1. Long nait paslain long Jisas i dai, em i tingting planti long wanem samting?

 EM NAIT paslain long Jisas i dai. Em i save klostu nau em bai lusim ol disaipel bilong em, na em i tingting planti long samting bai painim ol long bihain. Em i tokim ol: “Yupela i no insait long ol samting bilong dispela graun.” (Jon 15:19) Bihain em i beten long Papa bilong em long ol, na em i tok: “Ol i no bilong dispela graun, olsem mi tu mi no bilong dispela graun.” (Jon 17:15, 16) Wanem mining bilong dispela tok Jisas i mekim?

2. “Dispela graun” em Jisas i toktok long en i makim wanem samting?

² Long hia, “dispela graun” i makim ol manmeri husat i no save long God na ol i stap aninit long wok bos bilong Satan. (Jon 14:30; Efesus 2:2; Jems 4:4; 1 Jon 5:19) Olsem wanem yumi inap stap olsem man i “no bilong dispela graun”? Long dispela sapta, bai yumi skelim sampela rot: Yumi stap gut yet long Kingdom Bilong God na yumi no sapotim wanpela sait bilong politik. Yumi sakim tingting bilong dispela graun. Yumi pasim klos na bilas i stret, na yumi holim stretpela tingting long mani. Na tu, yumi pasim klos pait em God i givim yumi.—Lukim Futnot 16.

3. Jisas i holim wanem tingting long wok politik?

³ Taim Jisas i stap long graun, em i lukim ol manmeri i gat planti hevi na laip bilong ol i no isi. Em i tingim tru ol na i laik helpim ol. Yu ting em i kamap wanpela lida bilong politik? Nogat. Em i save olsem samting ol man i nidim tru em Kingdom Bilong God, o gavman bilong em. Jisas bai kamap King bilong dispela Kingdom, na Kingdom em bikpela tok em i autim. (Daniel 7:13, 14; Luk 4:43; 17:20, 21) Jisas i no insait long wok politik, na em i no save sapotim wanpela sait bilong politik. Taim Jisas i sanap long ai bilong Gavana Bilong Rom, Pontius Pailat, em i tok: “Kingdom bilong mi i no bilong dispela graun.” (Jon 18:36) Ol disaipel bilong em tu i no sapotim wanpela sait bilong politik. Buk On the Road to Civilization i tok, ol Kristen bilong pastaim “i no holim wanpela namba insait long politik.” Long nau, ol Kristen tru i holim wankain tingting. Yumi sapotim na stap gut long Kingdom Bilong God, na yumi no sapotim wanpela sait bilong politik bilong dispela graun.—Matyu 24:14.

4. Olsem wanem ol Kristen tru i sapotim Kingdom Bilong God?

⁴ Ol ambasada i mausman bilong gavman bilong ol long narapela kantri, so ol i no save insait long politik bilong dispela kantri. Dispela i wankain tu long ol Kristen God i bin makim, ol bai mekim wok king wantaim Jisas long heven. Pol i raitim pas i go long ol Kristen God i bin makim, na i tok: “Mipela i stap olsem ol ambasada i kisim ples bilong Krais.” (2 Korin 5:20) Ol Kristen God i bin makim, ol i mausman bilong gavman bilong God. Ol i no save insait long politik na ol samting bilong gavman bilong dispela graun. (Filipai 3:20) Ol  Kristen God i bin makim i helpim planti milion manmeri long kisim save long gavman bilong God. “Ol arapela sipsip” em ol bai stap oltaim long nupela taim God bai kamapim, ol i sapotim ol Kristen God i bin makim. Ol tu i no sapotim wanpela sait bilong politik. (Jon 10:16; Matyu 25:31-40) Em i klia tru, ol Kristen tru i no save insait long politik bilong dispela graun.—Ritim Aisaia 2:2-4.

5. Wanem wanpela risen na ol Kristen i no insait long woa?

⁵ Ol Kristen tru i save tingim olgeta wanbilip bilong ol olsem famili bilong ol na ol i stap wanbel maski ol i bilong wanem kantri o bekgraun. (1 Korin 1:10) Sapos yumi insait long woa, bai yumi pait wantaim ol wanfamili, em ol wanbilip bilong yumi, em Jisas i bin tokim yumi long laikim ol. (Jon 13:34, 35; 1 Jon 3:10-12) Moa  yet, Jisas i tokim ol disaipel long laikim tu ol birua bilong ol.—Matyu 5:44; 26:52.

6. Ol wokman bilong Jehova em ol i dediket pinis i holim wanem tingting long ol gavman?

⁶ Maski yumi stap Kristen na yumi no save sapotim wanpela sait bilong politik, yumi wok strong long stap ol gutpela sitisen. Olsem, yumi soim rispek long gavman taim yumi bihainim ol lo bilong en na baim takis. Tasol oltaim yumi wok strong long givim “ol samting bilong God, . . . long God.” (Mak 12:17; Rom 13:1-7; 1 Korin 6:19, 20) Pasin bilong yumi long laikim God, bihainim tok, na lotuim em, i insait long “ol samting bilong God.” Yumi redi long lusim laip bilong yumi yet na yumi no laik sakim tok bilong Jehova.—Luk 4:8; 10:27; ritim Aposel 5:29; Rom 14:8.

7, 8. “Tingting bilong dispela graun” i makim wanem samting? Em i mekim wanem long ol manmeri?

⁷ Bilong stap longwe long graun bilong Satan, yumi no ken larim “tingting bilong dispela graun” i kontrolim yumi. Dispela tingting na pasin bilong en i kam long Satan, na i kontrolim ol man i no lotuim Jehova. Tasol ol Kristen i mas sakim dispela tingting na pasin. Olsem Pol i tok, “yumi no bin kisim tingting bilong dispela graun, nogat, yumi kisim holi spirit i kam long God.”—1 Korin 2:12; Efesus 2:2, 3; lukim Futnot 17.

⁸ Tingting bilong dispela graun i mekim ol manmeri i tingim ol yet tasol, mekim pasin antap, na bikhet. Em i mekim ol i ting ol i no gat wok long bihainim tok bilong God. Satan i laik bai ol manmeri i mekim laik bilong ol yet na ol i no tingting long wanem samting bai kamap long dispela. Em i laik bai ol manmeri i ting  olsem “laik nogut bilong bel na pasin bilong aigris” em ol bikpela samting long laip. (1 Jon 2:16; 1 Timoti 6:9, 10) Devil i wok strong tru long giamanim ol wokman bilong Jehova na trikim yumi long kisim wankain tingting olsem em.—Jon 8:44; Aposel 13:10; 1 Jon 3:8.

9. Olsem wanem tingting bilong dispela graun inap stiaim yumi?

⁹ Olsem win yumi pulim, tingting bilong dispela graun i raunim yumi. Sapos yumi no wok strong long sakim dispela tingting, em bai stiaim yumi. (Ritim Provep 4:23.) Dispela inap kamap long ol rot we yumi ting i no gat rong long en, olsem yumi larim tingting na pasin bilong ol man i no lotuim Jehova i stiaim yumi. (Provep 13:20; 1 Korin 15:33) O ol samting olsem ponografi, pasin apostet, o ol spots i gat pasin resis long en inap stiaim yumi.—Lukim Futnot 18.

10. Olsem wanem yumi inap sakim tingting bilong dispela graun?

¹⁰ Olsem wanem yumi inap abrusim pasin bilong larim tingting bilong dispela graun i stiaim yumi? Yumi mas stap klostu long Jehova na larim savetingting bilong em i stiaim yumi. Oltaim yumi mas beten long kisim holi spirit bilong em na bisi long mekim wok bilong em. Jehova em Man i gat bikpela strong tru long yunives winim olgeta narapela. Yumi bilip olsem em inap helpim yumi long sakim tingting bilong dispela graun.—1 Jon 4:4.

11. Olsem wanem tingting bilong dispela graun i stiaim pasin bilong ol man long bilas?

¹¹ Yumi soim tu olsem yumi no bilong dispela graun long rot bilong klos na bilas bilong yumi. Planti man bilong dispela graun i laik bilas long pulim ai bilong ol narapela, kirapim tingting doti long ol narapela, soim olsem ol i bikhet long ol arapela, o so-of long hamas  mani ol i gat. Tasol sampela i no bisi long lukluk bilong ol. Ating ol i no laik bilas gut o ol i stap doti. Yumi no ken larim ol kain tingting olsem i stiaim klos na bilas bilong yumi.

12, 13. Wanem ol stiatok bai helpim yumi long makim klos yumi laik pasim?

¹² Yumi ol wokman bilong Jehova, olsem na oltaim yumi laik bilas gut, stap klin, na bilas i luk nais, na i stret long ol hap yumi go long en. Yumi bilas long “pasin i soim rispek na gutpela tingting” bambai yumi kamapim olsem yumi “lotuim God.”—1 Timoti 2:9, 10; Jut 21.

 ¹³ Pasin bilong yumi long bilas inap mekim sampela samting long tingting ol narapela i gat long Jehova na ol manmeri bilong em. Yumi laik mekim “olgeta samting bilong givim glori long God.” (1 Korin 10:31) Pasin i soim rispek i makim yumi tingim filings na tingting bilong ol narapela. So taim yumi makim ol klos o hau yumi bai bilas, yumi mas tingim olsem ol samting yumi makim inap mekim sampela samting long ol narapela.—1 Korin 4:9; 2 Korin 6:3, 4; 7:1.

14. Yumi mas tingim wanem samting taim yumi makim bilas yumi werim bilong mekim ol wok Kristen?

¹⁴ Yumi save bilas olsem wanem taim yumi go long ol miting o autim tok? Bilas bilong yumi i save pulim ai bilong ol narapela na ol i lukluk long yumi? Bilas bilong yumi i mekim ol narapela i sem? Yumi pilim olsem hau yumi bilas em samting bilong yumi yet na i no bisnis bilong ol narapela? (Filipai 4:5; 1 Pita 5:6) Em tru olsem yumi laik luk nais, tasol ol samting i mekim yumi i luk nais tru em ol pasin Kristen yumi kamapim. Em ol pasin Jehova i lukim taim em i lukluk long yumi. Ol i soim yumi wanem kain man tru long “insait,” na dispela i “bikpela samting long ai bilong God.”—1 Pita 3:3, 4.

15. Wai na Jehova i no tokim yumi stret long hau yumi mas bilas na hau yumi mas stretim lukluk bilong yumi?

¹⁵ Jehova i no givim wanpela lista i gat ol lo long wanem bilas yumi mas pasim na wanem bilas yumi no ken pasim, nogat. Em i givim ol stiatok bilong Baibel we i ken helpim yumi long mekim ol gutpela disisen. (Hibru 5:14) Em i laik bai pasin bilong yumi long laikim em na ol narapela i as bilong ol disisen yumi mekim, maski ol i bikpela o liklik disisen. (Ritim Mak 12:30, 31.) Long olgeta hap bilong graun, lain bilong Jehova  i bilas long kain kain pasin bikos long kalsa bilong ol na samting ol yet i laikim. Ol kain kain bilas i luk nais na i mekim man i amamas.

16. Olsem wanem tingting bilong graun long mani i pait wantaim tok Jisas i skulim ol man long en? Yumi mas givim wanem ol askim long yumi yet?

¹⁶ Satan i laik ol manmeri i ting olsem mani na ol samting bilong skin bai mekim ol i stap amamas, tasol ol wokman bilong Jehova i save olsem dispela i no tru. Yumi trastim tok bilong Jisas: “Maski man i gat planti samting, em i no kisim laip long ol dispela samting em  i holim.” (Luk 12:15) Mani i no inap mekim yumi stap amamas tru. Em i no inap givim yumi ol pren tru, bel isi, o laip oltaim. Tru, yumi nidim ol samting bilong skin, na yumi laik stap amamas. Tasol Jisas i skulim yumi olsem yumi bai stap amamas sapos yumi pas gut wantaim God na lotu bilong yumi i bikpela samting long laip bilong yumi. (Matyu 5:3; 6:22) Askim yu yet: ‘Tingting bilong graun long mani i save stiaim mi? Mi save tingting o toktok oltaim long mani?’—Luk 6:45; 21:34-36; 2 Jon 6.

17. Olsem wanem laip bilong yumi inap kamap gutpela moa sapos yumi sakim tingting bilong graun long mani?

¹⁷ Sapos yumi tingting strong long mekim wok bilong Jehova na sakim tingting bilong graun long mani, laip bilong yumi bai i gat as bilong en. (Matyu 11:29, 30) Bai yumi pilim olsem ol samting yumi gat em inap long yumi na bel na tingting bilong yumi bai stap isi. (Matyu 6:31, 32; Rom 15:13) Bai yumi no tingting planti long ol samting bilong skin. (Ritim 1 Timoti 6:9, 10.) Bai yumi amamas long givim samting. (Aposel 20:35) Na samting yumi mekim long laip bai givim yumi bikpela haptaim moa long stap wantaim ol narapela yumi laikim. Na tu, yumi inap slip gut long nait.—Eklisiastis 5:12.

18. Satan i traim long mekim wanem long yumi?

¹⁸ Satan i traim long bagarapim pasin pren bilong yumi wantaim Jehova, so yumi mas mekim olgeta samting bilong lukautim dispela pasin. Yumi gat pait wantaim “ol spirit nogut.” (Efesus 6:12) Satan na ol dimon bilong em i no laik bai yumi stap amamas o stap oltaim. (1 Pita 5:8) Ol dispela strongpela birua i pait wantaim  yumi, tasol Jehova inap helpim yumi long winim pait!

19. Efesus 6:14-18 i stori olsem wanem long “klos pait” bilong Kristen?

¹⁹ Long bipo, ol soldia i save werim klos pait bilong lukautim ol yet long taim bilong pait. Long wankain pasin, yumi mas werim “klos pait” em Jehova i givim yumi. (Efesus 6:13) Dispela klos pait bai lukautim yumi. Yumi ritim tok long dispela klos pait long Efesus 6:14-18: “Yupela i mas sanap strong na pasim tok i tru olsem yupela i save pasim belt long bel bilong yupela, na pasim stretpela pasin olsem siot kapa long bros, na pasin bilong redi long autim gutnius bilong bel isi i mas i stap olsem su long lek bilong yupela. Na long olgeta kain taim, yupela i mas kisim bilip olsem hap plang bilong pait na bai yupela inap mekim i dai olgeta spia paia bilong Satan. Na tu, yupela i mas tingting long God bai kisim bek yupela, na dispela i mas i stap olsem hat kapa bilong yupela, na kisim bainat bilong holi spirit, em tok bilong God. Na tu, long strong bilong holi spirit wok yet long beten long olgeta kain taim, na mekim olgeta kain beten na ol prea we yupela i beten strong.”

20. Yumi mas mekim wanem bambai dispela “klos pait” i helpim yumi?

²⁰ Sapos soldia i lusim tingting long wanpela hap bilong klos pait bilong em na hap bodi bilong em i stap ples klia, birua bai sutim em long dispela hap. Sapos yumi laik bai “klos pait” i lukautim yumi, yumi no ken lusim tingting long wanpela hap bilong en. Yumi mas werim long olgeta taim na lukautim gut. Pait bilong yumi bai go yet inap long graun bilong Satan i bagarap na Satan na ol dimon i raus long dispela graun. (Revelesen 12:17; 20:1-3) So sapos yumi wok long pait strong  long daunim ol laik nogut o sampela pasin kranki, orait yumi no ken givap!—1 Korin 9:27.

21. Olsem wanem yumi inap winim pait bilong yumi?

²¹ Sapos yumi sanap long strong bilong yumi yet, strong bilong Devil bai winim yumi. Tasol wantaim helpim bilong Jehova, yumi bai strong moa! Bilong stap strong yet long bilip, yumi mas beten long Jehova, stadi long Baibel, na bung wantaim ol bratasista. (Hibru 10:24, 25) Ol dispela samting bai helpim yumi long stap gut yet long God na redi long sambai long bilip bilong yumi.

22, 23. (a) Hau bai yumi inap redi oltaim long sambai long bilip bilong yumi? (b) Bai yumi skelim wanem samting long neks sapta?

²² Oltaim yumi mas redi long sambai long bilip bilong yumi. (Jon 15:19) Long sampela samting, ol Witnes Bilong Jehova i stap narapela kain long planti man. Askim yu yet: ‘Mi kliagut long risen na mipela i stap narakain? Mi bilip tru olsem tok em Baibel na gutpela wokboi i gat savetingting i mekim em i stret? Mi amamas long stap olsem Witnes Bilong Jehova? (Buk Song 34:2; Matyu 10:32, 33) Mi inap eksplenim bilip bilong mi long ol narapela?’—Matyu 24:45; Jon 17:17; ritim 1 Pita 3:15.

²³ Long planti samting, yumi klia tru long samting yumi mas mekim bilong stap longwe long dispela graun. Tasol sampela taim, yumi no klia long samting yumi mas mekim. Satan i laik trapim yumi long kain kain rot. Wanpela trap em i yusim em amamas. Olsem wanem yumi inap makim gut amamas? Bai yumi skelim dispela long neks sapta.