bilong holimpasim yumi. Tasol yumi ken abrusim ol dispela trap bikos Baibel i skulim yumi long ol trap bilong Devil. (2 Korin 2:11; lukim Futnote 31.) Wanpela bilong ol dispela trap em wok bilong dimon.
STAP LONGWE TRU LONG OL DIMON
10. (a) Wok bilong dimon em wanem kain ol wok? (b) Jehova i gat wanem tingting long wok bilong dimon?
10 Wok bilong dimon em ol narakain strongpela wok we man i mekim wok wantaim ol dimon olsem, man i tokaut long ol samting bai kamap bihain, sanguma, wok marila, o traim long toktok wantaim ol man i dai pinis. Baibel i tokim yumi olsem ol wok bilong dimon “i stingpela samting,” na yumi no ken insait long en na long seim taim yumi lotuim Jehova, nogat. (Lo 18:10-12; Revelesen 21:8) Ol Kristen i mas abrusim tru olgeta kain wok bilong dimon.—Rom 12:9.
11. Laik bilong save long ol narakain strongpela wok inap stiaim yumi long wanem samting?
11 Satan i save olsem sapos yumi amamas long ol dispela narakain strongpela wok, em bai isi long em i pulim yumi i go insait long wok bilong dimon. Ol kain kain wok bilong dimon inap bagarapim pasin pren bilong yumi wantaim Jehova.
SATAN I TRAIM LONG TRIKIM YUMI
12. Olsem wanem Satan i laik stiaim tingting bilong yumi?
12 Satan i traim long paulim tingting bilong ol man. Isi isi em i kirapim ol manmeri long kisim tupela tingting, i go inap ol i ting olsem “samting i gutpela em i nogut, na samting i nogut em i gutpela.” (Aisaia 5:20) Devil i kirapim ol man long kisim tingting olsem ol skultok bilong Baibel i no inap helpim yumi na yumi inap stap amamas moa sapos yumi sakim ol lo bilong God.
13. Olsem wanem Satan i traim long kirapim pasin bilong kisim tupela tingting?
13 Pasin bilong kisim tupela tingting em wanpela rot Satan i yusim na i wok gut tru. Em i yusim dispela pasin inap longpela taim pinis. Long gaden Iden, em i bin traim long kirapim Iv long kisim tupela tingting taim em i askim: “Tru tru God i tokim yutupela long no ken kaikai prut bilong olgeta diwai bilong gaden, a?” (Stat 3:1) Bihain, long taim bilong Jop, Satan i askim Jehova long ai bilong ol ensel, olsem: “Yu ting bai Jop i pret long yu sapos em i no kisim wanpela samting long han bilong yu, a?” (Jop 1:9) Bihain long Jisas i bin kisim baptais, Satan i salensim em na tok: “Sapos yu pikinini bilong God, orait tokim ol dispela ston long tanim i kamap bret.”—Matyu 4:3.
14. Olsem wanem Satan i kirapim ol man long kisim tupela tingting olsem wok bilong ol dimon i no inap bagarapim ol?
14 Long nau, Devil i wok yet long kirapim ol man long kisim tupela tingting. Em i mekim sampela wok bilong dimon i luk olsem i no gat rong long en, na dispela i kirapim ol man long ting olsem ating wok bilong ol dimon i no samting nogut. Sampela Kristen tu i no luksave olsem wok bilong ol dimon inap bagarapim ol. (2 Korin 11:3) Olsem na yumi mas mekim wanem bilong banisim yumi yet? Yumi mas mekim wanem na bai Satan i no ken giamanim yumi long ol trik bilong em? Yumi ken skelim tupela rot we em inap trikim yumi: ol amamas na medikal tritmen.
SATAN I YUSIM OL LAIK BILONG YUMI YET BILONG TRAIM YUMI
15. Olsem wanem yumi inap insait long wok bilong dimon long rot bilong ol amamas?
15 Long nau, planti muvi, ol vidio, televisen program, kompiuta gem, na ol web-sait bilong Intenet i stori long ol dimon, mejik, na ol narakain strongpela pawa. Planti i ting ol dispela samting i bilong kisim amamas na i no inap bagarapim ol, tasol ol i no luksave olsem ol i larim ol dimon i kam insait long laip bilong ol na dispela inap nogutim ol. Na tu, man inap insait long wok bilong ol dimon long rot bilong ol samting olsem horoskop, ritim ol mak long han, tarot kas, na kristol bal. Devil i haitim ol hevi we inap kamap na em i traim long mekim ol dispela samting i luk narapela kain tru, intresting, na olsem samting bilong kisim amamas. Man inap ting olsem hevi i no inap painim em taim em i watsim ol muvi i gat wok bilong ol dimon o ol narakain strongpela wok bikos em yet i no mekim wok bilong dimon. Bilong wanem dispela tingting inap nogutim em?—1 Korin 10:12.
16. Bilong wanem yumi mas sakim ol amamas we i gat ol narakain strongpela wok long en?
16 Satan na ol dimon i no inap lukim tingting bilong yumi. Tasol ol inap save long ol samting yumi laikim na samting yumi tingting long en long rot bilong lukim ol samting yumi makim bilong yumi yet na bilong famili bilong yumi, na tu, ol amamas em yumi makim. Sapos yumi makim ol muvi, ol musik, o ol buk i stori long man i toktok wantaim ol daiman, wok marila, spirit nogut i stap insait long man, ol wits, ol vempaia, o ol kain wok olsem, Satan na ol dimon bai save yumi gat laik long save long ol dispela samting. Na ol inap traim long mekim na yumi go insait tru long wok bilong ol dimon.—Ritim Galesia 6:7.
17. Olsem wanem Satan inap yusim laik bilong yumi long stap helti bilong traim yumi?
17 Satan inap yusim tu laik bilong yumi long stap helti bilong traim yumi. Long nau, planti man i no gat gutpela helt. Ating man inap traim kain kain tritmen tasol dispela i no helpim em. (Mak 5:25, 26) Ating em inap pilim olsem i no gat narapela rot na em bai redi long traim kain kain samting. Tasol yumi ol Kristen i mas was gut, yumi no ken makim ol medikal tritmen we ol i save yusim ol wok bilong “mejik.”—Aisaia 1:13.
Trastim Jehova taim yu sik
18. Kristen i mas sakim wanem kain medikal tritmen?
18 Long Israel bilong bipo, sampela man i bin yusim “mejik.” Jehova i tokim ol: “Taim yupela i opim han bilong yupela, mi haitim ai bilong mi long yupela. Maski yupela i mekim planti prea, mi no laik harim.” (Aisaia 1:15) Tingim—Jehova i no laik harim ol prea bilong ol! Yumi no laik mekim samting we inap bagarapim pasin pren bilong yumi wantaim Jehova na mekim em i no laik helpim yumi, moa yet long taim yumi sik. (Buk Song 41:3) Olsem na yumi mas painimaut gut sapos tritmen yumi laik kisim i gat sampela wok bilong ol dimon o narakain strongpela pawa i insait long en. (Matyu 6:13) Sapos i luk olsem i gat sampela wok bilong ol dimon long en, orait yumi mas sakim!—Lukim Futnot 32.
STORI LONG OL DIMON
19. Olsem wanem Devil i pretim planti man?
19 Planti man i ting olsem Devil na ol dimon i samting ol man i save piksaim tasol long tingting, tasol ol narapela i save ol dimon i stap tru bikos long samting ol yet i ekspiriensim. Planti man i save pret long ol spirit nogut na ol i kalabus long ol kastam em wok bilong ol spirit nogut i insait long en. Sampela i save spredim pasin bilong pret long ol dimon long rot bilong stori long ol samting nogut ol dimon i mekim long ol man. Planti taim ol man i intres tru long ol kain stori olsem na ol i amamas long stori long ol narapela. Ol dispela stori i save mekim ol man i pret long Devil.
20. Olsem wanem yumi inap spredim tok giaman bilong Satan?
20 Tingim dispela—Satan i laik bai ol man i pret long em. (2 Tesalonaika 2:9, 10) Em man bilong giaman na em i save long rot bilong stiaim tingting bilong ol man husat i intres long wok bilong ol dimon na mekim ol i bilipim ol samting we i no tru. Ol dispela man inap stori long ol samting ol i ting ol i bin lukim na harim. Taim man i kamapim gen na gen ol kain stori, ol i save skruim sampela tok moa long en na stori i senis. Yumi no laik helpim Satan long spredim pasin bilong pret long rot bilong kamapim gen ol kain stori olsem.—Jon 8:44; 2 Timoti 2:16.
21. Yumi no ken stori long wok dimon, tasol yumi ken stori long wanem samting?
21 Sapos wanpela long lain bilong Jehova i ekspiriensim samting ol dimon i mekim long em, em i no ken kamapim gen dispela stori bilong amamasim ol narapela. Ol manmeri bilong Jehova i no ken pret long wanpela samting em Devil na ol dimon bilong em inap mekim. Yumi mas putim tingting i go long Jisas na long bikpela strong Jehova i bin givim long em. (Hibru 12:2) Jisas i no bin amamasim ol disaipel bilong em long ol kain stori bilong ol dimon. Em i save stori tasol long tok bilong Kingdom na “ol strongpela wok bilong God.”—Aposel 2:11; Luk 8:1; Rom 1:11, 12.
22. Yu laik strong long mekim wanem?
22 Yumi no ken lusim tingting olsem Satan i gat bikpela laik long bagarapim pasin pren bilong yumi wantaim Jehova. Na em bai traim olgeta kain samting bilong inapim dispela laik bilong em. Tasol yumi save long ol pasin trik bilong Devil na yumi laik strong long sakim olgeta kain wok bilong ol dimon. Yumi “no ken opim rot long Devil” long daunim strong bilong yumi. (Ritim Efesus 4:27.) Yes, sapos yumi sakim Devil, bai yumi no inap pas long ol trap bilong em na bai yumi stap gut aninit long lukaut bilong Jehova.—Efesus 6:11.