1. Yumi mas mekim wanem bambai pasin bilong yumi long mekim lotu i amamasim Jehova? Bilong wanem?

 JISAS i tok: “Ol man i lotu tru long Papa, ol bai lotuim em long spirit na long pasin i tru. Tru tumas, Papa i painim ol kain man olsem long lotuim em.” (Jon 4:23; 6:44) Yumi olgeta wan wan i mas “wok yet long skelim gut ol samting em Bikpela i orait long en.” (Efesus 5:10) Sampela taim dispela i no isi. Satan i save traim long giamanim yumi bambai yumi mekim ol samting we i no amamasim Jehova.—Revelesen 12:9.

2. Stori long samting i bin kamap klostu long Maunten Sainai.

² Olsem wanem Satan i traim long giamanim yumi? Wanpela rot em olsem, em i mekim na yumi paul long wanem samting i stret na wanem samting i no stret. Tingim samting i bin painim lain Israel taim ol i wokim kem klostu long Maunten Sainai. Moses i bin go antap long maunten, na ol manmeri i wetim em long kam bek long kem. Bihain ol i taiet long wet na ol i askim Aron long wokim wanpela god bilong ol. Em i wokim wanpela imis gol i luk olsem pikinini bulmakau. Na bihain ol manmeri i wokim wanpela bikpela bung. Ol i danis raunim dispela pikinini bulmakau na brukim skru long en. Ol i bilip olsem taim ol i brukim skru long  dispela pikinini bulmakau, tru tru ol i lotuim Jehova. Tasol maski ol manmeri i tingim dispela bung olsem “bikpela bung bilong lotu long Jehova,” dispela i no mekim na dispela pasin i stret, nogat. Jehova i tingim dispela pasin olsem pasin bilong lotuim imis, na planti bilong ol i bin dai. (Kisim Bek 32:1-6, 10, 28) Yumi kisim wanem skul long dispela? Yumi no ken larim ol narapela i giamanim yumi. “No ken tatsim wanpela samting i doti,” na larim Jehova i skulim yu long wanem samting i stret na wanem samting i no stret.—Aisaia 52:11; Esekiel 44:23; Galesia 5:9.

3, 4. Wai na i gutpela long skelim as bilong planti popula selebresen?

³ Taim Jisas i bin stap long graun, em i trenim ol aposel bilong em long stap gutpela eksampel long mekim lotu i klin. Bihain long em i dai, ol aposel i wok yet long skulim ol nupela disaipel long ol stiatok bilong Jehova. Tasol bihain long ol aposel i dai, ol tisa giaman i kirap long bringim ol bilip giaman na ol kastam na ol selebresen bilong ol haiden i kam insait long kongrigesen. Ol i givim nupela nem long sampela bilong ol dispela selebresen bilong haiden bambai ol i luk olsem ol i selebresen bilong ol Kristen. (2 Tesalonaika 2:7, 10; 2 Jon 6, 7) Planti bilong ol dispela selebresen i popula yet long nau, na ol i strongim yet ol bilip giaman, na wok bilong ol dimon tu. *—Revelesen 18:2-4, 23.

⁴ Long olgeta hap bilong graun long nau, ol selebresen na ol bikpela de i bikpela samting long laip bilong ol manmeri. Tasol taim yu wok long kisim save long  tingting bilong Jehova, ating yu bai lukim olsem yu mas stretim tingting bilong yu long sampela selebresen. Ating dispela i no isi, tasol yu ken save tru olsem Jehova bai helpim yu. Bai yumi skelim as bilong sampela popula selebresen bambai yumi inap kliagut long tingting bilong Jehova long ol dispela selebresen.

5. Wanem evidens i soim olsem Jisas i no bin bon long Disemba 25?

⁵ Long planti hap bilong graun, ol i save selebretim Krismas long Disemba 25, na planti man i ting em det we Jisas i bin bon. Baibel i no tokim yumi long wanem de o mun Jisas i bin bon, tasol Baibel i tokim yumi long sampela samting long taim bilong yia we Jisas i bon. Luk i stori olsem long taim Jisas i bon long Betlehem, “ol wasman bilong sipsip . . . i stap ausait” na lukautim ol sipsip bilong ol. (Luk 2:8-11) Long mun Disemba, ren na sno i save pundaun long Betlehem na ples i kol, olsem na ol wasman bilong sipsip i no inap stap ausait wantaim ol sipsip bilong ol long nait. Yumi lainim wanem samting long dispela? Jisas i bin bon long taim we weda i gutpela, i no long Disemba. Baibel na ol evidens bilong histori i soim olsem em i bin bon namel long ol mun em nau yumi save kolim Septemba na Oktoba.

6, 7. (a) Olsem wanem planti popula kastam bilong Krismas i bin kirap? (b) Wanem samting i mas kirapim yumi long givim ol presen?

⁶ So olsem wanem Krismas i stat? Em i kam long ol bikpela bung haiden, olsem Saturnalia bilong ol Rom, em wanpela selebresen ol i dediketim long Saturn, god bilong agrikalsa. Buk The Encyclopedia Americana i tok: “Saturnalia, em wanpela bung bilong bikpela kaikai bilong Rom, ol i save selebretim long namel bilong Disemba,  na dispela i stap olsem as bilong ol kastam bilong amamas na givim samting long Krismas. Olsem, ol i kisim pasin bilong mekim ol bikpela kaikai, givim ol presen, na laitim ol kandel long dispela selebresen.” Na tu, ol i bin selebretim betde bilong san-god Mitra bilong ol Persia long Disemba 25.

⁷ Tasol planti man husat i selebretim Krismas long nau i no save tingim olsem ol haiden i as bilong Krismas. Ol i luk fowed tasol long Krismas olsem taim bilong stap wantaim famili, enjoim gutpela kaikai, na  givim ol presen. Yumi laikim ol famili na ol pren bilong yumi, na Jehova i laik bai ol wokman bilong em i serim ol samting wantaim narapela narapela. Olsem 2 Korin 9:7 i tokim yumi, “God i save laikim tumas man husat i amamas long givim samting.” Jehova i no laik bai yumi givim ol samting long ol narapela long ol spesel taim tasol, nogat. Ol manmeri bilong Jehova i save amamas long givim ol presen na bung wantaim ol pren na famili long kain kain taim bilong yia, na ol i no ekspektim ol narapela long bekim ol samting long ol. Ol i givim samting bikos ol i laikim ol narapela.—Luk 14:12-14.

8. Yu ting ol man bilong glasim ol sta i givim ol presen long Jisas taim em i bin nupela bebi? Stori long dispela.

⁸ Bilong sapotim dispela aidia bilong givim presen long Krismas, planti man i tok 3-pela saveman i bin bringim ol presen i go long nupela bebi Jisas long haus bilong ol animal. Em tru olsem sampela man i bin visitim Jisas na bringim ol presen. Long taim bilong ol man i bin raitim Baibel, ol man i save bringim ol presen i go long ol bikman. (1 King 10:1, 2, 10, 13) Tasol yu save tu olsem Baibel i tok ol dispela man i bringim ol presen, em ol glasman bilong ol sta, olsem ol astroloja, na ol i save mekim mejik na ol i no lotuim Jehova? Na tu, ol i no bin visitim Jisas taim em i nupela bebi long haus bilong ol animal. Ol i visitim em sampela taim bihain, taim em i liklik “pikinini” na em i stap long wanpela haus.—Matyu 2:1, 2, 11.

9. Baibel i stori long wanem ol betde?

⁹ De we wanpela bebi i bon em taim bilong amamas. (Buk Song 127:3) Tasol dispela i no min olsem yumi mas selebretim ol betde. Tingim dispela: Baibel i stori  long tupela betde tasol. Wanpela em betde bilong wanpela Fero bilong Isip, na narapela em betde bilong King Herot Antipas. (Ritim Stat 40:20-22; Mak 6:21-29.) Dispela tupela king i no wokman bilong Jehova. Long Baibel, yumi no inap ritim stori bilong wanpela wokman bilong Jehova i bin selebretim betde.

10. Ol Kristen bilong bipo i gat wanem tingting long ol betde?

¹⁰ Buk The World Book Encyclopedia i tok ol Kristen bilong bipo “i tingim pasin bilong selebretim betde bilong wanpela man olsem kastam bilong ol haiden.” Ol bilip giaman i as bilong ol kain kastam olsem. Olsem, ol Grik bilong bipo i bilip olsem olgeta wan wan man i gat wanpela spirit i lukautim ol, dispela spirit i bin stap long de ol i bon. Na ol i ting dispela spirit i gat koneksen wantaim wanpela god i bon long seim det olsem dispela man. Na antap long kain bilip haiden olsem, ol betde i gat koneksen tu wantaim astroloji na ol horoskop.

11. Jehova i pilim olsem wanem taim yumi givim samting?

¹¹ Planti man i pilim olsem betde bilong ol em wanpela spesel de we ol narapela i mas soim olsem ol i tingim na laikim ol. Tasol yumi ken soim pasin laikim long ol famili na pren bilong yumi long olgeta taim bilong yia, na i no long wanpela de tasol. Jehova i laik bai yumi mekim gutpela pasin na givim ol samting long olgeta taim. (Ritim Aposel 20:35.) Yumi tenkyu tru long presen bilong laip i dia tumas em God i givim yumi long olgeta de, i no long betde bilong yumi tasol.—Buk Song 8:3, 4; 36:9.

12. Olsem wanem de yumi dai i gutpela moa winim de yumi bon?

¹² Eklisiastis 7:1 i tok: “Gutpela nem i gutpela moa winim gutpela oil, na de man i dai i gutpela moa winim de man i bon.” Olsem wanem de yumi dai i gutpela  moa winim de yumi bon? Taim yumi bon, yumi no mekim yet wanpela samting long laip bilong yumi, gutpela o nogut. Tasol taim yumi yusim laip bilong yumi long mekim wok bilong Jehova na mekim gutpela pasin long ol narapela, yumi kisim “gutpela nem,” na Jehova bai tingim yet yumi bihain long yumi dai. (Jop 14:14, 15) Ol manmeri bilong Jehova i no save selebretim betde bilong ol yet o bilong Jisas. Wanpela de tasol Jisas  i tokim yumi long tingim, em Memorial bilong tingim indai bilong em.—Luk 22:17-20; Hibru 1:3, 4.

13, 14. Selebresen bilong Ista i gat koneksen long wanem samting?

¹³ Planti man i bilip olsem ol i selebretim kirap bek bilong Jisas taim ol i selebretim Ista. Tasol tru tru, selebresen bilong Ista i gat koneksen long Eostre, em haiden god meri bilong ol Anglo-Sakson na em god meri bilong tulait na bilong spring sisen. Buk The Dictionary of Mythology i tok em i god meri bilong kamapim pikinini. Sampela kastam bilong Ista i konekt long dispela. Olsem, buk Encyclopædia Britannica i tok ol kiau “i stap olsem bikpela simbol bilong makim nupela laip na kirap bek.” Na tu, inap longpela taim ol lotu haiden i yusim ol rabit olsem simbol bilong kamapim ol pikinini. Em i klia tru olsem Ista i no gat koneksen long kirap bek bilong Jisas.

¹⁴ Taim Jehova i lukim ol man i miksim ol kastam bilong lotu giaman wantaim kirap bek bilong Pikinini Man bilong em, yu ting em i amamas? Nogat tru. (2 Korin 6:17, 18) Tru tru, Jehova i no bin tokim yumi long selebretim kirap bek bilong Jisas.

15. Olsem wanem Halowin i bin stat?

¹⁵ Halowin, ol i kolim tu olsem Nait Bilong Olgeta Halo (All Hallows Eve) o nait long De Bilong Olgeta Santu, i gat koneksen long ol wits, ol sotpela pes nogut man ol i kolim goblin, na ol spirit bilong ol daiman. Dispela selebresen i no nupela samting. Long taim bilong ful mun klostu long Novemba 1, lain Kelt bilong Briten na Aialan bilong bipo i save selebretim bung bilong Samhain. Ol i bilip olsem long taim bilong dispela bung, ol  spirit bilong ol daiman i save kam bek long graun. Ol manmeri i save putim kaikai na dring ausait bambai ol spirit i no ken mekim nogut long ol. Long nau, taim ol pikinini i bilas long ol kostium na go long wan wan haus na tok “Trik o trit,” ol i no luksave olsem ol i bihainim dispela kastam bilong wok dimon bilong bipo.

16, 17. Yumi mas tingim wanem samting taim yumi plenim wanpela weding?

¹⁶ Weding em taim bilong amamas. Ol man long olgeta hap bilong graun i bihainim narapela narapela pasin bilong selebretim ol weding. Planti taim ol man i no save ol kastam bilong weding i stat olsem wanem, so ating ol i no save olsem ol bilip bilong lotu haiden i as bilong sampela kastam. Tasol tupela Kristen husat i laik plenim weding, ol i mas mekim ol samting bambai weding bilong ol i amamasim Jehova. Sapos ol i kisim save long hau ol kastam bilong weding i bin kirap, ol inap mekim ol gutpela disisen.—Mak 10:6-9.

¹⁷ Ol man i ting sampela kastam bilong weding bai bringim ‘gud lak’ long tupela nupela marit. (Aisaia 65:11) Olsem, long sampela ples ol manmeri i save tromoi rais samting long tupela nupela marit. Ol i bilip olsem dispela bai givim tupela ol pikinini, amamas, na longpela laip na dispela bai banisim tupela long ol samting nogut. Tasol ol Kristen i mas was gut na abrusim ol kastam we i gat koneksen long lotu giaman.—Ritim 2 Korin 6:14-18.

18. I gat wanem ol narapela stiatok bilong Baibel long sait bilong ol weding?

¹⁸ Tupela Kristen i laik bai weding de bilong ol i stap olsem taim bilong amamas na i soim pasin rispek na olgeta man i kam long dispela bung bai amamas. Ol gest long  wanpela weding Kristen i no ken mekim ol tok bilong daunim man, tok doti, o tok i no soim rispek long tupela nupela marit o long ol narapela. (Provep 26:18, 19; Luk 6:31; 10:27) Weding Kristen i no save kamapim “pasin bilong hambak long mani kago.” (1 Jon 2:16) Sapos yu plenim wanpela weding, mekim olgeta samting bambai yu inap amamas taim yu lukluk i go bek long ol gutpela memori bilong weding de bilong yu.—Lukim Futnot 28.

19, 20. Pasin bilong apim glas i stat olsem wanem?

¹⁹ Wanpela pasin planti man i save mekim long taim bilong ol weding na ol narapela bung, em pasin bilong apim glas. Long taim bilong apim glas, wanpela i save mekim tok long ol gutpela samting i ken kamap na ol narapela i apim glas bilong ol. Ol Kristen i mas i gat wanem tingting long pasin bilong apim glas?

²⁰ Buk International Handbook on Alcohol and Culture i tok ating pasin bilong apim glas i kam long wanpela kastam haiden bilong bipo we ol i ofaim blut o wara long ol god. Ol i mekim olsem bilong askim ol god “long inapim samting ol i laik i mas kamap, em sotpela prea we ol i tok ‘yu ken i stap longpela taim’ o ‘gutpela helt long yu!’” Long bipo, ol manmeri i save apim kap bilong ol na askim ol god bilong ol long givim wanpela blesing long ol. Tasol Jehova i no save givim ol blesing long dispela kain rot.—Jon 14:6; 16:23.

21. Ol Kristen i mas sakim wanem ol narapela selebresen?

²¹ Taim yu laik mekim disisen long insait long  wanpela selebresen, tingim wanem kain pasin na tingting dispela selebresen i save strong long kamapim. Olsem, sampela selebresen na shou i gat ol danis bilong kirapim bel, pasin bilong dring longlong, na pasin pamuk samting. Ating ol kain selebresen olsem i save strongim laip-stail bilong ol gei na lesbian o strongim pasin bilong litimapim kantri. Sapos yumi insait long ol dispela kain selebresen, yu ting yumi heitim tru ol pasin Jehova i heitim?—Buk Song 1:1, 2; 97:10; 119:37.

22. Wanem samting inap helpim Kristen long mekim disisen long em bai insait long wanpela selebresen o nogat?

²² Ol Kristen i mas was gut na abrusim ol selebresen i no givim ona long God. Aposel Pol i tok: “Maski yupela i kaikai o dring o mekim narapela samting, yupela i mas mekim olgeta samting bilong givim glori long God.” (1 Korin 10:31; lukim Futnot 29.) Em tru, i no olgeta selebresen i gat pasin pamuk samting, ol samting bilong lotu giaman, o pasin bilong litimapim kantri. Tasol sapos wanpela selebresen i no brukim ol stiatok bilong Baibel, yumi yet i mas mekim disisen long yumi bai insait long en o nogat. Na tu, yumi mas tingim olsem disisen bilong yumi bai mekim wanem long ol narapela.

23, 24. Olsem wanem yumi ken eksplenim disisen bilong yumi long sampela selebresen long ol famili i no Witnes?

²³ Ating yu stop pinis long insait long ol selebresen i no givim ona long Jehova. Tasol ating sampela long famili husat i no Witnes Bilong Jehova inap ting olsem yu no laikim ol o yu no laik bung moa wantaim ol. Ating ol i pilim olsem ol bikpela de em dispela taim tasol long famili i ken bung wantaim. So bai yu mekim wanem?  I gat planti rot we yu ken helpim ol long save olsem yu laikim ol na ol i bikpela samting long yu. (Provep 11:25; Eklisiastis 3:12, 13) Ating long ol narapela bung, yu ken invaitim ol long spendim taim wantaim yu.

²⁴ Sapos famili bilong yu i laik save long risen na yu no insait long sampela selebresen, yu ken painim infomesen long ol pablikesen bilong yumi na long jw.org web-sait we inap helpim yu long eksplenim risen bilong yu long ol. No ken mekim na ol i ting yu laik winim tok pait o fosim ol long holim wankain tingting olsem yu. Helpim famili bilong yu long lukim olsem yu skelim planti samting na bihain yu bin mekim disisen bilong yu yet. Stap isi, na ‘oltaim tok bilong yu i mas gutpela, olsem yu putim sol long en.’—Kolosi 4:6.

25, 26. Olsem wanem ol papamama i ken helpim ol pikinini bilong ol long laikim ol lo bilong Jehova?

²⁵ Em i bikpela samting long yumi olgeta wan wan i mas kliagut long risen na yumi no laik insait long sampela selebresen. (Hibru 5:14) Bikpela samting em yumi laik amamasim Jehova. Na sapos yumi papamama, yumi mas lusim sampela haptaim long helpim ol pikinini bilong yumi long kliagut na laikim ol stiatok bilong Baibel. Taim ol i tingim Jehova olsem man i stap tru, ol tu bai gat laik long amamasim em.—Aisaia 48:17, 18; 1 Pita 3:15.

²⁶ Jehova i amamas long lukim yumi mekim olgeta samting yumi inap mekim long lotuim em long pasin i klin na i onest. (Jon 4:23) Tasol planti i ting ol man i no inap bihainim onest pasin long dispela graun i no gat onest pasin. Yu ting dispela i tru? Bai yumi stori long dispela long neks sapta.