1-3. (a) Yumi kisim wanem skul long Provep 13:20? (b) Wai na yumi mas skelim na makim gut ol pren bilong yumi?

 YU BIN luksave long hau bebi i watsim papamama bilong em? Paslain long em inap toktok, em i wok long lainim olgeta samting em i lukim na harim. Taim em i kamap bikpela liklik, em i stat long bihainim pasin bilong papamama na i no hatwok long em i mekim. Yumi no kirap nogut olsem ol man i bikpela pinis, ol tu inap bihainim tingting na pasin bilong ol man ol i spendim bikpela haptaim wantaim ol.

² Long Provep 13:20, yumi lainim olsem: “Man i wokabaut wantaim ol man i gat savetingting, em bai gat savetingting.” Dispela tok “wokabaut wantaim” wanpela i makim olsem man i laik spendim bikpela haptaim wantaim dispela man. Dispela i no olsem em i stap klostu long dispela man na em tasol, nogat. Wanpela saveman bilong Baibel i tok pasin bilong wokabaut wantaim wanpela i makim olsem em i laikim dispela man na i pas gut wantaim em. Ol man yumi spendim bikpela haptaim wantaim ol, moa yet sapos yumi pas gut wantaim ol, ol inap stiaim pasin bilong yumi.

 ³ Ol pren bilong yumi inap stiaim yumi long gutpela rot o rot nogut. Provep 13:20 i tok moa: “Man i poroman wantaim ol longlong man, trabel bai painim em.” Ol pren husat i laikim God bai strongim yumi long stap gut yet long em. Bilong helpim yumi long skelim na makim gut ol pren, yumi ken skelim wanem kain ol man Jehova i makim olsem ol pren bilong em.

4. Wai na em i bikpela ona long stap pren bilong God? Wai na Jehova i kolim Abraham “pren bilong mi”?

⁴ Jehova, Nambawan King Bilong Yunives, i opim rot long yumi kamap pren bilong em. Dispela em bikpela ona tru. Jehova i save skelim gut na makim ol pren bilong em. Em i save makim ol man i laikim na bilip long em. Tingim Abraham. Em i redi long mekim olgeta samting God i tokim em long mekim. Long olgeta taim, Abraham i soim olsem em i stap gut long God na bihainim tok bilong em. Em i redi tu long sakrifaisim pikinini bilong em, Aisak. Abraham i bilip olsem “God inap kirapim em bek.” (Hibru 11:17-19; Stat 22:1, 2, 9-13) Abraham i bilip na bihainim tok, na Jehova i kolim em “pren bilong mi.”—Aisaia 41:8; Jems 2:21-23.

5. Jehova i pilim olsem wanem long ol man i stap gut long em?

⁵ Jehova i tingim ol pren bilong em i dia tumas. Ol pren bilong em i tingim pasin bilong ol long stap gut long em i winim ol narapela samting. (Ritim 2 Samuel 22:26.) Ol i stap gut long em na bihainim tok bilong em bikos ol i laikim em. Baibel i tok God i “save pas gut wantaim man bilong mekim stretpela pasin,” em ol man i bihainim tok bilong em. (Provep 3:32) Jehova i invaitim ol pren bilong em long stap olsem ol spesel  gest long “haus sel” bilong em. Em i invaitim ol long lotu na beten long em long olgeta taim.—Buk Song 15:1-5.

6. Olsem wanem yumi ken soim olsem yumi laikim Jisas?

⁶ Jisas i tok: “Sapos man i laikim mi, em bai bihainim tok bilong mi, na Papa bilong mi bai laikim em.” (Jon 14:23) So bilong kamap pren bilong Jehova, yumi mas laikim tu Jisas na mekim samting em i skulim yumi long mekim. Olsem, yumi bihainim instraksen bilong Jisas long autim gutnius na kamapim ol disaipel. (Matyu 28:19, 20; Jon 14:15, 21) Yumi laikim Jisas, olsem na yumi “bihainim gut lek mak bilong em.” (1 Pita 2:21) Jehova i amamas taim em i lukim yumi givim bes bilong yumi long bihainim pasin bilong Pikinini bilong em long toktok na samting yumi mekim.

7. Wai na yumi mas kisim ol pren em ol i pren bilong Jehova?

⁷ Ol pren bilong Jehova i gat pasin bilong stap gut long em, bihainim tok, na laikim Pikinini bilong em. Ol pren yumi makim ol i wankain olsem ol pren Jehova i save makim? Sapos ol pren bilong yu i bihainim pasin bilong Jisas na ol i bisi long skulim ol narapela long Kingdom Bilong God, ol inap helpim yu long kamap gutpela man na stap gut yet long Jehova.

8. Yu laikim wanem samting long pasin pren bilong Rut na Naomi?

⁸ Long Baibel, yumi inap ritim planti stori long ol pren, kain olsem pasin pren namel long Rut na tambu mama bilong em, Naomi. Dispela tupela meri i bilong tupela narapela narapela kantri na bekgraun, na Naomi i gat bikpela krismas moa winim Rut. Tasol ol i kamap bes pren bikos tupela wantaim i laikim Jehova.  Taim Naomi i laik lusim kantri Moap na go bek long Israel, “Rut i no laik lusim em.” Em i tokim Naomi: “Lain bilong yu bai i kamap lain bilong mi, na God bilong yu bai i kamap God bilong mi.” (Rut 1:14, 16) Rut i mekim gutpela pasin tru long Naomi. Taim ol i kamap long Israel, Rut i wok hat long sapotim pren bilong em. Naomi i laikim tru Rut na givim em gutpela edvais. Rut i harim tok bilong em, na long dispela rot tupela wantaim i kisim planti blesing.—Rut 3:6.

9. Yu laikim wanem samting long pasin pren bilong Devit na Jonatan?

⁹ Narapela eksampel long ol gutpela pren em Devit na Jonatan, tupela wantaim i stap gut long Jehova. Krismas bilong Jonatan i winim krismas bilong Devit inap 30 yia samting, na Jonatan i neks man long kamap king bilong Israel. (1 Samuel 17:33; 31:2; 2 Samuel 5:4) Maski i olsem, taim em i save olsem Jehova i bin makim Devit long kamap king, em i no jeles o i laik resis wantaim Devit, nogat. Jonatan i mekim olgeta samting bilong sapotim Devit. Olsem, taim bagarap i laik painim Devit, Jonatan i helpim em long “bilip strong long Jehova.” Em i redi long lusim laip bilong em long helpim Devit. (1 Samuel 23:16, 17) Devit tu i stap gut long pren bilong em. Em i promis long lukautim famili bilong Jonatan, na em i inapim dispela promis bihain long Jonatan i dai.—1 Samuel 18:1; 20:15-17, 30-34; 2 Samuel 9:1-7.

10. Yumi kisim wanem skul long pasin pren bilong 3-pela Hibru?

¹⁰ Satrak, Mesak, na Abetnego em 3-pela yangpela pren Hibru. Taim ol i pikinini yet ol man i kisim ol long ples bilong ol i go long narapela hap. Maski ol i stap longwe long ol famili bilong ol, ol i helpim narapela  narapela long stap gut yet long Jehova. Bihain taim ol i kamap bikpela, wanpela samting i traim bilip bilong ol, King Nebukatnesar i tokim ol long lotuim wanpela imis gol. Satrak, Mesak, na Abetnego i no laik lotuim imis na ol i tokim king: “Mipela i no inap mekim wok bilong ol god bilong yu o lotu long imis gol em yu bin sanapim.” Taim dispela samting i traim bilip bilong ol, dispela 3-pela pren i stap gut yet long God bilong ol.—Daniel 1:1-17; 3:12, 16-28.

11. Olsem wanem yumi save olsem Pol na Timoti i gutpela pren?

¹¹ Taim aposel Pol i bungim yangpela man Timoti, em inap lukim olsem Timoti i laikim Jehova na i tingim tru kongrigesen. So Pol i trenim Timoti long helpim ol bratasista long ol narapela narapela hap. (Aposel 16:1-8; 17:10-14) Timoti i wok hat tru, olsem na Pol i tok: “Em i bin wok hat wantaim mi bilong helpim gutnius.” Pol i save olsem Timoti bai “tingim tru” ol bratasista. Taim Pol na Timoti i wok hat wantaim long mekim wok bilong Jehova, ol i kamap gutpela pren.—Filipai 2:20-22; 1 Korin 4:17.

12, 13. (a) Wai na yumi mas skelim na makim gut ol pren insait long kongrigesen? (b) Wai na aposel Pol i givim tok lukaut long 1 Korin 15:33?

¹² Insait long kongrigesen, yumi inap kisim skul long ol bratasista bilong yumi na helpim narapela narapela long stap gut long bilip. (Ritim Rom 1:11, 12.) Tasol insait tu long kongrigesen, yumi mas was gut long husat yumi makim olsem ol bes pren bilong yumi. Yumi gat ol gutpela bratasista bilong kain kain kalsa na bekgraun. Sampela i nupela long kongrigesen,  na sampela i bin lotuim Jehova inap planti yia. Sampela haptaim i mas lus bambai man i ken pas gut moa wantaim Jehova, wankain olsem prut, sampela haptaim i mas lus bambai prut i ken mau. So yumi mas soim pasin bilong i no les kwik na laikim narapela narapela na oltaim skelim na makim gut ol pren bilong yumi.—Rom 14:1; 15:1; Hibru 5:12–6:3.

¹³ Sampela taim wanpela bikpela hevi inap kamap insait long kongrigesen, na yumi mas was gut tru. Ating wanpela brata o sista i wok long mekim samting  em Baibel i tok i no stret. O ating wanpela i kisim pasin bilong komplein na dispela inap bagarapim kongrigesen. Yumi no kirap nogut long dispela bikos long taim bilong ol aposel tu, sampela taim ol hevi i kamap insait long kongrigesen. Aposel Pol i givim tok lukaut long ol Kristen long bipo olsem: “Yupela i no ken larim ol arapela i giamanim yupela. Ol poroman nogut i save bagarapim ol gutpela pasin bilong man.” (1 Korin 15:12, 33) Na tu, Pol i givim tok lukaut long Timoti olsem em i mas was gut long ol man em i makim olsem ol bes pren bilong em. Yumi tu mas mekim wankain long nau.—Ritim 2 Timoti 2:20-22.

14. Ol pren yumi makim inap mekim wanem long pasin pren bilong yumi wantaim Jehova?

¹⁴ Yumi mas lukautim gut pasin pren bilong yumi wantaim Jehova. Em samting i dia tumas long yumi. Yumi mas abrusim pasin bilong stap bes pren bilong wanpela husat inap mekim na bilip bilong yumi i slek na bagarapim pasin pren bilong yumi wantaim God. Yumi no inap putim spans insait long viniga na ekspektim wara long pulap long spans, olsem tasol yumi no inap i gat ol pren husat i mekim ol pasin i no stret na ting olsem em bai isi long yumi mekim ol gutpela pasin. Yumi mas skelim gut na makim ol bes pren bilong yumi.—1 Korin 5:6; 2 Tesalonaika 3:6, 7, 14.

15. Yu inap mekim wanem bilong kisim ol gutpela pren insait long kongrigesen?

¹⁵ Insait long kongrigesen, yu inap painim ol man i laikim tru Jehova. Ol inap kamap bes pren bilong yu. (Buk Song 133:1) No ken painim tasol ol pren i gat wankain krismas o bekgraun olsem yu. Tingim, Jonatan i gat bikpela krismas moa long Devit, na Rut i  yangpela moa long Naomi. Yumi laik bihainim edvais bilong Baibel: “Mekim pasin laikim long bel bilong yupela i go bikpela moa.” (2 Korin 6:13; ritim 1 Pita 2:17.) Na taim yu wok strong long bihainim pasin bilong Jehova, planti bai laik kamap pren bilong yu.

16, 17. Sapos wanpela long kongrigesen i mekim yumi bel hevi, yumi no ken mekim wanem?

¹⁶ Insait long olgeta famili, wan wan i gat narapela narapela pasin, tingting, na wei bilong mekim ol samting. Na i wankain tu long kongrigesen. Ol bratasista i no wankain na dispela i mekim na laip i gat amamas long en, na yumi inap lainim planti samting long narapela narapela. Tasol sampela taim yumi gat narapela narapela tingting na dispela inap mekim na yumi kisim tingting kranki long ol brata o sista na yumi bel kros long ol. Sampela taim ating ol inap mekim yumi bel hevi o bagarapim filings bilong yumi. (Provep 12:18) Olsem wanem? Bai yumi larim ol dispela hevi i daunim yumi o mekim yumi i stap longwe long kongrigesen?

¹⁷ Nogat. Maski sapos wanpela i mekim yumi bel hevi long sampela samting, yumi no ken stap longwe long kongrigesen. Jehova i no mekim yumi bel hevi. Em i givim yumi laip na olgeta narapela samting. I stret yumi mas laikim em na stap gut long em. (Revelesen 4:11) Kongrigesen em presen i kam long Jehova na i helpim yumi long strongim bilip bilong yumi. (Hibru 13:17) Yumi no ken givim baksait long dispela presen sapos wanpela i mekim yumi bel hevi.—Ritim Buk Song 119:165.

18. (a) Wanem samting inap helpim yumi long stap gut wantaim ol bratasista bilong yumi? (b) Wai na yumi mas fogivim ol narapela?

 ¹⁸ Yumi laikim ol bratasista bilong yumi na yumi laik stap gut wantaim ol. Jehova i no ekspektim wanpela man long stap gutpela olgeta, na yumi tu i mas mekim wankain. (Provep 17:9; 1 Pita 4:8) Yumi olgeta i save popaia, tasol pasin laikim bai helpim yumi long wok yet long “amamas long fogivim narapela.” (Kolosi 3:13) Pasin laikim bai stopim yumi long mekim liklik hevi i kamap olsem bikpela hevi. Tru, taim wanpela i mekim yumi bel hevi, em hatwok long lusim tingting long dispela. Em isi long kros na bel nogut long dispela man. Tasol dispela bai tekewe amamas bilong yumi na yumi bel kaskas tasol. Tasol taim yumi fogivim man i mekim yumi bel hevi, bel na tingting bilong yumi bai stap isi, pasin wanbel bai stap insait long kongrigesen na bikpela samting tru, bai yumi pas gut wantaim Jehova.—Matyu 6:14, 15; Luk 17:3, 4; Rom 14:19.

19. Long wanem taim yumi mas stop long bung wantaim wanpela insait long kongrigesen?

¹⁹ Insait long famili i gat pasin laikim, wan wan i mekim ol samting bilong amamasim narapela narapela. Tasol tingim taim wanpela i bikhet. Olgeta insait long famili bai traim planti taim long helpim em, tasol em i wok long sakim helpim ol i givim. Ating em bai lusim haus, o ating het bilong famili bai askim em long lusim haus. Wankain samting inap kamap long kongrigesen. Wanpela inap wokim disisen long bihainim yet pasin we i mekim Jehova i bel hevi na bagarapim kongrigesen. Em i sakim helpim ol i givim na pasin bilong  em i kamapim olsem em i no laik stap insait long kongrigesen. Ating em bai lusim kongrigesen, o kongrigesen i mas rausim em. Sapos dispela samting i kamap, Baibel i tokaut klia olsem yumi mas “lusim pasin bilong poroman” wantaim em. (Ritim 1 Korin 5:11-13; 2 Jon 9-11) Dispela inap givim bikpela hatwok sapos em i wanpela pren o wanfamili bilong yumi. Tasol long kain taim olsem, pasin bilong yumi long stap gut long Jehova i mas strong moa winim pasin bilong yumi long stap gut long narapela.—Lukim Futnot 8.

20, 21. (a) Olsem wanem arensmen bilong rausim man i soim pasin laikim? (b) Wai na em i bikpela samting long yumi skelim na makim gut ol pren bilong yumi?

²⁰ Arensmen bilong rausim man i kamapim pasin laikim bilong Jehova. Dispela arensmen i banisim kongrigesen long ol man husat i no tingim ol lo bilong Jehova. (1 Korin 5:7; Hibru 12:15, 16) Na i helpim yumi long soim pasin bilong yumi long laikim nem holi bilong Jehova, ol stretpela lo bilong em, na laikim Jehova yet. (1 Pita 1:15, 16) Na arensmen bilong rausim man i soim pasin laikim long man husat i no stap moa long kongrigesen. Dispela strongpela kaunsel inap helpim em long luksave olsem pasin em i bihainim i no stret na i kirapim em long senis. Planti em bipo ol i bin raus, bihain ol i kam bek long Jehova na ol bratasista i welkamim ol bek long kongrigesen.—Hibru 12:11.

²¹ Pasin bilong ol pren bilong yumi inap stiaim pasin bilong yumi. So em i bikpela samting long yumi mas skelim na makim gut ol pren. Sapos yumi laikim ol man Jehova i laikim, bai yumi stap wantaim ol man husat inap helpim yumi long stap gut long Jehova inap oltaim oltaim.